“Ko ki fu ataranda bisue fu gu ni, ki fu ra ue fu gu ni, ki fu ru sa fu gu ni.”MT. 25:15.

1, 2. Tipagine Yesu ape gu kpiapai ti ni nga ga ataranda?

ROGO gu sanza nga ga ataranda, Yesu ayugupa gu sunge si aida mbedimbedi apefuoko mangihe. Si naida aida ani girogo gu sanza re yo mbiko si nabi ruru aKristano dunduko, singia i na gu maabangirise nga ga raka ngbangbaturũ yo watadu ga raka auru kpotosende.

2 Yesu ape gu sanza nga ga ataranda re ni karagapai kuti gu sanahe gako abawiriki afuhe tipa “ina pa ga[ko] ye ti ni, na pa digida rago.” (Mt. 24:3) Ngba gi gene re, gu sanza re nadigisotihe ti gi gaani regbo re, na si nga gupai ani ainopa du Yesu ti ni na ome kindo beko.

3. Gini apai ani awirikaha ti agu akpiapai du ni kekehe rogo Matayo kapita 24 na 25?

3 Gu sanza nga ga ataranda wakina agu asanza du biama du ni kekehe rogo Matayo 24:45 kuti 25:46. Gu kura asanza du biata nafura tipa ruru kangara moyambu, ngasu adee bawe, na akandoro gbiati ameme a nga papara ga Yesu karagapai kuti gu sanahe nabipa gu goapai nayugopa yangara arame. Rogo agu asanza du biama re dunduko, Yesu afura tipa agu apai i nika ino ruru apefuoko ti ni ti yangara arame. Gu sanza nga  ga kanga, ngasu adee, na ga ataranda, si fu mbedimbedi apefuoko. Rogo gu sanza nabipa ruru moyambu, ko afura tipa gu umba rika nga ga mbedimbedi aboro ko afu gu sunge fuyo nga ga riga gako aborokporo ti yangara arame nga i du ni ruruyo na tatamana. Rogo gu sanza nga ngasu adee, ko anyakasipa gupai nga mbedimbedi aKristano si nika ida i mbakaditiyo na kini ngere angera, ki ini gupai nga Yesu nika yeaye ono zanga ino gu uru ko nika ye ti ni watadu regbo. Rogo gu sanza nga ga ataranda, Yesu ayugu gupai nga, si naida mbedimbedi aKristano nimangi gayo sunge zanga nyomoro. Yesu ape gu yangada sanza nga ga akandoro na ameme fu agu aboro du na maabangirise ka raka auru kpotosende ane. Ko anyakasi gupai nga, si naida i du ni ruruyo na kini undo mbedimbedi awirinako auru kpotosende ane. * Ani gbenga berãrani awere kuti gu sanza nga ga ataranda.

BAIRASUNGE AFU MARÃ FU GAKO ABAMANGISUNGE

4, 5. Da kumba watadu bairasunge aru kubani, na ataranda narukuba gine?

4 Oni gedi Matayo 25:14-30. Gaani awaraga asakirogoyo nga gu kumba watadu bairasunge du rogo gu sanza re nga Yesu, na ko amere ho ko aga ni ku ngbangbaturũ yo rogo gu garã nangia 33. Rogo gu sanza du mbata fuhe, Yesu aya ko nika mera ku gi ngbii yo, nga “ka dia ngbi ni gako ki yega.” (Rk. 19:12) I aafunga pagbia fu Yesu ti gu regbo ko aga ku ngbangbaturũ yo nibasa te. * Kuba gure, ko ‘asungu pati kumbabe Mbori, tona ti gu rago re, ko nangera daho i ka manga avurako ni ni gbada nduko.’Eb. 10:12, 13.

5 Gu kumba du rogo gu sanza re adu na ataranda beko muambe, na si angia bakere marã ti agu aregbo re. * Mbata fu ko ndu ku gi ngbiiyo, ko akparaka ataranda ti gako amoyambu, na ki idi i sonosi gu marã re ti gu regbo ko nika dunga ho ya. Wakina gu kumba re, Yesu adu na nyanyakipa he beko mbata fu ko ga ku ngbangbaturũ yo. Ginihe du nangiaha? Gako sunge naadu.

6, 7. Ginipai ataranda aru kubaha?

6 Yesu anyakasipa gako sunge tungusapai na yugopai. (Oni gedi Ruka 4:43.) Vurube gako sunge tungusapai, ko asopo gu bino narengbe ka zuko wenengai ku mbatayo. Mbata kusayo, ko ape gupai fu gako abawiriki nga: “Oni tumba nga bangironi, ka ngera nga ku ati yo, si ima vura avura wa ka i ke he ake.” (Yo. 4:35-38) Gupai naadu berãko yo angia ka dungura gu dungu aboro naadu na wene kpotoyo yo i da ni gako abawiriki. Wakina wene basopobino, Yesu arengbanga ka mbu ngerafuo gako ati naima rẽ tipa ke ahe rogoho te. Sidu, ngbutuko fuo zingako be kpio na mbata fu gako ku ngbangbaturũ yo, ko afu nyanyakipa sunge fu gako abawiriki niya: “Oni ndú tie, ki sa arikaaboro dunduko ni abawiriki.” (Mt. 28:18-20) Rogo gi gene re, gu nyanyakipa sunge Yesu afuhe fu gako abawiriki angia sunge tungusapai.2 Kor. 4:7.

 7 Gini digisopai tie rengbe ani kada kutini? Ho Yesu afu gu sunge ni fu apefuoko nga ga sa aboro ni abawiriki, si adu wa ka i ya ko afu “gako ahe ku be yo” du nga ataranda. (Mt. 25:14) Ka pepai taata, agu ataranda re nga sunge tungusapai ka sa aboro ni abawiriki.

8. Wa vura duhe nga agu amoyambu re agbia marã ni bakiakia, ginipai bairayo aaidaha beyo?

8 Rogo gu sanza nga ga ataranda, bairasunge afu ataranda bisue fu kura moyambu, fu guni ue, na guru sa fu guni. (Mt. 25:15) Wa vura duhe nga agu amoyambu re dunduko agbia marã ni bakiakia, bairasunge aaida i mangisunge na gu marã ko afuhe fuyo, du rogoyo nga ka mangasunge tungusapai wai rengbehe na omeyo. (Mt. 22:37; Koro. 3:23) Rogo bambata sa kama agarã, tona ti rago Pendekote rogo gu garã nangia 33, apefuo Kristo atona mangasunge na agu ataranda re. Gu kitabu nga Amokedi nafura tipa wai i amangisunge tungusapai na sa boro ni abawiriki. *Amo. 6:7; 12:24; 19:20.

MANGASUNGE NA ATARANDA TI YANGARA ARAME

9. (a) Ginipai gu ruru amoyambu ue amangihe na gayo ataranda, na ginipai gipai re ayugoho? (b) Gini sunge “kura akandoro” amangaha?

9 Ti digido rago, gbe tona rogo 1919 ka ndu ku mbatayo, ga Kristo ruru  mbedimbedi aKristano auru kpotosende aima digo nimangisunge na ga Bairayo ataranda. Wakina bambata moyambu na gu ue ni, gu mbedimbedi aKristano re namangasunge na omeyo dũ na gu he du beyo. Ndupai ho tipa ani asadi ka ino guni nagbia ataranda bisue na guni nagbia ataranda ue te. Rogo gu kpiapai re, agu amoyambu ue re dunduko namangisunge nyanyaki na ki ye na marã kuriihe. Gini sunge agu aboro du namaabangirise ka raka auru kpotosende amangaha? Nyanyakipa sunge! Ga Yesu kpiapai nga ga akandoro na ameme nayugo gupai furani nga agu aboro du namaabangirise ka raka auru kpotosende na gu sunge beyo nga ka undo mbedimbedi awirina Yesu rogo tungusapai na yugopai. Rogo gi kpakarakpakara yangara arame re, agi arika dunduko ue re namangasunge nyanyaki wa ‘rimbasa akandoro sa’ ka sa aboro ni abawiriki.Yo. 10:16.

10. Gini nyanyaki gopai nayugo padu Yesu na ome Kindo beko?

10 Bairasunge aaida surungba gu sunge re kuru akura. A wa ani nifura tipaha mbata, gu gako ruru abawiriki naadu rogo bambata sa kama agarã aima kiiso gako ahe. Na ginipai du tipa gi yangara aregbo re gi sanza nga ga ataranda re adigisotihe ti ni re? Ga Yesu ruru amoyambu ima mangasunge ni bakerehe ka tungusapai na ka sa aboro ni abawiriki nga gu sunge naamanganga mbata ya. Gu sunge i amangaha rogo zegino dunduko naye na dungu kama akutu nga ga vovo abawiriki ku dagba abatungusipa Kindo rogo agarã dũ, na si nasa sunge tungusapai na yugopai ni gu babakere pai nayugo padu Yesu na ome Kindo beko. Bairayo na ngbarago nirengo!

Kristo fu gu nyanyakipa sunge nga ga tungusapai fu gako amoyambu (Oni bi genewaraga 10)

GINI REGBO BAIRASUNGE NIKA YE KA BI FUO GAKO SUNGE TI NI?

11. Ginipai nasarani ani dakuti gu digisopai nga Yesu nika bi fuo sunge ti regbo bakere gberãngbi?

11 Yesu nika ye ka bi fuo gu sunge gako amoyambu amangaha bara ti digido bakere gberãngbi barambeda. Ginipai sarani ani dakuti gi digisopai re? Rogo gu gako sangbanebi du rogo Matayo kapita 24 na 25, ko afura tipa pa ye ko. Ho ko aafura ni tipa sapangbanga ti regbo bakere gberãngbi, ko aya aboro nika “bi Wiri boro ko niye rogo mai ngbangbaturũ” yo. Ko angarasi  gu gako abawiriki nika raka ti yangara arame i ningere angera kindi niya: “Oni aina nga ni gu uru gaoni Gbia ka ye te,” “bambiko Wiri boro naye ti gu saa oni aberã nga pa ha ya.” (Mt. 24:30, 42, 44) Sidu, ho Yesu aya ni wẽ ‘baira agu aboro sunge ki ye re, ki wisigi yo,’ ko aafura tipa ho ko nika ye ni ka sapangbanga ti digido gi sino raka re. *Mt. 25:19.

12, 13. (a) Wai du bairasunge na akaragapai fu agu amoyambu naadu ue, na tipagine? (b) Gini regbo i nikadikohe ti ni ni yangaraha ti mbedimbedi aKristano? (Oni bi gu sanduki nga  “Karagapai ti Regbo Kpio.”) (d) Gini mosoro agu aboro nga akandoro nika gbiaha?

12 Ringbisihe kuti gu sanza re, ho bairasunge aye ni, ko abi gu moyambu nadi ataranda bisue na guni nadi ra ue dunduko ni ruruyo, na i agasi ra na agu akura ra kurii ra. Bairayo ape bangisapai fuyo nga: “Mo amangi he wenengai, wene kangara boro sunge nga mo; mo amangi agu apai du ni umba ha wenengai, mi aasia pa bakere apai foro.” (Mt. 25:21, 23) Ginipai tie rengbe ani ka berãha tipa Bairasunge nga Yesu ho ko nika ye ni ka sapangbanga rogo gako taarimo?

13 Agu aboro narukuba agu amoyambu du ue re, i nga gako mbembedi abawiriki namangasunge nyanyaki, i nika dikohe tiyo mbata fu bakere gberãngbi tona. (Yugo. 7:1-3) Yesu nika fu gayo mosoro nga ga ga ku ngbangbaturũ mbata fu Aramegido. Agu aboro du namaabangirise ka raka auru kpotosende naundo awirina Kristo ti sunge tungusapai, i nika sapangbanga yo ni akandoro na i nika gbia gu momu nga ga raka auru kpotosende rogo ga Mbori Kindo.Mt. 25:34.

GBEGBERẼ NYOMORONYOMORO MOYAMBU

14, 15. Ya mo Yesu aape gupai nga dungu mbedimbedi awirinako nika du ni gbegberẽ airanyomoro? Oni sakingo rogoyo.

14 Rogo gu sanza re, gu yangara moyambu re akpisidi gako taranda kusende yo kuba mangasunge na ni watadu ka ndu ka maa gu marã re ku baigo marã yo. Gu moyambu re adu na gbegberẽ sino, bambiko ko amangipai kia ti gupai bairasunge aaidaha. Bairako aya ko nga “gbegberẽ iranyomoro.” Bairasunge adi gu taranda naadu beko na ki furu fu guni naadu na ataranda bawe. I aba gu gbegberẽ moyambu re “ku rogo gu bitimo du zegi yo.” “Yo kpe ka du ni na ri ngba rinde.”Mt. 25:24-30; Rk. 19:22, 23.

15 Moyambu sa dagba ga bairasunge amoyambu yo aigi gako taranda, ya mo gure nga Yesu aaida ka ya bete mbedimbedi aKristano nika du ni gbegberẽ yo na ni  airanyomoro? Oó. Oni kparia gupai si apehe. Rogo gu kpiapai nga ga ruru kangara moyambu, Yesu afura tipa gu gbegberẽ moyambu naata akurako. Yesu aafuranga ku mbatayo nga gbegberẽ rika nga ga amoyambu nika duadu ti ni te. Kuba gure, ko aza gu ruru moyambu re tipa ka sino ko danga wa ga gu gbegberẽ sino moyambu re ya. Wakina gure a, rogo gu kpiapai nga ga ngasu adee bawe, ko aapenga gupai nga bete mbedimbedi apefuoko nika du wa mumungo ngasu adee bisue te. Kuba gure, ko afu zahe fu awirinako tipa gupai rengbe ka manga yo ka i tona ka yukuro na ki zanga mbakadatiyo. * Nibi gupai i nafura tipaha ane, si rẽarẽ ka dakuti gu digisopai nga Yesu aayanga wẽ dungu mbedimbedi aKristano nika du ni gbegberẽ airanyomoro ti yangara arame te. Kuba gure, Yesu aaza mbedimbedi apefuoko tipa i nimangisunge amanga kindi na gu ataranda i afu ra fuyo ki zanga manga gupai rengbe ka sayo i du ni gbegberẽ moyambu.Mt. 25:16.

16. (a) Ginipai ani awirikaha ti gu sanza nga ga ataranda? (b) Wai du gi kekeapai re naziasi gaani giarogopaiyo tipa gu sanza nga ga ataranda? (Oni bi gu sanduki nga  “Giarogo gu Sanza nga ga Ataranda.”)

16 Gini apai ue ani awirikaha ti gu sanza nga ga ataranda re? Bambatapai nga, Bairasunge nga Kristo fu gu sunge fu mbedimbedi amoyambu ko abihe na nyanyaki paha nga sunge tungusapai na sa aboro ni abawiriki. Ue pai nga, Kristo naida ani dunduko ani mangisunge tungusapai zanga piriga ti ni. Ka ani mangi agi apai re, Bairasunge nika fu mosoro tipa gaani idapase, pa ngera ani angera kindi na padu ani ni rururani.Mt. 25:21, 23, 34.

^ genewaraga 3 I fura tipa ruru kangara moyambu rogo gu Ngbaõbambu Sinziri nangia ga Bamburu 1, 2013, kpewaraga 27-28, genewaraga 8-10. I fura tipa ngasu adee rogo gu kekeapai ye mbata fu gere rogo gi magazini re. I sakipai tipa gu sanza nga ga akandoro na ameme rogo gu Ngbaõbambu Sinziri nangia ga Tanvuo 15, 1995, kpewaraga 23-28, rogo pa-Ingirisi na i fura tipaha a rogo gu kekeapai ngbefuo gere rogo gi magazini re.

^ genewaraga 5 Ti regbo Yesu, taranda sa adunga adenario nga 6,000. Ka singia bamangisunge anaagbia denario sa rogo uru sa, si aniidi nimangisunge tipa agarã 20 ka gbia taranda sa.

^ genewaraga 8 Fuo kpio amokedi, Satana akusi samungu, nga gu nadi dungu kama agarã. Ti gu regbo re, gene aadunga ho tipa ka tungusapai ka sa aboro ni ndikidi ga Kristo abawiriki te. Ono si adu nga ariapai nika manga ti regbo ‘ke ahe’ nga yangara arame. (Mt. 13:24-30, 36-43) Oni bi gu Ngbaõbambu Sinziri nangia ga Bamburu 1, 2013, kpewaraga 15-18.

^ genewaraga 11 Oni bi gu Ngbaõbambu Sinziri nangia ga Bamburu 1, 2013, kpewaraga 13-14, genewaraga 14-18.

^ genewaraga 15 Oni bi genewaraga 13 nga ga gu kekeapai nga “Ya mo Oni Anye Kaa ‘Ngera’ Angera Kindi?” du rogo gi magazini re.