Rabiguet

Goyee ro ná índice xtuny contenidos

 MOD NON GUIBANYNO

Gacnéno saʼno órni guinino xtiitz Dios ló toib territorio ro raniʼ buñ xidal diitz

Gacnéno saʼno órni guinino xtiitz Dios ló toib territorio ro raniʼ buñ xidal diitz

Buñ más racadiag xtiitz Dios órni rasuidyno layibu ló xtiitzcayibu. Sigory por ngú ló Pentecostés íz 33, Jehová buny que judíos «de guirá gudxrop» ni bisob láabu nacadiagyibu xtiitz Dios ló xtiitzcayibu, ná goniʼyibu diitz hebreo o diitz griego (Hch 2:5, 8). Ló naareʼ, noʼ congregaciones de xidal diitz ni raniʼ xtiitz Dios ló toibsi territorio. ¿Xí raquiin gony publicadores de guirá congregacionescu par labúu guiniʼyibu xtiitz Dios né diti gony xilaʼsiyibu dxiin né diti gonynudyibu buñ ni rabés lagarycu?

  • Guidxinno toib acuerdo (Pr 15:22): Superintendentes de servicio non guidxinyibu toib acuerdo ximod más galán guiniʼyibu xtiitz Dios ló territorio. Congregaciones de stoib diitz sigory más sioladxyibu diti tzoʼno ló territorio xtunyibu pal mitienni. Per pal territoriocu xiroʼni né diti labúu rasloʼoxyibu láani naguel, sigory sioladxyibu tzoʼno ló territorio xtunyibu né gaibyno layibu órni radzelno buñ ni ná guisuidy la Biblia (od-S pág. 93 párr. 37). O sigory ranabyibu xcalrracné congregación xtunyno par guiyopyno buñ ni raniʼ xtiitzyibu par tzáguenyibu buñcu (km-S 7/12 pág. 5, cuadriyen). Guisetnaladxno que rioʼ ór lainy toib yoʼ rabés buñ ni raniʼ más de toib diitz. Órni guiyopyno buñ ló territorio non guicaano cuidad que cayony cumplirno né leyes xtuny buñchiin.

  • Non guisobno (Ef 4:16): Non guisobno ni ná superintendente de servicio. ¿Rasuidyno ni ná la Biblia a toib buñ ni raniʼ stoib diitz ni diti rony tocar congregación xtunyno la? Sigory buñcu saniʼs más naguel lainy xcudx Jehová pal toib herman ni raniʼ xtiitzbu rasuidy láabu.

  • Goyoʼ puext (Pr 15:28; 16:1): Pal ló territorio xtunylo radzelo toib buñ ni raniʼ stoib diitz, buny rutirigaʼlni looy gaibylo láabu ni ná la Biblia. Par tzoʼlo puext, buny pensary xi diitz raniʼ buñ ló territorio xtunylo né bilit la Biblia né tipnés videos ni noʼ ló diitzcu. Láaca labúu guiquiinlo aplicación JW Language par ganlo ximod guiniʼlo dioxh ló xidal diitz.