Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 12

Litz ni racné buñ laʼga nabany

Litz ni racné buñ laʼga nabany

Libro xtuny Proverbios napni xidal litz ni raduidy Dios lóono. Salomón né stipnés buñ bicaʼ láani

¿RASAC guicacuentno xcalmandary Jehová la? Par ganno láani, raquiin guisuidyno ni raibybu lóono ló Xtiitzbu. Per ¿nigolú raquiin gonyno láani la? ¿Sabanyno más sacró pal guisobno ni náni la? Ló Proverbios, Salomón bicaʼ xidal litz ni racné lóono laʼga nabanyno. Guisuidyno tipnésni.

Gapno confianz lóo Dios. Par guidzakno Jehová, raquiingoluʼ gapno confianz lóbu. Salomón bicaʼ: «Gop confianz lóo Jehová né guidopy xcalnabanylo, né diti gaplo confianz ló xcalnanlo. Ló guirá néz ni naplo goloʼ cuent láabu, né láabu sony nadopbu xinéslo» (Proverbios 3:5, 6). ¿Ximod labúu guislooyno que napno confianz lóo Dios? Guiduidyno lagary conésbu lóono né guisobno guirá ni rony mandarybu. Pal ronyno láani modreʼ: sioʼ nakit xcalnabany Bixiosno ni dxiip lainy guibá né saslooyno que Buñdzab nac toib moxter (Proverbios 27:11).

Xfamilno né buñ ni nac ximigno. Guirá family ni noʼ ló naareʼ raquiingoluʼyibu xcalrracné né xilitz Jehová. Dios raibybu buñguieeu ni ma noʼ tzeʼel: «Bibaladx né tzeʼel lo ni bitzñanélo dada dzú góclo mbioxhlas», modreʼ ronybu que buñguieeu guisetnaladx que diti por cuenunysi cós guisiambu tzeelbu (Proverbios 5:18-20). Ló capítulo 31 de Proverbios rasetlani xí labúu gony toib buñgonaʼ né modreʼ tzeelbu né xiimbu gap respet láabu. Ló libro reʼ láaca rasetlani que mbiox guisob bixios né xinaʼ (Proverbios 6:20). Libro de Proverbios rasetlani que raquiingoluʼ tzoʼ ximigno né raibyni lóono que pal ralsitno de stipnés, sacno buñ ni rioʼ ló galrrasaʼ por lóocano (Proverbios 18:1). Ximigno labúu sacné lóono par gonyno ni ná Jehová o gonybu que galsitno de láabu, por ngú rasac guibiʼno xí clas buñ guidzakno (Proverbios 13:20; 17:17).

Mod racnéni lóono por tigaano. Proverbios sitné xidal litz ni racné lóono par cueʼno cós mal ló xpensaryno, diti guichiinni lóono gueʼgoluno alcohol, gonyno pensary galán de ló dzú ni sietra né gacno buñ ni rony dxiin galán (Proverbios 6:6; 14:30; 20:1). Láaca raibyni lóono que pal diti rasobno ni ná xilitz Dios, mal sarecaano (Proverbios 14:12). Láaca ralitzni lóono gapno xcalnabanyno —ndeʼ raduidy diitz mod rasacno niis lainy—, portín cú «ralainy vida» (Proverbios 4:23).

Guirá litz reʼ ma gocnéguluni xidalguixo buñ, né nigoreʼ raluladxyibu que diti noʼ stoib cós más galán que guisobno xcalmandary Jehová.

(Bireʼni ló libro de Proverbios.)