Amirioni aboro rogo zegino areme idi kuti gupai nga Krisimasi nga irisa uru batika Yesu Kristo. Wa vura duhe wo, ya mo mo aberẽnga singia agu akristano naadu rogo bambata sa kama agarã nga agu yo naadu mbembedi na Yesu aamanga pumbo nga ga Krisimasi? Ya mo mo rugutiro na gupai Baibiri agumbaha tipa irisa uru batika? Pa gbia ani akaragapai kuti agi asanahe re rengbe ka undo rani ani bihe singia Krisimasi fu aKristano.

Bambatapai nga, Baibiri afuranga tipa irisa uru batika Yesu watadu ga kura boro naairiso Mbori ni ruru ni te. Ziazia Kekeapai fura tipa aboro ue nairisi uru batika yo. Boro sa dagbayo naadu ni airisi Yekova te, gu Mbori du pako rogo Ziazia Kekeapai, na gbegberẽpai amangi rogo agi aˈuru batika re dunduko. (Bambata Pai 40:20; Marako 6:21) Ringbisihe kuti gu buku nga Encyclopædia Britannica, bambata aKristano aima soga gu “sino apagano nangia kaa irisa aˈuru batika”.

Gini ramediwi i abatika Yesu ti ni?

Ziazia Kekeapai agumbanga pa gini regbo nzunzu i avungu Yesu ti ni te. Gu Cyclopedia nga ga McClintock na Strong naya, “boro arengbenga ka bi gu uru i abatika Kristo rogoho rogo K[uru] N[diko] yo watadu rogo kura ba te”. Nirengo, ka Yesu aaida apefuoko naairiso uru batika ko, ka ko aima manga ome tipa i ini gu ramediwi i abatika ko ti ni.

Uepai nga, pai ho du ni kekehe rogo Ziazia Kekeapai yo nayugoho nga Yesu watadu boro sa dagba gako abawiriki amangi pumbo nga ga Krisimasi te. “Ringbisihe kuti gu buku nga New Catholic Encyclopedia, i fura tipa manga pumbo nga ga Krisimasi ni bambataha rogo gu keke kpiahe nangia ga Philocalus, gu bakeapai nangia ga aRomo nakepai bara rogo gu garã nangia 336 [F.B.K.].” Si tie ziazia nga, gipai re adu tifuo nyasa ke Baibiri na fuo dungu kama agarã fuo vungayo Yesu auru kpotosende ane. Sidu, gu buku nga ga McClintock na Strong agumba gupai nga, “anga Mbori du na moi gu mbakadapai nga ga Krisimasi te, na si rogo V[ovo] N[diko] yo a te.” *

Ginipai Yesu arugu gako abawiriki i naatingida paha?

Ni du Yesu ni Bakere Bayugupai, ko afu arugute zukazuka tipa gupai ko aaida apefuoko naamangaha, na si ni kekehe rogo Baibiri yo. Manga pumbo Krisimasi dagba agu apai re te. Kina wai bayugupai sukuru yo aidanga agude sukuru susi rii agu arugute i nafuhe fuyo ya, Yesu aidanga ha fu apefuoko tipa i “susi . . ri agu apai du ni keke he” rogo Ziazia Kekeapai yo te.—1 AKorindo 4:6.

Ono tie, nyanyakipa pai sa bambata aKristano aima rugatiyo na pai tipaha wenengai nga, pa Tingida Pakpio Yesu. Yesu nitiko nagumba pa gu regbo fu gako abawiriki si aida i mangi gi pumbo re, na ko ayugu wai fuyo si aida i mangihe. Gi futufutu arugapai re gbiati gu ramediwi nga ga pakpio ko ni kekehe rogo Ziazia Kekeapai—Ruka 22:19; 1 AKorindo 11:25.

A wa ani nabihe, Krisimasi nga pumbo uru batika, na agu aKristano naadu mbata aapekangafuo gu mangaapai nga ga apagano re te. Kurigure, Ziazia Kekeapai agumbanga gupai nga Yesu watadu kura aboro amangi pumbo nga ga Krisimasi te. Na agi agopai re, amirioni aKristano rogo zegino ima da kuti gupai nga Krisimasi fu aKristano te.

^ genewaraga 6 Tipa ka ino kura apai tipa pa enga pa iriso gu pumbo nga ga Krisimasi, mo bi gu kekeapai nga, “Agedi Gaani Awaraga Nasanahe Nga . . . Gini Rengo Duho Tipa Krisimasi?” rogo gu Ngbaõbambu Sinziri nga ga Banduru 1, 2014, si kina rogo gaani bangiriba nga ga Internet nga www.jw.org/zne.