ADezire Yekova idi kuti gupai nga “Ziazia Kekeapai dunduko si aye be ga Mbori Toro si ki rengbe” tipa fu undo. (2 Timoteo 3:16) Ani namangasunge na Ziazia Kekeapai tipa ka wirikapai tipa Bakusiahe na ka raka gu raka du na rogoyo ti ni.

Ziazia Kekeapai naya: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” (Atambuahe 83:18) Sidu tie, ani nairiso kina Yekova Mbori sa na wangia ani gako aDezire, ani namanga bakere ome ka yugo ndikidi rimoko fu aboro.​—Yesaya 43:10-12.

Wa du ani ni aKristano, ani idi kuti gupai nga Yesu nga “Wiri Mbori” * aye ku auru kpotosende na ki da ni Masiya. (Yoane 1:34, 41; 4:25, 26) Tingbafuo kpioko, i azingisiko ku ngbangbaturũ yo. (1 AKorindo 15:3, 4) Kusa, ko ada ni Bakindo ga Mbori Kindo. (Yugoti 11:15) Gu Kindo re nga gu ndikidi zogarago nika karaga Paradizo berewe ku auru kpotosende ane. (Daniere 2:44) Ziazia Kekeapai naya, “Bayee aboro adía kumbo ringara, ki du na ngbarago tipa gu wenepia du kpaima.”​—Atambuahe 37:11, 29.

Barumbatayo Katoriko yo afura tipa aDezire Yekova rogo gu waraga pangbanga du Germany yo nga, “Ho i agedapai ni rogo Ziazia Kekeapai, i naida kuti gupai nga Mbori du nafura fuyo. Ho du kpakaraapai ni rogo gayo raka, i nagbata ziga rogo Fugo Mbori yo. . . . Fugo Mbori fuyo ni ungaha.”​—Münsterländische Volkszeitung

ADezire Yekova idi kuti gupai nga gu bangua arugute nga ga Ziazia Kekeapai ima rengba ka fu undo fu aboro zavura areme a. (Yesaya 48:17, 18) Sidu tie, ani napekafuo agu abangua arugute re sirisiri. Ni kpiapai, wa duhe nga Ziazia Kekeapai naza rani ti manga agu apai nabirikosi berãrani na kpotorani, ani avungo gundo watadu ka dia kere angua kutii kpotoraniyo te. (2 AKorindo 7:1) Ani na ne agu apai a Ziazia Kekeapai azahe ti ni wagu nga, kpibuda, wasiwasi kodaba, na dĩi.​—1 AKorindo 6:9-11.

^ genewaraga 5 Ziazia Kekeapai nafura tipa Yesu ya ko nga “bangisa Wiri Mbori” mbiko ko nga gu bambata boro na gu yangada boro kina Mbori akusi ko nitiko.​—Yoane 3:18; AKorosaio 1:13-15.