Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

La Biblia ¿de xí raniʼni?

 MIDID 7

Dios rabeʼ israelitas de Egipto

Dios rabeʼ israelitas de Egipto

Jehová raxel xidal plagas ronoʼ Egipto né Moisés rabeʼbu Israel de gudxcú. Dios raquiimbu Moisés par guiduidybu leyes a Israel

MA GODUDY xidal íz de goló noʼ israelitas lainy gudx Egipto né racaʼyibu xilaay Jehová né ma bidalyibu. Goyoʼ stoib faraón ni buny mandary lainy gudx Egipto per ndeʼ nigolú buñ mal góc né diti bimbubu José. Bibiʼbu que buñ israelitas ma bidalyibu por ngú bixelbu xomósbu que pal ñal toib badaʼ ni nac buñguieeu nasalbu badaʼyen reʼ lainy guʼuc ni laa Nilo. Per goyoʼ toib buñgonaʼ ni diti bidzuiby, goloʼbu xiimbu lainy toib dzoim né bicachlanbu badaʼ reʼ lainy guiʼix cueʼ guʼuc. Xiindzap faraón bidzel láabu, goleʼbu laa nidxiyen reʼ Moisés né bisniʼsbu Moisés lidx bixiosbu, faraón.

Órni Moisés ma nap 40 íz, goyoʼbu ló toib galnagan portín bigaitybu toib egipcio ni cayonynaa a toib israelita, por ngú bixonybu goyeebu goylésbu toib lagary ni noʼ sit. Órni Moisés ma nap 80 íz, Jehová bixel láabu guibiguetbu Egipto par guinabbu faraón naduidy lagary nareʼ Israel de Egipto.

Per faraón biaʼan nasaguel, por ngú Dios bixel chii plagas ronoʼbu. Órni yása guixelbu toib plaga, Moisés raibybu faraón guiduidy lagary guireʼ israelitas né modreʼ diti noʼ xí sacyibu. Per faraón góc buñ farmay né guirási ór cualóbu Moisés né Jehová. Ni ma guisaʼni chii plagas, Dios bixel toib ángel bigaity guirá xiin lagol buñ de Egipto. Nosi family ni bigas xiruny xiil roʼ xpuert ngú ni bilaa xiin lagol, por ni bisobyibu ni goniʼ Jehová. Par que israelitas nasetnaladxyibu ni góc gueʼel cú, gosalóyibu bunyibu lanii de Pascua guirá íz.

Mális goity xiin lagol faraón, gochbu Moisés né guiráca israelitas nareʼyibu de Egipto. Góc naguelyibu né bireʼcayibu, per faraón naguel bitzaʼ xpensary né bitopbu guiráca soldad ni napbu néca carret né cuanalyibu israelitas. Órni guirá israelitas bidxinyibu roʼ nisdaʼ Xináa bisacyibu que cutica biloxni portín ma yadi pu lad guinásyibu. Per Jehová bixal galaʼ nisdaʼ par godudy xcudxbu ló yoovich. Órni guirá egipcios cuanal layibu galaʼ nisdaʼ ór cú Jehová bidxiguet nís cú xalagary, né faraón goity toibsi né guirá soldad.

Diti xidzú de goló góc guirá ndeʼ, bidxinyibu bisaladxyibu cueʼ dainy ni laa Sinaí né cú Jehová buny toib acuerdo né layibu. Jehová biquiimbu Moisés par guininé layibu, né Dios biduidy xidal leyes par gacnéni layibu ló nitisi cós. Dios ñoʼ né layibu pal nasobdiitzyibu guirá ni goniʼbu, né por layibu guiráxadit gudx nacaʼ xilaay Jehová.

Per xidal de layibu bislooy que diti gop fe lóo Jehová. Por ngú, Dios buny que nasaayibu ló yoovich cuarent íz. Ór cú Moisés goniʼ que Josué tzoʼ xalagarybu par sanir nisló israelitas. Dada bidxin midid goyoʼyibu ló Layoo ni Jehová Goniʼ guiduidy a Abrahán.

(Bireʼni ló Éxodo, Levítico, Números, Deuteronomio, Salmo 136:10-15 né Hechos 7:17-36.)