Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Oni Tingidipa Aguyo Namangasunge Kindo ti Aregbo Dũ

Oni Tingidipa Aguyo Namangasunge Kindo ti Aregbo Dũ

‘Ani natingida pa gaoni mangapai nga ga idapase na gaoni sunge nyemuse.’1 TESA. 1:3.

1. Gini akpiapai duho tipa agu aboro natingidipa agu aboro namangisunge fu Yekova kakaka?

GU MOKEDI nangia Pauro atingidipa aguyo namangisunge nyanyaki tipa wene pangbanga. Ko akepai ki ya: ‘Ani natingida pa gaoni mangapai nga ga idapase na gaoni sunge nyemuse na gaoni hipai nga ga maabangirise rogo gaani Gbia Yesu Kristo yo, barangba gaani Mbori nga Barani.’ (1 Tesa. 1:3) Nirengo, Yekova natingidapa gu gako amoyambu dunduko namangasunge fu ko singia agu apai du tipa yo nasayo i mangihe ni bakerehe watadu ni toonihe.Eb. 6:10.

2. Ginipai ani nika wisigoho rogo gi kekeapai re?

2 Dungu gu ga Yekova amoyambu naadu mbata na aguyo du awere ima mbupa kura gayo apai tipa ka mangasunge fuko ti aregbo dũ. Ani bingo pai tipa agu aboro namangisunge rogo bambata sa kama agarã. Ani nika wisigopai a tipa agu angbatunga mangasunge kindo ti aregbo dũ duho areme na ki bi wai rengbe ani ka tingidapa aguyo fu tiyo ka mangasunge kindo ti aregbo dũ.

AGU AKRISTANO NAADU MBATA KUSAYO

3, 4. (a) Wai kura awirina amangisunge kindo mbata kusayo? (b) Gini aundo i anaagbiaha be kura awirina?

3 Ngbutuko fuo Yesu zi bapatiza, ko atona gu sunge si adu nga  si nika manga rogo zegino dunduko. (Rk. 3:21-23; 4:14, 15, 43) Fuo kpiko, gako abawiriki angbembatayo rogo kiiso sunge tungusapai. (Amo. 5:42; 6:7) Gu Kristano nangia Firipo amangisunge ni batungusi wene pangbanga na ni mokedi Paresitina yo gbiati agu kurayo a. (Amo. 8:5, 40; 21:8) Pauro gbiati kura amokedi atungusipai rogo dungu aringara. (Amo. 13:2-4; 14:26; 2 Kor. 1:19) Ni kpiapai, Sira, Marako gbiati Ruka amangisunge ni abakeapai. (1 Pet. 5:12) Agu aKristano nga adee amangisunge wa sa na gi ruru akumba re. (Amo. 18:26; Rom. 16:1, 2) Gu wene akpiapai nga ga agi aKristano i akehe rogo Vovo Ndiko re, ho ani agedaha ni, si naundo rani ani bi gupai nga Yekova nabi gu sunge gako amoyambu amangaha na kikiipaha.

4 Wai agi aboro re anaagbia marã ka songoda tiyo na ni? Ti kura aregbo, akurayo aKristano anaagama ahe agama fuyo na kini fu kura aundo fuyo, ono i anaasananga yo tipaha te. (1 Kor. 9:11-15) Kura aboro gbiati adungurati anaasongoda yo ni nyemuhe. (Oni gedi Amokedi 16:14, 15; AFiripoio 4:15-18.) Pauro gbiati gako abadiasunge anaamangasunge amanga ka songoda tiyo na ni.

AGU AWIRINA NAMANGASUNGE KINDO TI AREGBO DŨ AREME

5. Ginipai kura arogotise agumbaha tipa mangasunge kindo ti aregbo dũ?

5 Areme a, dungu awirina nafutiyo ka mangasunge kindo ti aregbo dũ rogo dungu angbatungaha. (Oni bi gu sanduki nga “ Agu Asunge Nga ga Kindo ti Aregbo Dũ Duho.”) I nabi gayo sunge wai? Gure nga gu sanahe rengbe oni ka sana yo na ni, na si nawira wa oni nika gbia undo agbia ka oni mangihe wo. Oni bingo gi kpiapai re: Wirina sa naima mangasunge ni bazakigene, kparakpara bazakigene, mokedi, na ki mangisunge Betere yo rogo kura ringara aya: “Mi nabihe nga mangasunge kindo ti aregbo dũ nga gu wene siapai mi amangihe. Ho garã re adu 18, si aidi mi siapai bangbanda nduge ku yunivasiti yo, mangasunge marã, watadu mangasunge ni bazakigene. Mi ima bi gupai nga bangiri Yekova agonga ti wai boro ambupa gani apai ka mangasunge fuko te. Mi ima mangasunge na gu tatamana watadu gu ome Yekova nafuhe fere ngba dungu agene, nga gupai mi aarengbanga ka mangaha ka mi asia kura apai nga ga zegino ya.” Diako aya: “Agu asunge dunduko ani namangihe, si ima undo re mi sono rogo toro yo. Ani ima bi wai Yekova nabanda rani na kini rugu rani ngba dungu agene, nga gupai kaa manganga furani wa ka ani asia ka raka fiõfiõ raka ya. Mi naatambua Yekova na aʹuru dũ tipa gaani raka kuti sunge kindo ti aregbo dũ.” Ya mo mo naida ka bi gamo raka wa gure?

6. Gini kido si aida aboro dunduko du na ni nibipa wai Yekova abi apai?

6 Nirengo, agu apai du tipa kura aboro ambunga yo i mangisunge kindo ti aregbo dũ awere te. Ani ima rengba kadu na gu kido nga Yekova nabi gayo sunge na nyanyakipa ha. Oni berẽnga pa aguyo Pauro ayambu rimoyo rogo Firemona 1-3, kodihe na agu aboro dunduko naadu rogo gu dungurati naadu Korosai yo. (Oni gedihe.) Pauro aima tambua yo, na kinawo Yekova adu a. Teketeke a, Barani nabi gayo sunge na nyanyakipa ha. Wai tie rengbe oni ka songoda aguyo namangasunge kindo ti aregbo dũ awere?

UNDO ABAZAKIGENE

7, 8. Sunge abazakigene nakoda ginipai, na wai rengbe kura aboro rogo dungurati ka undo yo?

7 Wakina agu abatungusi wene pangbanga naadu mbata kusayo, zaaza abazakigene nangarasa gu dungurati du yo rogoho  gbe. Dunguyo naasada kaa dia asaa 70 kuti tungusapai rogo adiwi ni basasa dunduko. Wai rengbe oni ka undo yo?

8 Wirina sa nga nazakigene aya: “Abazakigene nidu ngangara rogo toro yo mbiko i natungusapai na aʹuru dunduko. Ono wa vura duhe wo, i naida aida na ngarasaro.” (Rom. 1:11, 12) Kura wirina sa namangisunge ni nazakigene tipa bete agarã aya tipa agu abazakigene du rogo gari dungurati wẽ: “I namangasunge nyanyaki zanga digidoho. Na ri agumba kurapai berewe nga ho kura awirina ayamba yo ni tipa riahe watadu ka fu wiri marã fuyo, i na tambuahe tipa gipai re na si nayugo gupai fuyo nga kura aboro naberã payo aberã.”

9, 10. Ginipai kura awirina namangihe tipa ka undo agu abazakigene du rogo gayo dungurati?

9 Ya mo oni na nyemu ka undo abazakigene gene tungusapai yo? Nazakigene du rimo ri nga Bobbi azungodihe ki ya: “Ani naida undo gbe bebere poso.” Kura nazakigene du kina rogo gu dungurati re ape kurapai ki ya: “Si ima kpakara ka gbia boro ka kuru na ni fuo bebere uru.” Kura wirina namangasunge awere rogo gu Betere nga ga Brooklyn afura tipa gu regbo ri angia nazakigene ki ya: “Kura wirina nadu na tarambiri beri aya, ‘Ka boro adunga ho ka mo ndu na ní ka tungusapai ya, mo niyambu re, mi nika kura na mo.’ Ri aima undo re mi mangisunge abazakigene.” Shari aya: “Fuo tungusapai, agu abazakigene nga abakuparanga nidu dedede nisayo. Oni ima rengba ka yamba yo tipa gaoni irisombori nga ga aborokporo dedede. Ho oni ayamba yo ni tipa ka manga kura apai na yo, si nasayo i nye nyanyaki.”

10 Wirina sa mangisunge ni nazakigene tipa agarã nambeda kuti 50 afura tipa gu regbo ri amangisunge abazakigene na agu awirina nga anakuparanga ki ya: “Gaani abaakumba anaandu kaa bi abazakigene fuo adiwi ue. I anaasana rani tipa wai du kpotorani, gu sunge marã ani amangaha na singia apai ho ani abakabangirani na ni. I aima ida ka undo rani. I anaaye kaa bi rani rogo gu ba ani aaraka rogoho tipa ka ino singia ani naida undo.” Gipai re rengbe ka tingida roni na pa gu tambuahe Pauro adu na  ni tipa wai gu kumba naadu Efesa yo angerefuo ko.2 Tim. 1:18.

11. Mangasunge ni kparakpara bazakigene nakoda gine?

11 Si ni pa maku fu agu aboro du na kparakpara abazakigene rogo gayo adungurati. Dungu agi awirina re nafu tiyo kaa dia asaa 130 kuti tungusapai rogo adiwi dunduko. I nadia kina bete regbo kuti sunge marã watadu i amanganga ha te, mbiko i nadia bakere regbo kuti tungusapai na i naundo rogo dungu agene. Be-basunge nafu wiri marã fuyo tipa si undo yo i moiberãyo kuti tungusapai.

12. Wai rengbe abaakumba na kura awirina ka undo kparakpara abazakigene?

12 Wai rengbe ani ka undo kparakpara abazakigene? Bakumba sa namangasunge rogo be-basunge ninafura dedede na dungu abazakigene aya: “Si naida abaakumba fura afura na yo tipa ka ino agu apai du tipa yo, na i ki ini wai rengbe yo ka songoda yo. Kura awirina nabihe nga i nangerafuo kparakpara abazakigene rogo apai dunduko mbiko i nafu wiri marã afu fuyo tipa si undo yo, ono agu awirina du yo dagbayo ima rengba ka undo yo rogo dungu agene.” Wakina abazakigene, kparakpara abazakigene na ngbarago ho i agbia aboro ni ka kura na yo gene tungusapai yo. Ya mo oni rengbe ka undo rogo gi gene re?

UNDO AGU ABABIAPAI NINAATA ATA

13, 14. (a) Ginipai si aida ani tingidihe tipa agu ababiapai ninaata ata? (b) Ginipai oni abihe nga si rengbe oni ka mangaha tipa ka undo yo?

13 Aboro naabi agu ababiapai ninaata ata na adiayo ni agu aboro naima nyaka rogo toro yo. Gipai re nga kina rengo, ono i naida ngarasaro aida, agu aboro ka i kuru na yo gene tungusapai yo, na i naida aida ka zambuasi tiyo a. Na ginipai ka mangi ka si du nga i ti na kaza i ki dika yo ku bambungua yo? I adu na bakere ngbarago ka si du nga awirina naundo yo na agu ahe zingoho amanga yo na kini berẽpa yo. Ruka nangia “munganga” na kingia bake gu kitabu nga ga Amokedi aima ngerafuo ga Pauro azingo gbiati gu kura awirina nanaata kaa biko adungurati.Koro. 4:14; Amo. 20:5–21:18.

14 Agu ababiapai ninaata ata na adiayo naida wene abakure. Kura babi adungurati sa aya: “Si nawira wa abakureami ima ino gu regbo mi aida ngarasaro ti ni. I naasana re na asanahe, na gipai re naundo re mi peke agu apai du tipa re fuyo. I nadegatuyo fere wenengai si kini sa gupai nga i undo re ni bakerehe.” Agu ababiapai ninaata ata na adiayo na tambuahe ho awirina aberãpa yo ni.

ONI SONGODI AGUYO NAMANGASUNGE BETERE YO

15, 16. Gini asunge aboro Betere amangaha, na wai rengbe ani ka songoda yo?

15 Rogo zegino dunduko, agu aboro namangasunge Betere yo nasongoda gu sunge nga ga Kindo rogo agu ringara be-basunge angera kuriihe. Kangia gaoni dungurati na aboro Betere rogoho, wai rengbe oni ka yugo gupai nga oni natingidapa yo atingida?

16 Ho i ada ni ni bambataha Betere yo, i ima rengba kaa berãpa gayo aborokporo gbiati gu wene abakureayo i ambuyo. I adu na bakere ngbarago ka agu aboro du Betere yo gbiati aguyo du rogo gayo vovo dungurati zi bakure na yo! (Mk. 10:29, 30) Gu sunge i amangaha nambu regbo ambu fuyo i ndu tipa adunguratise na tungusapai rogo aposo dũ. Ono tie, aregbo kinaho aboro Betere amanga kura asunge fuo nyasa yo sunge. Ho agu aboro du rogo gayo dungurati arugatiyo ni na gipai re na ki yugu gupai nga i na tambuahe tipa gu sunge i amangaha, aboro dunduko nagbia undo.Oni gedi 1 ATesaroniko 2:9.

 UNDO AGU AWIRINA NAMANGA SUNGE KINDO ROGO KURA ARINGARA

17, 18. Mangasunge kindo rogo kura ringara nakoda gini apai?

17 Agu awirina namangasunge kindo rogo kura aringara nagbiatiyo na gu kparakaapai nga ka inido tiyo na agu ariahe du rogo gu rago re, afugo, asino aboro, na agu apai du yo kia ti agu apai i nainidihe. Tipagine i aida aida ti ni ka gbiatiyo na agi apai re?

18 Kura amokedi namangasunge tungusapai rogo gu rago rengbe dungu aboro ka gbia undo ti gu rabahe i agbiaha. Be-basunge nameka wene abambu fu amokedi na kini fu wiri marã fuyo si niundo yo na agu apai zingoho amanga yo. Agu awirina namangasunge rogo kura aringara, i nakeda yo ku rogo be-basunge, watadu i undo na meka abe-basunge, agu aba i asafugo rogoho, aBambu Bakere Adunguratise, watadu aBambu Kindo. Gu kura apai kinaha i amangaha fuyo wa fu riahe fuyo na bambu tipa ka ra rogoho. Wakina aboro Betere, i nandu tipa adunguratise dedede na kini tungusipai rogo gu rago du yo rogoho, sidu, i naundo rogo dungu agene.

19. Ginipai si aida ani tingidihe tipa agu aboro namangasunge kindo rogo kura aringara?

19 Wai rengbe oni ka tingidapa agi awirina re? Si naida oni tingidi gupai nga, ti tonatonaha, i arengbenga ka inido agu ariahe du rogo gu rago re te. Si naida oni tingidi gipai re ho oni ayambayo ni tipa riahe; oni rengbe ka sanayo tipa gu riahe rengbe yo ka rihe watadu gu i aida ka asadaha. Oni du na zerangbaduse wa i nikaa wirika gu fugo na sino agu aboro du rogo gu rago re. Si ima rengba ka dia yo na regbo tipa i girogo agu apai dunduko oni agumbaha, ono oni ima rengba ka undo yo i ini wai kaa yamba afugo. I naida aida ka wirikapai!

20. Gini wene gene rengbe ani ka tingidapa agu aboro namangasunge kindo gbiati avunguyo ngbaha?

20 Wa agi awirina re aima kuti sunge kindo, avunguyo nagbinza a. Kangia avunguyo nga aDezire Yekova, si nawira wa i idi gupai nga awiriyo nye kina kuti ngba gayo sunge. (3 Yo.  4) Nirengo, ka avunguyo aida na undo, agi awirina re ima rengba ka manga gupai rengbe yo ka mangaha tipa ka undo. Ono wa vura duhe wo, agu awirina du rogo gu ba du avungu agu awirina namangasunge kindo rogoho ima rengba ka ngerafuo gi gbinza avunguyo re ho i aida undo ni. Oni tingidi gupai nga agu awirina namangasunge kindo, i namanga nyanyakipa sunge rogo zegino areme. (Mt. 28:19, 20) Ya mo oni watadu gaoni dungurati rengbe ka undo avungu agu awirina namangasunge kindo?

21. Agu awirina namangasunge kindo nabi gu undo na ngarasaro kura aboro afuhe wai?

21 Agu awirina namangasunge kindo ti aregbo dũ, i amanganga ha tipa ka gbia marã te, ono i namangaha fu Yekova na kura aboro. I na bakere tambuahe tipa gu undo rengbe oni ka fuhe. Kura wirina sa namangasunge kindo rogo kura ringara aya: “Ka boro vura ke kina wiripai foro ka yugo gani tambuahe na ni, si nayugo gupai nga kura aboro naberãpa ro aberã na i na ngbarago tipa gu sunge mo amangaha.”

22. Mo nabi mangasunge kindo ti aregbo dũ wai?

22 Mangasunge fu Yekova ti aregbo dũ nga pa maku nirengo. Akpakarapai kinaho i agbiatiyo na ni, arugapai kinaho si aida i ndu kuti ni, na si naida aida i ringbisi gayo sunge. Na agi apai re nambakada yo tipa gu nyenye sunge napido ga Yekova ruru amoyambu dunduko rogo gako Kindo. Ani dunduko ‘nitingidinga pa gu mangapai atingida nga ga idapase na gu sunge nyemuse’ nga ga agu aboro namangasunge kindo ti aregbo dũ.1 Tesa. 1:3.