Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

La Biblia ¿de xí raniʼni?

 MIDID 9

Israel ranab toib rey

Israel ranab toib rey

Saúl ni primer buny mandary Israel diti bisobbu Jehová. David rioʼ xalagarybu né Jehová rony toib acuerdo né láabu que xcalmandarybu diti sadubylagaʼni

DESPUÉS ni goity Sansón, bibany Samuel láabu gócbu juez né profeta. Guirá israelitas gonabyibu toib rey ni ñony mandary layibu xomodca racni ló stipnés gudx. Jehová diti bioladx ni gonabyibu, per gosaguelbu né bixelbu Samuel par ñonybu rey a Saúl. Primer, Saúl gócbu buñdxo, per después bitzaʼbu mod ni nacbu né gócbu buñ farmay né bidxin dzú ma diti bisobbu Dios. Ma diti goniiny Jehová que Saúl ñac rey, láabu golúbu toib mbioxhlasien ni laa David par ñoʼ xalagarybu. Per par labúu ñacni, nabésbu xidal íz par ñony mandarybu.

Toibtica dzú, David goyguen tipnés buch, layibu nacyibu soldad xtuny Saúl né dxeeyibu ló guerr. Órni bidxinbu lagarycu bibiʼbu que soldad nigolú cadzuiby, portín lad filisteo noʼ toib soldad nigolú nasoʼ ni laa Goliat né raxiichbu de gudx Israel né de Jehová. Ná David nacbu toib mbioxhlas nigolú bidzuitzbu né gonabbu nadíilbu dada nagaity saʼyibu né Goliat. David bigalña guiʼx bixiʼil xtuny né tipnés guiee né seebu guicalóbu Goliat ni nasoʼ midid tzón metros. Goliat bixiichbu David, per David cuapy que sonybu gan portín Jehová cayacné láabu. Toibsi guiee biquiimbu par bicantabu Goliat, ór cú cuaʼbu espad xtuny Goliat né bichocbu guic Goliat. Ór cú filisteos bidzuibyibu né bixonyibu.

Saúl bidziguiaʼbu balory ni gop David, por ngú biduidybu toib dxiin ni rasac a David. David guirási ór buny gan ló guerr por ngú Saúl bianladx né dada goniiny nagaitybu David. Láabu bixonybu par diti ñaitybu. Ná por xidal íz bixonybu par diti ñaitybu, diti bunybu mal a Saúl. ¿Xigony? Portín gondxichbu que Jehová golú a Saúl par gac rey. Godudy íz Saúl goity ló toib guerr, ór cú David buny mandary xalagarybu, mod ni goniʼ Jehová gacni.

«Naʼ soni que gony mandarybu por tipzó.» (2 Samuel 7:13)

David goniiny nasaʼ toib yoʼ ro ñenyibu Jehová. Per Dios goniʼ que diti láabu non gonybu láani, xalagary ngú toib buñ de xfamilbu nasaʼ láani. Ndeʼ bidxin góc Salomón xiin David. Ná scú gocni, Jehová biduidy galnasác láabu órni bunybu toib acuerdo né David: que lad xfamilbu nareʼ guirá ni ñony mandary. Né ladyibu nareʼ ni Nalaa buñgudxlio, ni Jehová goniʼ lainy Edén. Ndeʼ nadxin ñac Mesías o ni Jehová golú par gony mandary ló Gobierno xtunybu, toib ni gony mandary por tipzó.

David bislooy que nigolú raduidybu guixquix a Jehová, órni bitopbu xidalgoluʼ cós xomod or né plata ni naquiinyibu órni ñaʼ yoʼ ro ñenyibu Dios. Né por xcalnadip Dios bicaʼbu xidal canción ni ronyxiroʼ Dios. Órni ma yaaca gaitybu, David biduidybu diitz que guirá ni bunybu gocni por xcalrracné Dios órni goniʼbu diitzreʼ: «Espíritu xtuny Jehová biquiin naʼ par guiniya, né xtiitzbu goyoʼni ló lodxi» (2 Samuel 23:2).

(Bireʼni ló 1 Samuel né 2 Samuel, 1 Crónicas, Isaías 9:7, Mateo 21:9, Lucas 1:32 né Juan 7:42.)

PAR GANNLO MÁS

Ni rony mandary galán né ni diti rony mandary galán

¿Xigony bidzoo Israel ló chop midid?