Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Oni Mangisunge na gu Ome du ti Mirãroni Ngba Wene Gene

Oni Mangisunge na gu Ome du ti Mirãroni Ngba Wene Gene

“Mo niídi he ya agu apai du ngbare . . . ngba bangiro, Ako Yekova.”—TAM. 19:14.

ABIA: 21, 35

1, 2. Tipagine du we ti ni ni wene kpiapai ka yugo gu ome du mirãse na ni?

BARA ti tonatona Tanvuo rogo gu garã nangia 1871, kere we azo bire Amerika yo rogo gu rago nga Wisconsin. Wa gu we re atona ka ki ngatingati, si aimi aboro naima susa 1,200 na ki zokodi angua wa abirioni ue. Si nawira wa gi we re atona gbua ho gatara (train) aasusa ni. Nairiwo wai du agi afugo du rogo Yakoba 3:5 re nirengo, nga gu naya: “Mo bí, nga gu bakere ngua i naziga ha ni toni we!” Tipagine gi bake Ziazia Kekeapai re ape gu fugo re ti ni?

2 Gu kpiapai Yakobo amangisunge na ni re, si ni yuguyuguhe rogo veresi 6 yo. “Mirãse a wakina we.” Mirãse narukuba gu tandu du ani na ni tipa ka fura. Wakina we, fugorani na kina ome ti ni tipa ka ye na bakere imisiri. Ziazia Kekeapai naya wẽ “kpio na unga kina rogo gu pai nga ga mirãse.” (Snz. 18:21) Kina rengo ngaha nga, ani arengbanga ka mbu fura mbiko gupai nga ani rengbe ka pe gbegberẽpai te, kina wai a duhe nga ani arengbanga ka mbu mangasunge na we mbiko kina gupai nga si ima rengba ka zo rago ni bakerehe te. Gu banguapai duho nga ino ka mangasunge na we. Ka ani mangisunge na we ngba wene gene, ani rengbe ka manga riahe ngbaha, ka faadaha, na ka zigaha yuru. Ka ani mangisunge na mirãrani  ngba wene gene, ani rengbe ka mangasunge na gu ome du ti ni tipa ka taasarimo Mbori na ni na ki undo kura aboro.—Tam. 19:14.

3. Gini abangiriaba biata tipa fugo ani nika wisigopai tipaha?

3 Singia ani nafura na ngbarani watadu ani nafura na berani, gu tandu du ani na ni tipa ka peka agu apai du ngbadurani yo na berãrani yo nga gu iˈiriwo gamahe Mbori nafuhe furani. Wai du rengbe ani ka mangasunge na gi gamahe re tipa ka ngarasa kura aboro angianga ka imisa yo ya? (Oni gedi Yakoba 3:9, 10.) Ani nika wisigo nyanyakipa apapara fugo biata nga: ho ani afura ni, gupai ani agumbaha, na gu gene ani agumbaha ngbaha.

HO ANI AFURA NI

4. Oni funga kpiapai tipa “rago onga kii”?

4 Fugo nga papara gaani raka na aˈuru dunduko, ono si aidanga ani fura na aregbo dunduko te. Nirengo, Ziazia Kekeapai naya “rago onga kii” kina ti ni. (Batu. 3:7) Onga kii ho kura boro afura ni nga pa irisa. (Eyo. 6:24) Mangasunge na mirãrani ngba wene gene ka zanga pekapa okõokõ apai nafu gu gopai nga ani tatamana gbiati rugatinapai. (Snz. 20:19) Ka ani banda mirãrani ho boro naimisi rani ni, si nga patatamana furani.—Tam. 4:4.

5. Wai du rengbe ani ka yugo gaani tambuahe tipa gu gamahe nga ga fugo Mbori nafuhe furani?

5 Ono Ziazia Kekeapai nafura afura tipa “rago fura” a. (Batu. 3:7) Ka bakurearoni fu wene gamahe furoni, oni arengbanga ka igoho zanga mangasunge na ni te. Kuba gure, oni rengbe ka yugo gaoni tambuahe ni manga oni sunge na ni wenengai. Ani nayugo gaani tambuahe tipa gu gamahe Yekova nafuhe furani ni manga ani sunge na ni ni tatamana. Gure nakoda pe gaani aberãpai, agu apai ani aidaha, peka afugo ngarasaro, na kini fu taarimo fu Mbori. (Tam. 51:15) Wai du rengbe ani ka ino “rago fura”?

6. Wai du Ziazia Kekeapai nayugu gu nyanyakipa pai du ti sia gu regbo si aida ani fura ti ni?

6 Agu afugo du rogo Asanza 25:11 nayugo gu nyanyakipai du ti sia gu regbo si aida ani fura ti ni nga: “Gu pai rengbe gumba yo ho ni karagapai si du wa kina zuzu ngua wa dahabu rogo baga feda yo.” Gu zuzu ngua duwa dahabu ima rengba kadu ni bawenehe. Maaha rogo baga feda ima rengba ka saha berewe si du ni bawenehe gbe. Wakina gure a, ka ani sia gu wene regbo si aida ani fura ti ni, afugo rani rengbe kadu ni bawenehe na wene sangbaha. Rogo gini gene?

7, 8. Wai du awirinarani apekefuo ga Yesu kpiapai nibipa sia gu wene regbo si aaida i fura ti ni tipa zingabekpio?

7 Si rengbe kadu nga gupai ani apehe re nga gupai gu boro ani afura na ni re aida ka giaha, ono ka ani asianga gu wene regbo si aida ani fura ti ni ya, rogoyo du nga ti ni te. (Oni gedi Asanza 15:23.) Ni kpiapai, rogo Marungu 2011, bazigizo na bakere sungburosungburo ime agbarasipa papara gu ringara nga Japan, na ki gbarasipa agu agbata naadu rogo gu papara rago re. Agu aboro naakpiki bangeyo aima susa 15,000. Wa vura duhe nga agu aDezire Yekova naadu rogo gu dagbarago re aima rungo na gayo amurakporo wa sa, i amangisunge na gu regbo re tipa ka fu wasa fu agu aboro naakpara agumeyo. Ono tie, badungu agu aboro du rogo gu rago re, i rogo gu pambori nga ga aBuda na i na kina wiri tooni inohe tipa Ziazia Kekeapai watadu i na ni a te. Agu awirinarani re aima inoho nga si aarẽnga i tungusipa zingabekpio fu agu aboro naakpara agumeyo nibasa tingbafuo gu bakere sungburosungburo ime re te. Kuba gure, i amangisunge na gu gayo gamahe nga ga fugo tipa ka songoda yo rogo nunga yo na kini sakipai rogo Ziazia Kekeapai tipa ndu gupai gu kereapai re amanga aboro ti ni.

8 Yesu aima ino gu regbo si aaidanga ko fura ti ni ya, ono ko aima ino gu wene regbo  a ko arengbe ka fura ti ni. (Yo. 18:33-37; 19:8-11) Ko aya fu gako abawiriki ti kura regbo wẽ: “Dungu apai du ngbare mi ka gumba fu roni, ka oni arengba nga na pa ha awere ya.” (Yo. 16:12) Agu aDezire Yekova naadu rogo gu papara Japan re aima pekafuo gu ga Yesu kpiapai re. Fuo susa agarã ue na beberehe fuo gu sungburosungburo ime re, i akoditiyo ka manga gu tua naamanga rogo zegino dunduko tipa ka kparaka Gu Pangbanga Nga ga Kindo Na. 38 riihe angia “Ya Mo agu Aboro Naima Kpi Araka Berewe?” Ti gu regbo re, dungu aboro aaida i fu wasa fuyo na gu wene pangbanga nga ga zingabekpio, na dungu airakporo nadi gu trakte re kugume. Kina rengo du ngaha nga, asino rani gbiati gaani aida ni bakiakia, sidu, si naida ani du na rubangirise ho daha ni ti sia gu wene regbo si aida ani fura ti ni.

9. Rogo gini gene du rengbe sia wene regbo ka fura ti ni narengbe ka sa fugorani si du ni wenehe?

9 Nirengo, aregbo kinaho si aida ani ini gu wene regbo ti ni nzunzu rengbe ani ka fura. Ni kpiapai, boro ima rengba ka imisa rani, ka si vura du vurũ nga ni niima berã tipa ka imisa rani. Si adu ni patatamana ani di regbo ka berãkurii gupai re ka bihe singia si naida nzunzu ani fura tipaha. Ka si du nga si naida ani fura, si angbanga ani ndu fuo gu boro imisi rani ti gu regbo du ngbadurani ni iimihe te mbiko ani ima rengba ka fura gbegberẽ funi. (Oni gedi Asanza 15:28.) Wakina gure a, si naida ani du na rubangirise ho ani afura ni tipa rengo na agu agumerani angianga aidipase ya. Ani naida i ini Yekova, ono si naida ani du na hipai gbiati maabangirise. Pe gu fugo rẽarẽ ti wene regbo ima rengba ka zaka ngbaduyo yo.

GUPAI ANI AGUMBAHA

10. (a) Tipagine du si aida ani du ti ni na rubangirise tipa ka sia gu fugo du ni wenehe? (b) Oni funga gu kpiapai nayugopa gbegberẽ afugo.

10 Afugo na ome rogoho tipa ka imisa boro na ka husa ni. (Oni gedi Asanza 12:18.) Rogo gi ga Satana zegino re, sino aboro du nga ka rupo akurayo na afugo. Agu aba nga ga ngimbaro nasa dungu aboro i “nabeda mirãyo wa basape, nibafu gayo nirãnirã apai wa asiida.” (Tam. 64:3) Si naida aKristano bandatiyó ti gi ngbatunga mangaapai re. “Nirãnirã apai” watadu afugo sawia, nga agu afugo boro arupo kurani na ni tipa ka payasi pani watadu ka zua ni. Aboro nabi afugo sawia ni agu afugo naba mongo ti aboro, ono si ima rengba ka satihe ku rogo zanga irisa, na sengahe. Sawia nga gbegberẽ fugo nga gu si aida Kristano “bá ha ku sa yo.” Afugo buga ima rengba ka mbakada afugo rani, ono si naida ani bandatirani ti gu gbegberẽ afugo naba mongo ti aboro, agu afugo wia naimisa aboro watadu naba zee tiyo. Ziazia Kekeapai nazungodi rani nga: “Ka gbegberẽpai kúru nga ngbaroni yo wa sa ya, kina ngbatunga gu pai ngba angba sa nyakasa ho zingoho nidu ni, si fu undahe fu agu yo nagia ha.”—Ef. 4:29, 31.

11. Rogo gini gene du du ngbaduraniyo ni kodikodihe nibipa siaka afugo?

11 Yesu ayugupai nga “ngba boro nagumba gu pai du kpotoni yo.” (Mt. 12:34) Sidu, sia wene afugo natona kina ngbaduse yo. Afugo rani nayugo gu bipai du ani na ni tipa kura aboro. Ka si du nga ngbaduraniyo hi be nyemuse na nunga, afugo rani ima rengba kadu ni wenehe.

12. Wai du rengbe ani ka mbakada gu gene si aida ani sia gu wene afugo rengbe ani ka gumbaha?

12 Pa siaka wene afugo nakoda berãrani gbiati wene rugatinapai. Zavura gu tatamanatatamana Bakindo nangia Soromo “aberẽ pa badungu asanza sirisiri, ki niwisigi pa ha” tipa ka ‘gbata agu apai ngba tue yo, ki nike gupai nga rengo ni ruruhe.’ (Batu. 12:9, 10) Ya mo si nidu foro ni kpakarapai tipa ka gbia “agu apai ngba tue yo”? Kangia wo duhe, si naida mo mbakadi gu gene mo afura ngbaha. Gene sa rengbe mo ka manga gipai re ngbaha nga  ka wisigo gu gene i namangisunge na afugo ngbaha rogo Ziazia Kekeapai gbiati rogo agu awaraga nga ga aKristano. Mo wiriki rogo agu afugoyo mo ainongo ho ya. Gu nyaki gbe nga, mo asadi ka wirika fugo ngba gu gene rengbe ka undo kura aboro. Ani nagedapai tipa gu pagume du dagba Yekova na Wiriko nga: “Gbia Mbori fu gu mirãse fere [Yesu] wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo.” (Yes. 50:4) Ka ani di regbo tipa ka berãkurii gupai ani andu ka gumbaha, si ima rengba ka undo rani ani pe agu afugo du ni wenehe. (Yak. 1:19) Si naida ani sana tirani nga, ‘Ya mo agi afugo re akusa gupai nzunzu mi aida ka pehe? Ginipai surungba gimi afugo nika du na ni kurii agu aboro nadegatuyo fere?’

13. Tipagine du agu afugo ti ni du taata tipa ka giarogoyo na nyanyakipaha?

13 I anaamangasunge na ambanya ti regbo aYisaraere tipa ka yamba aboro ku rogo bangisa ba sa na tipa ka gbataka yo, kodihe na ka zinahe fu asekere i ndu tipa vura. Si rẽarẽ tie ka bi wai Ziazia Kekeapai amangasunge na mbanya tipa ka yugopa gu fugo du taata tipa ka giarogoyo. Vudo mbanya bau aima rengba ka vundo agu asekere naandu ku ba vurayo. Wakina gure a, ka si du nga afugo rani ziazia te watadu ni ruruhe te, si ima rengba ka vundo ri aboro yo. Kina rengo ngaha nga, wa ani amangaha ome tipa afugo rani du ni wenehe, si naida ani du na rubangirise ka afugo rani dunga zanga irisa ya.—Oni gedi 1 AKorindo 14:8, 9.

14. Oni funga gu kpiapai nayugo wai Yesu amangisunge na agu afugo du taata.

14 Yesu amoi wene kpiapai tipa siaka agu afugo rẽarẽ. Oni bingo gu gako wene gumbapai ko mangihe ni guruhe du ni kekehe rogo Matayo kapita 5 kuti 7. Yesu aamanganga sunge na kpakarakpakara afugo watadu gu adunga taata tipa ka giarogoyo ya te; ko aamanganga sunge a na agu afugo naimisa boro a te. Kuba gure, ko amangisunge na agu afugo du ziazia, na du taata tipa ka rimo ku ngbadu agu aboro yo naadegatuyo fuko. Ni kpiapai, tipa ka sa aboro ka i bakingo bangiriyo tipa zanga riahe rogo uru ya, ko afura tipa wai Yekova afu riahe fu azire ariyo. Fuani, ko aringbisi agu aboro naadegatuyo fuko kuti azire ki sanahe nga: “Genoroni asusa nga genora te?” (Mt. 6:26) Nairiwo wai gupai re adu ni bawenehe na ni taataha ka giarogoyo si ki zi ngbaduyo yo! Ani wisigingo pai awere tipa gu biata papara gaani fugo du na nyanyakipaha.

WAI KA FURA

15. Tipagine si aida afugo rani du ti ni ni wenehe ho ani afura ni?

15 Gu gene ani agumbapai ngbaha rengbe kadu na nyanyakipaha wakina gupai ani agumbaha. Ho Yesu aafura ni rogo gu bambutiria naadu rogo gako dagbarago nangia Nazareta, aboro ‘abakibangiriyo mbiko gu iˈiriwo wene apai naakura ngbako yo.’ (Rk. 4:22) Gu iˈiriwoho wene apai nazio ngbadu aboro yo, asanga yo i sogo fugo rani te. Nirengo, gu wene afugo re nasa afugo rani si zungodi aboro. (Snz. 25:15) Ani rengbe ka wirika ga Yesu wene afugo nipe ani agu apai ngbaangba, du zezeredi, na kini berẽpa gu bipai nga ga kura aboro. Pa bi Yesu gu ome aboro amangihe tipa ka gia agu apai ko aagumbaha, asako nungayo ziko na “ko ki tona yugo dungu apai fu yo.” (Mk. 6:34) Zavura ho aboro asenge Yesu ni, ko aamanganga sunge na gbegberẽ afugo te.—1 Pet. 2:23.

16, 17. (a) Ho ani afura ni na agumerani gbiati wene abakurearani rogo dungurati, wai du rengbe ani ka wirika Yesu? (Oni bi gu sura du ti tonatonaha.) (b) Oni funga kpiapai tipa wene afugo.

16 Si ima rengba kadu furani ni kpakarapai tipa ani fura nazera gbiati tatamana ho duhe ni nga gu boro ani afura na ni ani ima ino ni wenengai. Ani ima rengba ka fura funi zanga bakpe ti ni. Gipai re ima rengba  kadu nga rengo singia ani nafura na gumerani watadu wene bakurearani rogo dungurati. Ya mo Yesu abihe nga gu wene pagume naadu dagbako na gako abawiriki aza gene fuko tipa ko fura fuyo gbegberẽ? Oó, wagusa te! Ho wene abakureako atona ka tikango ni dagbatiyo riipa da nika du nga bakumbayo, ko aruguyo na wene afugo gbiati gu kpiapai nga ga tooni gude. (Mk. 9:33-37) Abaakumba rengbe ka wirika gu kpiapai nga ga Yesu nifu yo arugute fu boro “ni zera.”—Gara. 6:1.

17 Ka si vura du nga boro gumba gupai du ni gbegberẽhe, karagapai ngba wene gene rengbe ka ye na wene surungbaha. (Snz. 15:1) Ni kpiapai, wirinarani sosono wiiri aaraka raka biriki. Kura wirina sa ni Kristano aya furi wẽ: “Nagberẽ gupai nga mo arengbanga ka ruga gu gude re te.” Gu nagude re aongo tipa bete regbo na ki karagapai furi nga: “Rengo du nga apai adunga awere wenengai te, ono mi nikaa ruga ko aruga kindi. Mo fura fere fuo Aramegido; yo du ani ka bihe ni singia apai adu kinawo kindi.” Gi zezeredi karagapai re aima ye na zereda dagba agi awirina re, na si aima ngarasa gu wiiri re naagia yo i ni peke gipai re. Ko abi gupai nga nako aambunga be ruga ko te. Gipai re aundo ko ko mbu gu gbegberẽ kpamiatise naadu tiko. Fuo bete regbo kusa, ko azi bapatiza na kusa ko ki mangisunge Betere yo. Singia ani dagba awirinarani, agumerani, watadu dagba kungbo aboro, si naida afugo rani du na “undahe dedede, si ki hii na tikpo.”—Koro. 4:6.

18. Wai du pekafuo ga Yesu kpiapai nga ga fugo narengbe ka undo rani ani mangisunge na gu ome du mirãrani na ni ngba wene gene?

18 Gu tandu du ani na ni tipa ka peka agu apai du berãrani yo rogo afugoyo nga iˈiriwopai. Ani pekenga fuo ga Yesu kpiapai apeka ni sia ani wene regbo tipa ka fura, ka manga ome ka siaka agu afugo rẽarẽ, na kini mangi ome tipa ka pe kina wene afugo. Gure nika sa gupai nga gu ome du mirãrani na ni du tipa husa agu aboro nadegatuyo furani na ki fu taarimo fu Yekova nga gu boro naafu gu wene gamahe nga ga fugo re furani.