Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Mbirinvuo 2014

Oni Nye ni Ruru Roni Dungu Arungo ki Vura Du Vurũ

Oni Nye ni Ruru Roni Dungu Arungo ki Vura Du Vurũ

“Ani aríma arima ku rogo ga Mbori ngbi ti dungu gberãrago.”AMO. 14:22.

1. Tipagine ga Mbori amoyambu ambu ti ni be fudifudiapai?

YA MO mo ini gupai nga mo nika gbia tiro agbia na dungu arungo mbata fu mo gbia nyenye unga? Si nawira wa mo ima inoho. Singia mo nga vovo boro rogo rengo yo watadu mo nga gu boro naima ima ni ga Yekova moyambu, mo ima ino gupai nga fudifudiapai namanga rani gbe mbiko gupai nga gi zegino re tiibe Satana.Yugo. 12:12.

2. (a) Gini ngbatunga fudifudiapai namanga ndikidi aKristano kurii gu namanga aboro dunduko? (Oni bi gu sura du ti tonatonaha.) (b) Da du naye na arungosiro kuti aKristano, na ani naino gipai re wai?

2 Fudifudiapai namanga aboro dunduko, ono kura ngbatungaha kinaho namanga kina ndikidi aKristano. (1 Kor. 10:13) Ginigu du ngaha? Kere sogote mbikopa ka yo kuti agu andiko nga ga Mbori. Yesu aya fu apefuoko wẽ: “Moyambu nakia nga susi bairani te. Si ngia i arungosi re arungosi, i arúngosi roni arungosi a.” (Yo. 15:20) Da du naye na gu rungosiro re? Satana du nawo ti nzingirihe, na Ziazia Kekeapai naya tipa ko wẽ ko wa gu “bahu nata ki nipoi, nigbata [ga Mbori] boro ka rita ni.” (1 Pet. 5:8) Satana namangapai ngba dungu agene ka sa ga Yesu abawiriki i mbu manga rurupai. Ani bingo gupai namangi gu mokedi nangia Pauro.

 RUNGOSIRO RUSETURA YO

3-5. (a) Gini rungosiro Pauro agbia tiko na ni Rusetura yo? (b) Wai gupai ko apehe tipa dungu arungo angarasi abawiriki?

3 I arungosi Pauro bara dunguhe mbiko gako idapase. (2 Kor. 11:23-27) Gu sa amangi Rusetura yo. Fuo aPauro na Barunaba husi kumba i avunguko ni ngbaramaningbaramani ko, aboro asambuo yo ki ya ambori nga yo. Ono i azungodi aboro ka i irisingo yo wa gure ya! Ono fuo regbo tooni, gbegberẽ rii aYudo yo ada, ki gumba aziree kuti aPauro tipa ka gberesa rii aboro yo kutiyo. Gu rimbasa aboro naadu ho aidi kuti agu aziree re! I ki tona ka sopa Pauro na ambia daho i aberẽhe ni nga ko ima kpi.Amo. 14:8-19.

4 APauro na Barunaba andu ku Derube yo, fuoho, “i ki karaga tiyo ku Rusetura yo, na ku Ikonio yo, a ku Andiokia yo, ki nyakasi mbisimo abawiriki, ki ngarasi yo i ka kuti idapase, ki ya, ani aríma arima ku rogo ga Mbori ngbi ti dungu gberãrago” du rogoyo nga dungu arungo. (Amo. 14:21, 22) Ti tonatonaha, agu afugo re ima rengba ka kpakara bangiri boro. Kurigu­re, pa susa boro rogo “dungu gberãrago” watadu arungo nga gbegberẽpai. Wai duhe tie nga aPauro na Barunaba ‘angarasi abawiriki’ na gu pangbanga nga ga rimo ku rogo ga Mbori ngbi rogo dungu arungo?

5 Ani rengbe ka gbia karagapai ka ani wisigi fugo Pauro wenengai. Ko aayanga gbua wẽ: “Si naida ani hi dungu gberãrago watadu arungo te.” Ono ko aya: ‘Ani aríma arima ku rogo ga Mbori ngbi ti dungu arungo.’ Sidu, Pauro anyakasi abawiriki ni nyakasa ko pa gu maku i nika gbiaha mbiko nye yo ni ruruyo. Anga pa musumo du gbua nangia pa gu maku re te. Yesu aima pe gupai a nga: ‘Gu ni ka hi pai dati yangara rago kindi, i abátasa gu ni abatasa re.’Mt. 10:22.

6. Gini mosoro du ho fu agu aboro nika hipai dati digida rago?

6 Ka ani hi arungosiro, ani gbia mosoro agbia. Tipa mbedimbedi aKristano, gayo mosoro nga zogarago na Yesu ngbangbaturũ yo ni agu aboro kaa kpingo ya. Tipa “kura akandoro,” i nika gbia nyenye unga auru kpotosende nga gu “ruru apai nikanye rogoho.” (Yo. 10:16; 2 Pet. 3:13) Ono a wa Pauro agumbaha, ani nika gbiatirani agbia na dungu fudifudiapai mbata fu gbia ani mosoro. Ani bingo ngbatunga aasada ue nga gu rengbe ani ka gbiatirani na ni.

GU ZUBOHE I ABIHE ABI

7. Gu zubohe i abihe abi nakoda gini apai?

7 Yesu aya: “I afú roni fu abororondo; i atáka roni rogo abambutiria; oni arú tipa re barangba agbia na abakindo.” (Mk. 13:9) A wa agi afugo re ayugoho, bete aKristano nika gbiatiyo agbia na rungosiro, singia be aboro pambori watadu be agu abarumbatayo nga ga birĩ zogarago yo. (Amo. 5:27, 28) Ani bingo ga Pauro kpiapai berewe. Ya mo gunde aziko mbiko inoko pa gi rungosiro re? Wagusa te.Oni gedi Amokedi 20:22, 23.

8, 9. Wai Pauro ayugu gupai nga ko aima diaberã ka hipai, na wai kura awirina namangi ngbatunga diaberã wakina gure areme a?

8 Pauro aru nyanyaki sa ga Satana zubohe na ko aya: “Ono mi akiisa nga ungare te, mi ki rengbe na digisa gu pai mi ninamaa bangire kuti ni, na gu sunge mi adi be Gbia Yesu, mi nitungusi gu wene pangbanga nga ga Mbori undahe.” (Amo. 20:24) Si tie ziazia nga, Pauro aagundenga be gu rungosiro naapido ko ku mbatayo te. Kuba gure, ko adiberã ka hi agu rungosiro re dunduko. Gako banguapai angia ka ‘tungusa wene pangbanga’ arungosiro ki vura ni gbiako vurũ.

9 Areme, dungu awirina ima diaberã  wakina gure a. Ni kpiapai, rogo kura ringara sa, kura aDezire Yekova ima hipai tipa agarã nambeda kuti 20 ku bambukiso yo mbikopa kparayo tiyo ti gu gbegberẽ apai nga ga zegino nakoda avura na asogote. Gu ringara re aaidanga gupai nga i pe gipai re ni ngbanga te. Ho i adu ni bambukiso yo, i aaidanga gayo aborokporo niye kaa biyo te, na i anaata aguyo na kini mangiyo na dungu ngbatunga arungosi.

10. Tipagine si aidanga ti ni ani gunde be tunguotunguo arungosiro ya?

10 Awirinarani rogo kura aringara nahi agu arungosi naye ni tunguotunguoho. Ka pai wa gure mangi tipa roni, si aidanga oni gunde te. Oni berẽnga pa Yosefa. I abagiko ni kanga, ono Yekova “ki batasi ko be agu apai naamanga ko dunduko.” (Amo. 7:9, 10) Yekova rengbe ka mangapai wakina gure tipa roni a. Ka bangironi gonga ti gupai nga “Gbia ini pa batasa aidipambori be asada” ya. (2 Pet. 2:9) Ya mo oni akido kuti Yekova kindi, ki ini gupai nga ko rengbe arengba ka batasa roni be gi sino raka re na ki fu nyenye unga furoni rogo gako Kindo? Oni na wene nduapai beroni ka kido kutiko na ki du na ngarã tipa ka hi rungosiro.1 Pet. 5:8, 9.

GU ZUBOHE I ABINGO HO YA

11. Wai du gu ga Satana zubohe i abingo ho ya kia ti gu i abihe abi?

11 Gu zubohe i abingo ho ya nga gu kura ngbatunga rungosi rengbe ka gbia rani. Wai du gi zubohe re kia ti gu i abihe abi? Gu zubohe i abihe abi wakina gu bavugumo naye ku rogo gbata ki kuadi abambu kusande ni kina ipo. Gu zubohe i abingo ho abi ya wakina angbari naye sende yo yee ki zi ga boro bambu ki tona ka ri angua-bambu daho si nika gburuwa ni. Ngbatunga gi zubohe re rengbe ka ye sa rani ka ani ainongo ya da kinaho si nika maapai ni ka gene adunga ani nehe ya.

12. (a) Gini birĩ sa Satana amangasunge na ni nga gu i abingo ho abi ya, na tipagine ko azio dungu aboro ti ni na gu birĩ re? (b) Gine nasa Pauro ko ya “rungorungo boro” nga ko?

12 Satana na nyemu ka gberesa gaani pagume na Yekova, singia na gu zubohe nga rungosiro i abihe abi watadu ka mangaapai ni birĩ yee tipa ka gberesa gaani idapase. Birĩ sa Satana amangasunge na ni kini zi dungu aboro nga zerakpotoseyo. Rago anaagberã agberã ti Pauro ti kura aregbo mbiko gako zangarengba. (Oni gedi ARomo 7:21-24.) Pauro angia gu Kristano naima “nyaka” rogo toro yo gbe na si nawiraha nga ko adu kina dagba agu abaakumba naadu rogo riigbu bipasunge Yerusarema yo. Ko awiripa ya wai “rungorungo boro” nga ko? Ko apehe wo mbiko gako zangarengba. Ko adu nzunzu na nyemu manga gupai du ni ruruhe, ono kura he kini sovura na ko tipa ko mangi kina gupai du ni gbegberẽhe. Ka si du nga pai naamanga ro ti kura aregbo wa gure, ya mo mo nagbia wasa mbiko ino gupai nga si aima manga gu mokedi nangia Pauro wo a?

13, 14. (a) Gine ninaaba gberãrago ti kura ga Mbori aboro? (b) Da du na nyemu ka bi gaani idapase si ni gburuwa, na tipagine?

13 Ti kura aregbo, dungu awirina kpotoyo yo naazera, i ki du na bakabangirise, watadu kini biti yo nga sunge tiyo te. Ni kpiapai, zaaza nazaki gene sa aya: “Mi naaberã bara dunguhe kurii gu ingahe mi namangihe, na bakere gberãrago naazio re ti agu aregbo dũ mi aberãkuriihe. Ho mi aberã ni kurii agu apai mi namangihe ni irairaha, si naasa re mi nibihe nga boro ho rengbe ka kpinyemure te, zavura Yekova.”

14 Gine ninaasa zaaza amoyambu nga ga Yekova yo wa Debora i nirungo kpotoyo yo? Dungu apai rengbe ka ye na ni. Kura aboro kinaho narungo kpotoyo yo mbiko gupai nga rago angbanga tiyo na wai du yo  watadu wai du gayo raka te. (Snz. 15:15) Tipa akurayo, agu akaza du tiyo watadu wai du kpotoyo rengbe arengba ka sa yo i du na gberãrago. Ka si vura du nga ginigu du du tipa rani, si naida ani tingidipa gu boro naida rago gberẽ tirani mbiko gipai re. Da du nzunzu naida rago gberẽ tirani tipa ani ki mbu iriso Yekova? Satana du. I ima sarangbanga ko sa kpio, na ko naida mo nibi tiro a nga wenepai ho tipa ro ku mbatayo te. (Yugo. 20:10) Gu rengo du ho nga, gu sásá du Satana na ni nga ka sa rani ani du na bakabangirise, ani zere rogo gaani irisombori, na ani ki mbu iriso ko. Ka mo mbunga tiro fuko ya, ono mo niso gu vura aso kindi ga Mbori aboro asoho nga ga toro!

15. Wai rengbe ani ka yugo gupai nga ani ima diaberã ka sovura kuti zerakpotoseyo?

15 Mo diberã kaa sovura aso kindi. Mo niberẽpa gu mosoro du ku mbatayo. Pauro akepai fu agu aKristano naadu Korinda yo ki ya: “Ani arungbura nga te; ono gu kpotorani du zegi yo navura zirã, gu tororani du ku vuru he yo i nambakada ha waragoagira. Bambiko gaani gberãngbi du ni aakpura ha nga gu nanye ngbutuko, si nambakada nyenye rõrõi taarimo tipa rani susi bakere gbe.”2 Kor. 4:16, 17.

ONI MBAKADITIRONI AWERE TIPA ARUNGO

Paranga aKristano na kuru yo naraba tiyo ka songoda gayo idapase (Oni bi genewaraga 16)

16. Tipagine si aida ani mbakaditirani ti ni awere tipa arungo?

16 A wa ani nabihe, Satana na dungu ‘abirĩ’ beko. (Ef. 6:11) Ani dunduko ni basasa si aida ani ndu kuti gu rugute du rogo 1 Petero 5:9 nga gu naya: “Oni ká fu ko ki ru nyanyaki rogo idapase yo.” Tipa ka manga gupai re, si naida ani mbakadi berãrani na kpotoraniyo awere tipa manga rurupai. Kpiapai du re tipa gipai re: Abanzengere naadia gbanga regbo kuti iigirã wirika sovura mbu gbanga regbo koyo kindi kuti sovura watadu mbata fu i gi gupai nga vura naye. Kinawo duhe a tipa ga  Yekova aborovura. Ani ainongo gini ngbatunga vura nga ga toro ani ka soho ku mbatayo te. Wa duhe were tie, ya mo patatamana ngaha furani ani gbia wene rabahe vuru gu regbo yo du bete zereda adu te? Pauro akepai fu aKorindo ki ya: “Oni wísigi tironi si ngia oni rogo idapase yo; oni ásadi tironi.”2 Kor. 13:5.

17-19. (a) Rogo gini agene rengbe ani ka asada tirani? (b) Wai rengbe paranga aboro ka mbakadatiyo ka songoda pa gayo idapase sukuru yo?

17 Gene sa rengbe ani ka degaturani kuti ga Pauro arugute ngbaha nga ka wisigo tirani na ngbatunga asanahe wa: ‘Ya mo mi naakpara fu Yekova dedede? Ho kura aboro naangarasa re ni mi mangi gbegberẽpai, ya mo mi naagiasangba Mbori susi ga aboro? Ya mo mi naandu tipa adunguratise ti aregbo dũ? Ya mo mi naafura tipa gimi idapase ni ngarã? Ya mo mi naambupai fu awirinami ti agu aingahe i amangaha, a wa mi aida i mbupai fere? Ya mo mi nara fu agu aboro nangbembatayo rogo gu dungurati du mi rogoho na aguyo nangerafuo adungurati rogo zegino dũ?’

18 Oni kparia gupai nga asanahe ue dagba agu du kuari re nabipa fura zanga gunde tipa gaani idapase na ru nyanyaki sa gu sosodahe nga ga kura aboro. Dungu gaani paranga aboro namanga gupai re sukuru yo. I ima wirika wai ka do gunde kusayo watadu zee tipa ka fura wenengai tipa gayo aida. I nafura zanga gunde. I aima keka apai rogo gaani amagazini tipa wai ka manga gipai re. Ni kpiapai, gu Ngbaõbambu Sinziri nangia ga Merekoko 1, 2013 asakipa wai rengbe boro ka fura wenengai tipa gani aida sukuru yo ni sana ní asanahe. Avunguagude, oni mangi akpiapai na awironi kporo yo tipa i ini wai ka karagapai fu akurayo sukuru yo.

19 Kina rengo du ngaha nga, si ni taatapai ti aregbo dũ ka fura ni ngarã watadu ka manga kura apai Yekova aida ani mangihe te. Ho ani amanga bakere sunge ni uru, si ni taatapai furani ani ndu tipa dunguratise nyemu te. Guari rii ba rame ngbawiso ka ndu ka tungusapai nga kina kpakarapai. Ono mo tingidi gupai nga: Ho bakere aasada nika ye ni ku mbatayo, mo rengbe arengba ka hihe ka mo ima inido tiro wenengai na agu apai nga ga toro kini mangihe dedede.

20, 21. (a) Wai pa berã ani kurii pa ga Yesu motumo narengbe ka undo rani ani do gberãrago kusayo? (b) Ginipai si aida si du nga gaani diaberã nibipa arungo?

20 Na gu zubohe boro abingo ho abi si niye ya? Ni kpiapai, wai rengbe ani ka sovura kuti gu gberãrago du ani na ni? Bakerepai sa rengbe ka undo rani gbe nga berãkurii pa ga Yesu motumo. Gure nga gupai Pauro amangihe. Ko anidu ni rungorungo ko ti kura aregbo. Ono ko aima ino gupai nga Kristo akpi tipa aboro ingapai, angianga ziazia aboro ya. Na Pauro angia boro sa dagba agu aboro ingapai re. Ko ake gupai a nga: ‘Gu unga du mi ngbaha mi ngbaha mbiko Wiri Mbori, ko nakpinyemu re na ki futiko tipa re.’ (Gara. 2:20) Ii, Pauro aima dia ga Yesu motumo kugume. Ko aima ino gupai nga gu motumo re adu tipa ko.

21 Wakina gure a, ka mo abi ga Yesu motumo ni gu gamahe Yekova afuhe foro, mo gbia bakere undo agbia. Ono gere ayugongo gupai nga gberãrago watadu zerakpotoseyo nika guari tiro ni kina boro ipo te. Agurani kinaho nika hi bete gi rungo re ahi daho vovo zegino nika ye ni. Ono mo tingidi gupai nga: Mosoro nika du fu agu aboro nika hipai zanga mbu Satana ko dibeyo. Aregbo dũ ani ambeda kuti gu regbo ga Mbori Ngbii nika ye na zereda, na ki di ingapai ti aboro dunduko. Mo diberã ka rimo ku rogo ga Mbori Ngbi, ka si vura du nga rogo dungu arungo.