Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

“Wo si Angba Angba Bangiro”

“Wo si Angba Angba Bangiro”

“Mo aoko agi apai re be airatatamana na airainahe, ki yugu he fu toni agude.”RK. 10:21.

1. Ginihe Yesu “angi rogo Ziazia Toro” yo mbikoho? (Oni bi gu sura du ti tonatonaha.)

YA MO mo rengbe ka berã wai apai adu fu Yesu Kristo wa ko “angi rogo Ziazia Toro”? Si rengbe kadu nga mo nabi kpakpuko yo si ni kiki na ko ki ningere na ngbarago. Ginihe du sako ko du wo? Ko kedi gako abawiriki nga 70 i ndu ka tungusa wene pangbanga nga ga ga Mbori Kindo. Ko naida ka ino wai i nika manga gi sunge ko nafuhe fuyo re. Dungu avura wene pangbanga du i ni, ngbatunga aboro wa gu wene abawirikipai nga abakeapai na aFarusi. I sa dungu aboro i nibi Yesu wa gu boro adunga sunge tiní ya nga kungbo basekengua na gako abawiriki nga agu aboro aadunga “ni tatamana aboro [ya na] ni airainahe” a ya. (Amo. 4:13; Mk. 6:3) Wa vura duhe wo, amokedi karagatiyo gene gi sunge re yo na ngbarago. I ima tungusapai fu aboro na adaimona ki vura ka sovura kutiyo vurũ. Ginihe naasa yo i du na ngbarago gbiati wingbaduse?Oni gedi Ruka 10:1, 17-21.

2. (a) Wai du Yesu aringbisi gako abawiriki kuti agude? (b) Ginihe naaundo ga Yesu abawiriki i girogo gu nyanyaki arengo nga ga toro?

2 Mo bingo gupai Yesu apehe fu Yekova: “Mi natambua ro, ako Buba, Gbia ngbangbaturũ na sende, bambiko mo aoko agi apai re bangiri airatatamana na arugutinapai, ki kusi he fu fogo  agude; ii, Buba, bambiko wo si angba bangiro.” (Mt. 11:25, 26) Rengo ngaha nga, Yesu aaidanga ka ya gako abawiriki angia ndikidi agude fuko te. Kuba gure, ko aini gupai nga gako abawiriki adu wa agude ringbisihe kuti gu wene abawirikipai naadu rogo gu ringara re naabitiyo nga airatatamana nga yo. Gu nyaki anyaka gbe nga, Yesu ayugupai fu gako abawiriki i du wa agude du na umbasitise na nawirikapai be aboro. (Mt. 18:1-4) Gini undo i agbiaha ti gu gayo umbasitise re? Mbiko ziazia toro, Yekova aundo yo i girogo gu nyanyaki arengo nga ga toro baraho agu airatatamana na wene awirikipai nanaasawia yo ainongo pai ya mbiko kiso Satana bangiriyo na mbiko gayo rukö.

3. Ginipai ani nika wisigoho rogo gi kekeapai re?

3 Nirengo, Yesu aima du na ngbarago! Ko adu na ngbarago ka bi wai Yekova ayugu gu dudunguro arengo nga ga toro fu agu aboro naadu na payo kusende si ki vura du nga i aadunga na bakere inohe te vurũ. Ko adu na ngbarago nga Bako ima ida na gu gene ko ayugopai ngbaha. Ya mo Yekova ima aria sinoko, na wai du ko ayugoho kindi nga ko naida aida na gu yugopai re? Wa ani kaa sakapai tipa ka gbia karagapai, ani nika bi gupai nga si nafu ngbarago furani a wa si adu tipa Yesu.

SAKA ROGO DUDUNGURO ARENGO FU ABORO DŨ

4. Rogo gini gene du gu aakpura Ngbaõbambu Sinziri ni gu gamahe naye be Mbori?

4 Vuru agu agarã susi barambeda kusayo, agu ayugupai nga ga toro ani agbiaha vurube ga Yekova riigbu ima du taata tipa aboro girogoyo. Ani bingo akpiapai biata. Bambataha nga, Ngbaõbambu Sinziri * akuru rogo pa-Ingirisi i ayambaha nga simplified edition du ni aakpuraha. Si ni bawenehe na kingia gamahe be Mbori fu agu aboro ainongo pa-Ingirisi wenengai ya watadu natakpata na gedapai. Avunguagude bi gupai nga si ima sa awiriyo i ni wisigipai sa na yo mbiko si nga gu bangua gene gaani riahe nga ga toro aye ngbaha. Dungu aboro ima keka awaraga tipa ka yugo gayo tambuahe tipaha. Wirina sa aya ri anaaidanga ka karagapai pati Wisigo Ngbaõbambu Sinziri te. Ri aya: “Mi anidu na zee.” Ono awere berewe te! Fuo manga ri sunge na gi vovoho re, ri akepai ki ya: “Mi nakaragapai awere ni dunguhe, na mi agunde nga berewe te! Mi natambua Mbori na gbiati roni a.”

5. Gini wenepai du tipa gu vovo Ziazia Kekeapai i naakpurasi afugoho re?

5 Uehe nga, i akusi vovo Ziazia Kekeapai i nafugu afugoho rogo pa-Ingirisi nga New World Translation of the Holy Scriptures rogo Tanvuo 5, 2013. * Dungu averesi du afugoho ni wiri umbaha, ono wa vura duhe wo, si aʹarianga rogoho yo te. Ni kpiapai, Eyobo 10:1 adu na afugo rogoho 27, ono si awere nga 19; Asanza 8:6 adu na afugo rogoho 20, ono si awere nga 13. Agi averesi re, si taata ka giarogoyo rogo gi vovo Ziazia Kekeapai re. Nirengo, kura wirina raki ni ruru ko tipa gbanga regbo ku rogo rengo aya: “Mi gedi gu kitabu nga Eyobo rogo gi vovoho re, na mi ki bihe nga gere nga bambata regbo tipa mi gii tire na rogoyo.” Dungu awirina pepai wakina gure a.

6. Gini bipai du oni na ni tipa gu vovo giarogopaiyo du tipa Matayo 24:45-47?

6 Biataha nga, oni bingo gu vovo giarogopaiyo mangi barambeda kusayo. Ni  kpiapai, rago aima ngba tirani na gu vovo giarogopaiyo du tipa “kangara moyambu,” du rogo gu Ngbaõbambu Sinziri nga ga Bamburu 1, 2013. (Mt. 24:45-47) I asakipai yo nga gu badona nga ga agu awirina du rogo Riigbu Bipasunge nga kangara moyambu na agu aboro dunduko nari gu riahe nga ga toro nga mbedimbedi aKristano na “kura akandoro,” i nga “aboro kporo.” (Yo. 10:16) Nairiwo gu ngbarago du ani na ni tipa ka wirika ngbatunga rengo wa gure na ka yugoho fu kura aboro! Gini kura gene berewe Yekova nayuguhe na ni nga ko ima ida na gu yugopai du taata tipa ka giarogoyo?

GU SAKAROGO ZIAZIA KEKEAPAI DU TAATA

7, 8. Gini kpiapai nga ga agu apangbanga du rogo Ziazia Kekeapai narukuba gu kura apai?

7 Kangia mo aima digo nimangisunge fu Yekova tipa dungu agarã, si nawira wa mo aima bi wai gaani awaraga natona ka sakapai tipa gu dungu apangbanga du rogo Ziazia Kekeapai. Rogo gini gene? Mbata kusayo, wo gaani awaraga anaafura dedede tipa gu kura apangbanga rogo Ziazia Kekeapai nga si nafura tipa bakerepai ku mbatayo. Ya mo ndupai ho tipa ani sakipai tipa agu apangbanga du rogo Ziazia Kekeapai wa gure? Ii. Ni kpiapai, Yesu afura tipa ‘gupai i aina apai ti ni nga ga Yona nangia nebi.’ (Oni gedi Matayo 12:39, 40.) Yesu asakipai ki ya Yona araki vuru tĩo yo nga gu narengbe kadu ni gako murö ka si adu nga Yekova abatasanga ungako te, gure nangia sangbanebi tipa wai Yesu nika raka ku murö yo.

8 Ziazia Kekeapai na gu kura sangbaanebi rogoho narukuba gu kura apai. Gu mokedi nangia Pauro aima sakapai tipa agu akuraha ni dunguhe. Ni kpiapai, gu pagume naadu dagba Abarayama na Agara gbiati Sara narukuba gu pagume naadu dagba Yekova na gu rika aboro nangia aYisaraere gbiati gu papara ga Yekova riigbu du ngbangbaturũ yo . (Gara. 4:22-26) Teketeke a, banye na yekaru, Uru Dada Ingapai, gbiamotumo, na gu kura apai nangia ga ga Moize aNdiko adu nga “kirima gu wene apai nikaye.” (Eb. 9:23-25; 10:1) Si ni wenepai tipa ka wisigopai tipa ngbatunga gu sangbaanebi re. Ya mo ani rengbe ka ya tie wẽ agu aboro dunduko, apai, na agu ahe du rogo Ziazia Kekeapai nga kirima kura aboro watadu kurapai?

9. Wai i asakipai tipa gu pangbanga nga ga Nabota mbata kusayo?

9 Mbata kusayo, wo gaani awaraga anaaya agu apai re dunduko narukuba kura apai. Ni kpiapai, oni wisigingo gu pangbanga du tipa Nabota nga gu boro Nakindo Izebere asaringbanga ni wia na ki imiko tipa gupai nga kumbari nangia Aba rengbe ka dia gako ati bakakue. (1 Aba. 21:1-16) Rogo gu garã nangia 1932, gaani waraga aya gu pangbanga re nga sangbaanebi. Si adu nga Aba na Izebere narukuba Satana na gako riigbu; Nabota narukuba Yesu; kpioko narukuba pakpio Yesu. Ono tie, dungu agarã kusa, gu buku nga “Let Your Name Be Sanctified,” nakuru rogo 1961, si aya Nabota nga mbedimbedi aKristano, na Izebere narukuba ziree aKristano. Sidu, pa imo Izebere Nabota narukuba rungosi mbedimbedi aKristano rogo yangara arame. Tipa dungu agarã, gu pangbanga re aima ngarasa gu idapase nga ga ga Mbori aboro. Ono tipa gine tie i aria gu giarogopaiyo re ti ni?

10. (a) Wai rubangirise naundo na saka agu apangbanga nga ga Ziazia Kekeapai? (b) Ginipai gaani awaraga agbe berãse areme gbe kutini?

10 Sidu, vuru agu agarã yo susi, Yekova ima undo “kangara moyambu” tipa i du  na bakere rubangirise. Gi rubangirise re ima undo yo i zanga ka yamba apangbanga dunduko rogo Ziazia Kekeapai nga sangbanebi, i namangaha sa kina gu ka i ini nirengo nga kina boro sangbanebi du. Kurigure, i bi gupai nga gu kura apangbanga i asakipai tipaha mbata kusayo, si ima kpakara fu aboro i girogoyo. Gu ngbatunga yugopai nga da narukuba da na tipagine, si ima rengba kadu ni kpakarapai ka inoho, ka tingidaha, na ka mangapai kutini. Gu bakere bakabangirise berewe duho nga, ka si du nga ani gbe berãrani kina kuti gu futufutuapai du rogo gu pangbanga du rogo Ziazia Kekeapai re, ani arengbanga ka mangapai kuti agu arugute du vuruhe yo te. Sidu, ani nabihe areme nga gaani awaraga namangasunge areme na agu apai du taata, agu apai du tipa idapase, hipai, sinombori, na gu kura nyanyakipa asino rengbe ani ka wirikaha ti agu apangbanga nga ga Ziazia Kekeapai. *

Ga Nabota kpiapai nayugo nyanyakipa pai furani (Oni bi genewaraga 11)

11. (a) Gini giarogopaiyo du ani na ni awere tipa gu pangbanga du tipa Nabota, na tipagine gako kpiapai angarasa rani ti ni? (b) Tipagine gaani awaraga nambu fura tipa gu kura apangbanga nga si nga sangbaanebi?

11 Gini giarogopaiyo tie du ani na ni awere tipa gu pangbanga nga ga Nabota? Ani girogoyo awere rogo gu gene du taata. Gu ruru kumba re akpi, angianga ni sangbanebi tipa Yesu ya watadu mbedimbedi aKristano ya, ono mbiko ko angia gu boro naakakuti ruru mangapai. Ko akakuti ga Yekova aNdiko aboro ki vura ka rungosiko vurũ. (Geda 36:7; 1 Aba. 21:3) Gako kpiapai nangarasa rani mbiko ani dunduko niima rengba ka gbiatirani na ngbatungapai wa gure. (Oni gedi 2 Timoteo 3:12.) Aboro dunduko rengbe ka giarogoyo, ka tingidaha na ka mangapai kuti gupai nangarasa gaani idapase re.

12. (a) Gini digisopai si aidanga ani da kutini ya nibipa agu apangbanga nga ga Ziazia Kekeapai? (b) Tipagine du ani ti ni awere na wene sakarogo gu dudunguroapai nga ga toro? (Oni bi gu kekeapai du bandu waraga yo.)

12 Ya mo ani rengbe ka ya agu apangbanga nga ga Ziazia Kekeapai na kina  agu arugute si aida ani mangihe angia na gu kura arogoyo ti ni ya? Oó. Areme, gaani awaraga nafura gbe tipa wai agu apangbanga nga ga Ziazia Kekeapai atingida rani na kurapai. Si nawira wa gaani awaraga afuranga berewe tipa agu apangbanga nga ga Ziazia Kekeapai dunduko ya si nga sangbaanebi te. Ni kpiapai, ani ima rengba ka ya gu padu ni ruruse nangia ga Nabota ti regbo rungosi na kpio re natingida rani na pa wai Kristo adu ni ruru ko gbiati mbedimbedi aKristano. Ono tie, ani ima rengba ka tingidapa wai ga Gbia “kura akandoro” akakuti gayo idapase. Gu ngbatunga yugopai du taata re, Mbori du nayugoho furani. *

GU SAKAROGO GA YESU AKPIAPAI YO DU TAATA

13. Gini kpiapai nayugo na ni nga ani nasakapai awere tipa ga Yesu akpiapai ngba taata agene?

13 Yesu Kristo angia gu bakerepa Bayugupai naraki auru kpotosende ane. Gako wenewene ayugopai nakoda akpiapai. (Mt. 13:34) Agu akpiapai re ni wenehe mbiko si nasaka nyanyaki apai taata tipa aboro berẽkuriihe na si kini zi ngbaduyo yo. Ya mo gaani awaraga asakanga ga Yesu akpiapai tipa dungu agarã kina ngba taata agene te? Kina boro rengo du! Anga ani adu na ngbarago tipa ka gbia wene giarogopaiyo tipa ga Yesu kpiapai nibipa agbooro, tunga musutada, na pio atĩo rogo gu Ngbaõbambu Sinziri nangia ga Bamburu 1, 2008 te? Ani ima inoho awere wenengai nga agi akpiapai re nafura tipa ga Mbori Kindo na gu diabese duhe na ni tipa ka dungura apefuo Kristo rogo gi gbegberẽ zegino re.

14. (a) Wai ani asakirogo gu sanza du tipa boro Somorona? (b) Na wai gi ani rogoyo awere?

14 Ono ginipai du tipa gu kura futufutu apangbanga, watadu asanza Yesu afura tipaha? Agu akuraha narukuba gu kura apai na sangbaanebi; na agu akuraha nga arugute tipa mangapai. Ono gini gu nga rengo? Vuru agu agarã yo susi, karagapai aima du ziazia. Ni kpiapai, oni bingo gu gene ani anaasaka gu ga Yesu sanza nga ga boro Somorona ngbaha. (Rk. 10:30-37) Rogo 1924, Ngbaõbambu Sinziri aya gi boro Somorona re narukuba Yesu; gu gene tona Yerusarema yo ka ndu ku Yereo narukuba gu samungu aboro amangihe Edene yo; agu airadĩ naadu bangiri gene narukuba kikindigi aba bagaahe; boromotumo gbiati boro Revi narukuba apambori. Areme, gaani awaraga natingida rani nga gi sanza re nayugo gupai nga si naida ani undo agu aboro dunduko du rogo zegino na naida na gaani undo, gbe rogo toro yo. Ya mo rago angbanga tirani ka bi gupai nga Yekova nasa gako yugopai si du ziazia te?

15. Ginipai ani nika wisigoho rogo gu kekeapai ngbefuo gere?

15 Rogo gu gaani kekeapai ngbefuo gere, ani nika wisigopai tipa gu kura ga Yesu sanza nga ga ngasu adee bawe. (Mt. 25:1-13) Wai Yesu aaida apefuoko girogo gupai gu sanza re ayugoho rogo gi yangara arame re? Ya mo agu apai, agu ahe na aboro dunduko du rogo gu pangbanga re narukuba bakerepai ku mbatayo? Ya mo ko aaida apefuoko mangisunge na ni ni gupai rengbe yo ka wirikapai behe si undo yo rogo gi yangara arame re? Ani nika bihe yo.

^ genewaraga 4 Gi aakpura Ngbaõbambu Sinziri re, i akusi bambataha rogo pa-Ingirisi rogo Bamburu 2011. Natona ti gu regbo re, i ima asada ka kusaha rogo gu kura afugo a.

^ genewaraga 5 Mbakadapai gudu ho awere tipa ka sa gi vovo Ziazia Kekeapai re ku rogo gu kura afugo yo.

^ genewaraga 10 Ni kpiapai, gu buku nga Oni Wiriki Gayo Idapase sakipai ni gbangaha tipa gu raka nga ga aboro 14 rogo Ziazia Kekeapai yo. Agu apai re naruriipa agu apai rengbe ani ka mangaha, angianga kina gupai narukuba kurapai ya ono ndikidi sangbanebi.

^ genewaraga 12 Nirengo, Fugo Mbori na apai rogoho si awira wa si ni “kpakarakpakara ha tipa rugati na paha,” kodihe na gu kura apapara ga Pauro awaraga. Ono tie, abake Ziazia Kekeapai dunduko ziazia toro adu kugiiyo na pa kehe. Kina gu bangisa ome re naaundo ndikidi aKristano i girogo rengo yo zavura “gu dudungura apai nga ga Mbori,” na si du nasaha taata fu gu berãrani nga ga ingapai re.2 Pet. 3:16, 17; 1 Kor. 2:10.