Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

La Biblia ¿de xí raniʼni?

 MIDID 5

Dios raduidy galnasác Abrahán né xfamily

Dios raduidy galnasác Abrahán né xfamily

Abrahán né xfamily racaʼ xilaay Jehová. Dios ran José lainy gudx Egipto

JEHOVÁ gondxich que nadxin toib dzú Xiimbu ni más nadxiʼbu ñaity. Génesis 3:15 bisetlaa láani. Par que buñgudxlio ñen balaati ñoʼobni xcalnabany Jehová, bunybu que ló la Biblia nacaa ximod gosac Abrahán órni Jehová gonab láabu nagaitybu xiimbu Isaac.

Diti guialadxno que Dios goniʼ que ni guilaa buñgudxlio sieedbu de xfamily Isaac. Abrahán gop fe ló xtiitz Jehová né biluladxbu que pal ñaclaxbu, Dios labúu nalís Isaac lad gueʼet. Por ngú, bisobdiitzbu né gosaguelbu nagaitybu Isaac. Per órni mápa mer guigaitybu Isaac, Jehová bixel toib ángel par diti ñonybu láani. Dios goniʼ sacró de fe ni gop Abrahán, láaca goniʼbu que acuerdo ni bunyibu nigolú sadxin sácni.

Godudy íz, Isaac gop chop xiin: Esaú né Jacob. Per Jacob más bioladx ñony ni ná Jehová, né por ngú Jehová biduidy xilaay láabu. Dios bitzaʼ laabu, ma góc laabu Israel né goyoʼ doce xiimbu ni bidxin góc gudx Israel. Per ¿ximod bidalyibu par gocyibu toib gudxrop?

Guirá ndeʼ gosaló órni guirá buch lagol José bianladx láabu. Bianladxgoluʼyibu José que dada bidxin midid bitoʼyibu José par gacbu toib mós. Buñ ni gosiʼ láabu goyné láabu Egipto, ro godudybu ló xiroʼ galnagan. José guirá ór buny ni ná Dios né gopbu balory, por ngú Dios gocné láabu, toibtica dzú Faraón ni rony mandary Egipto biduidy toib dxiin ni rasac a José. Né modreʼ gocnébu xfamilbu. Portín órni goyoʼ toib galrralán, Jacob bixel ximbiox tzasiʼ galrro gudx Egipto. Órni radxinyibu gudx Egipto, ¿chú láabu rony mandary ro radoʼ galrro reʼ? ¡José! Órni rabiʼbu guirá buchbu, ratuidybu xcalkié guirá buchbu scásiʼ portín ma bisianyibu mod nacyibu. José bixel layibu tzacaʼyibu xfamilyibu. Faraón biduidy layoo tzaay layibu ro cuésyibu, né xfamilyibu nigolú bidal né cuaʼyibu xilaay Jehová. José biduidy cuent que Jehová buny guirá ndeʼ par guirebuʼ guirá ni ma goniʼbu.

Jacob bibany lainy gudx Egipto lad guirá xfamilbu dada dzú ni goitybu. Órni mápa mer gaitybu goniʼbu que ni Guilaa buñgudxlio sac toib rey ni sap galnadip né sareʼbu lad xfamily xiimbu ni laa Judá. Godudy íz, José láaca goniʼ que Jehová sabeʼbu xfamily Jacob de gudx Egipto.

(Bireʼni ló Génesis capítulos 20 a 50 né Hebreos 11:17-22.)