DEDEDE aboro naida ka raka na ngbarago. Ono rogo gi yangara arame re, aboro dunduko nagbiatiyo na agu akpakarapai nga gu du “nikpakarakpakaraha ka mangapai sani,” NW. (2 Tim. 3:1) Iraira mangaapai, kaza kpotose, zingo sunge marã, rungo kpotoseyo, watadu gu kuraapai nga gu naye na bakabangirise gbiati bakere gberãrago, ima rengba ka sa kura aboro yeeye i zanga gu ngbarago du yo na ni. Zavura ga Mbori amoyambu ima rengba kadu na bakere gberãrago ki zanga gu ngbarago du yo na ni. Ka i ya pai wa gure mangi ro, wai du rengbe mo ka gbia ga ngbarago berewe?

Tipa ka gbia karagapai kuti gu sanahe re, bambatapai nga si naida ani ini guhe nga ndikidi ngbarago, na wai du kura aboro nanye na ngbarago i ki vura du rogo aˈasada vurũ. Na ani nika wirika gupai rengbe ani ka mangaha ka banda gaani ngbarago na zavura ki kiisihe.

GINIHE NGA NGBARAGO?

Si naida ani ini gupai nga du na ngbarago kia ti kungbo mongo. Ani yugungo ho na kpiapai: Tifuo boro mbiri bakere buda, ni nakpihe kini tona kaa moma bakere mongo. Ono tie, ho buda akata ni bangirini yo, ni amomanga berewe te, ni na karaga tiní berewe ku rogo gu raka hi be gberãrago gbiati kpakaraapai. Gu mongo ni naamoma ha re naangianga ndikidi ngbarago te.​—Snz. 14:13.

Ono ngbarago tigaha, nga gu bangabanga sino du kpotorani yo. I sakirogoyo nga si nga “ho kpotoboroyo angi ni mbiko gu wenepai mangi funi watadu mbiko gu wenepai du ni na maabangirise tipaha.” Ndikidi ngbarago nanyeanye kindi singia apai tipa rani wenengai watadu si wenengai te. (1 Tesa.1:6) Nirengo, boro ima rengba kadu ni fudifudi ni be pai ono ni ki duadu kindi na ngbarago kpotoniyo. Ni kpiapai, i ata amokedi tipa tungusapa Kristo. Ono wa si avura duwo, i ‘aguari barangba abororondo, rago ningba angba ti yo mbiko wa i aya i are are nahi wasiro tipa rimoko.’ (Amo. 5:41) Si ziazia nga, i anginga mbiko gupai nga i ata yo te. Ono ni du yo ni ga Mbori amoyambu, i agbia ndikidi ngbarago mbiko i abanda gayo padu ni ruruse fuko.

I avunganga boro na gu ngbatunga ngbarago re te; si asonanga nibasa vuru umba regbo yo a te. Tipagine adunga ha ti ni wo ya? Bambiko ndikidi ngbarago nga papara zuzu ga Mbori ziazia toro. Na gu undohe nga ga ga Mbori toro, ani ima rengba ka sonosa ‘vovo borose,’ nga gu nakoda ngbarago. (Ef. 4:24; Gara. 5:22) Na ho ani asonosa ngbarago ni, ani ima rengba ka diabe gu fudifudiapai nga ga raka.

AGU AKPIAPAI SI AIDA ANI WIRIKIHE

Yekova aaberãpa weneapai si mangi auru kpotosende ane, angianga gu gbegberẽ apai ani abihe dedede areme re ya. Ono wa vura duhe wo, gu gbegberẽ mangaapai re adianga ga Yekova ngbarago kusayo tiko te. Fugo Mbori naya: “Ome du rogo gako ba na ngbarago.” (1 Peka 16:27) Kurigure, gu weneapai gako amoyambu amangaha nafu ‘ngbarago ku kpoto Yekova yo.’​—Snz. 27:11.

Ani rengbe ka wirika Yekova ni zanga du ani na bakere gberãrago ho apai amanganga ni wa gu ani aaberãha ya. Kuba gupai nga ani zanga gaani ngbarago, ani rengbe kaa berãkurii gu weneapai  du berani awere na kini pidi gu weneapai ngba kisusi na zerangbaduse nika ye kumbatayo. *

Dungu akpiapai kinaho rogo Ziazia Kekeapai yo nga ga agu aboro naabanda gayo ngbarago kindi i ki vura du vurũ rogo akpakarapai yo. Abarayama ahi agu apai namoi raka ko ngbapai yo na agu akpakarapai naagbia ko be aboro. (Bam. P. 12:10-20; 14:8-16; 16:4, 5; 20:1-18; 21:8, 9) Wa Abarayama avura kaa gbia tiko vurũ na agu akpakarapai re, ko abanda gako ngbarago kpotokoyo. Wai du ko amangi gipai re? Ko adu na gu maabangirise nga ga raka rogo vovo zegino tii ga Masiya zogarago. (Bam. P. 22:15-18; Eb. 11:10) Yesu aya: “Rago angba angba ati baroni nga Abarayama ko bi ragore.” (Yo. 8:56) Ani rengbe ka wirika Abarayama ni berã ani kurii agu angbarago du ku mbatayo.​—Rom. 8:21.

Wakina Abarayama, gu mokedi nangia Pauro na gako badiasunge nangia Sira amoiberã yo fuo ga Mbori akidohe. I adu na nyanyaki idapase, na i abanda gayo ngbarago wa i avura du vurũ rogo akpakarapai yo nga ga raka. Ni kpiapai, tingbafuo i ta yo ni kerehe na ki bayo ku bambukiso yo, ‘ho si adu ni wa ka bebere yuru da i aakpara kini bi aimina fu Mbori.’ (Amo. 16:23-25) Kupati gu nga ka gbia ome ti gayo maabangirise, Pauro na Sira adu na ngbarago bambiko i aambu mbiko rimo Kristo. Ani rengbe ka wirika Pauro na Sira ni tingida ani gu wenepai naye mbiko iriso Mbori ni rururani.​—Frp. 1:12-14.

Areme, gaani riigbu nga ga awirina na badungu wene akpiapai rogoho nga ga agu aboro nabanda gayo ngbarago i ki vura du rogo akpakarapai yo vurũ. Ni kpiapai, rogo Ngbangba 2013, kere bavugumo i ayamba rimoho nga Super Typhoon Haiyan amangi Philippines yo, ki gberesi akporo nga ga aDezire Yekova bangehe aima susa 1,000. George, nga gu ko si aima gbarasa kpuko rogo gu gbata nga Tacloban, aya: “Wa gupai re navura manga awirina vurũ, i kindi na ngbarago. Mi ainongo wai ka mi gumbapa gu ngbarago du ani na ni te.” Ka ani vura gbiatirani na gini riko kere akpakarapai vurũ, ani ima rengba ka nye na ngbarago ka ani aaberãkurii agu apai Yekova namangihe furani na kidu na tambuahe tipaha. Gini kurahe berewe Yekova nafuhe furani nga gu nafu kura ndupai furani ani du na ngbarago?

GU NDUAPAI DU ANI NA NGBARAGO TI NI

Gu bakere ndupai du ani na ngbarago ti ni nga pa gaani pagume na Mbori. Oni berẽnga pa gipai re: Ani ima ino Bakindo Zegino Dunduko. Ko nga , Barani, gaani Mbori na Bakurearani!​—Tam. 71:17, 18.

Ani nabi gu gamahe nga ga raka na nyanyakipaha gbiati gu rengba du ani na ni ka gbia ngbarago ti ni. (Batu. 3:12, 13) Wa du ani ni agu aboro Yekova nagbe yo koyo du ko ni, ani ima rugatirani na gupai Mbori akpinyemuhe tipa rani. (Koro. 1:9, 10) Sidu tie, ani naraka gu raka du na ndikidi rogoyo ti ni na arugapai berani ani araka kutini. Ono tipa badungu aboro tigayo, i ainongo gu ringbisapai du tipa raka te. Tipa ka nyakasa gu kparakparapai du dagbarani na agu aboro re, Pauro akepai ki ya: “‘Agu apai bangirise abi nga ha ya, tue agia nga ha ya, nga agu apai boro aberã nga pa ha wa sa a ya, si nga agu apai dunduko Mbori ambakadi tipa agu yo nakpi nyemu ko.’ Ono Mbori ayugu he fu rani rogo Toro yo.” (1 Kor. 2:9, 10) Ya mo ani anginga mbiko ino ani gupai Yekova akpinyemuhe na gako ringbisapai te?

Ani makianga gu kura pai Yekova namangihe berewe fu gako aboro. Ya mo ani adunga na ngbarago bambiko i ima rengba ka mbupai furani ti gaani aingapai te? (1 Yo. 2:12) Mbiko ga Mbori inapai, ani na gu maabangirise nga vovo zegino nika du ane barambeda. (Rom. 12:12) Zavura awere, Yekova nafu dungu wene abakure furani nga aguyo ani airisoko na yo. (Tam. 133:1) Fugo Mbori nakido rani a nga Yekova nabanda gako aboro be Satana na gako adaimona. (Tam. 91:11) Ka ani aaberãkurii agi amaku dunduko naye be Mbori re, ani nika du na bakere ngbarago.​—Frp. 4:4.

 WAI KA KIISO GAMO NGBARAGO

Ya mo gu Kristano naima du na ngbarago rengbe ka kiiso gani ngbarago? Yesu aya: “Gumba mi agi apai fu roni re. gi ngbarago du rogo roni, gaoni ngbarago moi pai.” (Yo 15:11) Ya mo gipai re ayugongo ho nga gaani ngbarago ima rengba ka kio te? Mo rengbe ka ringbisa gu ome mo amangaha ka kiiso gamo ngbarago kuti wai i ariga we ka si bisingo ya. Mo du wa ka mo aariga ha na nyake tipa si naaki aki kindi. Wakina gure a, si naida mo naariga tiro ariga kindi rogo toro yo tipa ka kiiso gamo ngbarago. Mo tingidi gupai nga: Ga Mbori ziazia toro du naye na ngbarago. Sidu, mo rengbe ka kiiso gamo ngbarago ni sana mo Yekova rogo kparakpee yo dedede tipa ziazia toro na ni berã mo kurii Fugoko gako toro adu kugiipa ke he.​—Tam. 1:1, 2; Rk. 11:13.

Mo rengbe ka kiiso gamo ngbarago a ni manga mo agu apai nasa ngbarago ti Yekova. (Tam. 35:27; 112:1) Tipagine? Si wo mbiko i akusi rani ani “gúnde ti Mbori, ki ka kuti gako arugute; bambiko gere nga gu pai dunduko nga ga boro.” (Batu. 12:13) Ka pehe rogo kura afugo, i akusi rani ani naamanga gupai Mbori akpi nyemuhe. Sidu tie, ho ani airiso Yekova ni, ani nagbia bakere ngbarago rogo raka yo. *

AGU AUNDO DUTI DU NA NGBARAGO

Ho ani akiiso gu ngbarago ni ani agbia be Mbori, ani nagbia kura dungu aundo. Ni kpiapai, gu Barani du ngbangbaturũ yo nika du na ngbarago na ani wa ani nikaa ndu kumbatayo kindi kaa irisoko na ngbarago ka ani vura du kina rogo gini akpakarapai yo vurũ. (Pa Rug. 16:15; 1 Tesa. 5:16-18) Berewe a, ka ani du na ndikidi ngbarago, ani nika soga pekafuo aũzegino na ki mbupa gaani apai tipa ga Mbori Kindo. (Mt. 13:44) Ho ani abi gu weneapai ni naye mbiko gipai re, gaani ngbarago nakio, ani kidu na ngbarago tipa tirani, na ani ki sa kura aboro i du na ngbarago a.​—Amo. 20:35; Frp. 1:3-5.

“Ka mo du na ngbarago awere na kidu wenengai rogo raka yo, si nawira gupai gbe nga kpotoro nika duadu wenengai kumbatayo.” Gure nga gupai bawetekeapai sa agumbaha rogo gu yunivasiti nga ga Nebraska nga gu du Amerika yo tingbafuo ko wisigi bete apai nga gu nabipa kpotose. Gupai re nandu sa na gupai Ziazia Kekeapai agumbaha, nga gu naya: “Wasawasa kpoto boro yo du wa wene ngua kaza.” (Snz. 17:22) Nirengo, wa mo nikaa kiiso gamo ngbarago, kpotoro ima rengba ka du wenengai.

Sidu, wa vura duhe nga ani naraka rogo kpakarakpakara aregbo, ani ima rengba ka sonosa ndikidi ngbarago nga gu nika nyeanye kindi wa ani nikaa gbia ziazia toro ni sana ani he tipaha rogo kparakpee yo, ni wisigo ani pai, na ni berã ani kurii Fugo Yekova. Ani nakiiso gaani ngbarago a ni berã ani kurii agu amaku du berani awere, ni wirika ani gu idapase nga ga kura aboro, na ni gbata ani gene ka manga gupai Mbori akpinyemuhe berani. Rogo agi agene re dunduko, ani ima rengba ka gbia gupai i nagumbaha rogo Atambuahe 64:10, nga gu naya: “Ruru boro ngí angi rogo Yekova, ki fu tini ku be ko.”

^ genewaraga 10 Kumbatayo, ani nika sakapai tipa gu sino nga hipai rogo gi zungudizungudi kekeapai nga gu nafura tipa “zuzu toro” re.

^ genewaraga 20 Tipa gu kura agene berewe ka kiiso gamo ngbarago, mo bi gu sanduki nga “ Gu Kura Agene Rengbe Mo ka Kiiso Gamo Ngbarago Ngbaha.”