Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 18

Jesús rony galrradziguiaʼ

Jesús rony galrradziguiaʼ

Jesús raslooy né guirá galrradziguiaʼ reʼ ximod guiquimbu xcalnadipbu órni gacbu Rey

DIOS biduidybu galnadip a Jesús par gony cós ni diti labúu rony ni toib buñgudxlio. Jesús bunybu xidal galrradziguiaʼ né xidal buñ bibiʼ láabu. Galrradziguiaʼ reʼ bislooy que láabu napbu galnadip par gonybu gan guirá enemig ni nap buñgudxlio. Guibiʼno tipnésni.

Galrralán. Primer galrradziguiaʼ ni buny Jesús láani ngú que bunybu que nís gocni vino, ndeʼ bislooy que láabu napbu galnadip par guiduidybu galrro né ni gueʼ buñ. Ló xchop buelt biyaʼanbu xidalguixo buñ né nosi chop tzón páa né beel biquiimbu par labúu bunybu láani. Né ló chop buelt reʼ biaʼan sobra galrro.

Galguitz. Cristo bisialbu buñ ni gop «bisaʼ clas galguitz» (Mateo 4:23). Bisialbu buñdxep, buñ gop, buñ ni gop lepra né nitisi clas galguitz bisialbu. Diti goyoʼ ni toib galguitz ni diti labúu nasialbu.

Jesús biscueʼsbu buroʼdant. Órni Jesús né xpiimbu noʼyibu lainy nisdaʼ gudx Galilea, tisintiempsi gosaló buroʼdant. Xpiimbu nigolú bidzuiby, per Jesús goliskiaʼbu lóbu bibiʼbu guibá né goniʼbu: «¡Goyoʼdzu! ¡Golés!». Órcuca buroʼdant cú golés (Marcos 4:37-39). Stoib ór, gosaabu ló nís órni cayac buroʼdant (Mateo 14:24-33).

Ángeles mal. Espíritus reʼ rimbuno layibu xomod demony né más nadipyibu que buñgudxlio. Xidal buñ diti rareʼ ló xomandary demony. Per Jesús diti bidzuiby layibu. Xalagary ngú layibu ngú ni bidzuibyibu, portín gonyibu que Jesús nap más galnadip que layibu.

Galgoity. Enemig reʼ ni la Biblia rabeʼ laa «último enemig» ni toib buñgudxlio labúu rony gan láani (1 Corintios 15:26). Per Jesús golísbu xiin toib gonaʼ viod né toib mbioxhlas gonaʼ ni ma goity. Per goyoʼ stoib galrradziguiaʼ ni más rareʼ loguiaʼ, órni Jesús golísbu ximigbu Lázaro ni ma nap tap govitz de goló goity, né bunybu láani nisló xidalguixo buñ. Dada xi enemigbu goniʼ que láabu napbu galnadip (Juan 11:38-48; 12:9-11).

Per guirá buñ ni Jesús golís lad gueʼet bixoʼyibu né goityibu stoib. ¿Biquiin guirá galrradziguiaʼ ni buny Jesús la? Biquiinni, portín guirá ndeʼ bislooy que profecías ni raniʼ de Gobierno xtuny Dios nigolú sácni. Gapno confianz que Rey ni Dios ma golú sanitlóbu galrralán, galguitz, desgrasy, sanitlóbu demony né dada galgoity. Láabu ma bislooybu que Dios ma biduidy galmandary láabu par gonybu guirá ndeʼ.

(Bireʼni ló libros de Mateo, Marcos, Lucas né Juan.)