Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Mbirinvuo 2015

 AGU APAI NANDU NA GUPAI DU TI KPOTOHO | ADA NGA ADEZIRE YEKOVA?

Gini ngbatunga aboro nga aDezire Yekova?

Gini ngbatunga aboro nga aDezire Yekova?

Gaani riigbu rogo zegino dunduko na si akodanga tihe na gu kura agbu nga ga apambori te. Wa vura duhe nga gaani riibasunge nga ga zegino gu du Amerika yo, badungu rani naraka rogo kura aringara. Nirengo, bange agurani nayugo Ziazia Kekeapai fu aboro ima susa amirioni muambe rogo aringara naima susa 230. Ani namangaha wo kuti agu afugo Yesu nga: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ.”​—Matayo 24:14.

Zanga bipa gu rago ani araka rogoho, ani nairisa andiko. Wa vura duhe wo, ani namanga bakere ome ka zanga rimiso tirani ku rogo birĩ-zogarago. Si wo mbiko ani namangapai kuti ga Yesu rugute fu aKristano nga ka i du nga ni “aboro zegino ya.” Rogo gi gene re, ani arimisongo tirani ku rogo agu apai nga ga birĩ-zogarago te watadu ka fubee tipa vura a te. (Yoane 15:19; 17:16) Nirengo, ti regbo gu Ue Vura Nga ga Zegino, i aba aDezire Yekova ku bambukiso yo, ki rungosiyo gbegberẽ mbiko i aambunga pa gayo idapase te. Kuru bisopu German yo akepai nga: “Kina yo sa nzunzu rengbe ka ya i aambunga pa gayo idapase ti regbo aNazi te.”

Gu waraga pangbanga nga Nová Svoboda du rogo gu ringara nga Czech Republic aya, “[ADezire Yekova] na bakere ome ka manga gupai du ni ruruhe. Ani ima rengba ka mangasunge na gu ngbatunga aboro re rogo kikiipa abangiriaba nga ga birĩ-zogarago, ono ka i idinga ha te. . . . I ima inoho nga agbia-ngbi na kina ome beyo ono i idi kuti gupai nga kina ga Mbori Kindo sa nika nyasariipa agu akpakarapai nga ga aboro.”

Wa vura duhe wo, ani akparanga tirani ti aboro te. Yesu akpari fu Mbori tipa apefuoko nga: “Mi akpara nga foro mo rogo yo aroga zegino te.” (Yoane 17:15) Sidu tie, si rengbe kadu nga mo naabi rani abi ani mangisunge, ni ngbeke ahe, na kini mangi sukuru kina rogo gamo dagbarago.