Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 16

Radxin Mesías

Radxin Mesías

Jehová rabexa que Jesús de Nazaret nac Mesías ni goniʼbu guieed

¿XIMOD labúu nimbu buñ chú láabu ngú Mesías? Jehová golexa ximod nimbu buñ láabu. Godudy tapgayoʼ íz de goló cuá Escrituras Hebreas, toib ángel ni laa Gabriel goyee ronoʼ María, toib mbioxhlasien ni golés gudx Nazaret, gahxca gudx Galilea. Gabriel góoch láabu que sioʼ toib xiimbu. Ná yása tzonébu toib buñguieeu, Dios buny que ñacxiinbu né gocni por espíritu xtunybu. Nidxiyen reʼ ñac ni ñony Mandary por tipzó. Dios biquiin toib mbioxhlas ni góc laa María par nasann xiimbu, Xiin lagolbu ni goyoʼ guibá.

María gosaguel buny né guidopy xcalnabany ni gonab Dios láabu. José, ni ronytzaay yac, bitzñabu né María después que toib ángel golexa xigony María ma nacxiin. Per guisetnaladxno que goyoʼ profetas ni goniʼ que Mesías gálbu Belén, diti Nazaret (Miqueas 5:2). Gudx Belén goyoʼni 140 kilometros sit de lagarycu, ¿ximod ñac cumplir guirá diitzreʼ?

Diti xidzú, toib ni buny mandary Roma goniʼ que guirá buñ guibiguet gudx ro gool par guicá laayibu ló toib guiich. José né María né xfamilyibu nacyibu de gudx Belén, por ngú bibiguetyibu órni mápa mer gál Jesús (Lucas 2:3). Jesús golbu lainy xcorraa nimal né gotbu lainy lagary ro rioʼ ni roo nimal. Ór cú, xidalguixo ángeles bidxin ronoʼ tipnés buñ ni cayan xiil né goniʼyibu que ma gool Mesías o Cristo ni goniʼ Dios guieed.

Láaca goyoʼ tipnés buñ ni goniʼ que Jesús góc Mesías ni goniʼ Dios guieed. Profeta Isaías goniʼ que sioʼ toib ni nasanir naslooy chú ngú gac Mesías o Cristo ni guidxin (Isaías 40:3). Buñguieeu reʼ góc Juan ni Ragonis. Toibtica buelt órni bibiʼbu Jesús, goniʼbu: «¡Bibiʼ, Xiil xtuny Dios ni ranitló galkié ni nap buñgudxlio!». Né órcuca xidal xpiin Juan cuanal a Jesús. Toibtica de layibu goniʼ: «Ma bidzeldo Mesías» (Juan 1:29, 36, 41).

Per goyoʼ stoib mod ni buñ biduidy cuent chú ngú góc Mesías. Órni Juan golonisbu Jesús, Jehová goniʼ dada lainy guibá. Biquiimbu espíritu xtunybu par golúbu Jesús xomod Mesías né goniʼbu: «Ndeʼ Xiinna, ni nadxiʼya, ni naʼ ma cuacuent» (Mateo 3:16, 17). ¡Dzúcu bidxin Mesías ni Dios goniʼ guieed!

Per ¿pu dzú bidxin Mesías? Ló íz 29 ló xtzúno, órni góc cumplir 483 íz ni goniʼ Daniel. Scú láani, ndeʼ nacni toibtica de guirá cós ni raslooy que Jesús nac Mesías. Per ¿xí diitz sacró naniʼ Jesús órni nadxiimbu ló Gudxlio?

(Bireʼni ló Mateo capítulos 1 a 3, Marcos capítulo 1, Lucas capítulo 2 né Juan capítulo 1.)

PAR GANNLO MÁS

¿Chú láabu ngú Jesucristo?

Bisuidy xigony goity Jesús, né xigony raquiinno ni guilaa lóono, né xí cayony Jesús nigoreʼ.