Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

La Biblia ¿de xí raniʼni?

 MIDID 13

Ni rony mandary galán né ni diti rony mandary galán

Ni rony mandary galán né ni diti rony mandary galán

Gudx Israel radzoni ló chop midid, né xidal ni buny mandary diti ronyibu ni ná Jehová. Buñ de Babilonia ranitlóyibu Jerusalén

DITI xidzú de goló raché Salomón, Israel radzoo ló chop midid mod goniʼ Jehová. Rehoboam, ni buny mandary xalagary Salomón nigolú mal gócbu né guirá buñ, por ngú chii family xtuny Israel bidzoyibu né bidxinyibu gocyibu toib gobierno lainy gudx Samaria. Per chop family diti bisianyibu rey ni bieed de xfamily David, né gocyibu gobierno ni goyoʼ Jerusalén.

Ni toib de guirá gobierno cú goyoʼ goxt, portín diti bisobyibu né diti gopyibu fe lóo Jehová. Per ni más buny cós mal ngú gobierno ni goyoʼ gudx Samaria, portín dada dzú ni bidzoyibu gosalóyibu bienyibu dioxh falz. Ná bixel Dios profetas ronoʼyibu xomod Elías né Eliseo —ná chop biinreʼ golís gueʼet—, diti goloʼyibu cuent. Por ngú Dios biduidy lagary que Asiria nanitló layibu.

Godudy más de tigayoʼ íz Jehová buny que gobierno ni goyoʼ Jerusalén nanitló, profetas xtuny Dios goninéyibu guirá ni buny mandary, tipnésyibu bicadiag né buny ni ná Dios. Xomod Josías, láabu bunybu por nanitlóbu guirá dioxh falz né bisaʼbu yoʼ ro bienyibu Jehová. Ro cayonybu dxiinreʼ bidzelbu tipnés guiich xtuny Moisés ni cuá nirdiguié. Josías nigolú bibaladx ni bidzelbu ley reʼ né ndeʼ bikíil láabu nasiábu Jerusalén.

Nabanni, per guirá ni buny mandary xalagary Josías diti buny scúca. Por ngú, Dios biduidy lagary que Babilonia nanitlóbu Judá né Jerusalén néca yoʼ ro bienyibu Jehová. Tipnés buñ ni bilaa goyeeyibu Babilonia xomod mós, per Jehová goniʼ que ló setent íz nabiguetyibu Jerusalén. Per ló guirá íz reʼ Judá ñanni xomod yoovich.

Ni toib de xfamily David ñony mandary dada órni nadxin Rey ni Jehová goniʼ guieed: Mesías. Guirá ni buny mandary de xfamily David por mod buny mandaryibu bislooyibu que buñgudxlio diti labúu rony mandary. Nosi Mesías labúu gony láani. Por ngú, Jehová gochbu a último ni góc rey ló dzúcu: «Corona [...] diti sadxin sácni xtuny stoib dada órni guidxin ni nap derech guicaʼ láani, né napa xi de gonycuent láani láabu» (Ezequiel 21:26, 27).

(Bireʼni ló 1 Reyes né 2 Reyes, 2 Crónicas capítulos 10 a 36 né Jeremías 25:8-11.)