Yesu aya fu aSadoke wẽ agu aboro nika zingabekpio “i aroga nga ade te, i afu nga ade ni dereakumba a te.” (Ruka 20:34-36) Ya mo ko aafura tipa agu aboro i nika zingisayo auru kpotosende?

Gi sanahe re na nyanyakipa ha, gbe, fu agu aboro gayo abadiarogatise nakpiki. Agi aboro re na nyemu ka raka na gayo abadiarogatise ho i nika zingisayo ni rogo vovo zegino. Kura dekurugbo sa aya: “Mi na diare aaidanga ka digiso gaani rogatise te. Ani aakpinyemu kadu ni kodikodi rani rogo irisombori ni arogotise nyeanye kindi. Mi kindi na nyemu ka raka sa na diare.” Ya mo ndupai ho ani moibangirani nga agu aboro nika zingabekpio nika rogatiyo? Ka pepai ni guruhe, ani ainongo ho nzunzu te.

Tipa dungu agarã, gaani awaraga ape gupai nga si nawira wa gu zingabekpio Yesu aafura tipaha na rogatise re, si tipa agu aboro nika zinga auru kpotosende, na i amanganga rogatise te. * (Mt. 22:29, 30; Mk. 12:24, 25; Rk. 20:34-36) Wa vura duhe nga, ani arengbanga ka ya gaani bipai ru te, ya mo si rengbe kadu nga Yesu aafura tipa agu aboro i nika zingisayo i ga ku ngbangbaturũ yo? Ani wisigingo gupai Yesu agumbaha.

Ani bingo gupai namangi. (Oni gedi Ruka 20:27-33.) ASadoke nga agu aboro naaidanga kuti zingabekpio ya, i aˈasada Yesu wa ka koto ngbako yo nibipa zingabekpio na gu rogatise nga ga dia boro dekurugbo gumeni. * Yesu akaragapai ki ya: “Awiri zegino naroga ade, i ki fuku yo i nidu ni dereakumba. Ono agu yo i ka ya ti yo i rengbe na da ti gu ngbi re, na ti zingabekpio, i aroga nga ade te, i afu nga ade ni dereakumba a te. bambiko ka i kpi nga berewe te. Bambiko i rengbe na amaraika; ki du ni awiri Mbori, wa du yo ni awiri zingabekpio.”Rk. 20:34-36.

Tipagine gaani awaraga naape gupai ti ni nga si wira wa Yesu aafura tipa gu zingabekpio nika du auru kpotosende ane? Mburuhe rii aberãpai ue. Bambataha nga, si ruaru ani ya si nawira wa aSadoke aaberãpa gu zingabekpio nika du auru kpotosende na Yesu akaragapai ringbisihe na gayo sanahe. Uehe nga, Yesu adigisi gako karagapai ni furako tipa Abarayama, Yisaka, na Yakobo nga gu ruru akumba i nika zingisayo auru kpotosende ane.Rk. 20:37, 38.

Ono tie, si ima rengba kadu nga Yesu aaberãpa gu zingabekpio nga ga ngbangbaturũ. Ginipai sarani ani dakuti gu digisopai re? Ani bingo nyanyakipa apai ue Yesu apehe.

‘Aguyo i ka ya tiyo i rengbe na dati . . . zingabekpio.’ Ruru mbedimbedi aKristano “re na ga Mbori ngbi.” (2 Tesa. 1:5, 11) Ga Yesu motumo nasayo ni ruruyo tipa i gbia unga; si du i akpingo ti ni na ingapai tiyo ya. (Rom. 5:1, 18; 8:1) I nayamba yo nga ‘aboro maku du ni ziazia yo’ na i ima rẽ tipa zingabekpio ku ngbangbaturũ yo. (Yugo. 20:5, 6) Gu kparakparapai du dagbayo na agu aboro nika du auru kpotosende nga, i nika zingisa “iraira” aboro azingisa auru kpotosende ane. (Amo. 24:15) Ya mo ani rengbe ka  ya mbedimbedi aKristano ‘rẽarẽ’ na zingabekpio?

“Ka i kpi nga berewe te.” Kura sasa afugo Ziazia Kekeapai naya, “i tipa kpio berewe te” na “kpio na ome kuriyo te.” Gu mbedimbedi aKristano nakpi ni ruruyo auru kpotosende naga ku ngbangbaturũ yo na ki da na gu unga zanga kpio nyeanye kindi. (1 Kor. 15:53, 54) Kpio na ome berewe kurii agu aboro nazinga be kpio ku ngbangbaturũ yo te. *

Nibi gupai fura ani tipaha re, ginipai rengbe ani kada kuti ni? Si ima rengba kadu nga gupai Yesu aapehe tipa rogatise na zingabekpio re, si tipa agu aboro nika ga ku ngbangbaturũ yo. Ka si du wo, gure nga afugo Yesu nape dungu apai furani tipa agu aboro nika ga ku ngbangbaturũ yo nga: I amanganga rogatise te, i akpingo te, na ngba kura gene, i wakina agu amaraika du ngbangbaturũ yo. Ono tie, gi digisopai re nakusa dungu asanahe.

Bambataha nga, tipagine ka Yesu aafura ti ni fu aSadoke tipa gu zingabekpio nga ga ngbangbaturũ baraho si awira wa i aaberãpa gu zingabekpio du auru kpotosende? Yesu anaakaraganga pai dedede fu asogoko ringbisihe na gupai i aaberãha te. Ni kpiapai, ko aya fu agu aYudo naida ko yugu gupai i aino apai ti ni fuyo wẽ: “Oni gbárasi gi yekaru re, rame ki du [biata] mi ki dua ha berewe.” Si nawira wa Yesu aima ino gupai nga i aaberãpa Yekaru, “ono ko agumba pa gu yekaru nga boroko.” (Yo. 2:18-21) Si rengbe kadu nga ko abihe nga ndupai ho tipa ko karagapai kuti ga aSadoke sanahe te mbiko i angia agu aboro naaidanga kuti zingabekpio watadu padu amaraika ti ni ya. (Snz. 23:9; Mt. 7:6; Amo. 23:8) Kuba gure, si nawira wa ko aaida ka yugo rengo tipa gu zingabekpio nga ga ngbangbaturũ wa ka gako abawiriki gbia undo ti ni, nga agu aboro si adu nga i nika ga ku ngbangbaturũ yo.

Uehe nga, Tipagine ka Yesu adigisi gako sakapai ti ni na pa Abarayama, Yisaka, na Yakobo nga agu aboro nika zingabekpio auru kpotosende? (Oni gedi Matayo 22:31, 32.) Mo bi gupai nga Yesu atona fugo tipa gi ruru akumba re na agu afugo nga “ono pa zinga aboro be kpio.” Gi fugo re nayugu gupai nga ko aaida ka gbe berãyo kuti kurapai kia. Fuo gure, Yesu adipai rogo ga Moize kekeapai aSadoke aima ida kuti ni, na ki mangisunge na agu afugo Yekova agumbaha fu Moize rogo yegbende ngua ka yugo na ni nga ga Mbori ringbisapai du nga ka zingisa aboro be kpio auru kpotosende.Gate 3:1-6.

Biataha nga, kangia gupai Yesu aapehe tipa zingabekpio na rogatise si tipa gu zingabekpio nga ga ngbangbaturũ, ya mo si nayugo gupai nga agu aboro nika zingabekpio auru kpotosende nika manga rogatise amanga? Fugo Mbori afunga karagapai nzunzu sa gi sanahe re te. Kangia Yesu aafura tipa gu zingabekpio nga ga ngbangbaturũ, afugoko ayugongo gupai gbaiga nga agu aboro i nika zingisayo auru kpotosende arogatiyo rogo vovo zegino te.

Sidu, ani ini gupai nga Fugo Mbori naya kpio nakparaka arogotise. Sidu, si agberẽnga dekurugbo diberã ka manga rogatise berewe te. Gipai re nga ga boro diaberã, na si aidanga i bisirapa ngbatunga agi aboro re tipa gbatayo badiarogatise te.Rom. 7:2, 3; 1 Kor. 7:39.

Nirengo, ani ima rengba kadu na dungu asanahe tipa wai raka nika du rogo vovo zegino. Kuba gupai nga ani bakibangirani na pa akaragapai kuti agi asanahe re, si naida ani sungu ka bi wai si nika manga. Ono gu kido rengbe ani kadu na ni nga: Aboro giasangba nika du na ngbarago, mbiko Yekova nika mbisa gayo azingo na nyemuapai dunduko.Tam. 145:16.

^ genewaraga 4 Oni bi gu Ngbaõbambu Sinziri nangia ga Banzinga 1, 1987, kpewaraga 30-31.

^ genewaraga 5 Ti agu aregbo i aakeka Ziazia Kekeapai ti ni, sino aboro angia kaa roga dekurugbo agu agumeyo kpiki zanga vunga agunde tipa ka zugosi ngbatungayo.Bam. P. 38:8; Pa Rug. 25:5, 6.

^ genewaraga 9 Agu aboro nika zinga auru kpotosende ane, i nika gbia nyenye unga angianga na gu kpoto tiyo ka kpingo ya te. Ka oni aida ka ino gu kparakparapai du dagba gu kpoto ka kpingo ya na nyenye unga, oni bi gu Ngbaõbambu Sinziri nangia Zerekpe 1, 1984, kpewaraga 30-31.