Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Bamburu 2015

Oni Mangi Ome ka Sa gu Paradizo Nga ga Toro si du ni Wenehe

Oni Mangi Ome ka Sa gu Paradizo Nga ga Toro si du ni Wenehe

“Mi amánga ba ndure ni taasitaasi he.”—YES. 60:13.

ABIA: 28, 136

1, 2. Rogo Kuru Ndika, gu fugo nga “gbada ndure” nayugo gine?

YEKOVA MBORI atakipande gupai nga: “Ngbangbaturũ nga gi mbata bakindo kpotosende nga gbada ndure.” (Yes. 66:1) Nibipa gi ‘gbada nduko’ re, ko aya: “Mi amánga ba ndure ni taasitaasi he.” (Yes. 60:13) Wai du ko amanga gipai re? Na ginipai si ayugoho furani, wa ani araka rii “gbada” ndu Mbori?

2 Kupati fura tipa kpotosende, gu fugo nga “gbada ndure,” i mangisunge na ni ni sanza rogo Kuru Ndika tipa ka sakapai tipa gu yekaru aYisaraere anaamangasunge na ni mbata. (1 Peka 28:2; Tam. 132:7) Gu yekaru naadu auru kpotosende angia mburu ba ndikidi irisombori. Mbiko gupai re, si adu ni bawenehe bangiri Yekova, na pa duhe auru kpotosende aafu taarimo fu ba ndu Yekova.

3. Ginihe nga ga Mbori bakere yekaru nga ga toro, na si atona ti gini regbo?

3 Areme, anga yekaru nga mburu ba ndikidi irisombori auru kpotosende ane berewe te. Mburu ba ndikidi irisombori narukuba gu yekaru nga ga toro mbiko si nataasarimo Yekova kisusi abambu dunduko. Si nga gu mbakadapai nasaha taata ani mbakadipai dagbarani na Mbori vurube gu motumo nga ga Yesu Kristo na padu ko ni boromotumo. Si atona rogo gu garã nangia 29 F.B.K. ho Yesu azi bapatiza ni, ti gu regbo  re, i ambedi ko ni Gbiamotumo nga ga ga Yekova bakere yekaru nga ga toro.—Eb. 9:11, 12.

4, 5. (a) Wai du Atambuahe 99 aringbisapa gu bakere nyemupai nga ga ndikidi airisi Yekova? (b) Gini sanahe si aida ani sana tirani na ni?

4 Tipa ka yugo gaani tambuahe tipa gu mbakadapai du tipa gu yekaru nga ga toro re, ani nataasa Yekova niyugo ani rimoko fu aboro, na kini taasirimoko a tipa gu gako gamunihe nga ga motumo. Nairiwo gu ngbarago du ani na ni ka ino gupai nga ndikidi aKristano areme naima susa amirioni muambe nafu taarimo fu Yekova! ADezire Yekova wa kura aboropambori nananga tiyo nga i nika fu taarimo fu Mbori ho i nika mbu gi kpotosende re ni ka ndu ku ngbangbaturũ yo te, ani dunduko ini gupai nga si naida ani fu taarimo fu Mbori kina auru kpotosende ane na kina awere.

5 Gure nga ani napekafuo gu kpiapai nga ga ga Yekova ruru amoyambu furayo tipa yo rogo Atambuahe 99:1-3, 5. (Oni gedihe.) A wa Atambuahe apehe, Moize, Arona na Samuere aima fubee ni bakerehe tipa gu mbakadapai nga ga ndikidi irisombori naadu ti rago yo. (Tam. 99:6, 7) Areme, mbata fu yangara awirina Yesu ga ku ngbangbaturũ yo ka mangasunge na ko ni aboromotumo, i namangasunge ni ruruyo rogo gu vurukporo nga ga gu yekaru nga ga toro auru kpotosende ane. Amirioni “kura akandoro” nafubee fuyo a. (Yo. 10:16) Wa vura duhe nga agi abadona ue re na gayo amaabangirise ni bakiakia, i dunduko nairiso Yekova kina ane rii gbada nduko. Ono tie, wa du ani ni basasa, si naida ani sana tirani nga, ‘Ya mo mi nafubee tipa gu ga Yekova mbakadapai du tipa ndikidi irisombori na omere dunduko?’

WAI KA INO AGU ABORO NAMANGASUNGE ROGO GU GA YEKOVA YEKARU NGA GA TORO

6, 7. Gini kpakaraapai nakuru dagba agu aKristano naadu mbata, na ginipai si aaida i mangihe tingbafuo dungu kama agarã kusa?

6 Gu samungu kuti ndikidi pambori i afura tipaha ku mbatayo atona ka manga mbata fu kama agarã da fuo i asigira gu dungurati nga ga aKristano. (Amo. 20:28-30; 2 Tesa. 2:3, 4) Fuo gure ngbutuko, si aima kpakara ka ino agu aboro nzunzu nairiso Mbori rogo gu gako yekaru nga ga toro. Fuo akama agarã kusa, regbo ada be Yekova tipa ko ziasi gipai re vurube gu gako vovo Bakindo nga Yesu Kristo.

7 Rogo gu garã nangia 1919, i aima ino agu aboro ziazia Yekova aidi nayo nga aguyo naamangasunge rogo gu yekaru nga ga toro. I aima giriso yo rogo toro yo tipa Mbori idi na gayo sunge. (Yes. 4:2, 3; Mara. 3:1-4) Gupai gu mokedi nangia Pauro abihe dungu kama agarã kusayo rogo yuguyugupai atona ka digiso tihe.

8, 9. Oni sakingo pai tipa gu ngbatunga “paradizo” biata Pauro abihe rogo yuguyugupai yo.

8 I ringbisipa gu yuguyugupai Pauro abihe rogo 2 AKorindo 12:1-4. (Oni gedihe.) Gupai Pauro abihe rogo yuguyugupai yo angia yugoti. Si aakoda gupai nika manga ku mbatayo, angianga gupai naamanga ti rago ko ya. Ho i atuka Pauro ni “ku ari dati biata ngbangbaturũ,” gini ngbatunga “paradizo” ko abihe? Gu paradizo Pauro afura tipaha re, si adu nga si nika ngia ndikidi paradizo, gu nga ga toro, na agu apai nika digiso tihe ngbangbaturũ yo, nga agu apai dunduko si adu nga si nika manga ku mbatayo. Si rengbe kadu tipa gu ndikidi paradizo nga ga kpotosende nga gu nika ye ku mbatayo. (Rk. 23:43) Si rengbe kadu a tipa gu paradizo nga ga toro nga gu aboro nika gbia ngbarago behe ni bakerehe rogo vovo  zegino. Kurigure, si nawira wa si nafura a tipa gu weneapai du ngbangbaturũ yo rogo “ga Mbori Paradiso.”—Yugo. 2:7.

9 Tipagine tie Pauro aya ti ni ko agi “agu apai ka boro ape nga ha ya, nga gu aru nga fu boro ni gumba ha a ya?” Gure aangianga regbo tipa ko sakipai futufutu tipa gu iʹiriwoapai ko abihe rogo yuguyugupai te. Ono areme, si ruaru ani fura tipa agu amaku du dagba ga Yekova aboro!

10. Ya mo gu fugo nga gu paradizo nga ga toro gbiati gu yekaru nga ga toro nga ngisapai?

10 Gu fugo nga gu “paradizo nga ga toro,” si nga gu fugo ani naafura tipaha dedede. Si naringbisapa gu gaani kparakpara pagume nga toro, nga gu nasarani ani du na zereda na Mbori gbiati awirinarani. Rengo nga ha nga, si aidanga ani digisihe nga, agu afugo nga “gu paradizo nga ga toro” gbiati “gu yekaru nga ga toro,” si nga ngisa fugo te. Gu yekaru nga ga toro, si nga ga Mbori mbakadapai tipa ndikidi irisombori. Gu paradizo nga ga toro re, si tipa ka yugo agu aboro ziazia Mbori naidi nayo na namangasunge fuko rogo gako yekaru nga ga toro.—Mara. 3:18.

11. Gini momu du ani na ni areme nibipa gu paradizo nga ga toro?

11 Nairiwo gu ngbarago du ani na ni ka ino gupai nga, naatona rogo 1919, Yekova namangasunge na kpakpa-aboro ka sonosa gu paradizo nga ga toro, ka nyakasaha, na ka kiisoho ku rogo kpotosende dũ! Ya mo mo nabi tiro mo ni songodi gi iʹiriwo sunge re? Ya mo mo na ngbarago tipa kaa mangasunge na Yekova ka taasapa gu ba nga ‘gbada nduko’?

GA YEKOVA RIIGBU NANGBA KINA KU MBATAYO

12. Gini kido du ani na ni dunduko nibipa wai Yesaya 60:17 adigiso tihe? (Oni bi gu sura du ti tonatonaha.)

12 I aima fura ku mbatayo rogo Yesaya 60:17 (Oni gedihe) tipa gu iʹiriwo aʹariapai si adu nga si nika manga rogo ga Yekova riigbu du paparaha auru kpotosende. Paranga aboro watadu agu aboro aata ima nga ku rogo rengo ya ima gedapai tipa agu aʹariapai re watadu i ima giaha ngba kura aboro. Nairiwo gu momu du agu awirina nga akumba na adee na ni nga aguyo naima bi agi aʹariapai re si nimangi! Si airiwongo te nga i ima ida kuti gupai nga Yekova du nangbembatayo fu gako riigbu vurube gako Bakindo nga Yesu! I ima ino gupai nga gayo kido na wene mburuhe ti ni, na gure nga kina gu kido du ani na ni dunduko. Ho ani agia agu apai ni i agumbaha, si nanyakasa gaani idapase na kido kuti Yekova.

13. Gini atindiro Atambuahe 48:12-14 amaaha rirani dunduko?

13 Ani dunduko si aida ani pepa ga Yekova riigbu fu kura aboro, ka ani vura ima aima wai ku rogo rengo vurũ. Si nga iiriwopai areme ka bi gu paradizo nga toro rogo gu zegino du na gbegberẽ apai rogoho na adunga nyemuse rogoho ya! Gu iiriwoapai du tipa ga Yekova riigbu watadu “Siona,” na gu rengo du tipa gu paradizo nga ga toro si naida i yuguhe fu gu “rika ngbatunga aboro nikaye.”—Oni gedi Atambuahe 48:12-14.

14, 15. Gini aʹariapai namangi rogo riigbu rogo gu garã nangia 1970, na gini undo si naye na ni?

14 Vuru agu agarã susi kusayo, gu sosono aboro du dagbarani ima bi agu aʹariapai mangi rogo riigbu nga gu sa gupai nga gu ga Yekova paparaha riigbu du auru kpotosende du ni bawenehe kisusi. I natingidapa wai dungurati anidu na gu moyambu nangerakurii dungurati kuba gu gbuu nga ga abaakumba, aringara anidu na gu moyambu nangerakurii be-basunge kuba gu Rondo Nga ga Be-basunge, na gu regbo rugapai anaaye be boro sa nga gu bangerekuriisunge nga ga riigbu kuba gu Riigbu  Bipasunge nga ga aDezire Yekova. Wa vura duhe nga aboro adu kinaho naaundo agi awirina re, boro sa naanidu na pagbia ka diaberã rogo adungurati, rogo abe-basunge na rogo riibasunge nga ga zegino. Rogo agu agarã naatona rogo 1970, i amangi aʹariapai nga, si naida gu gbuu nga ga abaakumba ni ngerekurii apai kuba gupai nga bangisa boro sa nimangihe.

15 Ya mo agi aʹariapai re si ye na undo? Nirengo, si ima ye na undo. Tipagine? Bambiko agi aʹariapai re, mburuhe adu rii gu wene inohe ani gbiaha rogo Ziazia Kekeapai. Kuba gupai nga kina boro sa namaapai kurii apai, gu wene asino dunduko du rogo “agamahe rogo aboro yo” Yekova afuhe, ima undo gako riigbu.—Ef. 4:8, NW; Snz. 24:6.

Yekova nafu gu rugapai nga gu aboro aidaha rogo agu aba du yo rogoho dũ (Mo bi genewaraga 16, 17)

16, 17. Gini aʹariapai mangi barambeda nga gu ngba tironi, na tipagine?

16 Oni berẽnga pa agu aʹariapai a mangi barambeda, wa ngbatunga gu nga wai du kpoto gaani awaraga awere, agu apai si afura tipaha gbiati wai ani akparakaha awere. Nairiwo gu ngbarago du ani na ni kaa kparaka gi wenewene awaraga re gene tungusapai yo! Na ho ani amangasunge ni na gu vovo birĩ-inohe du awere ka gbandaka rengo, wa mangasunge na gu bangiriba nga ga Internet nga jw.org, ani nayugo gu nyemupai du Yekova na ni tipa aboro rogo aba dunduko gbia agu arugute i arungo tipaha.

17 Na bangirani agonga ti gu nyanyakipa aʹariapai a naafu regbo furani tipa manga gu Irisombori Nga ga Aborokporo watadu kadu na bakere regbo tipa wisigopai nisase te. Ani nabi agu asona ku mbatayo namanga nibipa agu ambakadapai nga ga bakere adunguratise na nyanyakipaha. Dedede ani naape gupai nga, si nangba kina ku mbatayo na agarã dũ! Na ani na ngbarago a mbiko agu arabahe ani agbiaha vurube agu sukuru nga ga siokrasia. Ani nabi Yekova ko ni undo rani rogo agi  aʹariapai re dunduko. Ko nasa gako riigbu bibihe ngba kina ku mbatayo na gu paradizo nga ga toro ani agbia ngbarago ti ni awere!

ONI SONGODI GU PARADIZO NGA GA TORO

18, 19. Wai du rengbe ani ka sa gu paradizo nga ga toro bibihe ngbaangba?

18 Pa irisa du ngaha ka bi gupai nga Yekova mbugene furani ani fubee tipa ka sa gaani paradizo nga ga toro ni wenehe. Ani namangaha wo ho ani atungusa gu wene pangbanga ni nga ga Kindo zaaza na ka sa aboro ni abawiriki. Bara sa ani aundo boro nimangi sonakumbatayo ki dati gu kparatise nga ga aKristano, gure nga ani nakiiso gaani paradizo nga ga toro kina ku mbatayo.—Yes. 26:15; 54:2.

19 Ani rengbe ka sa gaani paradizo nga ga toro bibihe ngbaangba ni manga ani ome tooni tooni ka mbakada agu asino rani nga ga aKristano. Rogo gi gene re, ani nasa bibi gi paradizo re si ngbaangba bangiri kura aboro. Dedede gaani iriiri mangaapai na gu zereda du dagbarani si naagbe aboro ku rogo riigbu na koyo du Mbori ni gbiati Kristo angianga kina gu inohe du ani na ni tipa Ziazia Kekeapai ya.

Mo ima rengba ka fubee ka kiiso gu paradizo nga ga toro (Mo bi genewaraga 18, 19)

20. Ringbisihe kuti Asanza 14:35, ginipai si aida ani mangihe?

20 Nairiwo gu ngbarago du Yekova na Yesu na ni areme ka bi gaani bawene paradizo nga ga toro! Gu ngbarago ani agbiaha awere wa ani asa paradizo nga ga toro bibihe ngbaangba nayugopa gu ngbarago ani ka gbiaha kusa ho ani kaa mangasunge ni ka sa gi kpotosende re ni ni paradizo. Oni tingidi gupai Asanza 14:35 apehe nga: “Ga bakindo ngbanya du fu kina gu moyambu namanga pai ni tatamana.” Ani mangingo pai amanga kindi na tatamana wa ani amangasunge nyanyaki ka sa gu paradizo nga ga toro bibihe ngbaangba!