“Oni péke Toro.”​—GARA. 5:16.

ABIA: 136, 10

1, 2. Ginipai kura wirina sa abihe nga si aakpa beko rogo toro yo, na ginipai ko amangihe tipaha?

ROBERT azi bapatiza ho garãko adu ni 15, ono ko aabingo rengo nzunzu na nyanyakipaha te. Ko aya: “Irairapai ho mi amangihe te, ono mi aamanga agu apai nga ga toro mbiko wa mi aabi aboro i nimangihe. Mi angera wa gu boro nanyaki anyaka rogo toro yo, mi anaakpanga adunguratise te, na bete adiwi adu kinaho vuru garã yo mi anaamangasunge moundo abazakigene. Ono pai kinaho naakpa.”

2 Robert nitiko aainongo gupai naakpa te da kinaho ko amangi rogatise ni kusa. Ko na diako atona kaa dia regbo kaa ngi agu ambaro nga ga sasana tise na agu asanahe nabipa agu apai du rogo Ziazia Kekeapai yo. Si aakpakaranga fu diako nga guri naaima nyaka rogo toro yo ri naakaragapai kuti agu asanahe re te, ono zee anaazio Robert ti aregbo dũ mbiko ko aainongo gupai ka ko karagaha te. Ko aya: “Si adu wa ka i ya pai ho mi ainihe kandara tooni te. Mi aya fu tire, ‘Ka si du nga mi nika du ni rii diare rogo toro yo, si naida mi mangipai amanga.’” Na Robert aima mangapai. Ko aya: “Mi awisigi Ziazia Kekeapai kakaka, mi kini tona kaa ino apai. Mi aye kadu na giarogopaiyo, na gu nyakipaha anyaka gbe nga, mi asonosi dawedawe pagume na Yekova.”

3. (a) Ginipai rengbe ani ka wirikaha ti gu pangbanga nangia ga Robert? (b) Gini bangua apai ani nika sakaha awere?

3 Ani ima rengba ka wirika nyanyakipa apai ti gu pangbanga nga ga Robert. Ani ima rengba kadu na bete inohe nga ga Ziazia Kekeapai na  kini koditirani na gu dungurati nga ga aKristano dedede, ono agu apai re nitihe asanga rani ni agu aboro naima nyaka rogo toro yo te. Watadu si rengbe kadu nga ani aima manga sonakumbatayo, ono ho ani awisigo tirani ni berewe, ani nabi gupai nga si naida ani mangi sonakumbatayo kindi rogo toro yo. (Frp. 3:16) Tipa ka undo rani ani naasona kumbatayo kindi, ani nika karagapai kuti bangua asanahe biata rogo gi kekeapai re: (1) Gine nika undo rani ani wisigi wai nzunzu du ani rogo toro yo? (2) Wai du rengbe ani ka nyaka kina kumbatayo rogo toro yo? (3) Ka ani du nyanyaki rogo toro yo, wai du rengbe gupai re ka undo rani rogo gaani raka yo na aˈuru dũ?

WISIGOTIRANI

4. Gu rugute du rogo AEfeso 4:23, 24, ada du duhe fuyo?

4 Ho ani adani ni ga Mbori amoyambu, ani aima manga aˈariapai. Agu aˈariapai re aima du na maapai kurii agu apai dũ ani amangaha rogo raka yo. Na agu aˈariapai re aarunga kuho fuo zio ani bapatiza te. Ziazia Kekeapai nagumba gupai furani nga si naida ‘ani dú ni vovo rani rogo gu toro yo nga ga gaani berã.’ (Ef. 4:23, 24) Gu fugo du rogo pa-Giriki yo sa yo ho nga “dú ni vovo roni” nayugo pa gupai nandu andu kindi kumbatayo. Sidu tie, si naida ani naandu kindi kumbatayo kaa du ni vovo rani rogo gaani aberã yo. Wa duhe nga ani nga kpakpa aboro, ani dunduko si aida ani naamanga ariapai kindi. Zavura gu ga Yekova amoyambu nga aguyo naima mangasunge fuko tipa gbanga regbo, si naida i naabanda tiyo abanda kindi rogo toro yo.​—Frp. 3:12, 13.

5. Gini asanahe rengbe ka undo rani ani wisigi tirani?

5 Tipa ka sonakumbatayo na ki bandatirani rogo toro yo, si naida ani wisigi tirani nzunzu. Singia ani nga paranga aboro watadu sosono aboro, ani rengbe ka sana tirani na agi asanahe re: ‘Ya mo mi bingo agu aˈariapai tire nayugo gupai nga mi nasona kumbatayo kada ni gu boro naberãpa agu apai nga ga toro? Ya mo asino re tona kaa da wa ga Kristo? Ginipai asino re gbiati gimi mangaapai ba agu adunguratise yo nga ga aKristano ayugoho tipa wai dunguro mi rogo toro yo? Ginipai afugo re ayugoho tipa gimi nyemuapai? Gu gene mi awisigopai ngbaha, mi avo roko na kini mbakadi tire ngbaha, watadu mi amangapai ngbaha ho i afu rugute ni fere, ginipai si ayugoho tipa re? Wai du mi naamangapai ho mi agbia tire ni na aˈasada? Ya mo mi mangi sonakumbatayo kisusi gu tonatona apai nga ga rengo na ki da ni gu Kristano naima nyaka rogo toro yo?’ (Ef. 4:13) Ka ani berẽkurii gaani akaragapai kuti agu asanahe re, si rengbe ka undo rani ani inipa gu sonakumbatayo ani namangihe rogo toro yo.

6. Tipa ka wisigopa wai du ani rogo toro yo, gini kurapai si aidaha berani?

6 Tipa ka wisigopa wai du ani rogo toro yo, si ima rengba kadu ti gu kura aregbo nga si naida ani gbia undo agbia be kura aboro. Gu mokedi nangia Pauro ape gupai nga boro borose arengbanga ka inopa gu irairapai ni amangaha bangiri Mbori te. Ono tipa gu boro tigani du rogo toro yo wenengai, ni ima rugatini na ga Mbori bipai gbiati gu iraira mangaapai nga ga boro borose. (1 Kor. 2:14-16; 3:1-3) Wa duhe nga abaakumba na ga Kristo berã tiyo, dedede, i naima bi gupai ni ipo nayugoho nga boro na gu berã nga ga borose tiní. Ka i ye ka fu rugute furani tipa gu ngbatungapai re, ya mo ani di gu rugute re kugume na ki mangipai kutini? Ka ani mangihe wo, ani yugu gu gopai ayugo nga ani na nyemu ka sonakumbatayo rogo toro yo.​—Batu. 7:5, 9.

ONI NYAKI KINA KUMBATAYO ROGO TORO YO

7. Tipagine kina inohe nga ga Ziazia Kekeapai arengbanga ti ni tipa kadu ni gu boro naberãpa agu apai nga ga toro ya?

7 Oni tingidi gupai nga anga kina inohe sa nga ga Ziazia Kekeapai si aidaha tipa kadu wenengai rogo toro yo te. Bakindo Soromo nga guko naadu bakuru kusayo adu na bakere inohe tipa Yekova. Agu apai ko aagumbaha ada kusa ni papara Ziazia Kekeapai. Ono niyangaraha, ko aanyenga ni ruruko fu Yekova wa gu boro du rogo toro yo nyanyaki te. (1 Aba. 4:29, 30; 11:4-6) Sidu, kupati gu inohe nga ga Ziazia Kekeapai, gini kurapai si aidaha? Si naida ani naasona kindi kumbatayo rogo toro yo. (Koro. 2:6, 7) Ono wai du rengbe ani ka manga gupai re?

8, 9. (a) Ginipai rengbe ka undo rani ani nyaki rogo toro yo? (b) Gaani sasa nga gine ho ani awisigopai ni na kini berẽkuriihe? (Oni bi gu sura duti tonatonaha.)

 8 Pauro angarasi agu aKristano naadu rogo bambata sa kama agarã i “súsi ku mbata yo dati [nyaka, NW].” (Eb. 6:1) Gini adiandue si aida ani dihe tipa ka mangapai areme kuti gu ga Pauro rugute re? Nyanyakipa diandue sa nga ka wisigo gu buku nga Oni Bánda Tironi Rogo ga Mbori Nyemuse Yo.” Ka mo wisigi gu buku re na ki nyasihe, si nika undoro mo ini wai ka mangapai kuti agu arengo du rogo Ziazia Kekeapai yo rogo gamo raka yo. Ka si du nga mo ima nyasa wisigo gu buku re, si adu ni wenepai ka mo wisigi gu kura awaraga nga gu rengbe ka undo ro mo nyakasi gamo idapase. (Koro. 1:23) Ya mo mo naamanga kparakpee na kini berẽkurii wai mo narengbe ka manga agu apai mo awisigoho ku rogo mangimangipai yo rogo gamo raka?

9 Si naida ani tingidi gupai nga wa ani kaa wisigopai na kini berẽkuriihe, si naida gaani sasa du nga ka sonosa nyemu gupai kpotoraniyo nga ka sa ngbarago ti Yekova na ka irisa gako andiko. (Tam. 40:8; 119:97) Ti kina gu bangisa regbo re, ani kini wiriki ka soga agu apai rengbe ka ka na gaani sonakumbatayo rogo toro yo.​—Tito 2:11, 12.

10. Ginipai rengbe paranga aboro ka mangaha ka nyaka rogo toro yo?

10 Kangia paranga boro nga mo, ya mo asasa bero nga ga toro? Ho kura wirina du Betere yo naandu ni tipa bakere adunguratise, si nidu ni sinoko kaa fura na agu aboro du tipa zio bapatiza mbata fu mbakadapai tona. Badungu agu aboro nidu tipa zio bapatiza re ningia paranga aboro. Ko naasana yo tipa gayo asasa nga ga toro. Badunguyo naafu gu karagapai nayugoho nga i ima ino gupai i aida ka mangaha tipa ka mangasunge fu Yekova, isoke wagu nga ka mangasunge Kindo ti aregbo dũ watadu ka tungusapai rogo gu ba du na bakere zingo abatungusipa Kindo rogoho. Ono tie ti gu kura aregbo, kura paranga aboro kinaho karagapai naadunga ngbayo ya. Ya mo gure rengbe ka yugo gupai nga i nabihe nga ndupai ho i du na asasa te? Wangia mo paranga boro, mo sananga tiro nga: ‘Ya mo mi namanga agu apai nga ga toro mbiko avungure? Ya mo mi nambeda na Mbori nisono sa mi gimi pagume na ko?’ Rengo ngaha nga, gu rugute du tipa du na agu asasa nga ga toro nabi aboro dunduko angianga kina paranga aboro sa ya. Padu ani na ngbatunga agu asasa re nika undo rani dũ wadu ani ni ga Yekova amoyambu ani nyakasi tirani rogo toro yo.​—Batu. 12:1, 13.

11. (a) Ginipai si aida ani mangihe tipa ka manga ndikidi sonakumbatayo rogo toro yo? (b) Gini akpiapai nga ga Ziazia Kekeapai rengbe ani ka wirikaha?

11 Bara sa ani naini gu bangiriaba si aida ani mangi ariapai rogoho, si naida ani mangi gu wene adiandue nibasa rengbe ka undo rani ani sono kumbatayo. Si ni nyanyakipa pai ka nyaka rogo toro yo. Nirengo, si rengbe ka sarani ani raki kumbatayo watadu ani kpi. (Rom. 8:6-8) Ono tie, tipa gupai nga ani nyaki rogo toro yo, si ayugongo gupai nga si naida ani du ni rengberengbe rani te. Ga Yekova toro ima rengba ka undo rani ani mangi sonakumbatayo. Ono wa vura duhe wo, si naida ani mangi nyanyaki asadatise amanga. Ho John Barr nga guko namangisunge rogo Riigbu Bipasunge aafura ni bete agarã kusayo tipa Ruka 13:24, ko aya, “Badungu aboro arengbanga ka rimo rogo pangipangi ngbadimo te mbiko i amanganga ome ka nyaka te.” Si naida ani du wa Yakobo nga guko natakpata ata kindi na maraika da kinaho ko agbia maku ni. (Bam. P. 32:26-28) Wa vura duhe nga boro ima rengba ka gbia ngbarago ti wisigo Ziazia Kekeapai, si aidanga ani berẽ gupai nga si naida Ziazia Kekeapai du wakina buku apaturẽ nga gu i akehe tipa kaa sa ngbarago ti aboro te. Si naida ani gbata gu nyanyakipa aũkumuko rogoho nga ga toro nga gu rengbe ka undo rani.

12, 13. (a) Gine rengbe ka undo rani ani mangipai kuti ARomo 15:5? (b) Wai du rengbe ga gu mokedi nangia Petero kpiapai gbiati rugute ka undo rani? (d) Gini apai rengbe mo ka mangaha tipa ka nyaka rogo toro yo? (Oni bi gu sanduki nga “ Agu Adiandue Rengbe Mo ka Diaha Tipa ka Sona Rogo Toro Yo.”

12 Wa ani kaa manga ome ka sona rogo toro yo, ziazia toro nika fu ome furani tipa ani aria berãrani. Na gu undo nga ga ziazia toro, ani rengbe ka tona kaa berã wakina Kristo yeeye. (Rom. 15:5) Kurigure, si nika undo rani ani di gu  nyemuapai nga ga borose kusayo kpotoraniyo na ki sonosi agu asino nasa ngbarago ti Mbori. (Gara. 5:16, 22, 23) Ka ani bi gupai nga ani naberã gbe kina tipa aũzegino watadu tipa gu nyemuapai nga ga borose, ka ani mbunga tirani fu gu berã re ya. Oni sana Yekova kindi tipa ziazia toro, na ko nika undo roni aundo tipa oni naamaa berãroni fuo agu apai du ni ruruhe. (Rk. 11:13) Oni tingidipa gu mokedi nangia Petero. Badungu aregbo kinaho rogo gako raka yo ko aamanganga pai wai gu boro naima nyaka rogo toro yo amangapai ya. (Mt. 16:22, 23; Rk. 22:34, 54-62; Gara. 2:11-14) Ono ko aambunga tiko fu gupai re te. Ga Yekova toro aundo Petero yeeye ko sonosi agu asino du wa ga Kristo. Ani rengbe ka manga kina gu bangisapai re.

13 Kusa, Petero apeke pa kura asino zaatu nga gu rengbe ani ka sonosaha. (Oni gedi 2 Petero 1:5-8.) Wa ani kaa “manga apai nyanyaki” ka sonosa gu ngbatunga asino duwa zatise, hipai, na nyemu awirina, si nika undo rani ani sono kumbatayo wa agu aboro naima nyaka rogo toro yo. Si adu ni wenepai ka mo asana tiro na aˈuru dũ nga, ‘Gini sino rengbe mi ka sonosaha areme tipa ka sona rogo toro yo?’

MANGASUNGE NA AGU ARUGUTE NGA GA ZIAZIA KEKEAPAI NA AˈURU DŨ

14. Ka ani du nyanyaki rogo toro yo, wai du rengbehe kadu na maapai kurii gaani raka?

14 Ka ani du na gu berã duwa ga Kristo, si nika du na maapai kurii afugo rani, kurii gu gene ani amangapai ngbaha basunge yo watadu sukuru yo, na kurii agu adiaberã ani amangaha na aˈuru dũ. Agu adiaberã re nikaa yugo gupai nga ani namanga nyanyaki asadatise kadu ni apefuo Kristo. Wangia ani agu aboro naberãpa agu apai nga ga toro, ani aidanga ka mbu ai pai si gberesipa gaani pagume na Barani du ngbangbaturũ yo te. Ho ani agbiatirani ni na aˈasada, gaani berã nga gu du wa ga Kristo nika fõngbaduraniyo ani ka agu aˈasada re. Ho ani kaa manga adiaberã ni, ani aniru mbata ka berãkurii agi asanahe re: ‘Gini arugute nga ga Ziazia Kekeapai nika undo re mi diberã? Ka i niya Kristo du du rogo gipai re, gini diaberã ka ko nimangihe? Gini diaberã nika sa ngbarago ti Yekova?’ Tipa ka raba tirani kaa berã wa gure, ani bingo bete akpiapai nga ga agu apai rengbe ani ka gbiatirani na ni. Rogo agu akpiapai re yo ni basasa dũ, ani nikaa bi arengo nga ga Ziazia Kekeapai nga gu rengbe ka undo rani ani mangi diaberã na tatamana.

15, 16. Oni funga akpiapai tipa wai gu berã duwa ga Kristo aundo rani ho ani amanga diaberã ni tipa (a) sia badiarogatise. (b) sia abakure.

15 Sia badiarogatise. Gu rengo nga ga Ziazia Kekeapai nga gu du tipaha gudu rogo 2 AKorindo 6:14, 15. (Oni gedihe.) Afugo Pauro nayugoho ayugo ziazia nga gu boro du rogo toro yo wenengai arengbanga kadu na ngbanya na boro borose te. Wai du rengbe ani ka mangasunge na gu rengo re ka sia badiarogatise?

16 Abakure. Oni bingo gu rengo nga ga Ziazia Kekeapai nga gu du rogo 1 AKorindo 15:33. (Oni gedihe.) Vuru Mbori akpamianga tiní na agu aboro nga aguyo rengbe ka gberesa padu ni wenengai rogo toro yo te. Gini asanahe rengbe ka undo ro mo mangi gipai re ku rogo mangimangipai yo? Ni kpiapai, wai du rengbe gipai re ka undoro nibipa zio bakure rogo Internet? Watadu ginipai si aida mo mangihe ka gu boro mo ainongo ni ya sanaro oni ngimbaro na ni rogo Internet?

Ya mo gimi adiaberã aundo re mi sono rogo toro yo, mi moi agu asasa nga ga toro, na mi du “zezeredi” na aboro? (Oni bi genewaraga 17)

17-19. Wai du rengbe du na gu berã nga ga toro ka undo ro (a) ka mo merenga fuo gupai adunga undo ti ni ya? (b) mo moi asasa rogo gamo raka yo? (d) mo mangipai kuti atagbagapai?

17 Agu apai naka na boro ti sona rogo toro  yo. Afugo Pauro fu agu akurako nga aKristano na zahe rogoho. (Oni gedi AEbere 6:1.) Gini ngbatunga mangaapai du du ni “kpikpi he” si aida ani nehe? Si nga gu mangaapai dunduko arengbanga ka undo rani rogo toro yo ya. Gi rengo re ima rengba ka undo rani na gu badungu asanahe nga gu rengbe ka kura rogo gaani raka yo, wa gu nga: ‘Ya mo gipai mi aida ka mangaha re, si dagba gu mangaapai yo nga ga borose? Ya mo si naida mi rimisi tire ku rogo gi ngbatunga sunge marã re? Tipagine si aidanga mi rimi agu ariigbu ti ni nga ga zegino nga gu naida ka aria apai rogo zegino ya?’

Ya mo gimi adiaberã aundo re mi sono rogo toro yo, mi moi agu asasa nga ga toro, na mi du “zezeredi” na aboro? (Oni bi genewaraga 18)

18 Agu asasa nga ga toro. Agu afugo Yesu ko agumbaha rogo gu gako tungusapai yo naadu rii bagangara yo na arugute rogoho ziazia nibipa maa asasa. (Mt. 6:33) Gu boro naberãpa agu apai nga ga toro namaa ga Mbori Kindo mbatayo rogo gani raka yo. Ka ani aatingida gi rengo re ti aregbo dũ, si nika undo rani ani karagapai kuti ngbatunga asanahe wa agu nga: ‘Ya mo si naida mi merefuo bakere wirikapai? Ya mo si naida mi idi gi ngbatunga sunge i nafuhe fere re?’

Ya mo gimi adiaberã aundo re mi sono rogo toro yo, mi moi agu asasa nga ga toro, na mi du “zezeredi” na aboro? (Oni bi genewaraga 19)

19 Tagbagaapai. Gu rugute gu mokedi nangia Pauro afuhe fu gu dungurati naadu Roma yo, wai du si aundo rani ani mangipai kuti atagbagapai? (Rom. 12:18) Wangia ani apefuo Kristo, ani namanga ome kadu “zezeredi na aboro dũ.” Ho tagbagapai akura ni, wai du ani amangapai sani? Ya mo si nidu ni mbumbuhe furani ka ida ga kura aboro berãpai, watadu aboro ini rani ni agu aboro “namanga zereda”?​—Yak. 3:18.

20. Tipagine mo aida ka manga sonakumbatayo ti ni rogo toro yo?

20 Gere gbua nga gu bete akpiapai nga gu nayugo wai pa berã ani kurii agu arugute nga ga Mbori narengbe ka undo rani ani mangi agu adiaberã du na ngbanya na gupai si aidaha be gu boro naima nanyaka rogo toro yo. Ka ani du ni agu aboro naberãpa agu apai nga ga toro, si nika sarani ani naaraka na bakere ngbarago na aˈuru dũ. Robert ani nibi gako pangbanga ti tonatona gi kekeapai re aya: “Tingbafuo mi sonosi ndikidi pagume na Yekova, mi aye kada ni wene kumbakudee na ni wene baagude. Mi aye kadu na bakere ngbarago.” Ani rengbe kadu na kina gu ngbatunga amaku re a ka ani peresipa sona rogo toro yo mbatayo. Wa ani nika du ni agu aboro naima nyaka rogo toro yo, ani nika raka bawene raka awere na “gu unga nga ndikidi unga” kumbatayo.​—1 Tim. 6:19.