GA MO bipai nga gine tipa Banduru 21 2012, nga gu ramediwi dungu aboro aya tipaha wee, si nga gu uru bakere ariapai nika manga rogo zegino naabaha? Ringbisihe kuti gupai mo amoiberã ro tipaha, mo ima rengba ka duna gberarago watadu ngbarago. Ya mo gere angia kura iraira gumbapa digido zegino kumbatayo?

Na ginipai du tipa gu “digida rago” furayo tipaha rogo Ziazia Kekeapai? (Matayo 24:3) Kura aboro nagunde nga kpotosende nika gbi agbi. Aguyo na ngbarago tipa ka bi agu apai nika manga ti digido zegino. Dungu aboro omeyo niima bata be gia gupai nga digido zegino ima mbeda. Kangia ziree du, ya mo ka aboro duna ngbatunga abipai wagu re?

Kina ngbaro rengbe ka zera ka bi gupai Ziazia Kekeapai apehe tipa digido zegino. Anga Ziazia Kekeapai nafu kina gu nduapai si aida ani ngere ti ni kumbatayo tipa digido zegino te, ono si nape rengo a nga gberarago rengbe arengba ka zio rani ka digido zegino adanga niipo ya. Ani nahõpai bero mo wisigi agu akaragapai Ziazia Kekeapai afuhe kuti agu asanahe aboro asanaha tipa digido zegino.

 Ya mo i nika zo gi zegino re na we?

GU KARAGAPAI NGA GA ZIAZIA KEKEAPAI: “[Mbori] namoi amburu kpotosende ka i agbisa nga ha waragoagira ya.”ATAMBUAHE 104:5.

I agbarasanga gi kpotosende re na we watadu gu kurahe kia te. Kuba gure, Ziazia Kekeapai naya gi kpotosende re nga gu kporo aboro nika raka rogoho nyeanye kindi. Atambuahe kapita 37:29 nayaa: “Ruru aboro adía kumbo ringara, ki nye anye kindi.”—Atambuahe 115:16; Yesaya 45:18.

Fuo kusa Mbori kpotosende, ko aya kpotosende “ni wene he gbe,” na ko nabihe kindi kinawo. (Bambata Pai 1:31) Ko aberãnga pa gbarasaha te, ko akidohe nga ko nika “gbarasa agu yo nagbarasa kpotosende,” na ki bandaha ka i gbarasinga ha nyeanye kindi ya.—Yugoti 11:18.

Ono oni rengbe ka bakabangironi riipa gupai gumbayo ho rogo 2 Petero 3:7. Gu veresi re nayaa: ‘Agu angbangbaturũ duho awere na kpotosende si du niʹigiigi he tipa we.’ Ya mo gipai re ayugongo gupai nga i nika zo gi zegino re te? Kura aregbo kinaho Ziazia Kekeapai amangasunge na agu afugo nga “ngbangbaturũ,” “kpotosende,” na “we” nimasaku watadu kpiapai. Nikpiapai, ho Atambuahe 66:4 ayani wee: “Zegino dunduko nairisa ro; i nabi bia tambuahe foro, kini bi abia ti rimoro,” gu fugo nga “zegino” narukuba wiri aboro.

Agu averesi du mbata fu 2 Petero 3:7 nayugo gupai nga gu ngbangbaturũ, kpotosende, gbiati we furayo tipaha re, si nga akpiapai. Veresi 5 na 6 napepa gu wiratise du dagba gu Ime Akangbii naadu ti rago Noa. Ti gu regbo re, i agbarasi gu zegino nadumbata, ono wa si avura duwo, gaani kpotosende kina kubaha. Kuba gure, Ime Akangbii awege kina gu gbegberẽ aboro naadu auru “kpotosende.” Si agbarasi agu ahe a naadu wa “ngbangbaturũ,” nga agu aboro naazogarago kurii gu gbegberẽ rikaaboro re. (Bambata Pai 6:11) Teketeke a, 2 Petero 3:7 nafura tipa gu nyenye gbarasahe nika manga kumbatayo nga si nika ye kurii gbegberẽ aboro na gayo gbegberẽ zogarago wa we.

Ginipai nika manga ho zegino nika digo ni?

GU KARAGAPAI NGA GA ZIAZIA KEKEAPAI: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.”1 YOANE 2:17.

Gu “zegino” napaya apaya watadu nika susa re, anga si nga ndikidi kpotosende te, ono si nga gu ngbatunga rikaaboro arakanga kuti gupai Mbori akpinyemuhe ya. A wa munganga nigba boro ka kusa kaza rogoniyo tipa ka batasa unga ní, kinawo Mbori nika nyasa riipa gbegberẽ aboro kusayo tipa ka mbu wene aboro i gbia ngbarago auru kpotosende. (Atambuahe 37:9) Rogo gi gene re, ani rengbe ka ya “digido zegino” nika ye na wenepai.

Gu ngbatunga wene bipai du tipa “digido zegino” re, gu kura sasa afugo Ziazia Kekeapai naya tipaha wee, “digido sino raka,” watadu “digido agarã.” (Matayo 24:3; New International Version) Wa duhe nga aboro gbiati kpotosende nika bata abata ti digido zegino, ya mo si adanga ani ya vovo garã watadu vovo sino raka nika ngbe fuani te? Ziazia Kekeapai nakaragapai nga ii, mbiko si fura tipa “gu ngbi nikadu yo.”—Ruka 18:30.

Yesu afura tipa gu regbo du kumbatayo re nga, “ho i ka sa ahe ni dunduko ni vovo ho.” Tigu regbo re, ko nika karaga aboro i du wai Mbori aidi i du ti tonatonaha. (Matayo 19:28) Weneapai nikadu ti gu regbo re

  • Paradizo kpotosende na ngbabase gbiati zugo ahe kpaima fu aboro dunduko.—Yesaya 35:1; Mika 4:4.

  • Wene asunge zanga mbugo.—Yesaya 65:21-23.

  • I ahusa akaza ngba arikoho dunduko.—Yesaya 33:24.

  • Aboro dunduko ada niparanga yó zanga gbinza.—Eyobo 33:25.

  • I azingisa kpikpi aboro bekpio.—Yoane 5:28, 29.

Ka ani aamanga “gu pai Mbori akpi nyemu he,” ndupai dunga ho ani gunde be digido zegino te. Kuba gure, ani nipidihe apido na omerani dunduko.

 Ya mo digido zegino ima mbeda nirengo?

GU KARAGAPAI NGA GA ZIAZIA KEKEAPAI: “Ho oni ka bi agi apai ni re si da, oni ini he ya ga Mbori ngbi mbedi.”RUKA 21:31.

Rogo gu buku nga The Last Days Are Here Again, bakerepa bayugupai nga Richard Kyle ake gupai nga, “gu tunguotunguo aʹariapai namanga gbiati baguzoro, si nayugopa digido zegino,” gbe, ho duhe ni nga si nikpakarapai ka sakapai tipa agu aʹariapai na baguzoro re.

Ono tie, agu anebi nga ga Ziazia Kekeapai yó afura tipa digido zegino, i aasakanga pai tipa gu gbegberẽ apai naamanga ti rago yó te. Kuba gure, ga Mbori toro adu kugiiyo i sakipai tipa ka yugo agu apai nika manga ti digido zegino. Mo wisigingo bete gu sangbaanebi re na ki mangingo diaberã nitiro singia si nadigisotihe tigi gaani regbo re.

  • Avura, angbongi, abazigizo, na kere ririakaza.—Matayo 24:7; Ruka 21:11.

  • Kuondiko akio kina kumbatayo.—Matayo 24:12.

  • Gberesa kpotosende.—Yugoti 11:18.

  • Aboro akpinyemu tiyo, marã, na nyemu agu apai nga ga borose susi nyemu Mbori.—2 Timoteo 3:2, 4.

  • Aramukporo agburuwa.—2 Timoteo 3:2, 3.

  • Zanga bi aboro agu agopai nayugopa mbeda digido zegino na nyanyakipaha.—Matayo 24:37-39.

  • I atungusa gu wene pangbanga nga ga ga Mbori Kindo rogo zegino dunduko.—Matayo 24:14.

A wa Yesu apehe, bi ani “agi apai re” dunduko nasarani ani inihe nga digido zegino ima mbeda. (Matayo 24:33) ADezire Yekova ima ida kuti agi agopai re, na i natungusapai tipa gayo idapase rogo aringara naima susa 236 fu kura aboro.

Ya mo iraira maabangirise tipa digido zegino nayugo gupai nga si ayengo berewe te?

GU KARAGAPAI NGA GA ZIAZIA KEKEAPAI: “Ho i ka ya ni, ‘Zereda, ngba barani angba,’ gberãngbi ki ye ku ri yo ni ba sa, a wa imisiri pai sa gu de du na gude; i abata nga wa sa te.”1 ATESARONIKO 5:3.

Ziazia Kekeapai naringbisapa gbarasa zegino kuti tonatona ima nga ga vungu fu dee ka ri anenga ha ya na si naye nitunguotunguoho. Gu regbo nandu sa digido zegino, si wakina duna vuse, gu dee niima mbeda ka vunga, ri nambakada tiri tipa vungu ti aregbo dunduko. Munganga rengbe ka pepa gu ramediwi ri nika batika ti ni, ka si vura du nga ri abatikanga ti gu regbo re te, ri ima inoho nga ri nika vunga barambeda. Teketeke a, wa vura duhe nga digido zegino adanga ti gu regbo aboro aberãpaha te, si aʹarianga gu rengopai nga ani rogo “kusa rago” te.—2 Timoteo 3:1.

Mo rengbe ka sanahe nga, ‘Ka si dunga agu apai nayugo gupai nga ani rogo kusa rago gbaiga, tipagine kura aboro aidanga ti ni kutini ya?’ Ziazia Kekeapai naya, ho digido zegino ka mbeda ni, dungu aboro nika ti kangoho. Kuba gupai nga i idi kuti gu bangua aʹariapai nga ga yangara arame, i nasawia agu aboro idi kutini niyaa: “Bambiko tona ti rago ti abarani ni rame, ahe dunduko nanye wa si adu rago  tonatona manga ahe.” (2 Petero 3:3, 4) Ka pehe rogo kura afugo, agu agopai du tipa yangara areme gbaiga, ono dungu aboro nabasaha abasa.—Matayo 24:38, 39.

Gi kekeapai re fura gbua tipa kina bete agu agopai du rogo Ziazia Kekeapai nayugo gupai nga digido zegino ima mbeda. * Ya mo mo naida ka ino kura apai? Kangia wodu, si angba gbe ka mo sana aDezire Yekova tipa ka tona wirika Ziazia Kekeapai naayo gbua zanga tumo tipaha. I rengbe ka ye kina ku kpuro yo tipa oni wisigihe yo, gu ba ngba tiro, watadu rogo terefuni a. Gu he gbua si aidaha bero nga regbo, na agu aundo mo nika gbiaha ti ni ima kio.

^ genewaraga 39 Ka mo aida ka ino kura apai tipa gipai re, mo bi kapita 9 nga ga gu buku nga Gini Apai Nzunzu Ziazia Kekeapai Ayugoho? du riihe nga, “Ya Mo Ani Naraka Rogo Yangara Areme?” si nga gu buku aDezire Yekova akusihe.