Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Tanvuo 2015

Ya mo Mo na Gberãrago Kuti Mbori?

Ya mo Mo na Gberãrago Kuti Mbori?

“TIPAGINE gipai re namangi re ti ni? Tipagine Mbori nambu gipai re ti ni si mangi re?” Gere nga agu asanahe nafudi Sidnei garãko adunga 24 rogo gu ringara nga Brazil. Tingbafuo ko gbiatiko na béno ho ko aaguzo ime ni, ko anye kubako na kini ta na kina ngbagida gbarĩgbarĩ aboro.

Gu rungo naye ni sangbana béno, kaza, kpio boro, gberãngo mbiko ome zegino, watadu vura ima rengba ka saha taata rago gberẽ ti aboro na Mbori. Anga vovopai nga gipai re te. Gu bakumba nangia Eyobo naadu bakuru kusayo agbiatiko na agberãngo gu tingbafuo kuraha. Ko abira Mbori zanga inoho ki ya: “Mi kpari foro, ka mo akaraga nga pai fere ya; mi ru ku ari, ono mo nabi re abi gbua. Mo asa tiro ka du fere wa kere boro mo narungosi re na gu bakere ome du ti bero.”—Eyobo 30:20, 21.

Eyobo ainongo gu ba gako akpakarapai aenge rogoho te, watadu ndu gupai si aamanga ko ti ni na tipagine Mbori ambuhe ti ni si ni mangiko te. Si ni pangbarago nga, Ziazia Kekeapai nape gu ndupai furani ngbatunga apai wa gure amanga ti ni na wai rengbe ani ka mangapai kutini.

YA MO MBORI AAIDA ABORO NI RUNGO?

Ziazia Kekeapai nape gupai furani tipa Mbori nga: “Gako manga sunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai, nga irarengo ni ruru ko.” (Pa Fu Rugute ni Ue he 32:4) Kangia wo duhe, ya mo boro ho rengbe ka ida kuti gupai nga gu Mbori “nga irarengo ni ruru ko” rengbe ka idaha fu aboro i ni rungo watadu ka mangasunge na agberãngo kafu mbusa fuyo watadu ka ziasi yo?

Kuba gure, Ziazia Kekeapai nape gupai furani nga: “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” (Yakoba 1:13) Nirengo, ani nawirika gupai rogo Ziazia Kekeapai yo nga Mbori ambakadi aboro ti tonatonaha ni rengberengbeyo. Ko afu bawene kporo fu gu bambata aboro ko akusiyo nga Adamu na Awa, agu ahe si aida tipa raka yo na wene sunge fuyo i ni mangihe. Mbori aya fuyo: “Oni zúga azuga, ki nge ange, ki hisi kpotosende berewe ki zogo ho.” Nirengo, ndupai aadunga ho be Adamu na Awa rago gberẽ tiyo na Mbori te.—Bambata Pai 1:28.

Ono areme, ngbanga raka te. Nirengo, rogo gu pangbanga nga ga ga aboro raka yo, gayo arungo ima du ni kerehe. Rengo du nga: “Ũzegino dũ mongo niukaga omehe nimbu be ima kina ku awere.” (ARomo 8:22) Ginipai du tie naamangi?

TIPAGINE DU ARUNGO TI NI?

Tipa ka ino gu ndupai du arungo ti ni, si naida ani bingo gupai naamangi ti tonatonaha. Gu maraika nasamungu kuti Mbori nga Satana anangi Adamu na Awa, na i ki ka ga Mbori arugute tipa gupai du ni ruruhe watadu gbegberẽhe a wa Mbori aruguyo nga ka i ringa zuzu “gu ngua nga ngua ina wenepai na gbegberẽpai” ya. Bakitingbanga aya fu Awa wẽ ka i basasangba Mbori i akpingo te, rogo gi gene re, ko akitingbanga Mbori nga irazire nga ko. Satana akitingbanga Mbori a nga ko naka na gu rengo be agu aboro ko azoga yo nga i sia gupai du ni wenehe watadu gbegberẽhe. (Bambata Pai 2:17; 3:1-6) Satana ape gupai nga raka aboro rengbe kadu wenengai ka si du nga i tii ga Mbori zogarago te a wa tiiworo fugoko aayugoho. Agi apai re akusi nyanyakipa pai nga, Ya mo Mbori rẽarẽ ka zogarago?

Bakitingbanga akusi kurapai berewe. Ko akitingbanga aboro nga i nairiso Mbori mbiko agu ahe i agbiaha beko. Bakitingbanga aya fu Mbori tipa gu ruru kumba nangia Eyobo wẽ: “A nga kina ro naadua gbata pati ko kirikiri na gako kporo, na pati gako ahe dunduko, te? . . . Mo táĩ nga bero awere, ki zadi nga agu ahe du be ko dunduko, ko agbérã ngbako yo foro kina ku bangiro.” (Eyobo 1:10, 11) Wa vura duhe nga, agi afugo Satana re adu tipa Eyobo, tiiworo fugoko aayugoho nga aboro dunduko namangasunge fu Mbori kina mbiko agu ahe i agbiaha beko.

WAI MBORI AMANGAPAI KUTI GIPAI RE

Gini wene gene ka Mbori amangipai kuti gi nyanyakipa pai re si ki nyasi bara sa kindi? Mbori du na tatamana  kisusi aima du na wene gene beko nga gu asanga gberãrago tirani ya. (ARomo 11:33) Ko adiberã ka mbu aboro i zogo tiyo tipa bete regbo na sangbana gayo zogarago yugu gada zogarago ngba kisusi.

Gu bakere gberãrago du auru kpotosende areme nayugoho ayugo nga ga aboro zogarago adu nga na diabese te. Ga aboro zogarago ayengo na zereda, ngbabase gbiati ngbarago te, ono i ima mbeda ka gbarasa kpotosende. Gipai re nasongoda gu nyanyakipa pai Ziazia Kekeapai nafura tipaha nga: “Gu boro nata, pa ruga gani apai si rogo ni yo te.” (Yeremaya 10:23) Kina ga Mbori zogarago sa rengbe ka ye na nyenye zereda, ngbarago, na kumuko fu aboro, mbiko gure nga ga Mbori ringbisapai.—Yesaya 45:18.

Wai du tie Mbori nika ye na gako ringbisapai tipa aboro? Mo tingidi gupai nga Yesu aya fu apefuoko i kpari ki ya: “Ga ngbi yé, ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Nirengo, ho regbo kada ni be Mbori ko nika dia agu apai dunduko naye na rungo vurube gako Kindo. (Daniere 2:44) Rungo, kaza, na kpio angia kuruapai. Ziazia Kekeapai naya tipa rungorungo boro wẽ, Mbori nika ‘batasa irazingo ahe ho ni ka kpara ni ku ari.’ (Atambuahe 72:12-14) Ziazia Kekeapai nakidohe a tipa kazakaza aboro nga: “A nga boro kporo sa ayá, ‘Mi nawoka’ te.” (Yesaya 33:24) Zavura gu kpikpi aboro du rogo ga Mbori berãpai yo, Yesu aya: “Ragoho nada, ho agu yo ka gia [fugo Yesu] ni dunduko du rogo amurã yo, ki kuru.” (Yoane 5:28, 29) Nangba gi kidohe re!

Sonosa idapase kuti ga Mbori akidohe naundo rani ani dibe gberãrago kutiko

WAI KA DIABE GBERÃRAGO

Agarã 17 fuo béno mangi Sidnei ani nifura tipa ko ti tonatona gi kekeapai re, ko aya: “Mi aabiranga Yekova Mbori tipa gu béno re te, ono mi ima idaha nga ti tonatonaha rago aima gberã tire na ko. Kura aregbo kinaho mi nidu na bakere gberãrago, na mi naakpara akpara ho mi aberãpa gimi ngbaramoni ni. Ono tie, mi ima ye ka ino gupai rogo Ziazia Kekeapai yo nga anga gu béno re angia mbusa be Mbori te. A wa Ziazia Kekeapai agumbaha, ‘rago gbia kuti mamu namanga fu yo dũ.’ Kparakpee fu Yekova na geda kura averesi ima nyakasa re rogo toro yo na ki undo re mi du na wene bipai.”—Batungusipai 9:11; Atambuahe 145:18; 2 AKorindo 4:8, 9, 16.

Ino gu nduapai Mbori nambu arungo ti ni na ka ino wai Mbori nika dia sangbanaha kusayo ima rengba ka undo rani ani dibe gu gberãrago rengbe ani kadu na ni kuti Mbori. Ani nakido nga Mbori “nafu mosoro fu agu yo nagbata ko.” Boro ho du na idapase kutiko na Wiriko rago nika gberã ti ni te.—AEbere 11:6; ARomo 10:11.