Da nga Gogo Boro Magogo i nafura tipa ni rogo gu kitabu nga Yezekere?

Gi sakarogopai yo re mburuhe adu rii gu kitabu nga Yugoti mbiko si nafura tipa Satana Bakitingbanga ya ko nangbe ku mbatayo ka zubo ga Mbori aboro rogo zegino dũ. (Yugo. 12:1-17) Sidu tie, ani aberẽhe nga Gogo nga gu kura rimo anebi afuhe fu Satana.

Ono tie, gu sakarogopai yo re akusi kura nyanyakipa sanahe. Tipagine? Oni kparianga gipai re: Ho Yekova afura ni tipa gu regbo ko nika diabe Gogo, ko naya tipa Gogo wẽ: “Mi afú ro fu angbatunga azire gomoro ni ũmozi fu anya nvou ami riti ro.” (Yeze. 39:4) Fuani Yekova gbia kurapai kutini nga: “Ti gu rago re mi afú ba fu Gogo tipa kpisida aboro rogo ho ringara aYisaraere yo . . . yo i ka kpisida Gogo ni na gako rimbasa dunduko.” (Yeze. 39:11) Ono wai tie rengbe “azire gomoro ni ũmozi fu anya nvou” ka rita gu boro nga toro? Wai rengbe yo kafu ba “kpisida aboro” fu Satana auru kpotosende? Ziazia Kekeapai nape gupai ape ziazia nga i nika kiso Satana ku rogo gu due zanga mburuhe tipa agarã 1,000, angianga ka rita ko watadu kpisida ko ya.—Yugo. 20:1, 2.

Si nape gupai furani nga fuo agarã 1,000, i nika kusa Satana rogo gu due zanga mburuhe re, na “ko akúra ka nanga arikaaboro nga agu yo du durugaduruga digida sende yo wa du he biama, nga Gogo na Magogo, ka dungura yo sa vura.” (Yugo. 20:8) Ono wai rengbe Satana ka nanga Gogo ka si du nga kinako du nga Gogo? Sidu tie, anga Satana du nga “Gogo” furayo tipa ko rogo gu sangbaanebi nga ga Yezekere watadu rogo gu kitabu nga Yugoti te.

Da tie du nga Gogo? Tipa ka karagapai kuti gu sanahe re, si naida ani weteke Ziazia Kekeapai ka ino da du nazubo ga Mbori aboro. Ziazia Kekeapai afura nga tipa kina gu zubohe nga ga ‘Gogo Boro Magogo’ te ono si nafura a tipa gu zubohe nga ga “gu bakindo du ku nodiyo” na gu zubohe nga ga “abakindo zegino.” (Yeze. 38:2, 10-13; Dan. 11:40, 44, 45; Yugo. 17:14; 19:19) Ya mo agi azubohe re ni bakiakia? Si awiranga ha wo te. Ziazia Kekeapai mangisunge na arimo ni bakiakia tipa kina gu bangisa zubohe re. Tipagine rengbe ani ka dakuti gu digisopai re ti ni? Mbiko Ziazia Kekeapai nape gupai furani  nga rikaaboro dunduko nika du rogo gi yangara zubohe re nga gu nika ye na gu vura nga Aramegido.—Yugo. 16:14, 16.

Ho ani awisigo agi averesi ni du tipa gu yangara zubohe kuti ga Mbori aboro re, si nadu ziazia nga gu rimo nga Gogo Boro Magogo re, afuranga tipa Satana te, ono si nafura tipa kodikodi rikaaboro. Ya mo gi “bakindo du ku nodiyo” narukuba kurapai re, ko du nika ngbembatayo fuyo? Ani ainongo ho nzunzu te. Ono si nangera wa gi bipai re na ngbanya dagbaha na gupai Yekova apehe tipa Gogo nga: Mo ‘ki kuru rogo ga ba ti mburu apapara rago nodiyo, mo na dungu aboro na mo, i dunduko nioro ri kina afarasi, nga bakere rimbasa agu aboro, rimbasa vura du na ome.’—Yeze. 38:6, 15.

Wakina gure a, gu nebi nangia Daniere, naraki kina ti bangisa regbo na Yezekere afura tipa bakindo nodiyo nga: “Apangbanga ayé uroyo na nodiyo, ki zigbasi ko, ko akúra na bakere ngariangaria zinga ka nyasa dungu aboro ki gbarasi yo kpakaya. Ko ki dua gako iiriwo bamburoko dagba baime na wene kparakpara ziazia bagangara; ono ko adá ti digida gako pai, zanga boro ka unda ko.” (Dan. 11:44, 45) Gipai re na wiratise dagbaha na gupai gu kitabu nga Yezekere apehe tipa gu mangapai nga ga Gogo.—Yeze. 38:8-12, 16.

Ginipai nika manga ni sangbana gi yangara zubohe re? Daniere napehe furani nga: “Ti gu rago re Mikaere [Yesu Kristo] agúari a [ti regbo Aramegido], nga gu bakere bazogo [naatona zogarago rogo 1914] naruga pa gamo aboro. Ono rago fuda nikadu [bakere gberãngbi], ngbatunga ha adu nga mbata wa gu te re, tona wa rikaaboro aenge ki da ti gu rago re. Ono ti gu rago re i abátasa gamo aboro, nga agu yo i ka bi rimoyo ni ba sa sa ni kekehe rogo kitabu.” (Dan. 12:1) Gi mangapai nga ga gu boro narukuba Mbori nga Yesu re i ima fura tipaha a rogo Yugoti 19:11-21.

Ono da tie i nafura tipa ni nga “Gogo na Magogo” rogo Yugoti 20:8? Ti regbo yangara asada ti digido agarã 1,000, agu aboro nika samungu kuti Yekova nika yugo gu sino nga ga imo aboro wakina ‘Gogo Boro Magogo’ nga gu rikaaboro nika zubo ga Mbori aboro ti digido bakere gberãngbi. Na sangbana gupai nika du tipa gu rikaaboro ue re nika du kina sa, nga nyenye kpio! (Yugo. 19:20, 21; 20:9) Si nawira wa si rẽarẽ tipa i yambu agu asamungu nika du ti digido Agarã Kutu re nga “Gogo na Magogo.”

Wangia ani wene abawiriki Fugo Mbori, ani nasungo ka bi gu boro nika ngia gu “bakindo du ku nodiyo.” Ka si vurangia kina gini boro nika ngbembatayo fu gi kodikodi rikaaboro re, ani nakido tipa apai ue: (1) I nika dia adia be Gogo Boro Magogo na gako aboro vura na ki gbarasi yo; na (2) Gaani Bakindo nga Yesu Kristo, nika batasa ga Mbori aboro na ki ngbembatayo fuyo ku rogo vovo zegino nga ga zereda na ndikidi ngbabase.—Yugo. 7:14-17.