“Kristo ahi pai a tigako tipa roni, ki he kpia pai fu roni, oni peke fuo ko.”—1 PET. 2:21.

1. Wai rengbe wirika Yesu ka mbedisa rani koyo du Yekova ni?

WO ANI naawirika agu aboro asinoyo nangba tirani. Dagba agu aboro dunduko naaraki auru kpotosende, guni sa si aida ani wiriki ni nga Yesu Kristo. Tipagine duhe ti ni wo? Yesu nitiko aya: “Gu ni bi re ni bi Buba.” (Yo. 14:9) Agu asino naadu ti Yesu nangia agu asino naadu ti Bako, na gu boro nabi Wiri ni aima bi Ba. Sidu tie, wa ani awirika Yesu, ani nambeda na Yekova, nga nyanyakipa Boro rogo zegino. Nairiwo wai ngbaha ka wirika asino Wiriko gbiati gako gene mangapai!

2, 3. (a) Tipagine Yekova aidi ti ni i keke asino Yesu furani, na ginihe Yekova aidaha berani? (b) Ginipai ani nika wisigoho rogo gi kekeapai re gbiati gu nika ngbefuo ho?

2 Wai rengbe ani ka ino wai du Yesu? Nirengo, asino Yesu naabaha ni kekehe rogo Ziazia Kekeapai. Yekova aidi i kepa agu asino re a wa duhe rogo Vovo Ndika mbiko ko naida ani inidi tirani na Wiriko wa ka ani wiriki ko. (Oni gedi 1 Petero 2:21.) Ni kpiapai, gu fugo nga ‘pekafuo’ mangiyo sunge na ni rogo Ziazia Kekeapai, rogoyo nga diandue. Gure nzunzu wa ka i ya Yekova naya furani ani du kina gii Yesu tipa kaa  dia ndurani na ko wa sa. Kina rengo ngaha nga, Yesu ambu wene kpiapai furani, ono ani nga aboro ingapai. Anga Yekova naida ani pekefuo Yesu teketeke te. Wa vura duhe wo, Ba naida ani pekefuo Wiri kina wai rengbe omerani na ni wangia ani aboro ingapai.

3 Sidu tie, ani wisigingo bete agu asino Yesu naadu ni bawenehe. Rogo gi kekeapai re, ani nika sakapai tipa gako umbasitise na gako nunga; rogo gu nika ye fuo gere, ani nika wisigopai tipa gako wingbaduse gbiati gako rugatinapai. Nibipa agu asinoko re ni basasa, ani nika karagapai kuti asanahe biata nga: Rogoyo nga gine? Wai Yesu ayugu agu asino re? Wai rengbe ani ka wirika ko?

YESU NA UMBASITISE

4. Wai rengbe oni ka sakapai tipa umbasitise?

4 Umbasitise nga gine? Rogo gi zegino du na rukö rogoho re, kura aboro rengbe ka bi umbasitise wa gunde watadu zanga kido. Ono tie, rengo ngaha te. Tipa boro du na umbasitise, si naida ni du na ome gbiati wingbaduse. Umbasitise nga “gu bipai du kia ti rukö.” Rogo Vovo Ndika, gu fugo nga “umbasitise” i mangisunge na ni nga gu “umbasitise nga ga berã.” (Frp. 2:3) Umbasitise natona na wai ani abi tirani. Kura buku sa nasakarogo Ziazia Kekeapai naya, “umbasitise nga ka ino wai du ani nzunzu barabangiri Mbori.” Kangia ani nzunzu na umbasitise bangiri Mbori, ani atumbanga tirani kurii akuarani te. (Rom. 12:3) Anga taatapai ngaha fu aboro ingapai i du na umbasitise te. Ono ani ima rengba ka wirika kadu na umbasitise ka si du nga ani naberãkurii padu ani ni ruru rani ku bangiri Mbori na ka pekafuo ga Wiriko diandue.

5, 6. (a) Da nga Mikaere nga bakumba maraika? (b) Wai Mikaere ayugu gako umbasitise?

5 Wai Yesu ayugu umbasitise? Wiri Mbori ayugu gu sino nga ga umbasitise tipa gbanga regbo, tona ho ko adu ni ngbangbaturũ yo, na ho ko adu ni auru kpotosende ane. Ani bingo gi bete akpiapai re.

6 Gako bipai. Gu bake Ziazia Kekeapai nangia Yuda akepai tipa ga Yesu raka ngbangbaturũ yo. (Oni gedi Yuda 9.) Nidu Yesu nga Mikaere nga bakumba maraika, ‘ko asovura na Bakitingbanga’ na ki ‘ti kangu’ na ko. Gipai re adu tipa “kangba Mose.” Fuo kpio Moize, Yekova akpisidi ko rogo gu ba boro ainongo pai tipaha ya. (Pa Rug. 34:5, 6) Isoke Bakitingbanga aaida ka mangasunge na kangba Moize tipa irisokpiahe. Ka si vurangia gini gbegberẽ berã naadu riko yo, Mikaere aru nyanyaki. Kura waraga sa naya gu pa-Giriki mangiyo sunge na ni rogo pa-Zande nga “aso vura” na ‘ti kangu,’ si nayugo gupai nga ‘Mikaere aza Bakitingbanga ka ko dinga kangba Moize ya.’ Ono wa si avura duwo, gi Bakumba Maraika re abihe nga gako sunge ngaha tipa ka sarangbanga ti gu regbo re te. Kuba gure, ko andu na gipai re ku barabangiri Bakere Basapungbanga nga Yekova. Rogo gi gene re, Mikaere aagunga rii gako pagbia te, zavura ho Bakitingbanga aasadi ko ni ko zingi. Nairiwo gu umbasitise ko adu na ni re!

7. Wai Yesu ayugu umbasitise rogo gako mangapai yo na afugoko?

7 Ti gu regbo Yesu aatungusapai auru kpotosende, ko aafura na kini mangiapai ngba gu gene naayugo gako umbasitise. Afugoko. Ko anaaidanga aboro fu bakere irisa fuko te. Kuba gure, ko afu gu taarimo re fu kina Bako. (Mk. 10:17, 18; Yo. 7:16)  Ko aafuranga gbegberẽ fu gako abawiriki te watadu ka sayo i nibi tiyo nga i na sunge te te. Kuba gure, ko akiisipa yo, kini tambua yo tipa gu wenepai ko abihe rogoyo yo na ki yugupa gako kido ku rogoyo yo. (Rk. 22:31, 32; Yo. 1:47) Gako mangaapai. Ko asia ka raka rogo gu ngbadimokporo naadunga na dungu aũkumuko rogoho ya. (Mt. 8:20) Ko anaamanga asunge bee na nyemuhe. (Yo. 13:3-15) Ko ayugu umbasitise rogo gako giasangba yo. (Oni gedi AFiripoio 2:5-8.) Ko aadunga wa gu kura aboro adunga na umbasitise ya te, ko aumbasi tiko ka manga gupai Mbori akpinyemuhe, na ki gi “sangba dati kpio.” Si ziazia tie nga, Yesu nga Wiri boro adu ni “irazerangbaduse.”Mt. 11:29.

ONI WIRIKI GA YESU UMBASITISE

8, 9. Wai rengbe ani ka yugo umbasitise?

8 Wai rengbe ani ka wirika ga Yesu umbasitise? Gaani bipai. Umbasitise naza rani ka ani gunga rii gu pagbia du berani ya. Ka ani bi gupai nga ani dagba agu aboro nafura riipa pai te, si aidanga ani gu niipo ka bisirapa kura aboro tipa gayo aingahe watadu ka bihe nga gayo ndu mangapai angbanga te te. (Rk. 6:37; Yak. 4:12) Umbasitise naundo rani ka ani du nga “ni ruru boro susi ya,” ka bi kura aboro nga sunge tiyo te watadu i na agu amomu du berani te. (Batu. 7:16) Agu abaakumba du na umbasitise i abingo tiyo nga payo kii ti ga akurayo aidipase te. Kuba gure, ngbatunga agu ababanda akandoro re nabihe nga akurayo “ngba susi” yo na i namangapai na umbasitise.Frp. 2:3; Rk. 9:48.

9 Ani bingo gupai naadu tipa W. J. Thorn, namangisunge ni gu babiapai ninaata ata tona rogo gu garã nangia 1894. Fuo dungu agarã kuti ngba gu sunge re, i ayambu ko ko ye ka mangasunge rogo gu bazoga akondo du rogo gu gaani riigbu bipa sunge du Amerika yo. Ko aya: “Ti agu aregbo mi anaaberãpa tire nga, anga boro gu sunge si aida mi mangihe nga gere re te, mi aniru berewe ka fura fu tire ki ya: ‘Ako nvutu sende mo. Ginihe nga mo namanga rukö?’” (Oni gedi Yesaya 40:12-15.) Gure nga gu bipai nga ga umbasitise nirengo!

10. Wai rengbe ani ka yugo umbasitise rogo gaani afugo yo na mangapai?

10 Gaani afugo. Kangia ani nirengo nga aboro umbasitise, afugo rani nika yugo umbasitise ayugo. (Rk. 6:45) Ho ani afura ni na akuarani, si aidanga ani nye kina kuti pekapa agu ahe du berani watadu amomu te. (Snz. 27:2) Kuba gure, ani ngere tipa gu wenepai du rogo awirinarani yo na kini tambua yo tipa gu wenewene asino du yo na ni, abiri, gbiati agu apai i namangihe. (Snz. 15:23) Gaani mangaapai. Agu aKristano du na umbasitise, i agbatanga taarimo rogo gi zegino re te. I na nyemu ka raka gu raka du taata na kini mangi agu asunge aboro abihe na paha kusende tipa wa ka i rengbe ka mangasunge fu Yekova na omeyo dunduko. (1 Tim. 6:6, 8) Kurigure, ani rengbe ka yugo gaani umbasitise nidu ani nagiasangba. Umbasitise nasarani ani ‘gisangba gaani abaakumba’ rogo dungurati na ani di agu arugapai dunduko kugume ga Yekova riigbu afuhe.Eb. 13:17.

YESU NA NUNGA

11. Oni sakingo rogo gu fugo yo nga nunga.

11 Ginihe nga nunga? Gu fugo nga “nunga,” si nga mangapai kuti gu rungo du boro na ni. Nunga nga papara nyemuse  na kidu ni wirina inopai. Agu afugo nga “weneringise” gbiati “inaapai” Ziazia Kekeapai nafura afura tipaha. (Rk. 1:78; 2 Kor. 1:3; Frp. 1:8) Nibi wai Ziazia Kekeapai afura tipa nunga, gu kura waraga sa aya: “Anga nunga gbua nga ani du na rungo agu aboro du rogo zingo te. Si nga ka berãpa gu boro re na kini undo ni na gu mangapai nika sa gupai nga ni tona raka berewe wenengai.” Nunga du nga gu ome nasa boro ni mangi gupai re. Gu boro du na nunga aboro, ni naasada ka manga ariapai rogo ga akurani raka yo.

12. Ginihe nayugoho nga Yesu adu na nunga kura aboro tiko, na ginipai gu nunga naadu tiko re asako ko mangihe?

12 Yesu ayugu nunga wai? Rogo sinoko na mangapai. Yesu adu na nunga kura aboro tiko. Ho ko abi bakureako ni nangia Maria na agu aboro naadu na ri i nikpari tipa pakpio kawiiri nangia Razaro, ko ‘akpari ni aume.’ (Oni gedi Yoane 11:32-35.) Sidu, kina gu bangisa nunga nasako ko zingisi wiri dekurugbo, kinaha nasako ko zingisi Razaro. (Rk. 7:11-15; Yo. 11:38-44) Mbiko gu nunga re, si asa Yesu ko fu gu maabangirise nga ga raka ngbangbaturũ yo fu Razaro. Mbata fu gure, ‘nunga’ rimbasa agu aboro naaye fuo Yesu amangiko. Gu nunga re asako ko “tona yugo dungu apai fu yo.” (Mk. 6:34) Nairiwo wai gipai re amangi ariapai rogo gu raka nga ga agu aboro dunduko nadi gako yugopai kugume! Oni bi gupai nga anga ga Yesu nunga angia kungbo berãpa aboro te; si asako ko mangipai tipa ka undo yo.Mt. 15:32-38; 20:29-34; Mk. 1:40-42.

13. Rogo gini gene Yesu anaafura na nunga fu kura aboro ngbaha? (Oni bi gu sura du ti tonatonaha.)

13 Gako afugo nunga. Gu nunga naadu ngbadu Yesu yo asako ko fura fu aboro na nunga, gbe fu agu aboro i anaarungosi yo. Gu mokedi nangia Matayo ape agu afugo du rogo Yesaya ki ya si adu tipa Yesu: “Ko akita nga kamakama nganzi te, ko abisa nga pidapida giri we te.” (Yes. 42:3; Mt. 12:20) Yesu afura ngba gu gene naazambuasi kpoto agu aboro yo naadu wa kamakama nganzi watadu wa gu we naida ka biso. Ko anaatungusa gu pangbanga nga ga maabangirise si “vodi agu yo ngbaduyo akua.” (Yes. 61:1) Ko ayambu agu aboro ‘nambu dunduko, na ki du na rõrõi tindiro’ i ye koyo du ko ni, na ki kido yo nga i nika gbia “ongoda” tipa tiyo. (Mt. 11:28-30) Ko akido apefuoko nga Mbori na nunga airisiko dunduko, kodihe na aguyo ko abiyo wa “toni agude” nga agu aboro si awira wa payo anyakanga bangiri aboro zegino te.Mt. 18:12-14; Rk. 12:6, 7.

ONI WIRIKI GA YESU NUNGA

14. Wai rengbe ani kadu na nunga kura boro tirani?

14 Wai rengbe ani ka wirika ga Yesu nunga? Ani du na nunga. Anga i navunga rani na kina nunga te, ono Ziazia Kekeapai nazungadi rani nga ani sonosihe. Du na “ngbadu inapai, na weneringise” nga papara gu vovo borose si aida aKristano dunduko du na ni. (Oni gedi AKorosaio 3:9, 10, 12.) Wai rengbe oni kadu na nunga kura aboro? Oni zaki ngbaduroni yo. (2 Kor. 6:11-13) Oni degeturoni wenengai ho boro ape agu apai ni namanga ni. (Yak. 1:19) Oni sana nitironi nga: ‘Ka i ya mi du gipai re amanga re, ka mi du wai? Ginihe ka mi naidaha?’1 Pet. 3:8.

15. Ginipai rengbe ani ka mangaha tipa ka undo agu aboro du wa kamakama nganzi watadu wa gu we naida ka biso?

15 Gaani mangapai. Nunga nasarani ani asadi ka manga ariapai rogo ga aboro  raka yo, gbe aguyo du wa kamakama nganzi watadu wa gu we nabiso. Wai rengbe ani ka undo yo? ARomo 12:15 naya: “Oni kpari na agu yo nakpara.” Agu aboro du rogo kpakarapai, i naida ani du na nungayo kisusi karagapai. Kura wirina naagbia wasa be awirinari aidipase fuo kpio wiiri aya: “Mi adu na tambuahe ka bi wai awirina aye na ki kpari na mi.” Ani nayugo nunga a ni manga ani wene apai fu kura aboro. Ya mo oni iningo pa gu wirina nga dekurugbo naida i mbakadi gari bambu? Ya mo sosono Kristano ho naida i ndu na ni kuba dunguratise yo, gene tungusapai yo watadu fuo amunganga? Zavura kina gu wiri tooni mangapai nga ga weneringise re, si rengbe arengba ka manga bakere ariapai rogo ga gu irisimbori re raka. (1 Yo. 3:17, 18) Kuri gere, ani rengbe ka yugo nunga fu kura aboro ni ndu ani ku gene tungusapai yo. Gu kura gene ho rengbe ani ka manga ariapai rogo gu raka nga ga agu aboro du na nyemu rengo susi gere te!

Ya mo mo na ndikidi nyemu agu awirina nga aidipase? (Oni bi genewaraga 15)

16. Ginipai rengbe ani ka mangaha tipa ka ngarasa agu aboro du na rungo kpotoyo yo?

16 Rogo afugo rani. Gu nunga akuarani du tirani nasa rani ani ‘nyákasi aguyo nawo, ani sóngodi aguyo narungbura.’ (1 Tesa. 5:14) Ginipai rengbe ani ka mangaha tipa ka ngarasa ngbatunga agu aboro re? Ani rengbe ka zambuasi yo ni yugo ani he fuyo nga ani naberãpa yo aberã. Ani rengbe ka tambua yo wa ka si undo yo i bi gu wene asino na tandu mangapai du yo na ni. Ani rengbe ka tingida yo nga Yekova ima mbedisa yo koyo du Wiriko ni, sidu, payo ni nyanyakihe bangiriko. (Yo. 6:44) Ani rengbe ka kido yo nga Yekova naberãpa gu gako amoyambu “du kpotoyo yo na rungo” watadu ‘aguyo toroyo aima’ aima. (Tam. 34:18) Agu afugo rani nga ga nunga ima rengba ka undo agu aboro naida na wasa.Snz. 16:24.

17, 18. (a) Yekova naida abaakumba mangi gako akandoro wai? (b) Ginipai ani nika sakapai tipaha rogo gu kekeapai naye fuo gere?

17 Abaakumba, Yekova naida oni ngerefuo gako akandoro na nunga. (Amo. 20:28, 29) Oni tingidi gupai nga, gaoni sunge du nga ka riga, ka ngarasa, na ka zambuasi akandoro. (Yes. 32:1, 2; 1 Pet. 5:2-4) Sidu, gu bakumba du na nunga amaanga arugute kurii akandoro te, watadu ka mangasunge na agu aingahe nga gaami tipa ka sara ami mangipai ni bakerehe baraho agu apai du tipa ra aidanga na ni wo ya te. Kuba gure, ni naasada ka sara ami du na ngbarago kpotora yo, na kini kido nga gu nyemuse du ami na ni fu Yekova nika sara ami mangisunge fuko wenengai.Mt. 22:37.

18 Wa ani nawisigi ga Yesu umbasitise gbiati nunga, si ima fõngbaduraniyo tipa ani nye kuti pekefuoko. Rogo gu kekeapai ngbefuo gere, ani nika wisigopai tipa gu kura nyanyakipa asinoko ue nga wingbaduse na rugatinapai.