Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Zerekpe 2015

Oni Kido Kuti Yekova ti Aregbo Dũ!

Oni Kido Kuti Yekova ti Aregbo Dũ!

“Ako oni nga aboro, oni nikída kuti ko na arago dunduko.”—TAM. 62:8.

1-3. Wai du ga Pauro kido kuti Yekova adu ni nyakasinyakasihe? (Oni bi gu sura du ti tonatonaha.)

SI ADU ni kpakarapai kadu ni Kristano Roma yo. Bambiko i abira yo tipa gu we nazo rago yo rogo gu garã nangia 64 Fuo Batikayo Kristo, na ki kiti ngbangayo nga i nasoga kura aboro, na aboro aasoga yo ni kerehe. Ka mo angia Kristano ti gu regbo re, wo ka i anaazio ro dedede na mo kini gbia nyanyaki ambusa. Wo ka mo anaabi awirinamo kere anya ni sipi yo na i kini kenge aguyo kuti ngbunduru ngua na kini zo aguyo i nihasi rago yuru.

2 Si nawira wa gi kere regbo re du nangia gu ue regbo Pauro adu bambukiso Roma yo ti ni. Ya mo gu kura aKristano aye ka undo ko? Si nawira wa Pauro abaka bangiriko abaka ti tonatonaha, mbiko ko akepai fu Timoteo nga: “Rago gi bambata sapangbanga a nga boro sa nadu fere te.” Wa si avura du wo, ko aima ino gupai nga boro adu kinaho naaundo ko. Ko aya: “Ono Gbia naru pati re ki nyakasi re.” Yesu aima fu gu ome fuko ko  aidaha. Wai du gipai re aundo ko? Oni bingo gu sangbanapai namangi, ko aya: “I abatasi re be ngba bahũ.”—2 Tim. 4:16, 17. *

3 Berãkurii gipai namangi Pauro re aima nyakasa ko, si aundo ko ko kido kuti Yekova na ki undo ko ko hi agu apai ko agbia tiko na ni ti gu regbo re na gu narengbe ka manga ko ku mbatayo. Nirengo, ko ape gupai nibasa nga: “Gbia akusa re be gbegberẽ mangapai dũ.” (2 Tim. 4:18) Pauro aima ino gupai nga ka aboro avuranga ka undo ko ya, gu undo Yekova na Wiriko afuhe nga ndikidihe!

MAMU TIPA KA “KÍDA KUTI YEKOVA”

4, 5. (a) Da rengbe mo ka gbia undo be ni ti aregbo dũ? (b) Wai rengbe mo ka nyakasa gamo pagume na Yekova?

4 Ya mo mo abingo tiro nga mo nagbia tiro na akpakarapai nisaro? Si rengbe kadu nga zingo sunge, soapai sukuru yo, kaza, watadu gu kura apai naba gberãrago tiro. Watadu mo sanahe tipa undo, ono ka i aundongo ro ya. Nirengo, gu kura apai kinaho aboro arengbanga ka nyasa riipaha ya. Ti ngbatunga agu aregbo du wa gure, ya mo gu rugute naya, oni “kída kuti Yekova” nga kungbopai gbua? (Snz. 3:5, 6) Ya mo kido kuti Yekova nga kungbopai? Wagu sa te! Gu undo naye be Yekova nga ndikidihe, a wa duhe rogo agu apangbanga nga ga Ziazia Kekeapai.

5 Kuba gupai nga ani du na gberãrago ho duhe ni nga aboro arengbanga ka undo rani te, si naida ani bi gu regbo re wakina gu Pauro abihe nga regbo tipa ka kido kuti Yekova nga ko nika undo rani aundo. Si nika nyakasa gaani kido kutiko na ki sa gupai nga gaani pagume na ko du ni ndikidihe.

DU NAKIDO NA NYANYAKIPAHA TIPA GAANI PAGUME NA YEKOVA

6. Tipagine rengbehe kadu ti ni ni kpakarapai ka kido kuti Yekova ho du ani ni rogo kerepai?

6 Ya mo mo rengbe ka peka agu apai nafuda ro fu Yekova rogo kparakpee yo na ki gbia zereda berãro yo mo na ini gupai nga mo ima manga gupai si naida mo mangihe? Mo ima rengba kadu na zereda berãro yo nirengo! (Oni gedi Atambuahe 62:8; 1 Petero 5:7.) Manga mo ho wo nika sa gupai nga mo sonosi wene pagume na Yekova. Wa vura duhe wo, si ima rengba kadu ni mbumbupai ka kido nga Yekova nika fu guhe afu furani ani aidaha. Tipagine? Mbiko Yekova akaraga nga pai nibasa kuti akparakpee te.—Tam. 13:1, 2; 74:10; 89:46; 90:13; Abak. 1:2.

7. Tipagine Yekova akaraganga pai ti ni nibasa kuti gaani akparakpee ti aregbo dũ ya?

7 Tipagine Yekova akaraganga pai ti ni nibasa kuti agu apai ani asanako tipaha ya? Oni tingidi gupai nga ko ringbisi gaani pagume na ko kuti gu pagume du dagba agude na bayo. (Tam. 103:13) Gude arengbanga kadu na kido nga agu ahe dunduko ni asana bani tipaha ni nika gbiaha agbia ti gu regbo ni asanahe tipaha te. Si rengbe kadu nga guhe gu gude re asanahe tipaha ni aidanga ha aida nzunzu te. Gu kura ahe kinaho si aida i sungudi wene regbo tipaha. Agu akuraha arengbanga ka undo gu gude re watadu gu kura aboro te. Kurigure, ka bagude amangapai kuti agu apai dũ gude asanahe tipaha si rengbe ka sa gupai nga bagude da ni kanga fu wirini. Wakina gure a, Yekova arengbanga ka karagapai niˈipo furani tipa guhe ani aidaha te na gipai re tipa kina gaani wenepai. Gure nga gako rengo wangia ko Bakusirani, Bairarani, na ni gu Barani du ngbangbaturũ yo. Ka Yekova amanga agu apai  dunduko ani akpinyemuhe si ima rengba ka gbarasapa gu pagume du dagbarani na ko.—Oni ringbisinga ha na Yesaya 29:16; 45:9.

8. Ginipai Yekova akido rani na ni nibipa gaani arungbura?

8 Gu kurapai rengbe kadu nga Yekova ima inopai tipa gaani arungbura. (Tam. 103:14) Sidu, ko ambunga rani ani hipai kina ngba gaani ome te, ono ko naundo rani aundo. Rengo ngaha nga, gu kura aregbo kinaho rengbe ani ka berãha nga ani arengbanga ka hipai te. Ono Yekova nakido rani nga ko ambunga gako amoyambu i mbu susi gu rengbe yo ka hihe te. Ni rengo ko “ambakada gene kura be he” ambakada furani. (Oni gedi 1 AKorindo 10:13.) Sidu tie, ani na wene ndupai berani ka kido nga Yekova ima ino gupai rengbe ani ka hihe.

9. Ginipai si aida ani mangihe ka ani bihe nga ani agbianga karagapai kuti gaani kparakpee niˈipo te?

9 Ho ani agbianga zereda ni berãrani yo nibasa tipa gupai ani nakpari tipaha ya, si naida ani sungudi gu Ko nika undo rani ti wene regbo. Oni tingidi gupai nga ko na zerangbaduse, bambiko ko na nyemu ka batasarani. “Yekova nasunguda roni ti nika du na undahe fu roni; si du du ko ti ni ni kiisikiisi pako ka ina pai fu roni. Bambiko Yekova nga Mbori ruru sarangbanga; maku du fu agu yo dunduko nasunguda ko.”—Yes. 30:18.

“NGBA BAHŨ” YO

10-12. (a) Wai rengbe apai kadu ni kpakarakpakaraha fu gu Kristano nangerafuo kazakaza gume ni? (b) Wai rengbe kido kuti Yekova ti regbo kpakarapai kadu na ome kurii gaani pagume na Yekova? Oni funga kpiapai.

10 Ho du mo ni rogo kpakarapai, mo ima rengba ka bi tiro wakina Pauro si ki du wa ka i ya mo ima mbeda ku “ngba bahũ” yo. Gere nga gu regbo si na ima kpakara ka kido kuti Yekova, ono si ni nyanyakipa pai ani kido kutiko. Ni kpiapai, ani ya nga mo nangerafuo borokporo nga gu ni du na bangabanga kaza. Si ima rengba kadu nga mo ima kpara tipa tatamana na ome. * Ka mo mangi agu apai dunduko si aida mo mangihe, ya mo mo arengbanga ka gbia zereda berãro yo ni ino mo gupai nga Yekova nabi ro abi na ko nika undo ro aundo mo nye ni ruru ro te?—Tam. 32:8.

11 Oni rengbe ka bihe nga Yekova aundo nga roni te. Na amunganga ima rengba ka gumba dungu apai furoni. Singia agu agumeroni oni adu nakido nga i rengbe ka fu wasa furoni, rengbe ka sa raka furoni ni kpakarakpakaraha. Si naida oni ningere ku be Yekova tipa undo. Na oni nimbedi na ko. (Oni gedi 1 Samuere 30:3, 6.) Ho oni nika gbia undo ni be Yekova, gaoni pagume na ko nika nyaka.

12 Linda * aini gupai nga rengo du nga gipai re ho ri aangera ni fuo kazakaza avunguri. Ri aya, “Ti agu aregbo re, mi, kumbami gbiakuti kawire ainongo gupai ka ani mangihe te. Ani abi tirani ti kura aregbo nga gene berani te. Ho ani angerani kusayo ani nabi wai abi nzunzu Yekova aundo rani. Ko anyakasi rani na ki fu guhe furani ani aidaha, zavura ti gu regbo ani anaabi tirani nga ani ainongo gupai si aida ani mangihe te.”

13. Wai kido kuti Yekova aundo gu kura wirina sa ri dibe akpakarapai?

13 Kido kuti Yekova nika undo rani ti gu regbo du ani rogo kpakarapai. Ti gu regbo kumbaku Rhonda angianga Dezire Yekova ya aida i mbutiyo, i abi kere kaza ti kawiri.  Bete adiwi kusa, dia kawiiri akpi. Ho ri abi tiri ni nga ri ima tona ka hu be gi kereapai ri agbia tiri na ni re, ri atona ka mangasunge abazakigene. Ngbutuko fuo gure, nari akpi. Ginipai naundo Rhonda ri du na diabese? Ri ape gupai nga: “Mi anaafura na Yekova na auru dũ, zavura tipa rukutu adiaberã. Mangaha wo sa Yekova ko du ni ndikidi boro fere. Si asare mi ni kido kuti Yekova angianga kuti tire watadu kuti kura aboro ya. Na gu undo ko afuhe fere adu ni ndikidihe, ko afu agu ahe fere mi aidaha. Ni sangbanaha, mi ima bi wai Yekova naundo re.”

Zavura kina dagba gaani aborokporo asada ima rengba ka gbia rani tipa gaani pagume na Yekova (Oni bi genewaraga 14-16)

14. Gini kido rengbe ruru Kristano kadu na ni ho i nakusi gumeni ni rogo dungurati?

14 Oni bingo gi kurapai re. Ani yanga i kusi gumero rogo dungurati. Vurube gu wirikapai nga ga Ziazia Kekeapai mo ima ino wai si aida i nimangipai na gu boro i nakusi ni rogo dungurati. (1 Kor. 5:11; 2 Yo. 10) Wa vura duhe wo, si ima rengba kadu ni kpakarapai tipa ka mangapai kuti gu diaberã nga ga kusa boro rogo dungurati. * Ya mo mo rengbe kadu na kido nga gu Bamo du ngbangbaturũ yo nika nyakasa ro anyakasa tipa mo ru nyanyaki ka mangapai kuti agu arugapai nga ga Ziazia Kekeapai nibipa gu boro i nakusi ni rogo dungurati? Ya mo mo nabihe nga si nga momu foro tipa mo nyakasi gamo pagume na Yekova nidu mo mbembedi na ko?

15. Tipagine Adamu abasasangba Yekova ti ni ati Edene yo?

15 Nibi gipai re, oni berẽnga tipa gu bambata kumba nangia Adamu. Ya mo ko aidi kuti gupai nga ko rengbe ka basasangba Yekova ki nye kaa raka araka  kindi? Oó, bambiko Ziazia Kekeapai naya “i ananga nga Adama te.” (1 Tim. 2:14) Tipagine tie ko abasasangba ti ni? Adamu ari gu zuzu ngua diako afuhe fuko mbiko gu nyemuse ko adu na ni koyo du ri ni. Ko adegetuko fu diako kuba gupai nga ko degetuko fu gako Mbori nga Yekova.—Bam. P. 3:6, 17.

16. Da si aida gaani nyemuse du ni nyanyakihe tipa ni, na tipagine?

16 Ya mo gipai re nayugo gupai nga si aidanga ani du na nyanyaki nyemuse koyo du agumerani ni te? Wagusa te! Ono si naida gaani nyemuse du ni nyanyakihe gbe koyo du Yekova ni. (Oni gedi Matayo 22:37, 38.) Gipai re tipa kina gu wenepai nga ga agumerani, singia i nairiso Yekova awere watadu i airisonga ko te. Mo ni nyakasi gamo nyemuse tipa Yekova ni kido mo kutiko. Ka si du nga pa kusayo gumero rogo dungurati naba rungo tiro, mo peke agu apai nafuda ro fu Yekova rogo kparakpee yo. * (Rom. 12:12; Frp. 4:6, 7) Mo mangisunge na gu regbo du mo rogo kpakarapai ka sa gamo pagume na Yekova si du ni ndikidihe. Gipai re nika undo ro mo du na kido kuti Yekova tipa gu wene sangbanapai rengbe ka kura.

GU REGBO ANI KAA SUNGUDO

Oni yugu gaoni kido kuti Yekova ni tungusa oni pai dedede

(Oni bi genewaraga 17)

17 Tipagine i abatasi Pauro ti ni “ngba bahũ” yo? Ko aya, “ya mi taki pande tungusapai sirisiri, aGendiria gi he dunduko.” (2 Tim. 4:17) Ani nakido nga, wa ani kaa tungusapai wa Pauro anaamangaha, Yekova nika “kpamia” agu ahe akpamia furani ani aidaha. (Mt. 6:33) Wa du ani ni abatungusipa Kindo, Yekova ima “asia pa wene pangbanga furani,” na ko nabi rani ni gako “abadiasunge.” (1 Tesa. 2:4; 1 Kor. 3:9) Ka ani du zaaza tingba ga Mbori sunge, si nika du furani taata ani sungudi gu regbo ko nika undo rani ti ni.

18. Ngba gini agene rengbe ani ka sonosa gaani kido kuti Yekova na ki nyakasi gaani pagume na ko?

18 Gere nga regbo tipa ani nyakasi gaani pagume na Mbori. Ka si du nga pai ho naba bakabangirise tirani, si naida ani mangisunge na ni ka mbeda koyo du Yekova ni. Ni rengo, ka ani ageda fura Mbori na kini berẽkuriihe, kini kpari fuko zanga piriga, na kini mangi agu apai nga ga toro, ani rengbe kadu na kido nga ko nika batasarani be agu apai nagbia rani awere na gu nika ye ku mbata yo.

^ genewaraga 2 Si ima rengba kadu nga gu “ngba bahũ” yo Pauro afura tipaha re nga kina boro ndikidi bahũ watadu si aru ku ba kurapai.

^ genewaraga 10 I ima kusa gu kura kekeapai nga gu rengbe ka undo aKristano i rengbe ka hi akaza na ka undo agu aboro na ngerafuo aborokaza. Oni bi gu Awake! nga ga

Wegebe 8, 1994;

Wegebe 8, 1997;

Merekoko 22, 2000; na