“Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”Yoane 3:16.

Gere nga gu veresi rogo Ziazia Kekeapai aboro naima inopaha rogo zegino dunduko. Aboro naya veresi ho “nafura wenengai wa gere tipa gu pagume du dagba aboro na Mbori na gu gene nga ga bata te.” Mbiko gipai re, rogo kura aringara, aboro nakeka “Yoane 3:16” ti regbo gayo adunguratise, ti vuro gayo atarambiri, kpoto abambu, na ti gu kura ahe.

Nibi agi apai re dunduko, agu aboro nakeka gi veresi re nabihe nga ga Mbori nyemuse nika ye na bata fuyo. Na ginipai du tipa ro? Ginipai ga Mbori nyemuse ayugoho foro? Na ginipai mo aberãha nga si Mbori amangihe tipa ka yugo gako nyemuse na ni foro?

“MBORI AKPI NYEMU ABORO AKPI ZEGINO DŨ”

Dungu aboro naatambua Mbori atambua tipa agu ahe ko akusihe ku rogo zegino kodihe na aboro. Rakiraki ahe ima du na tatamana na gu gene i ambakadihe ngbaha nayugoho ayugo nga gu boro namangihe ní na bakere tatamana. Dungu aboro naatambua Mbori tipa unga na aˈuru dunduko. I ima ino gupai a nga Mbori du nafu agu ahe fuyo i aidaha tipa ka raka ngbatunga agu nga wege, ime, riahe, na gu wege ani akparakaha dagba tirani na angua tipa wa ka ani araka na kini gbia ngbarago rogo agu apai ani amangaha.

Si adu ni wenepai ka ani atambua Mbori tipa gi wene ahe re dunduko mbiko ko nzunzu nga Bamangirani na ni Bafu Unga. (Atambuahe 104:10-28; 145:15, 16; Amokedi 4:24) Ani rengbe ka tambua Mbori tipa gu nyemuse du  ko na ni tipa rani ni berã ani kurii agu apai dunduko ko amangaha ani raki. Gu mokedi nangia Pauro aya: “[Mbori] ni tiko nafu unga fu aboro dũ, na onga na ahe dunduko.”Amokedi 17:25, 28.

Ono tie, Mbori nayugo gako nyemuse rogo dungu agene angianga kina ngerafuo rani rogo borose yo te. Ko tumba parani kurii ani ini agu apai nga ga toro na ki undo rani ani mbiisi gu gaani azingo nga ga toro re. (Matayo 5:3) Rogo gi gene re, aboro giasangba na gu maabangirise nga ka da ni papara “awiri Mbori.”ARomo 8:19-21.

Yoane 3:16 naya Mbori ayugu gako nyemuse furani ni kedako Wiriko nga Yesu ku auru kpotosende tipa ko yugupai furani tipa Mbori na ki kpi tipa rani. Ono tie, dungu aboro naya i aruganga tiyo nzunzu na ndu gupai si aaida Yesu ye ka kpi ti ni tipa aboro te. Na i ainongo wai pakpioko ayugopa ga Mbori nyemuse tipa rani te. Ani bingo wai Ziazia Kekeapai asaka ndu gupai Yesu akpi ti ni na pa nyakapaha.

“KO AFU BANGISA WIRIKO”

Aboro dunduko nakpi akpi, na kini woki na kini gbinza. Wa vura duhe wo, anga gure nangia ga Yekova bambata ringbisapai te. Ko afu gu maabangirise fu gu bambata aboro ko akusiyo nga i raki rogo paradizo auru kpotosende. Ono pai sa ko aaidaha beyo nga: I gisangbako. Mbori aya ka i aamanganga ha wo ya, i nika kpi akpi. (Bambata Pai 2:17) Nirengo, gu bambata kumba re aima samungu kuti ga Mbori pagbia, na ko ki ye na kpio kuriko na awiriko a. Pauro aya: “Gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”ARomo 5:12.

Ono tie, Mbori “nakpi nyemu ruru sarangbanga.” (Atambuahe 37:28) Wa vura duhe nga Mbori aima fu mbusa fu Adamu mbiko gu ingapai ko amangihe, si ayugongo gupai nga Mbori asaringbanga aboro dunduko nga i nirungo na kini kpi mbiko gako zanga giasangba te. Ni manga Mbori sunge na gu rugute nga “ungani tipa unga,” ko amangisunge na ruru sarangbanga tipa ka saha berewe taata fu aboro giasangba i gbia nyenye unga. (Gate 21:23) Gu sanahe na kura nga, wai du ka i arengbe ka karaga gu rengberengbe unga Adamu aingisihe re? Karagapai nga: Si aaida kina rengberengbe boro tumo na unga ni.

Yesu aye ku auru kpotosende na ki fu ungako tipa ka batasa aboro be ingapai na kpio

Si tie ziazia nga, wiri Adamu ho naarengbe ka fu gu ngbatunga motumo re te, ono kina Yesu sa. (Atambuahe 49:6-9) Wa duhe nga i aavunganga Yesu na ingapai tiko te, ko adu ni rengberengbe ko kina wai Adamu adu mbata. Sidu, nifu ko ungako, ko angbe aboro be gu sunge kanga nga ga ingapai. Ni mangako ho wo, ko afu  momu fu awiri Adamu nga i du na gu rengberengbe unga Adamu na Eva adu na ni mbata. (ARomo 3:23, 24; 6:23) Ya mo pai ho si aida ani mangihe tipa ka gbia undo ti gi mangapai nga ga nyemuse re?

“GU NI KA IDI PA KO”

Ka ani karaga tirani ku rogo Yoane 3:16 ani nabi agu afugo yo nga, “gu ni ka idi pa ko ni kpi nga te, ono nyenye unga du adu be ni.” Gipai re nayugo gupai nga pai kinaho si aida ani mangihe tipa ka gbia gu gamahe nga ga nyenye unga re. Ka ani aida ka gbia “nyenye unga,” si naida ani idi kuti Yesu na kini gisangbako.

Mo ima rengba ka berã gupai nga: ‘Gine naye na giasangba ku rogo gipai re? Anga Yesu aya, “gu ni ka idi pa ko” ní nika gbia nyenye unga te?’ Nirengo, idapase nga nyanyakipa pai. Ono tie, si ni nyanyakipa pai ka tingida gupai nga rogo Ziazia Kekeapai, anga idapase nga kungbo ida kuti pai te. Tipa ka ngba bangiri Mbori, anga si gbua nga boro ini Yesu ni Batasi te. Gu idipase re duwa ka ní fu tini ka manga gupai Yesu ayuguhe. Idapase zanga mangapai, sunge ti ni te. Ziazia Kekeapai naya: ‘Ka idapase zanga mangaapai si ni kpikpi he.’ (Yakoba 2:26) Ka pehe ngba kura gene, gupai si aidaha be idipase nga ní idi kuti Yesu, du rogoyo nga ní raki ringbisihe kuti gani idapase.

Pauro aya: “Nyemu Kristo nasoda rani; bambiko ani naya wẽ, boro sa [Yesu] akpi tipa yo dunduko, . . . ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.” (2 AKorindo 5:14, 15) Du ani na tambuahe tipa ga Yesu motumo nafõ rani ani mangi ariapai rogo gaani raka yo ka zanga raka fu tirani ono ka raka fu Yesu naakpi tipa rani. Gipai re nayugo gupai nga, si naida ani peresi manga agu apai Yesu ayuguhe rogo gaani raka. Gi ngbatunga ariapai re nika du na ome kurii agu apai nyakipaha bangirani, gaani asiapai, na agu apai dunduko ani amangaha. Gini mosoro nika du fu agu aboro dunduko idi kuti Yesu?

“NI KPI NGA TE, ONO NYENYE UNGA DU ADU BE NI”

Yangara papara Yoane 3:16 nafura tipa ga Mbori kidohe fu agu aboro du na idapase kuti motumo na naraka ringbisihe kuti gako arugute. Ga Mbori ringbisapai nga ka ruru boro ‘kpingo ya, ono nyenye unga duadu beni.’ Ono tie, amaabangirise ni bakiakia na sungudo agu aboro nagbia undo ti gi ga Mbori nyemuse re.

Yesu akidopa nyenye unga fu badona aboro sa ku ngbangbaturũ yo. Ko apepai fu gako ruru abawiriki nga ko nika mbakada ba fuyo wa ka i zogorago na ko rogo gako taarimo. (Yoane 14:2, 3; AFiripoio 3:20, 21) Agu aboro i nika zingisayo ku ngbangbaturũ yo re nika du “ni aboromotumo nga ga Mbori yo, na ga Kristo yo, i azóga rago na ko agarã ki du 1000.”Yugoti 20:6.

Kina bete apefuo Kristo nika gbia gi ngbatunga momu re. Nirengo, Yesu aya: “Oni nga umba rika aboro, ka oni gúnde nga ya; bambiko si ngba ti Baroni ka fu ngbi fu roni.” (Ruka 12:32) Bakio gu “umba rika aboro” re nika du wai? Yugoti 14:1, 4 naya: “Oni ngére, mi ki bi Wiri Kandoro [nga Yesu nazingi bekpio], ko ru ri gu bagangara nga Siona, agu yo ki du na ko 144,000, nga agu yo du na rimoko ni keke he ti ngbanda kpakpuyo, na rimo Bako a. . . . I atumo agi yo dagba aboro yo re, i du ni amakawa fu Mbori, na fu Wiri Kandoro a.” Ka i ringbisi bange agi aboro re na agu aboro naaraki auru kpotosende, agu aboro nga 144,000 re nga “umba rika aboro.” Wa duhe nga i nga abakindo, ada tie i nika zoga yo?

Yesu afura tipa kura ue badona ruru aboro nga aguyo nika gbia undo ti gu Kindo nga ga ngbangbaturũ re. A wa duhe rogo Yoane 10:16, Yesu aya: “Gu kura akandoro du be re, adu nga  rogo gi ndugu re ya; mi ayé aye na ami a, ami agía fugore agia; rimbasara adú adu sa, babanda akandoro ki du sa.” Agi “akandoro” re namaabangiri yo ka gbia nyenye unga auru kpotosende nga gu bangisa maabangirise Adamu na Eva agbarasipaha. Ani naino gipai wai?

Ziazia Kekeapai fura bara dunguhe nga Paradizo nika du auru kpotosende ane. Tipa ka bi gipai re, mo ima rengba ka zaka gamo Ziazia Kekeapai na ki gedi agi averesi re: Atambuahe 37:9-11; 46:8, 9; 72:7, 8, 16; Yesaya 35:5, 6; 65:21-23; Matayo 5:5; Yoane 5:28, 29; Yugoti 21:4. Agi averesi re nafura tipa digido vura, ngbongi, akaza, na kpio. Si nafura tipa gu regbo wene aboro nika gbia ngbarago ti meka gayo abambu, sopa bino, na sonosa agude rogo zezeredi zegino. * Ya mo gi maabangirise re angbanga tiro te? Ani na wene nduapai berani ka ida kuti gupai nga, agi akidohe re nika manga barambeda.

MBORI IMA MANGA DUNGU APAI

Ka mo berẽ tooni kurii agu apai dunduko Mbori namangihe foro na fu kura aboro dunduko, nirengo mo bihe abi nga ko ima manga dungu apai. Ani na unga berani, tatamana, na agu ahe nasongoda gaani raka. Kurigure, ga Mbori gamunihe nga ga motumo rogo Yesu yo naakpi tipa rani nafu bakere amaku furani a wa wiriki ani he rogo Yoane 3:16.

Ani nika gbia nyenye unga rogo gu bawene zezeredi zegino zanga kaza, vura, ngbongi watadu kpio na si nika zaka gene ani gbia nyenye ngbarago na amaku. Pa gbia mo agi amaku re nabi kina ro. Gu sanahe nakura nga, Ginipai mo amangaha fu Mbori?

^ genewaraga 24 Ka oni aida ka ino kura apai tipa gu asangbaanebi re, oni bi kapita 3 nga ga gu buku nga Gini Apai Nzunzu Ziazia Kekeapai Ayugoho? Si nga gu buku aDezire Yekova akusaha.