Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Zerekpe 2015

Abaakumba, Oni Nabipa Raba Kura Aboro Wai?

Abaakumba, Oni Nabipa Raba Kura Aboro Wai?

“Were ahe na regboho ti ni dunduko.”—BATU. 3:1.

1, 2. Ginipai ababi adungurati nabihe rogo dungu adungurati?

BABI adungurati nambeda ka nyasa gako dunguratise na abaakumba. Wa ko angera ku kpakpuyo yo ko na bakere nyemuse tipa agi ababanda akandoro namangasunge nyanyaki re, aguyo ima gbinza na i ima rengba kadu ni bako. Wa vura duhe wo, ko nabaka bangirise, na ko sana yo nga, “Awirina, ginipai oni namangihe tipa ka raba kura aboro tipa i rẽ sa agu atindiro nga ga dungurati?” I ima tingida gupai nga gu ye ko aye mbata ko aya fuyo wẽ si naida i moiberã yo tipa ka raba kura aboro. Ni yangaraha, gu kura bakumba sa ya, “Ka pe guhe nga rengo ani mangi pai gbua tooni.” Gu kura abaakumba wo ti riyo nga kina rengo du.

2 Kangia bakumba nga mo, ya mo mo rengbe ka maa tiro ku rogo gu bangiriba nga ga agu abaakumba re? Si nawira wa pai wa gure ima du tipa ro. Ababi adungurati rogo zegino dũ ima gbiatiyo na ngbatunga agi apai re, si naida i mangi ome tipa ka raba awirina, paranga yo na gu sosono yo tipa i ningerefuo akandoro. Gipai re ima kpakara ni rengo. Tipagine duhe ti ni wo?

3. (a) Wai Ziazia Kekeapai ayugo nyakapa raba kura aboro, na tipagine si aida ani du ti ni na nyemu ka raba kura aboro? (Oni bi gu kekeapai du bandu waraga yo) (b) Tipagine rengbe kura abaakumba ka bihe ti ni ni kpakarapai ka raba kura aboro?

 3 Wa du oni ni babanda akandoro, oni ima ino gupai nga si naida i raba kura aboro araba. * Oni ima ino gupai nga si naida kura awirina rogo dungurati tipa ka nyakasaha na tipa ka zaka kura vovo adungurati berewe. (Oni gedi Yesaya 60:22.) Oni ima ino gupai nga Fugo Mbori na ngarasa roni nga oni ‘yugo pai fu kura aboro.’ (Oni gedi 2 Timoteo 2:2.) Wa vura duhe wo, wakina agu abaakumba ani nifura tipa yo ti tonatonaha, oni ima rengba ka bihe ni kpakarapai ka yugopai fu kura aboro. Tifuo ngerafuo gamo aborokporo, gamo sunge, agu apai nga ga dungurati, na agu apai si aida mo mangihe niˈipo, mo rengbe ka bihe nga kina wiri bete regbo nye bero tipa ka raba kura aboro rogo dungurati. Wa vura duhe wo, ani bingo agu apai nyaki gupai ti ni nga ga raba kura aboro.

SI NAIDA I RABA ABORO NIˈIPO

4. Gini ndupai rengbe ka sa gupai nga ka abaakumba raba nga kura aboro rogo dungurati ya?

4 Gini ndupai sa rengbe ka sa abaakumba ka i gbianga regbo tipa ka raba kura aboro ya? Isoke kura abaakumba naberãha nga: ‘Pa raba kura aboro gu duadu na nyanyakipa ha, ono anga si ni gupai si aidaha niˈipiipihe wa gu kura apai nga ga dungurati i arengbanga ka mbu paha ya te.’ Si rengbe kadu nga agu akurayo naberã gupai nga: ‘Ka si du nga mi araba nga kura aboro awere te, dungurati nikaa ndu andu ku mbatayo.’ Wa vura duhe nga dungu apai kinaho si aida i mangihe niˈipo, zanga raba kura aboro ima rengba ka gbarasapa dungurati rogo toro yo.

5, 6. Ginipai rengbe ani ka wirikaha ti gu bipai nga ga bakama tarambiri tipa ngerafuo makana, na wai rengbe gipai re kadu tipa raba kura aboro rogo dungurati?

5 Oni berẽnga pa gi kpiapai re: Bakama torombiri ima rengba ka ino gupai nga tipa ka banda gako torombiri si nimangisunge kindi si naida ko naauka nzeme ku rogo makana ha dedede. Wa vura duhe wo, ko rengbe ka bihe nga si ni gupai si aidaha ni ipiipihe wa uka giazi ku rogoho te. Nirengo ka ko auka nga giazi ku rogo gako torombiri ya, si naru nibasa. Ko rengbe ka berã gupai nga ‘ka mi auka nga nzeme ku rogo makana torombiri ya, si rengbe arengba ka ndu tipa wiri bete regbo.’ Ono gini kerepai du ti gipai re? Ka si du nga bakama torombiri auka nga nzeme ku rogo makana ha te, regbo adu kinaho si nika gberã bara sa kindi. Ono ka gu tarambiri re gbere, si nika ida ni tumo bakere marã tipa ka mbakadaha. Ginipai ani awirikaha ti gipai re?

6 Abaakumba na dungu asunge beyo si aida i mangihe niˈipo; ka i amanganga ha wo ya dungurati duadu ngbapai. Wakina gu bakama tarambiri nangba giazi kindi ku rogo gani tarambiri yo, kinawo si aida abaakumba ‘rugutiyo na pa agu apai du na nyanyakipa ha.’ (Frp. 1:10, NW) Ono tie, kura abaakumba nangerafuo agu apai si aida i mangihe niˈipo na bangiriyo kini go ti raba kura aboro, du rogoyo nga ngerafuo makana tarambiri. Ka si dunga abaakumba araba nga kura aboro awere te, si ima rengba kadu nga gu dungurati re adu nga na agu aboro nika rẽ tipa ka ngbembatayo rogo apai yo te.

7. Wai du si aida ani naabi agu abaakumba nadia regbo tipa ka raba aboro?

 7 Si tie ziazia nga, si aidanga ani naberã gupai nga pa raba kura aboro ni gupai anyakanga paha ya te. Agu abaakumba nabi gupai du ku mbatayo tuturũ na ki mangipai ka raba agu awirina adunga na inohe gbe ya i nga tatamanatatamana buruku na i nga pa maku fu dungurati. (Oni gedi 1 Petero 4:10.) Gini undo dungurati agbiaha be gipai re?

WENE MANGASUNGE NA REGBO

8. (a) Gine nasa abaakumba i raba kura aboro, na tipa gine? (b) Gini nyanyakipa sunge du be agu abaakumba namangasunge rogo gu rago du na bakere zingo rogoho? (Oni bi gu sanduki nga “ Nyanyakipa Sunge.”)

8 Zavura agu abaakumba naima du na inohe gbe, si naida i ini gupai nga wa garã yo nikaa nge kinawo gene nikaa dunga berewe beyo tipa kaa manga dungu apai rogo dungurati ya. (Mika 6:8) Berewe a, si naida i ini gupai aino nga “rago gbia kuti mamu” rengbe ka sa yo ka i mangingo gu gayo asunge nga dungurati berewe ya. (Batu. 9:11, 12; Yak. 4:13, 14) Mbiko gu nyemuse du agu abaakumba na ni nangera ku mbatayo tipa ga Yekova akandoro, i naraba gu paranga awirina du rogo dungurati na gu inohe i nagbiaha vuru agu agarã dunduko i namangisunge ni ruruyo fu Yekova.—Oni gedi Atambuahe 71:17, 18.

9. Ginipai nika manga ku mbatayo nga gu si aida i raba aboro awere tipaha?

9 Gini kura nduapai du agu abaakumba ti ni naraba kura aboro ni pa maku fu akandoro? I nanyakasa dungurati. Ngba gini gene? Gu ome abaakumba amangaha ka raba kura aboro nasa gupai nga awirina nga akumba duho nga aguyo nika nyakasa dungurati si ru nyanyaki na ki du na kodatise, angianga kina awere ya, ono gbe ti regbo gu kpakarapai nga ga regbo bakere gberãngbi. (Yeze. 38:10-12; Mika 5:5, 6) Sidu tie, ani nahõpai beroni abaakumba oni moingo ho ni gaoni sasa tipa ka tona raba kura aboro kina areme.

10. Ginipai si aida bakumba mangihe tipa kadu na regbo beni ka raba kura aboro?

10 Rengo ngaha nga, ani ima inoho nga gu regbo oni adiaha kutingba manga gu nyanyakipa asunge nga ga dungurati ima rengba ka batasa omeroni ka gene adunga beroni wa ka oni mangi kurapai ya. Sidu, si naida oni di bete gu regbo re tipa ka raba kura aboro. (Batu. 3:1) Mangaha wo rengbe kangia wene mangasunge na regbo.

ONI SA APAI SI DU TAATA

11. (a) Ginipai bi oni he tipa agu aberãpai abaakumba afuhe tipa raba kura aboro rogo aringara ni bakiakia? (b) Ringbisihe kuti Asanza 15:22, tipagine si nika du ti ni ni wenepai ka makiapa agu aberãpai gu kura abaakumba afukuhe?

11 Bambeda kusayo, i asana badona nga ga abaakumba nga agu yo du na diabese rogo raba kura awirina i sono rogo toroyo nga, ginipai i naamangaha ka raba kura aboro. * Wa vura duhe nga agu apai du tipa agu abaakumba re ni bakiakia, agu arugute i afukuhe aima wira tihe gbe. Gipai re nayugo ginipai? Gu rabahe du mburuhe ri Ziazia Kekeapai fu agu aboro nawirikapai rogo arago dũ na rogo adungurati wakina gu si adu ti rago gu mokedi nangia Pauro. (1 Kor. 4:17) Sidu, rogo gi kekeapai re na gu ngbefuoho, ani nika wisigo agu aberãpai agi abaakumba re afukuhe. (Snz. 15:22) Rogo gi kekeapai re, i nika yamba agu aboro naraba he nga “abayugupai” na aguyo i araba yo nga “abawiriki.”

12. Ginihe si aida bayugupai mangihe, na tipagine?

 12 Si naida bayugupai sa apai si du ni wenehe tipa ka raba bawiriki. Kina wai si aida basopobino sopo gani bino mbata fu ni ruhe, kinawo du a si aida ni mbakadi ngbadu bawiriki yo mbata fu niyugu vovo abirĩ funi. Wai rengbe bayugupai ka mbakada kpoto bawiriki yo wenengai tipa rabahe? Ni peka ni fuo gu kpiapai nga ga gu nebi naadu mbata. Ginipai ko amangihe?

13-15. (a) Gini sunge i afuhe fu Samuere? (b) Wai du Samuere amangi gi sunge i afuhe fuko re? (Oni bi gu sura du ti tonatonaha.) (d) Ginipai du gu pangbanga nga ga Samuere ti ni na nyanyakipa ha fu abaakumba areme?

13 Rogo kura uru sa agarã wa 3,000 kusayo, Yekova aya fu gu gbinza nebi nangia Samuere: “Gba ti saa wa gere mi akéda kumba koyo du mo ni naye ringara Benyamina yo, mo ki mbedi ko ni nzeme, ko dú ni bazogo ku ri gimi aboro aYisaraere.” (1 Sam. 9:15, 16) Ko aima ino gupai nga gako sunge ngbe ku mbatayo ima da ti digidoho na Yekova afu gu sunge fuko nga ga mbeda kura boro nidu ku ba ko. Si nawira wa Samuere aima berã gupai nga, ‘Wai rengbe mi ka raba gi kumba re tipa gi sunge re?’ Ko aberẽ kurapai na ki bi wai ka manga gupai ko aberẽhe re.

14 Rogo kura girorago, ho Samuere abi Saura ni, Yekova aya fu gu nebi re wẽ: ‘Gu kumba re du re.’ Samuere atona ka manga gupai ko aberẽhe. Ko ayambu Saura tipa riahe. Ko afu wene basungo fu Saura na gako moyambu na ki moi wene kparakpara pasio barangba yo na Samuere ki ya: “Mo rí he; bambiko i ni banda ha tipa ringbisiringbisi rago tipa ro.” Tingbafuo gure, Samuere na Saura azoro ri bambuyo i ki ta fura afura gene nindu kua Samuere yo. Samuere agbia wene regbo ho i ari riahe ni gbiati ho i aandu ni na ko, na ko amangisunge wenengai na gu regbo re. Ko ayambu Saura kurii gako bambuyo. Ho wene wege aya ni nyemu Samuere “ki fura na Saura ri bambu yo” da ti gu regbo i api ka ra. Rogo kura girorago, Samuere ki mbedi Saura ki nyoro pangba ko na ki fu gu kura arugapai fuko. Fuo gure, ko ki ya fu Saura ko ndu, tifuo ko mbakadi ko tipa gu sunge ko nika mangaha.—1 Sam. 9:17-27; 10:1.

15 Rengo nga ha, mbeda boro ni ngbembatayo rogo ringara kia ti raba boro nida ni bakumba watadu moundo abaakumba rogo dungurati. Ono wa vura duhe wo, abaakumba ima rengba ka wirika dungu apai ti gu gene Samuere amangipai ngbaha. Ani bingo apai ue dagba agi apai re.

ONI DU NA NYEMU KA YUGOPAI NA NI WENE ABAKURE

16. (a) Gini bipai Samuere adu na ni ho aYisaraere asanahe ni tipa bakindo? (b) Gini bipai Samuere adu na ni ho Yekova ayani fuko ko mbedi Saura?

16 Oni du na nyemu ka yugopai, angianga kaa dindiko adindiko ya. Ho Samuere agi gupai ni mbata nga aYisaraere naida i moi boro ni bakindo kuriyo, rago agbere tiko ni kerehe na ko abi tiko nga gako aboro aidanga na ko te. (1 Sam. 8:4-8) Nirengo, ko adindiko adindiko tipa ka manga gupai aboro aaidaha, Yekova aya fuko bara biata ko gi gupai i apehe. (1 Sam. 8:7, 9, 22) Wa si avura du wo, Samuere adunga na imisiri ngbaduse watadu kpipai kuti gu boro si adu nga ni nika diaba ko te. Ho Yekova aya ni fuko ko mbedi Saura, gu nebi re agi sangba Yekova angianga mbiko gupai nga si angia gupai si aida ko mangihe ya, ono mbiko nyemuse.

17. Wai du abaakumba awirika gu bipai Samuere adu na ni, na gini ngbarago i agbiaha?

17 Wakina Samuere, agu abaakumba du na inohe i na kina ngbatunga gu bipai re. (1 Pet. 5:2) Ngbatunga agu abaakumba re abakanga bangiriyo nga agu aboro i araba  yo re nika dia bete gayo amomu beyo rogo dungurati te. Gi wene sino abayugupai re abingo abawiriki ni avurayo te, ono i nabiyo ni “amounda” ni wene gamahe fu dungurati. (2 Kor. 1:24; Eb. 13:16) Nairiwo gu ngbarago du agu abayugupai re na ni ka bi wai agi abawiriki re amangasunge na gu tatamana du yo na ni ka undo dungurati!—Amo. 20:35.

18, 19. Wai du rengbe bakumba ka mbakada ngbadu bawiriki yo, na tipagine nyakipa gipai re ti ni?

18 Oni du ni bakure, angianga kina bayugupai ya. Gu uru Samuere agbia Saura, ka ko agbe kina ndukura nga ga nzeme na ki ukaha kurii Saura yo ni kina boro ipo na ki ya fu gi vovo bakindo re ko ndu, ka ko ambedi ko tigu ono ki zanga mbakada ko tipa gu sunge ko aandu ka mangaha. Kuba gure, Samuere adi regbo tipa ka mbakada ngbadu Saura yo wenengai. Mbata fu Samuere mbedi ko, i ari riahe ki ta tingba wene gbodogbodo nyemu, kini fura tipa gbanga regbo na ki ongodi wenengai.

Raba kura aboro natona na manga pabakure (Oni bi genewaraga 18, 19)

19 Wakina gure a, si naida bayugupai tona gani rabahe na sa apai si du taata na ki zi bakure na bawiriki. Agu adiandue si aida bakumba dihe tipa ka sa apai si du taata re ni bakiakia ringbisihe kuti gupai du rogo gani dagbarago. Wa vura duhe wo, ka si vura dunga mo na raka rogo gini rago vuru na kini mangi kura asunge ka regbo adunga bero ya, ono mo kini di regbo tipa kadu na bawiriki, gure wa ka i ya mo na ya funi wẽ: “Mi nabi ro abi na nyanyakipa ro.” (Oni gedi ARomo 12:10.) Agu abawiriki du na nyemu ka wirikapai ima rengba ka rugatiyo na gipai re wenengai na ki bihe na nyanyakipa ha gbe rogo arago dũ.

20, 21. (a) Wai rengbe mo ka sakapai tipa bawene bayugupai? (b) Ginipai ani nika wisigoho rogo gu kekeapai naye fuo gere?

20 Abaakumba, oni tingidi gupai nga: Bawene bayugupai nga gu boro nakpinyemu ka yugopai fu kura boro na kini kpinyemu gu boro ni ayugopai funi. (Oni ringbisinga ha na Yoane 5:20.) Bawiriki nakparia gu sino du ti bayugupai re ni kina ipo, na si na ome kurii wai ni nika mangapai kuti gu rabahe ni agbiaha. Sidu tie, abaakumba, wa oni kaa raba kura aboro si naida oni du ni abakure yo.—Snz. 17:17; Yo. 15:15.

21 Tingbafuo mbakada ngbadu bawiriki yo, si naida bakumba raba ni tie. Gini apai si aida bakumba mangihe? Ani nika sakapai tipaha rogo gu kekeapai naye fuo gere.

^ genewaraga 3 I ke gi kekeapai re na gu ngbefuoho fu abaakumba, ono wa vura duhe wo, si naida gu kura aboro rogo dungurati duadu na nyemu gupai i asakaha re. Tipagine? Mbiko si nika ngarasa agu abatungusipai dunduko nima zio bapatiza nga si naida i gbia rabahe tipa ka rẽ tipa agu atindiro nga ga dungurati. Na wa gipai re nikaa manga, aboro dunduko nika gbia undo.

^ genewaraga 11 Agi abaakumba re naraka rogo agu aringara nga Australia, Bangladesh, Belgium, Brazil, France, French Guiana, Japan, Korea, Mexico, Namibia, Nigeria, Réunion, Russia, South Africa, na United States.