“Oni mbédi na Mbori, ko ki mbedi na oni.” —YAK. 4:8.

1. Tipagine si aida ani banda gaani pagume na Yekova si du ni nyanyakihe ti ni?

YA MO mo nga gu Dezire Yekova naima zio bapatiza? Ka si duwo, mo na nyanyakipa he bero nga gamo pagume na Mbori. Ono tie, gu pagume re ngbapai be gu soapai du rogo gi ga Satana zegino re gbiati gaani zangarengba. Gi ngbatunga aˈasada re nagbia aKristano dunduko. Sidu, si naida gaani pagume na Yekova du ni nyanyakihe gbe.

2. (a) Ginihe nga pagume? (Oni bi gu kekeapai du bandu waraga yo.) (b) Wai rengbe ani ka nyakasa gaani pagume na Yekova?

2 Ya mo gamo pagume na Yekova ni ndikidihe? Ya mo mo nakpinyemu ka nyakasaha? Yakoba 4:8 napepa wai rengbe mo ka mangaha wo, si na ya: “Oni mbédi na Mbori, ko ki mbedi na oni.” Oni ini gupai nga gipai re namanga dagba aboro ue. * Wa ani kaa manga ome ka mbeda na Mbori, ko nika mbeda na ani a. Wa ani kaa fura na Yekova dedede, si nika nyakasa gaani pagume na ko  kina ku mbatayo. Ni sangbanaha, ani nika du na ndikidi pagume na ko. Na ki da na gu ngbatunga kido Yesu adu na ni ho ko aya ni: ‘gu ko nakedi re ko nga ndikidi Mbori . . . Mi ini ko.’ (Yo. 7:28, 29) Gini apai du nzunzu rengbe mo ka mangaha tipa ka mbeda na Yekova?

Wai rengbe mo ka fura na Mbori? (Oni bi genewaraga 3)

3. Wai rengbe ani ka fura na Yekova?

3 Fura dedede na Yekova na nyanyaki paha tipa ka mbeda na ko. Wai rengbe mo ka fura na Mbori? Wai du mo nafura na gu bakureamo naraka tuturũ? Si nawira wa, oni nakeka waraga dagba tironi na kini fura rogo terefuni, isoke dedede. Mo nafura na Yekova ho mo akparakpee ni fuko dedede. (Oni gedi Atambuahe 142:2.) Na Yekova nafura foro ho mo adia regbo ni dedede kaa geda Fugoko na kini berẽkuriihe. (Oni gedi Yesaya 30:20, 21.) Ani makia nga wai gi fugo dagbase re anyakasa gaani pagume na Yekova, na kini sa gu gaani pagume re ni ndikidihe.

YEKOVA NAFURA NA MO ROGO WISIGO ZIAZIA KEKEAPAI

4, 5. Wai du Yekova afura na mo rogo Fugoko yo? Oni funga kpiapai.

4 Zanga kapa, mo ima ida kuti gupai nga Ziazia Kekeapai na gu pangbanga rogoyo nga ga Mbori fu aboro dunduko. Ono ya mo Ziazia Kekeapai napepa wai rengbe mo ka mbeda na Yekova? Nirengo si ima pehe. Ono wai du? Wa mo nika geda Ziazia Kekeapai na kini wisigihe dedede, mo asadi ka bi wai du gamo karagapai kuti agu apai si apehe na ki bi wai rengbe mo ka mangasunge na ni nibi agu apai du tipa ro; ni manga mo ho wo, gure nga mo na mbu Yekova ko nifura foro rogo Fugoko yo. Si nika saro mo du na mbembedi pagume na ko.—Eb. 4:12; Yak. 1:23-25.

5 Ni kpiapai, mo gedinga agu afugo Yesu naya, “Ka oni dúngura nga ũkumuko ni gaoni zegino ya,” na ki berẽkuriihe. Ka mo bihe nga mo namaa pa Kindo mbatayo rogo gamo raka, gure nga Yekova na ngbarago na mo. Ono ka mo bihe nga si naida mo sa gamo raka sidu taata tipa ka maa pa Kindo mbatayo, gure nga Yekova ima yugo gu bangiriba foro si aida mo mangi ariapai rogoho tipa ka mbeda na ko.—Mt. 6:19, 20.

6, 7. (a) Wai du du wisigo Ziazia Kekeapai na ome kurii gaani nyemuse tipa Yekova na gako tipa rani? (b) Gini ndupai si aida ani wisigi Ziazia Kekeapai na ni?

6 Wisigo Ziazia Kekeapai nakoda dungu apai si nayugo gu bangiriaba rengbe ani ka sona rogo toroyo ngbaha. Na si nakiiso gaani tambuahe tipa ga Yekova wene gene mangaapai, si kini sa rani ani kpinyemuko bakere gbe. Na ho gaani nyemuse tipa Mbori asona ni, gako nyemuse tipa rani nakio kina  ku mbatayo, rogo gi gene re, si kini nyakasi gaani pagume na ko.—Oni gedi 1 AKorindo 8:3.

7 Ono tie, tipa ani mbedi na Yekova, si naida ani wisigi Ziazia Kekeapai na wene ndupai. Yoane 17:3 naya: ‘Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.’ Ngba gi gene re, si aidanga ani wisigi Ziazia Kekeapai na gu ndupai gbua nga ka gbia inohe te ono si du tipa ka ‘ino’ Yekova wenengai ni boro.—Oni gedi Gate 33:13; Tam. 25:4.

8. (a) Wa ringbisiyo ho rogo 2 Abakindo 15:1-5, gini baka bangirise rengbe boro kadu na ni nibipa wai Yekova amangi Bakindo Azaraya? (b) Wai pa ino ani Yekova asa rani ka ani dunga na kapa kuti gako mangaapai ya?

8 Wa ani ka ino Yekova ni mbembedi bakurearani, ndupai adunga ho ani bakibangirani tipa gu kura apangbanga du rogo Ziazia Kekeapai yo ani agianga tirani na ni ya te. Ni kpiapai, ga bipai nga gine kuti gu gene Yekova amangipai ngbaha fu gu Bakindo aYudo nangia Azaraya? (2 Aba. 15:1-5) Oni ini gupai nga, wa si avura du nga “aboro atumo kindi ki ni zo fuõngua ri tumbatumba arago,” Azaraya tigako ‘aamanga gupai naru aru bangiri Yekova.’ Ono wa si avura duwo, “Yekova ki mangi bakindo, si du ko adu ni boro ngbataka ki da ti rago kpioko.” Tipagine? Gu pangbanga re apenga nduhe te. Ya mo si naida gipai re fudi rani watadu ka sa rani ani bakibangirani singia Yekova afu mbusa fu Azaraya zanga nduhe? Ka singia ani na wene inohe tipa wai Yekova amangaapai, si arengbanga ka fuda rani te. Gipai re nakoda ino gupai nga Yekova nafu mbusa ti aregbo dunduko “rogo ruru ringbisahe.” (Yere. 30:11) Gu ngbatunga inohe re nakido rani nga ka ani vura ka inongo gu ndupai Yekova amangipai ti ni wa gu ko amangihe fu Azaraya re ya, ani rengbe arengba kadu na kido nga gako asapangbanga ti aregbo dũ ni ruruhe.

9. Gini gopai nayugo gupai nga Yekova aduadu na wene ndupai beko ka sa Azaraya ni boro ngbataka?

9 Ono tipa gi pangbanga re, ima fura futufutu tipaha rogo gu kura papara Ziazia Kekeapai. Kina Bakindo Azaraya du i ayambako nga Bakindo Uziya. (2 Aba. 15:7, 32) Rogo gu pangbanga du rogo 2 Pekapai 26:3-5, 16-21, ani nawirika gupai yo nga, wa si avura du nga Uziya aamanga gupai naaru bangiri Yekova, kusa “kpotoko yo ki du na abiatise, ko mangi pai sa gbarasa tiko.” Mbiko diangbiti apai, ko aˈasadi ka zo fuõngua nga gu sunge nangia ga aboro motumo i aasianga paha fuko ya. Aboromotumo muambe-bawe na sa asadi ka ruga ko. Ga Uziya karagapai angia gine? Ko ayugupa gu rukö nadu tiko. Ko ‘azingi’ kuti agu aboromotumo re. Si airiwonga te ka bi gupai nga Yekova asako ni boro ngbataka!

10. Tipagine si aidanga ti ni ani kapa kuti ga Yekova mangaapai ya, na wai rengbe ani ka nyakasa gaani kido kuti ga Yekova ruru gene mangaapai?

10 Si aidanga ani zanga gia rogo gipai re yo te. Ka si adunga i apekanga gu kura apai tipa gupai nangia ga Bakindo Azariya rogo kura papara Ziazia Kekeapai te, a wa duhe tipa gu kura apangbanga du rogo Ziazia Kekeapai, ya mo mo rengbe ka ya runga gu gene Mbori amangaapai ngbaha te? Watadu mo rengbe ka berã gupai nga Ziazia Kekeapai na dungu apai rogoho nga gu naundo rani ani ini gupai nga Yekova namanga gupai du ni ruruhe ti aregbo dũ, na ko du ini gupai du ni ruruhe na irairaha? (Pa Rug. 32:4) A wa ani ka ino Yekova wenengai ni Boro, gaani nyemuse na tambuahe nika kio tipa gako mangaapai na ndupai adunga ho tipa ani kapa kuti gako mangaapai te. Tipa mo du na ngbatunga gi tambuahe re, si nasona mbiko gu ome mo amangaha tipa ka wisigo Fugoko na kini berẽkuriihe. (Tam. 77:12, 13) Manga gipai re  nika nyakasa gamo pagume na Yekova, na ki saha ni ndikidihe.

MO NAFURA NA YEKOVA ROGO KPARAKPEE YO

11-13. Wai du ini mo gupai nga Yekova nagia akparakpee agia? (Oni bi gu sura du ti tonatonaha.)

11 Ani nambeda na Yekova rogo kparakpee yo. Ho ani akparakpee ni fu Yekova, ani na tambuako, na kini mbuko ko ni ngbe furani ku mbatayo. (Tam. 32:8) Ono tipa gamo pagume na Yekova du ni ndikidihe, mo du wa ka mo idi kuti gupai nga ko nadega tuko adega kuti akparakpee.

12 Kura aboro idi kuti gupai nga kparakpee naundo boro berãni yo gbua. I na pe gupai nga, ka mo aberã gupai nga Mbori na karagapai akaraga kuti gamo akparakpee, si wo mbiko gupai nga mo na peka gamo aberãpai rogo fugoyo, ki ini gupai nambusa ro, na ki moiberãro tipa ka gbia zigaha. Kparakusayo ti agi a faida re, wai rengbe mo ka ino gupai nga Yekova na gia gamo akparakpee agia?

13 Oni makia nga gipai re: Mbata fu Yesu ye ku auru kpotosende, ko aima bi wai Yekova akaragapai kuti agu akparakpee nangia ga gako amoyambu. Fuo gure, ti regbo ga Yesu sunge tungusapai auru kpotosende, ko anaape gako aberãpai fu Bako ku ngbangbaturũ yo rogo kparakpee yo. Wa ka ko aberẽhe nga Yekova adeganga tuko kuti kparakpee te, ya mo ka ko adi gbanga regbo ka kpara na yuru sasasa? (Rk. 6:12; 22:40-46) Ya mo ka ko ayugu kparakpee fu gako abawiriki ka ko aberẽhe nga, kparakpee nga guhe naundo boro berãni yo gbua? Si tie ziazia nga, Yesu aima ino gupai nga kparakpee nga ndikidi fura na Yekova. Ti gu kura regbo sa, Yesu aya: “Buba, mi tambua ro wa gi mo pa re. Mi ini aina ya mo nagia pa re a waragoagira.” Ani ima rengba kadu na kido a nga Yekova “ninagia kpetambuahe” agia.—Yo. 11:41, 42; Tam. 65:2.

14, 15. (a) Gini aundo ani agbiaha ho ani ape kina boro gupai ni ani aidaha rogo kparakpee yo? (b) Wai du kparakpee aundo kura wirina sa ri nyakasi gari pagume na Yekova?

14 Ho mo ape kina boro gupai ni nzunzu mo aidaha rogo gamo kparakpee yo, mo naye ka ino gupai nga Yekova na karagapai akaraga kutini. Ho Yekova akaragapai ni kuti gamo akparakpee si nika sa gupai nga mo ni bi ko ni ndikidi boro. Kurigure, wa mo nika fura tipa agu apai du kpotoroyo  fu Yekova, kinawo ko nika mbeda na mo a.

15 Oni bingo gu kpiapai du tipa Kathy. * Ri anaagbia nga ngbarago gene tungusapai yo te, wa vura duhe nga ri anaatungusapai dedede. Ri aya: “Mi anaaidanga na tungusapai te. nirengo, mi a naaidanga ha nzunzu te. Ho mi ambu mangasunge marã ni, kura bakumba sa ape gupai nga ko namaabangirise nga mi nika manga sunge abazakigene amanga; na ko afu fuomu fere nga ga abazakigene. Mi adiberã ka mangasunge abazakigene, na mi atona kaa kparakpee fu Yekova na auru dũ nga ko undo re mi idi na sunge tungusapai.” Ya mo Yekova akaragapai kuti gari kparakpee? Ri aya: “Mi awere na garã biata kuti ngba sunge abazakigene. Pa dia mi bakere regbo ku gene tungusapai yo na ki ni wirikipai be gu kura awirina sa gupai nga mi ini wai ka tungusapai. Areme, anga mi naida natungusapai gbua te, ono mi nakpinyemuhe. Kurigure, gi pagume na Yekova ima du ni mbembedi he susi wai si adu mbata.” Ni rengo, ga Kathy akparakpee aundo ri tipa gari pagume na Yekova du ni ndikidihe.

MO MANGI GUPAI SI AIDA MO MANGIHE

16 Mbeda koyo du Yekova ni nga gupai ani kaa mangaha amanga kindi. Ani duwa ka ani mangi diandue ka mbeda na Mbori ka ani aida ko mbedi na ani. Ka kina ginipai vura manga amanga vurũ, ani nyenga anye kaa fura kindi na Mbori rogo wisigo Ziazia Kekeapai yo na kparakpee. Ni manga anihe wo, gaani pagume na Yekova nika du ni nyanyakihe na ki undo rani ani dibe aˈasada.

Sonosa wenepagume na Yekova nga gupai si aida boro naamangaha rogo gani raka yo (Oni bi genewaraga 16, 17)

16, 17. (a) Ginipai si aida ani mangihe tipa ka banda gaani pagume na Yekova si ni sono kina ku mbatayo? (b) Gini pai ani ka wisigoho rogo gu kekeapai naye fuo gere?

17 Ono tie, kpakaraapai rengbe ka kura ka si dunga pai gudu ho nambusa rani ani ki vura kaa kparakpee tipaha vurũ si ki banga abanga. Ti ngbatunga agu aregbo re, gaani kido kuti Yekova ima rengba ka zera. Ani rengbe ka tona baka bangirani singia Yekova nagia gaani akpee watadu ko abingo rani ni bakureako te. Wai rengbe ani ka diabe ngbatunga apai wa gure na kidu na gu kido nga gaani pagume na Yekova ni ndikidihe? Gu kekepai naye fuo gere nika fura tipa gipai re.

^ genewaraga 2 Pagume nga gu gene aboro aberãpa tiyo na kini mangipai futiyo ngbaha. Rogo gi gene re, agi aboro ue re dũ si aida i mangi ome ka nyakasa gayo pagume.

^ genewaraga 15 Ndikidi rimori ngaha te.