“Ani nga amounda gaoni ngbarago.”—2 KOR. 1:24.

1. Ginipai naasa Pauro ko ngi tipa agu aKristano naadu Korinda yo?

ROGO gu garã nangia 55 F.B.K., gu mokedi nangia Pauro adu rogo gu gbata nga Turoa, ono kini berẽpa agu awirinako kindi naadu Korinda yo. Mbata kusayo rogo gu garã re, rago agberẽ tiko ka bi gupai nga agu awirina re apaa dagbatiyo. Mbiko gu nyemuse ko adu nani koyo du yó ni, ko akedi waraga tipa ka rugayo. (1 Kor. 1:11; 4:15) Ko akedi gako badiasunge nangia Tito ko ndu ka undoyo na ki ye na karagapai fuko ku Turoa yo. Pauro asungudo Tito Turoa yo ko ye ka pe agu apai naamanga yó fuko. Ono tie, rago agberẽ ti Pauro nga Tito ayegongo te. Ginipai si aidi Pauro mangihe? Ko andu ku Masedonia yo na i ki gbiatiyo yo naako. Tito agumba gupai fuko nga awirina aima mangapai wenengai sa gu waraga ko akedihe re na i adu na nyemu ka biko. Ho Pauro agi gi wene atingidapai re ni, ko “angi angi mbiko ho susi.”—2 Kor. 2:12, 13; 7:5-9.

2. (a) Ginipai Pauro akehe fu aKorindo nibipa idapase na ngbarago? (b) Gini asasanahe ani ka makiapai tipaha?

2 Ngbutuko fuo gure, ko ake gako ue waraga fuyo. Ko aya fuyo wee: “A nga ani du na pa zoga gaoni idapase te, ono ani nga amounda gaoni ngbarago, bambiko oni naru mbiko gaoni idapase.” (2 Kor. 1:24) Ginipai ko aaida ka pehe na gipai re? Na wai gu si aida agu afugoko re duna ome kurii agu aKristano nga abaakumba areme?

GAANI IDAPASE NA GAANI NGBARAGO

3. (a) Ginipai naadu berã Pauro yo ho ko akepai ni ki yaa: “Oni naru mbiko gaoni idapase”? (b) Wai gu abaakumba apekafuo ga Pauro kpiapai areme?

3 Pauro afura tipa nyanyakipa apai ue si aida aKristano du nani, nga idapase gbiati ngbarago. Ko akepai tipa  idapase ki yaa: “A nga ani du na pa zoga gaoni idapase te, . . . oni naru mbiko gaoni idapase.” Agi afugo Pauro re nayugu gupai nga, ko aima ino gupai nga agu awirina naadu Korinda yo aru nyanyaki angianga mbiko ko watadu gu kura boro ya, ono mbiko gayo idapase kuti Mbori. Sidu, ko aabingo ndupai ho tipa ka zoga ga akurako idapase te, na ko aidanga ka mangaha wo te. Ko aima du naa kido nga i angia gu ruru aKristano naida ka manga gupai naadu niruruhe. (2 Kor. 2:3) Areme, abaakumba napekafuo ga Pauro kpiapai nidu yó naa kido kuti ga awirinayo idapase gbiati nyemuapai nasayo i mangisunge fu Mbori. (2 Tesa. 3:4) Kuba gupai nga abaakumba namaa nyanyaki andiko kurii dungurati, i namangasunge na agu arugute nga ga Ziazia Kekeapai gbiati gu rugahe nga ga ga Yekova riigbu. Nirengo, agu abaakumba du areme na pagbia kurii ga awirinayo idapase te.—1 Pet. 5:2, 3.

4. (a) Ginipai Pauro aaberãha ho ko akepai ni ki yaa: “Ani nga amounda gaoni ngbarago”? (b) Wai gu abaakumba apekafuo ga Pauro kpiapai areme?

4 Pauro ayaa: “Ani nga amounda gaoni ngbarago.” Ko amangisunge na gi fugo re tipa tiko na gako abadiasunge. Tipagine pe ani he ti ni wo? Bambiko rogo kina gu bangisa waraga re, ko atingidi aKorindo naapa gako abadiasunge ue ho ko akepai ni ki yaa: “Yesu . . . atungusi pa ko dagba roni yo ku ngbarani, kina ngbarani na Siruano na Timoteo.” (2 Kor. 1:19) Kurigure, rogo gako waraga yo, agu aba dunduko ko amangisunge na gu fugo nga “amounda” rogoho, ko anaafura dedede tipa gu gako abadiasunge naadu wa Aporo, Akuira, Puriseka, Timoteo, Tito, gbiati kura aboro. (Rom. 16:3, 21; 1 Kor. 3:6-9; 2 Kor. 8:23) Sidu, ho ko ayani wee: “Ani nga amounda gaoni ngbarago,” ko akido aKorindo nga ko gbiati abadiangbako aaida ka manga asadatise tipa ka sa ngbarago ti aboro dunduko rogo dungurati. Areme, abaakumba a na kina gu bangisa nyemupai re. I naida ka manga asadatise tipa ka undo awirinayo i “mángi pa Yekova na ngbarago.”—Tam. 100:2; Frp. 1:25.

5. Gini sanahe ani ka wisigo akaragapai tipaha na kini berẽkuriihe?

5 Barambeda kusayo, i asana agu awirina nga zaaza abatungusipai naraka rogo apapara zegino nibakiakia nga, “Gini afugo na gini mangaapai nga ga bakumba ninaafu ngbarago furoni?” Wa ani ka wisigo agu akaragapai awere agi akuarani aidipase re afuhe, ani ringbisinga gayo akaragapai na gu rengbe ani ka fuhe. Kurigure, ani dunduko si aida ani berẽkuriipa wai rengbe ani ka fubee sa gu toro nga ga ngbarago rogo gaani dungurati. *

“ONI SÁNANGO PERUSI NGA BADIANGBA”

6, 7. (a) Gini gene rengbe abaakumba ka wirika Yesu, Pauro, na gu kura ga Mbori amoyambu ngbaha? (b) Tipagine pa yamba ani awirinarani ti rimoyo afu ngbarago ti ni fuyo?

6 Badungu awirina nina ya gayo ngbarago nakio ho i abi gupai ni nga abaakumba nakpinyemuyo. Gu bangisa gene abaakumba amanga gipai re ngbaha nga ka pekafuo gu kpiapai nangia ga Davide, Eriu, gbiati Yesu. (Oni gedi 2 Samuere 9:6; Eyobo 33:1; Ruka 19:5.) Gi ga Yekova amoyambu re dunduko ayugu ndikidi nyemu aboro nimangayo sunge na rimo aboro. Pauro aima rugatiko naapa nyakapa tingida rimo akurako aidipase na kini mangisunge nani. Ko adigisi ke gako waraga nifuko sene fu awirina bangeyo aima susa 25 ti arimo yó kodihe na Perusi nga gu Kristano ko aya tipa ri wee: “Oni sánango Perusi nga badiangba.”—Rom. 16:3-15.

 7 Kura abaakumba kinaho duhe fuyo nikpakarapai ka tingida rimo aboro. Wa vura duhe wo, ho i amanga ndikidi asadatise ni tipa ka ino rimo aboro, gure wa i naya fu akurayo aidipase wee, ‘Mo nga nyanyakipa boro fere.’ (Gate 33:17) Abaakumba nafu ngbarago gbe fu awirinayo ho i ayambayo ni ti rimoyo i fu karagapai ti regbo Wisigo Ngbaõbambu Sinziri watadu ti regbo kura adunguratise.—Oni ringbisinga ha na Yoane 10:3.

“RI NAMANGI SUNGE GBE ROGO GBIA”

8. Gini nyanyakipa gene sa Pauro apekefuo gu kpiapai nga ga Yekova na Yesu ngbaha?

8 Pauro ayugu nyemuse koyo du awirinako ni nitambua ko yó, si nga gu kura gene nakiiso gu ngbarago nga ga akurani aidipase. Sidu, rogo gu bangisa waraga ko agumbapa gako nyemu mangasunge tipa ga akurako ngbarago rogoho, ko ayaa: “Gi sambuati du ni bakere he tipa roni.” (2 Kor. 7:4) Agi afugo nga ga tambuahe re aima zambuasi kpoto agu awirina yo naadu Korinda yo. Kina gu bangisapai re ko amangihe fu kura adungurati. (Rom. 1:8; Frp. 1:3-5; 1 Tesa. 1:8) Nirengo, tifuo ko gumbapa Perusi rogo gako waraga fu gu dungurati naadu Roma yo, ko agbia kurapai kuti ni nga: “Ri namangi sunge gbe rogo Gbia.” (Rom. 16:12) Nairiwo wai agi afugo re avura fu wasa fu ri! Pauro apekefuo ga Yekova kpiapai na Yesu nitambua ko kura aboro.—Oni gedi Marako 1:9-11; Yoane 1:47; Yugo. 2:2, 13, 19.

9. Tipagine pa tambua ani aboro na i kini tambua rani aye ti ni na ngbarago rogo dungurati?

9 Abaakumba areme nabi gupai na nyanyakipaha nga ka tambua awirinayo. (Snz. 3:27; 15:23) Ho bakumba amanga gipai re ni, gure nga ni naya fu awirinani wee: ‘Mi ima bi gupai oni amangaha. Mi naberã paroni aberã.’ Nirengo, awirina naida ka gia afugo ngarasaro wagu re ngba abaakumba. Wirina sa du garãri wa 50 agumba gupai nga: “Basunge yo, boro ho ni naatambua re tipa gu sunge mi amangaha te. Aboro yo na kina gu sino nga ga abaangira. Ho bakumba atambua re ni tipa gupai mi namangihe fu dungurati, si nafu wasa fere, na ki ngarasi re! Si nasa re mi bi tire nga Mbori nakpinyemu re akpi.” Kina gu bangisapai re gu wirina agumbaha duna agude beko ue adunga gako badiarogatise ti ni ya. Bambeda, bakumba atambua ko. Wai gu gipai re aduna ome kuriko? Ko ayaa: “Agu afugo gu bakumba re agumbaha fere aima ngarasa re!” Nirengo, ho bakumba atambua awirinani ni tipa agu apai i amangaha, si nazambuasi yó na ki kiisi gayo ngbarago. Gipai re nafu ome fuyo tipa i naandu kindi ngba gu gene nga ga unga “ka he amáka nga yo ya.”—Yes. 40:31.

“ONI RÍGI GA MBORI KANISA”

10, 11. (a) Wai rengbe abaakumba ka pekafuo gu kpiapai nangia ga Nemaya? (b) Ginipai nika undo bakumba ní fu ga ziazia toro ũgume ho ní andu ni ka ngarasa aboro?

10 Gini nyanyakipa gene duho abaakumba ayugo nyemuse ngbaha fu awirinayo na si kini ye na ngbarago fu dungurati? I nayugoho nimangayo pai niipo tipa ka ngarasa awirinayo. (Oni gedi Amokedi 20:28.) Ho abaakumba amangaha ni wo, i napekafuo gu kpiapai nangia ga agu ababanda avusende nga ga toro yó nadumbata. Nikpiapai, ani bingo gupai gu ruru babiapai nangia Nemaya amangihe ho ko abi gupai ni nga bete agu awirinako nangia aYudo arungbura rogo toro yo. Gu pangbanga re nape gupai nga ko aguari niipo ki ngarasiyo. (Nem. 4:14) Kina gu bangisapai re abaakumba aida ka mangaha areme a. I ‘naguari’ ki mangipai tipa ka undo akurayo aidipase i nyaki rogo idapase yo. Tipa i ngarasi awirinayo wo, i nandu kaa bi yó kpuyo yo ka agu apai du tipa yó mbugene fuyo i mangihe wo. Ti gu regbo i andu ka bi aboro  tipa ka ngarasayo re, i naida ka “fu ga Ziazia Toro ũgume” fuyo. (Rom. 1:11) Ginipai rengbe ka undo abaakumba i mangihe wo?

11 Mbata fu bakumba ndu ka ngarasa wirina, si naida ní di regbo tipa ka berãpa gu boro ní andu ka ngarasa ní. Gani akpakarapai nga gine? Ginipai rengbe ko ka gumbaha tipa ka ngarasi ní? Gini veresi watadu pangbanga nga ga gu boro du pani rogo Ziazia Kekeapai rengbe ka undo gu boro re? Ka bakumba berẽ mbata fu ní ndu ka ngarasa boro, si rengbe ka undo ko ko gumba kina agu apai nikadu na undo ti ni. Ho bakumba andu ni ka ngarasa awirinani, ní nambugene fuyo i gumba agu apai du ngbayo na ní ki degetuni wenengai ka giaha. (Yak. 1:19) Wirina sa nidee ayaa: “Si nipa ngarasaro ho bakumba adegatuni ni na ngbaduniyo dunduko ka gia gupai boro agumbaha.”—Rk. 8:18.

Mbakadatise mbata naundo bakumba ní “fu ga Ziazia Toro ũgume” fu aboro ho ní andu ni ka ngarasayo

12. Ada rogo dungurati si aida i ngarasiyo, na tipagine?

12 Ada nika gbia undo be gu ngarasaro nga ga abaakumba? Pauro azungodi agu aKristano nga abaakumba rogo dungurati nga i “bánda . . . akandoro” dunduko. Nirengo, aboro dunduko rogo dungurati naida i ngarasiyo, kodihe na agu abatungusipai nga abazakigene naima digo nimangisunge tipa dungu agarã. Tipagine i aida ti ni na gu undo nga ga abaakumba? Bambiko ti kura aregbo, zavura agu aboro niima nyaka rogo toro yo i nagbiatiyo agbia na gu fudifudiapai du rogo gi gbegberẽ zegino re. Ani wisigingo gupai namangi rogo ga Bakindo Davide raka yo nga gu nayugo ndu gupai gu ga Mbori moyambu niima nyaka rogo toro yo aida undo ti ni ti kura aregbo be badiangbani.

“ABISAI . . . AYE KA UNDA DAWIDI”

13. (a) Gini regbo Yisebi-benoba aida ka imo Davide ti ni? (b) Wai gu Abisai abatasi Davide?

13 Ngbutuko fuo i mbedi Davide ni Bakindo, ko asovura na Goriata nangia gu ngburunga kumba nangia ngbatunga Refaima. Gi boro wingbaduse nangia Davide re aimi gi ngburunga kumba re. (1 Sam. 17:4, 48-51; 1 Peka. 20:5, 8) Fuo susa agarã kusa,  ti regbo vura na aFereseto, Davide asovura berewe na kura ngburunga kumba. Rimoko angia Yisebi-benoba naadu a ningbatunga Refaima. (2 Sam. 21:16) Ono tie, ti gi regbo re, gi kumba re ambedi ka imo Davide. Tipagine? Si aadunga mbiko gupai nga Davide aadunga na wingbaduse te te, ono mbiko omeko nabati. Gu pangbanga re nayaa: “Dawidi ki tona ka rungbura.” Fuo ino Yisebi-benoba gupai nga ome Davide ima bata, ko “ki berẽ pa imo Dawidi.” Sidu, mbata fu gi ngburunga kumba re so Davide na gako baso, “Abisai wiri Seruya aye ka unda Dawidi, ki rũ gu Feresto re, ki imiko.” (2 Sam. 21:15-17) Nairiwo wai ko abati kpokoto! Nairiwo gu tambuahe Davide avura du nani tipa wai Abisai amoiberã ko fuoko na ki ye niipo ka undo ko ka batasa ungako be kerepai! Gini apai ani awirikaha ti gipai re?

14. (a) Wai rengbe ani ka diabe agu akpakarapai duwa kina Goriata? (b) Wai rengbe abaakumba ka undo aboro i gbia ome gbiati ngbarago? Oni funga kpiapai.

14 Ga Yekova aboro rogo zegino dunduko namangasunge tungusapai si ki vura du nga i nagbiatiyo na akpakarapai be Satana na gako aboro vurũ. Agu akura rani aima gbiatirani na agu akparakapai duni ngburunga ha wakina “Goriata,” ono pa kido ani kuti Yekova naundo rani ani dibehe. Ono tie, kura aregbo kinaho omerani abata na kpotoraniyo kini zere be sovura dedede kuti gu fudifudiapai ani agbiatirani nani rogo gi zegino re. Ho du ani ni wa gure, si taata kpotoraniyo zere ani ki ti kurogo gu kpakarapai ani narengbe ka hihe ahi kidu na diabese rogoho. Ti ngbatunga agu aregbo duwa gure, gu undo bakumba afuhe rengbe arengba ka ye na ngbarago furani na ki fu ome furani, a wa si amanga fu badungu aboro. Nazaki gene du garãri naima susa 60 ayaa: “Ti kura aregbo kusayo, mi aadunga wenengai te, na sunge tungusapai anaabatasa kina omere. Bakumba sa aini gipai re na ki fura na mi. Ani afura naako riipa agu apai du rogo Ziazia Kekeapai yo nangarasi re. Mi amangisunge na agu aberãpai ko afuhe fere na si ki undo re.” Ri agbia kurapai kutini nga: “Nangba wai gu bakumba re amangipai rogo nyemuse yo niruga ko tiko naapa gi rungbura ki undo re!” Nirengo, si ima ngba ka ino gupai nga ani na kina abaakumba berani nangerafuo rani rogo nyemuse yo na duwa kina Abisai ti aregbo dũ tipa ka ‘undo rani.’

ONI INIPA “GU NYEMUSE DU TI RE FU RONI BAKERE GBE”

15, 16. (a) Ginipai naasa gupai nga awirina kpinyemu Pauro gbe? (b) Tipagine ani akpinyemu gaani abaakumba ti ni?

15 Padu boro nibabanda akandoro nakoda mangasunge kakaka. Ti kura aregbo, abaakumba rengbe ka zanga rame yuru bambiko i nabakabangiriyo tipa ga Mbori rimbasa akandoro watadu i nasongoda akurayo aidipase rogo toro yo. (2 Kor. 11:27, 28) Wa vura duhe wo, abaakumba namanga gi gayo asunge re dunduko na ngbarago, wakina Pauro. Ko akepai fu aKorindo nga: “Mi abaga tire abaga zaza dati digida ha tipa mbisimoroni.” (2 Kor. 12:15) Nirengo, gu nyemuse ko adu nani tipa akurako asako ko mangisunge na gako regbo naabaha tipa ka nyakasayo. (Oni gedi 2 AKorindo 2:4; Frp. 2:17; 1 Tesa. 2:8) Si du nga ndu gupai naasa awirina i kpinyemu ko.—Amo. 20:31-38.

16 Wangia ani ga Mbori amoyambu areme, ani nakpinyemu abaakumba na kini moiyo rogo gaani akpee yo. I nasa ngbarago tirani niyugoyo nyemuse furani. Ani nagbia ngbarago ho i ayeni ka ngarasa rani. Kurigure, ani na ngbarago nga i ti aregbo dũ tipa ka undo rani rogo agu akpakarapai ani agbiatirani nani rogo gi zegino re nga gu nabatasa kina omerani. Ii, ngbatunga agu abaakumba nangerafuo rani wagu re i nga ‘amounda gaani ngbarago.’

^ genewaraga 5 I asana kina gu bangisa awirina re berewe nga, “Gini sino bakumba oni naabihe na nyanyakipaha gbe?” Badunguyo akaragapai nga, “Du zaaza na aboro.” Ani nika fura tipa gi nyanyakipa sino re rogo gu kura magazini naye kumbatayo.