Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Ngbangba 2015

 Agu Apai Nandu Na Gupai Du Ti Kpotoho

Mbori Bipai Tipa Vura Bakuru Kusayo

Mbori Bipai Tipa Vura Bakuru Kusayo

Aboro aarungosi akurayo. Agu aboro i aarungosi nangia aYisaraere re i akpari fu Mbori kakaka tipa undo, ono i agbianga undo ti gu regbo re te. I angia ga Mbori aboro bakuru kusayo. Agu aboro naarungosiyo re angia aboro gu nyanyaki ringara nangia Ezipeta. (Gate 1:13, 14) Tipa dungu agarã, aYisaraere aapido Mbori kusiyo tii gu gbegberẽ zogarago nangia ga aEzipeto. Niyangaraha, ga Mbori regbo tipa ko mangipai ada. (Gate 3:7-10) Ziazia Kekeapai nape gupai nga kina boro Mbori nitiko naasovura kuti aEzipeto. Ko aye na agberãngo kurii aEzipeto gu tingbafuo kuraha, na fuani ko ki gbarasi bakindo Ezipeta na gako aborovura ku Zamba Baime yo. (Atambuahe 136:15) Yekova Mbori ayugu tiko ni nyanyaki “boro sovura” kuba gako aboro.—Gate 15:3, 4.

 Gu rengo nga Mbori nitiko naasovura kuti aEzipeto nayugoho ayugo nga ko asoganga avura dunduko te. Ti gu kura regbo, ko aidihe fu gako aboro nga aYisaraere i sovura. Ni kpiapai, ko afu zinahe fuyo i sovura kuti aboro Kanana nangia amangi kere gbegberẽ apai. (Pa Fu Rugute ni Ue he 9:5; 20:17, 18) Ko arugu ga aYisaraere Bakindo nangia Davide ko sovura kuti aFereseto nga aguyo naarungosi aYisaraere. Na Mbori ayugu wai ka sovura fu Davide na ko kidu na diabese.—2 Samuere 5:17-25.

Agu apangbanga nga ga Ziazia Kekeapai re nayugo gupai nga, ho aboro aamanga gbegberẽpai ni na kini rungosi aYisaraere, Mbori aidipa vura tipa ka banda gako aboro na ka banda ndikidi irisombori. Ono oni bingo gu nyanyakipa pai du biata re tipa agu avura Mbori anaaida paha re.

  1. KINA MBORI NAANA DIABERÃ TIPA GU BORO SI ANAAIDA NI SOVURA. Ti gu kura regbo sa, Mbori aya fu aYisaraere wẽ: “Oni asó nga gi vura te re.” Nduhe angia gine? Mbori nitiko si adunga ko nika sovura kubayo. (2 Pekapai 20:17; 32:7, 8) Ko aima mangaha wo tipa dungu aregbo, wa ngbatunga gu du ti tonatona gi kekeapai re. Ti gu kura aregbo, Mbori afu zinahe fu gako aboro nangia aYisaraere i so agu avura ko aima idapaha, nga agu avura naadu tipa ka dia Ringara Mokido na ka bandaha.—Pa Fu Rugute ni Ue he 7:1, 2; Yosua 10:40.

  2. KINA MBORI NAANA DIABERÃ TIPA GU REGBO GU NGBATUNGA AVURA RE ANAAMANGA TI NI. Si aaida ga Mbori amoyambu sungudi gu regbo Mbori nika sovura kuti agu aboro naarungosi yo na nanaamanga gbegberẽ apai patiyo re. Ti gu regbo i aasungudo re, si aidanga i tona ka sovura nitiyo te. Ho i animangihe ni wo, rago anaagberã ti Mbori nayo. Nirengo, Ziazia Kekeapai nayugo gupai nga, ho aYisaraere anindu ni sa vura zanga Mbori idihe fuyo, sangbanaha aningia kina gberãngo. *

  3. Wa vura duhe nga Mbori anaasovura kuti aKanano, ko aima banda aguyo, ngbatunga boro wa Raba na gari aborokporo

    RAGO ANGBANGA TI MBORI NA KPIO ABORO KODIHE NA GBEGBERẼ ABORO TE. Yekova Mbori nga Baenge unga na Bakusi aboro. (Atambuahe 36:9) Sidu tie, ko na nyemu ka bi aboro i ni kpiki te. Ono tie, si nafu kina gberãrago nga, kura aboro nata gbegberẽ buro ka rungosi akurayo na ka imoyo. (Atambuahe 37:12, 14) Ti gu kura regbo, Mbori anaaida i sovura kuti gbegberẽ aboro tipa ka dia gu ngbatunga gbegberẽpai re kusayo. Na wa si avura duwo, rogo agu agarã dunduko ko aidihe fu aYisaraere i so ngbatunga agu avura re, ko adu kindi na “nunga” na ko “aipo nga na zinga” kuti avura aYisaraere te. (Atambuahe 86:15) Ni kpiapai, ko afu ndiko fu aYisaraere nga, mbata fu i sovura kuti kura agbata, si anidu nga i “tingidi pa zereda” fuhe mbata tipa gupai nga agu aboro naaraka rogo agu agbata re i gbia momu ka aria gayo gene mangaapai na ka i asonga vura nayo ya. (Pa Fu Rugute ni Ue he 20:10-13) Rogo gu gene re, Mbori ayuguhe nga ‘rago angba nga tiko tipa kpio gbegberẽ boro te, ono gu ngba nga gbegberẽ boro sa tini ti gani pai ki nye ni ungani.’—Yezekere 33:11, 14-16. *

Rogo gu kekeapai susi kusayo re, ani bi gupai nga Mbori abi vura bakuru kusayo ni wene gene tipa ka nyasariipa arungosiro na gbegberẽ mangaapai. Ono Mbori du naadu na rengo beko ka diaberã tipa gu regbo agu avura re anaamanga ti ni na gu boro si aaida ni so gu vura re angianga aboro nanaamanga gu diaberã re ya. Na ya mo Mbori anaasovura gbua na nyemu ka imo aboro? Si aadunga wo te. Nirengo, ko nasoga zuu. (Atambuahe 11:5) Ya mo ga Mbori bipai tipa vura aima ye ka ariatihe ho Wiriko nga Yesu Kristo atona gako sunge tungusapai ni rogo bambata sa kama agarã?

^ genewaraga 7 Ni kpiapai, ti gu kura regbo sa, aYisaraere asovura na aAmareko na aKanano na i ki dibe aYisaraere mbiko Mbori aaruganga yo nga i sovura te. (Pa Geda Aboro 14:41-45) Tingbafuo dungu agarã kusa, gu ruru Bakindo nangia Yosiya arimisi tiko ku rogo gu vura Mbori aaidanga paha ya, na gi mangaapai re asako ko zanga gako raka.—2 Pekapai 35:20-24.

^ genewaraga 8 AYisaraere aatingidanga pazereda mbata fu i sovura kuti aKanano te. Tipagine? Mbiko Mbori afu agarã 400 fu aKanano i aria gayo gbegberẽ gene mangaapai. Ti gu regbo aYisaraere aye ka sovura kuti aKanano re, i aˈarianga tiyo ti gayo gbegberẽ mangaapai te. (Bambata Pai 15:13-16) Sidu, si adunga i gbarasiyo dunduko kusayo. Ono tie, agu aboro dagba aKanano yo naasa gayo berã aima bata.—Yosua 6:25; 9:3-27.