Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

La Biblia ¿de xí raniʼni?

 MIDID 3

Buñ ralaa ló guiérodann

Buñ ralaa ló guiérodann

Dios ranitló guirá buñ mal per ralaabu Noé né xfamily

CONFORMA bidal buñ ló Gudxlio, galkié né cós mal láaca bidalni. Sigory nosi toibguielot Enoc buny ni ná Dios ló guidopy Gudxlio, láabu goniʼbu que Jehová sanitló buñ mal. Guirá buñreʼ buny guidiagcuet, né gocxiroʼ cós mal. Diti ngúsi, láaca goyoʼ tipnés ángeles ni cualó Jehová né bisianyibu guibá né gocyibu xomod buñgudxlio né cuaʼyibu xidal buñgonaʼ ni goniiny layibu. Xiin guirá buñgonaʼ reʼ nigolú buñ mal gocyibu, buñ nasoʼ, buñdxibloo né góc laayibu nefilim, né bitalyibu cós mal ló Gudxlio. ¿Labúu raduidyno cuent balaati bioʼob xcalnabany Jehová órni bibiʼbu guirá cós mal ni cayac ló Gudxlio la?

Después ni goity Enoc goyoʼ stoib buñtzay ni góc laa: Noé. Láabu né xfamilbu bunyibu xtem par bunyibu ni ná Dios. Toibtica dzú Jehová goniʼ que guitnébu toib guiérodann par guinitlóbu buñ mal. Per diti goniiny láabu nanitlóbu Noé né guirá nimal. Gochbu Noé nasaʼ toib arca o toib caj xiroʼ ro labúu ñoʼbu né xfamilbu par nalaayibu, láaca nagoʼbu guirá clas nimal lainyni. Noé bisobbu Dios né bisaʼbu toib arca ló cuarent o cincuent íz. Ló dzúcu láaca gosaabu gochbu buñ nasian cós mal ni rony par diti nanitlóyibu ló guiérodann ni ñac (2 Pedro 2:5). Gosaabu gochbu buñ que mápa mer gac Guiérodann reʼ per buñ diti goloʼ cuent ni goniʼbu. Bidxin dzú goyoʼ Noé né xfamily né guirá nimal lainy arca, ór cú Dios bisieg xpuertni né gosaló guiérodann reʼ.

Guiérodann reʼ goclani cuarent dzú né cuarent gueʼel por ngú guidopy ló Gudxlio biguaguel nís. Ni toib buñ mal bilaa. Godudy beʼo nís biaʼach loni né arca biaʼanni laidy toib dainy. Godudy toib íz, Noé né xfamily bireʼ lainy arca né biduidyibu guixquix órni biduidybu toib galrrascad Dios. Ór cú Jehová goniʼbu que ma diti sanitlóbu buñgudxlio né toib guiérodann. Biduidybu xtiitzbu órni goyoʼ toib bip. Ortísi nabiʼ buñ láani maca nasetnaladxyibu ni goniʼ Jehová.

Después de Guiérodann Dios góoch layibu ñonyibu tipnés cós. Goniʼbu que buñ labúu guá xpeʼel nimal per diti non guáyibu xirunyimu. Láaca bixelbu buñ nadal ló guidopynac Gudxlio. Per xidal buñ góc toibsi né Nemrod par cualóyibu Jehová né bidopyibu lainy toib gudx par bisaʼyibu toib torre. Per Dios bicaa ni náyibu ñonyibu. ¿Ximod? Bunybu que buñ ni rabés lainy gudx —ni góc laa Babel, né después Babilonia— tisintiempsi naniʼyibu gadzega diitz. Órni diti labúu bienyibu ni raniʼ saʼyibu, bireʼganyibu né cada toib gonás xinés see.

(Bireʼni ló Génesis capítulos 6 a 11 né Judas 14, 15.)