GINIHE NGA IDAPASE?

A wa furayo tipa “idapase” rogo Ziazia Kekeapai, idapase nakoda gu nyanyaki ida du mburuhe rii goapai. Gu boro du na idapase kuti Mbori, ní naa kido nga ko adigiso gako akidohe adigiso dunduko.

WAI MOIZE AYUGU IDAPASE?

Moize amoi mburu gako raka rii ga Mbori akidohe. (Bambata Pai 22:15-18) Ko aduna na momu tipa ka raka wene raka dagba agu aũkumuko nangia ga Ezipeta, ono ko ambupa gu momu re na ‘ki sia kina gupai nga i mangi ko gbegberẽ dagba ga Mbori aboro, susi gupai nga ngi tipa rago ngbutuko rogo gu ngbarago nangia ga ingaapai.’ (AEbere 11:25) Ya mo gure angia tunguotunguo diaberã ka ko abiratiko kusa tipaha? Oó, bambiko Ziazia Kekeapai nayaa, Moize ‘aru nyanyaki nibi gu ko ka bangirise abinga ko ya.’ (AEbere 11:27) Moize aabiranga tiko tipa gu diaberã ko amangihe nga ga idapase re te.

Moize anaagbata gene tipa ka nyakasa gu idapase nga ga kura aboro kuti Mbori. Nikpiapai, oni kparianga gupai namangi tigu regbo si adu wa i kengedi aYisaraere ku bangbanda ga Faro aborovura na Zamba Baime. I aduna bakere gunde nga kerepai ima dati yó, si ki sa gupai nga i kpari fu Yekova nafu Moize. Ginipai si aida Moize mangihe?

Si nawira wa Moize ainongo gupai nga Mbori nika kparaka Zamba Baime na ki zaki gene fu aYisaraere i bati te. Ono tie, Moize adu naa kido nga Mbori nika mangapai amanga tipa ka banda gako aboro. Moize aida awirinako duna kina gu bangisa bipai re. Ani nageda gupai nga: “Mose ki ya fu aboro, ‘Ka oni gúnde nga ya, oni rú zaa, ka bi gu bata nga ga Yekova nga gu ko ka manga ha fu roni areme.’” (Gate 14:13) Ya mo Moize aundo awirinako tipa i du na nyanyaki idapase? Ii, mbiko Ziazia Kekeapai nafura tipa Moize na aYisaraere dunduko niyaa: ‘Mbiko idapase i andu rogo Zamba Baime wa kina ugu sende.’ (AEbere 11:29) Ga Moize idapase aundongo kina ko sa te, ono agu aboro dunduko nawirikipai behe.

GINI APAI ANI AWIRIKAHA?

Ani rengbe ka wirika Moize nimaa ani gaani raka riimburu ga Mbori akidohe. Nikpiapai, Mbori nakido rani nga ko nika ngera angerafuo rani na agu ahe ani azingo tipaha ka ani moi gako iriso nibambatapai rogo gaani raka yo. (Matayo 6:33) Nirengo, si ima rengba kadu furani ni kpakarapai tipa ani ne nyemu duna dungu aũzegino berani nga gupai rengbe na arago dunduko areme. Ono ani rengbe kadu naa kido nga, ho ani amanga ome ni tipa ka sa gaani raka si du taata na kini moi berãrani tipa iriso Yekova, ko afu agu ahe afu furani ani aidaha. Ko nakido rani nga: “Mi ahe nga unda ro wa sa te, mi ambú nga ro a wa sa te.”—AEbere 13:5.

Ani naasada ka undo kura aboro a i sono rogo idapase yo. Nikpiapai, agu avunguagude duna tatamana ima ino gupai nga i na bakere momu beyo tipa ka undo awiriyo i duna idapase kuti Mbori. A wa i nikaa sona, si naida i duna inohe nga Mbori kinaho na ko nafu arugute furani tipa gupai duni ruruhe na gu duni irairaha. Kurigure, si naida i idi kuti gupai nga mangapai kuti gako arugute nga gu bawenepai si aida ani mangihe rogo gaani raka yo. (Yesaya 48:17, 18) Avunguagude nafu gamahe fu awiriyo ho i aundo yó ni tipa i duna idapase nga Mbori “kina ho, ko nafu mosoro fu agu yo nagbata ko.”—AEbere 11:6.