Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

La Biblia ¿de xí raniʼni?

 MIDID 19

Toib profecía ni goniʼ Jesús ni gac cumplir ló xtzúno

Toib profecía ni goniʼ Jesús ni gac cumplir ló xtzúno

Jesús bislooy ximod buñ guiduidy cuent que ma gosaló cayony mandarybu né que mápa mer gudxliogoxreʼ guinitló

ÓRNI noʼyibu laidy dainy Olivos ro buñ labúu rabiʼ guidopy Jerusalén né yoʼ xiroʼ ni napni, tap xpiin Jesús gonab láabu cuéxabu diitz ni goniʼbu antes. Jesús goniʼbu que yoʼ xiroʼ né Jerusalén sanitló, né antes de ngú goniʼbu que «guidubylagaʼ gudxliogox ni noʼ» (Mateo 13:40, 49). Nigoreʼ xpiin Jesús gonabdiitz láabu: «¿Xí señal tzoʼ órni looy ma noʼlo né láaca xí señal tzoʼ órni ma guidubylagaʼ gudxliogox?» (Mateo 24:3).

Órni Jesús cuapy layibu golexabu xi ni gac dzú yása guinitló Jerusalén né yoʼ xiroʼ ni napni. Per diitz ni goniʼbu diti gocni nosi par ló xtzúyibu. Profecía reʼ láaca raguiñani dada ló xtzúno. Jesús goniʼ xidal cós ni gac cumplir toibsi ló xtzúno, né ndeʼ nadxin ñac toib señal. Ndeʼ naslooy que Jesús ma noʼ, né que Gobierno xtunybu ma gosaló cayony Mandary. Ndeʼ naduidy diitz que Jehová ma buny a Jesús Rey, né Xcalmandarybu guinitló guirá cós yox ni cayac né sonyni que buñ guiguaʼ goxtiguie ló guidopynac Gudxlio. Guirá cós ni goniʼ Jesús naslooyni que ma noʼno ló dzú ni ma guidubylagaʼ, que sanitló guirá cós ni cayac né religión, partid né mod nabany buñ. Guirá ndeʼ naslooy que ma yaaca guidxin toib Gudxlio móz.

Jesús golexa xi cós gac ló Gudxlio órni ma noʼbu xomod Rey lainy guibá. Goniʼbu que sioʼ guerr, galrralán, xo rodann, né galguitz ni ragaity xidalguixo buñ. Né buñ ma diti nasobdiitzyibu ley. Jesús láaca goniʼ que buñ ni rasob láabu naniʼ ló guidopy Gudxlio diitz sacró de Gobierno xtuny Dios. Guirá cós reʼ nadubylagaʼni ló «gran tribulación» ni diti ma goyoʼ dzú gocni (Mateo 24:21).

¿Ximod ñan guirá buñ ni racanal a Jesús que tribulación ma cabigax? Jesús góoch a xpiin que guisuidyibu de yac higuera (Mateo 24:32). Ló gudx Israel órni yac higuera ma casaló careʼ xquixni, buñ raduidy cuent que verano ma noʼ gahx. Scúca, órni guirá cós ni goniʼ Jesús ma cayac cumplir ló toibsi tiemp, buñ ñan que fin ma noʼni gaxtiguié. Jesús goniʼ que nosi Bixiosbu nan dzú né ór ni saló gran tribulación. Por ngú goniʼbu ndeʼ: «Nanísi colguiguaʼ, colguiguaná, portín diti nanto pu ór gacni» (Marcos 13:33).

(Bireʼni ló libro de Mateo capítulos 24 né 25, Marcos capítulo 13 né Lucas capítulo 21.)

^ Párrafo. 14 Par ganlo más de profecía ni goniʼ Jesús, bibiʼ capítulo 9 ló libro ni laa, ¿Xí ni merpa rasuidy la Biblia?, ni rabeʼ testigos xtuny Jehová.