“Ani natambua ro nga gaani Mbori, ki nisambua taasitaasi rimoro.”—1 PEKA 29:13.

ABIA: 1, 48

1, 2. Wai du Yekova agama gako ahe furani?

YEKOVA nga weneringi Mbori. Agu ahe dunduko du berani naye kina beko. Yekova nga baira adahabu na feda dunduko kodihe na gu kura ahe dunduko nga ga kpotosende, na ko namangasunge na agu ahe re ka fu agu ahe si aidaha tipa ka songoda raka. (Tam. 104:13-15; Agai 2:8) Ziazia Kekeapai na badungu apangbanga rogoho nga ga wai Yekova amangisunge na gako ahe ngba iˈiriwo gene tipa ka ngerafuo gako aboro.

2 Ho aYisaraere adu ni ngbakungba yo tipa agarã 40, Yekova anaafu manu gbiati ime fuyo. (Gate 16:35) Ni sangbana gipai re, “he akpa nga be yo te.” (Nem. 9:20, 21) Vurube gu nebi nangia Erisa, Yekova akiisi gu wiri tooni nzeme nangia ga ruru dekurugbo ngba iˈiriwo gene. Gu ga Mbori gamunihe re aundo ri ri tumo gari bape na tingbafuo gure ri du na marã beri narengbe arengba tipa ka songoda rakari gbiati raka awiiri. (2 Aba. 4:1-7) Yekova aundo Yesu a ko ki kusi riahe gbiati marã ngba iˈiriwo gene ho si aaidaha ni.—Mt. 15:35-38; 17:27.

3. Gini apai ani nika wisigoho rogo gi kekeapai re?

3 Ahe be Yekova adunga digidoho ti ni ya nga gu rengbe ka songoda gu gako kusikusiahe du auru kpotosende. Ono wa vura duhe wo,  ko nayamba gako amoyambu kindi i mangisunge na gayo ahe ka songoda gu sunge nga ga gako riigbu. (Gate 36:3-7; oni gedi Asanza 3:9.) Tipagine Yekova aida gupai ti ni berani nga ani fu ahe fuko dagba agu ahe yo du berani? Wai du gu ruru aboro naadu bakuru kusayo afu agamahe ka songoda agu asunge nga ga ga Yekova amoyambu? Wai du riigbu amangasunge na gu marã aboro afuhe areme ni gamahe? Gi kekeapai re nika karagapai kuti agu asanahe re.

TIPAGINE ANI AFU GAMAHE TI NI FU YEKOVA?

4. Ho ani asongoda ga Yekova sunge ni, ani nayugo ginipai fuko?

4 Ani nafu gamahe fu Yekova mbiko gupai nga ani ima kpinyemuko na mbiko gupai nga ani nabiko na nyanyakipa ko. Kina ngbarani nazera ho ani aberãpa agu apai ni dunduko Yekova namangihe furani. Ho Bakindo Davide aapeka pa agu ahe ni si aaidaha tipa ka dua yekaru, ko ape gupai nga agu ahe dunduko du berani naye kina be Yekova na agu ahe dunduko ani afuhe fu Yekova, ani nafuhe kina dagba agu ahe yo kinako afuhe furani.—Oni gedi 1 Pekapai 29:11-14.

5. Wai du Ziazia Kekeapai ayugoho nga fu gamahe nga nyanyakipa papara ndikidi irisombori?

5 Ani nafu gamahe a fu Yekova mbiko si nga gu gene ani airisoko ngbaha. Gu mokedi nangia Yoane agi ga Yekova amoyambu rogo yuguyugupai yo i nigumba gupai ngbangbaturũ yo nga: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.” (Yugo. 4:11) Ya mo mo arengbanga kada kuti gupai nga Yekova rẽarẽ na gu taarimo gbiati gu irisa nga gu rengbe ani ka fuhe fuko ho ani afu gu wene ahe ni fuko du berani te? Yekova afu zinahe fu aYisaraere vurube Moize nga i naaye kubara bangiriko ti regbo apumbo biata nga gu naana manga na agarã dũ. Wa duhe nga fu gamahe ti regbo agu apumbo re angia papara ga aYisaraere irisombori, si aaidanga i ye “na ku beyo ku bara bangiri Yekova” te. (Pa Rug. 16:16) Wakina gure areme a, gu gamahe ani afuhe mbiko ani nabi gu sunge gu papara ga Yekova riigbu du auru kpotosende ane amangaha na nyanyakipaha na tipa ka songoda gu sunge re, si nga nyanyakipa papara gaani irisombori.

6. Tipagine duhe ti ni ni wenepai furani ka fu gamahe? (Oni bi gu sura duti tonatonaha.)

6 Si tipa kina gaani wenepai ho ani afu gamahe ni. Si ni wenepai furani ani naagamahe fu aboro angianga kina aboro naagamahe furani ya. (Oni gedi Asanza 29:21.) Ani ima rengba ka berãpa gu gude nangbe gamahe fu avunguru na papara gu marã kina yo afuhe furu. Nairiwo gu tambuahe agu avungugude re nidu na ni tipa gu gamahe re! Gu gude namangasunge abazakigene na kini raki kporo na avunguni ima rengba ka fu bete marã tipa si undo na agu apai si aidaha kporo. Wa vura duhe nga avunguni arengbanga kaa berãha nga ni mangihe wo te, i ima rengba ka dia gu gamahe re mbiko si nga gu gene gu gude re ayugoho ngbaha nga u na tambuahe tipa agu apai dunduko i amangaha furu. Wakina gure a, Yekova ima ino gupai nga si ni wenepai furani kaa fu gamahe dagba agu ahe yo du berani.

WAI ABORO ANAAFU GAMAHE TI AGU AREGBO I AAKEKA ZIAZIA KEKEAPAI TI NI

7, 8. Wai du ga Yekova aboro ti gu regbo i aakeka Ziazia Kekeapai amoi kpiapai nibipa fu gamahe (a) ho sunge ani duadu ni si aaidaha tipaha? (b) tipa ka songoda kuraapai nga ga sunge?

7 Ani naino gupai rogo Ziazia Kekeapai yo nga, ga Yekova aboro anaafu agamahe tipa kaa songoda gako sunge. Ti gu kura aregbo, sunge anidu kinaho ga Yekova aboro anaafu agamahe tipaha. Ni kpiapai, Moize angarasi aboro i fu gamahe tipa gupai nga i dua banye na ni, wakina gu Bakindo Davide amangihe nibipa dua yekaru a. (Gate 35:5; 1 Peka 29:5-9) Ti regbo Bakindo Yoasa, aboromotumo amangisunge na gu marã aboro aye na ni tipa ka mbakada agu aba nagberẽ ti ga Yekova bambu.  (2 Aba. 12:4, 5) Ho agu awirina naadu rogo gu bambata dungurati nga ga aKristano, ainipa gu zingo ni naamanga Yuda yo mbiko ngbongi, i adiberã nga “i nikakeda ũgomoro fu agu awirina nadu Yuda yo, gu ni ki niringbisi gani na kina omeni.”—Amo. 11:27-30.

8 Ti gu kura aregbo, ga Yekova aboro anaafu marã tipa si songodi agu aboro naangbe kumbatayo tingba gako sunge. Tii ga Moize aNdiko, i aafunga ũkumbo fu aRevi wagu i afuhe fu kura angbatunga te. Kuba gure, aYisaraere anaafu sa-dagba-bawe fuyo, si kini mbu regbo fuyo i moiberã yo sa fuo kina gayo sunge banye yo. (Geda 18:21) Wakina gure a, Yesu na gako abawiriki agbia undo ti gu weneringise nangia ga agu adee “nga agu yo naamanga pa yo na gayo ũkumuko.”—Rk. 8:1-3.

9. Wari agamahe anaaye ni bakuru kusayo?

9 Rengo ngaha nga, agu agamahe re anaaye rogo agene ni bakiakia. Ho aYisaraere aafu gamahe ni ngbakungba yo tipa i dua banye na ni, si nawira gupai gbe nga agu ahe i aafuhe re akodi agu ahe i aye na ni Ezipeta yo. (Gate 3:21, 22; 35:22-24) Rogo bambata sa kama agarã, kura aKristano abagi gayo ahe, wagu nga gayo abino watadu gayo akporo, na i ki ye na marãha fu amokedi. Amokedi ki kparaka gu marã re fu agu aboro naadu na zingo. (Amo. 4:34, 35) Agu akurayo anaamaa marã kubani tipa kaa fu gamahe dedede si nisongodi ga Mbori sunge. (1 Kor. 16:2) Rogo gi gene re, ngbatunga aboro dunduko naana fu gamahe, tona ti gu kere kumukokumuko yo ki da ti gu kere rungorungo yo.—Rk. 21:1-4.

FU GAMAHE AREME

10, 11. (a) Wai du rengbe ani ka wirika gu ga Yekova amoyambu naadu ti agu aregbo i aakeka Ziazia Kekeapai nga aguyo naadu na gu sino tiyo nga ga gamahe? (b) Gamo bipai nga gine tipa gu momu du mo na ni ka songoda gu sunge nga ga Kindo?

10 Areme a, si rengbe kadu nga sunge kinaho si aida ani fu gamahe tipa gupai nga i mangihe. Ni kpiapai, ya mo i nasogima dua vovo Bambu Kindo tipa gaoni dungurati? Watadu ya mo i nambakada agu apapara gu gaoni Bambu Kindo oni andu ku rogoho awere nga gu gberẽ? I rengbe ka pe gupai furoni nga si naida marã tipa gupai nga i mbakadi gaani be basunge, ba gaani bakere dunguratise, watadu tipa ka undo agu awirinarani gberãngo nati kuriyo. Ani naafu gamahe a tipa ka songoda agu aboro namangasunge rogo gaani bakere basunge nga ga zegino na rogo agu abe basunge du rogo zegino dunduko. Agu agamahe ani afuhe nasongoda amokedi, kparakpara abazakigene, gbiati agu ababiapai ninaata ata. Zanga kapa, gaoni dungurati aima manga diaberã kaa keda marã tipa gupai nga si songodi gu mbakadapai du tipa dudua aBambu Bakere Adunguratise gbiati aBambu Kindo rogo zegino dunduko, nga gu naundo awirinarani rogo zegino dũ.

11 Ani dunduko rengbe arengba ka fubee tipa ka songoda gu sunge ga Yekova riigbu amangaha rogo gi yangara areme re. Badungu agu agamahe aboro afuhe, i nafuhe rogo gbuko yo. Ho ani amaa marã ni ku rogo sanduki Bambu Kindo yo watadu ho ani afu gamahe ni rogo jw.org, ani apenga pa bakio gu marã fu aboro ani nafuhe te. Ani rengbe kaa berãha nga gu wiri umba marã ani nafuhe aundongo gbe te. Ono tie, bakere gu marã du be gaani riigbu naye gbe mbiko gu badungu rukutu wiri agamahe aboro afuhe kuba gu bete kindigi agamahe. Zavura agu awirinarani narungo arungo, i wakina aboro Makedonia nga aguyo navura du rogo “bakere rungo” i kini zungodihe kindi tipa gu momu nga ga fu gamahe na i ki fu gayo gamahe a.—2 Kor. 8:1-4.

12. Wai du riigbu amanga nyanyaki asadatise ka mangasunge na gu marã aboro afuhe ngba wene gene?

12 Riigbu Bipasunge naamanga kparakpee na kini mangi nyanyaki asadatise tipa kadu ni ruruyo na ni kangara yo nibipa wai i amangasunge na gu marã nga ga riigbu. (Mt. 24:45) Gu marã i agbiaha, i nasogima wai ka mangasunge na ni na rubangirise na i ki mangisunge na ni wenengai. (Rk. 14:28) Ti agu aregbo i aakeka Ziazia Kekeapai ti ni, gu ruru akumba  nga aguyo naangerafuo agu agamahe aboro aafuhe anaamangasunge na agu agamahe re sa tipa kina gu sunge i afuhe tipaha. Ni kpiapai, Ezara andu nunguro ku Yerusarema yo na agu ahe bakindo aParaso afuhe, nga gu nakodi dahabu, feda, na gu kura ahe nga gu genoho narengbe kadu awere rogo marã Amerika nga adorari naima susa amirioni sa kama. Ezara aabi gu marã re ni gu gamahe kina boro afuhe nitini fu Yekova na ko ki fuku arugapai tipa ka banda agu aũkumuko re wa i aandu nunguro na ni rogo kere arago. (Ezara 8:24-34) Gu mokedi nangia Pauro adungura marã tipa ka ndu ka undo agu awirina na ni naadu rogo zingo Yuda yo. Ko amangipai tipa gupai nga agu aboro naandu na gu marã re i ngerefuoho ngba ruru gene “ku bangiri Gbia sa te, ono ku bangiri aboro a.” (Oni gedi 2 AKorindo 8:18-21.) Ni pekafuo gu kpiapai nangia ga Ezara gbiati Pauro, gaani riigbu areme napekafuo agene mangasunge sirisiri ho daha ni ti mangasunge na gu gamahe aboro afuhe.

13. Tipagine riigbu namangi kura aˈariapai ti ni bambeda kusayo?

13 Aborokporo rengbe ka manga ariapai tipa ka zanga mangasunge na marã ni kikiihe kisusi gu i agbiaha watadu i rengbe ka gbata gene ka sa gayo raka taata na ki umbasi bakio gu marã i amangasunge na ni tipa ka manga ga Yekova sunge ni bakerehe. Gure nga kina gu ngisapai du tipa ga Yekova riigbu. Vuru agu agarã susi bambeda kusayo, badungu wene vovo apai gaani riigbu nakusihe. Ti gu kura aregbo, agi apai re asa gupai nga riigbu mangisunge na bakere marã kisusi gu si agbiaha. Sidu, riigbu naagbata agene ka umbasi bakio gu marã si amangasunge na ni na ka akpurasi sunge tipa gupai nga kadu na rengba ka manga badungu apai na gu marã nga gu oni afuhe ni gamahe.

GU UNDO NAYE TI GAONI AGAMAHE

Gamo gamahe nasongoda gu gaani sunge namanga rogo zegino dunduko (Oni bi genewaraga 14-16)

14-16. (a) Gini apai i amangaha na agu agamahe oni afuhe? (b) Ngba gini agene mo nagbia undo ti agu apai re?

14 Badungu ga Yekova amoyambu nga aguyo naima dia gbanga regbo kutingba gako sunge ima pe gupai nga i aabingo regbo mbata wa gere na badungu ariahe nga ga toro te. Oni berẽnga kurii gipai re! Vuru agu agarã yo susi bambeda kusayo, ani ima bi wai i atona jw.org gbiati JW Broadcasting. I ima kusa New World Translation of the Holy Scriptures awere rogo badungu afugo. Rogo gu garã nangia 2014 gbiati 2015, i amangi gu Bakere Adunguratise Nga ga Dungu Aringara riihe adu nga “Oni Gbata Ga Mbori Kindo Mbata!” rogo gu kikindigi abangimbaro du rogo agbata 14. Agu aboro nandu tipaha aima du na bakere ngbarago kadu pati ni.

15 Badungu aboro ima yugo gayo tambuahe tipa gu bakere aundo i agbiaha be ga Yekova riigbu. Ni kpiapai, nibipa gu mbakadapai nga  ga JW Broadcasting, kura arogotise namangasunge rogo kura ringara sa Asia yo akepai nga: “Ani namangasunge rogo wiri tooni gbata. Ni sangbana gupai re, kura aregbo kinaho ani abi tirani nga ani ni kparakpara rani ku mburu rago yo, na bangirani ki go ti wai ga Yekova sunge amanga rogo zegino dunduko. Ono bara sa kindi ani abi agu ambakadapai du rogo JW Broadcasting, si natingida rani na gupai nga ani nga papara gu riigbu nga ga awirina du rogo zegino dunduko. Agu awirinarani du ani na yo no na bakere ngbarago tipa JW Broadcasting. Dedede, ani naagia gupai kungbayo nga tingbafuo i bi gu mbakadapai nga gu ninaaye na adiwi dũ, i nabitiyo nga i mbembedi na agu awirina du rogo Riigbu Bipasunge. Awere, i na bakere ngbarago kisusi kadu ni papara ga Mbori riigbu.”

16 Rogo zegino dunduko, aBambu Kindo nambeda kina kuti 2,500 i aduaha awere watadu i ambakada agu apaparaha gberẽ. Tingbafuo kura dungurati sa Honduras yo tona manga dunguratise rogo gayo vovo Bambu Kindo, i akepai nga: “Nirengo, ani na bakere ngbarago kadu ni papara gu ga Yekova ngbadimokporo du rogo zegino dunduko na ka gbia ngbarago ti gu kodatise du dagba awirina rogo zegino dunduko, nga gu sa gupai ani anaarasa kina paha nga kadu na Bambu Kindo rogo gi gaani dagbarago re si da ti rengo.” Badungu aboro yugu kina gu ngbatunga tambuahe re a tingbafuo i gbia Ziazia Kekeapai na gu kura awaraga nga gu i nasaha ku rogo gayo fugo, tingbafuo i gbia undo ti gu sunge fu undo namanga ho gberãngo ati ni, watadu tingbafuo i bi gu wene sangbanapai nakura ti tungusapai rogo agu aba du na badungu aboro rogoho rogo gayo arago.

17. Wai du gu gene gaani riigbu amangasunge ngbaha areme ayugo gupai nga Yekova du nasongodaha?

17 Agu aboro angianga aDezire Yekova ya arengbanga ka rugatiyo na wai ani amanga agu asunge re dunduko na kina agu agamahe aboro afuhe te. Tingbafuo kura barugupasunge sa rogo kura kikii bambakadaahe bi kura gaani mekemeke abambu nga gu i agbingbida awaraga rogoho, ngbako azere ka bi gupai nga abaundosunge du naamanga agu asunge dũ naamanga yo, i aamanga agu asunge re dũ na kina gu marã aboro afuhe ni gamahe, na i amanganga mbakadapai kaa dungura marã be aboro te. Ko aya pai arengbanga ka manga wa gu ani amangaha re te. Ani ima da kuti gako pai! Ani ima ino gupai nga si rengbe ka manga sa mbiko kina gu undo nga ga Yekova.—Eyo. 42:2.

AGU AMAKU ANI AGBIAHA HO ANI AFUHE NI FU YEKOVA

18. (a) Gini amaku ani agbiaha ho ani afubee ni ka songoda Kindo? (b) Wai du rengbe ani ka raba awirani gbiati vovo aboro i naafu gamahe?

18 Yekova fu gu iriiri momu furani nga ka songoda gu bakere sunge namanga areme. Ko kido rani nga ka ani fu gamahe ka songoda gako Kindo, ko nika fu maku afu furani. (Mara. 3:10) Yekova kidohe nga gu boro nikaa fu gamahe, ni nika zugo azugo. (Oni gedi Asanza 11:24, 25.) Fu gamahe nasarani ani du berewe na ngbarago a, mbiko “fu he ngba ti dia ha [watadu ‘gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi,’ NW].” (Amo. 20:35) Ani na gu momu nga ka raba awirani gbiati vovo aboro rogo gaani afugo yo gbiati gaani kpiapai i ini wai ka fu gamahe a na ni sangbanaha ki gbia dungu amaku.

19. Wai du gi kekeapai re nangarasi ro?

19 Agu ahe dunduko du berani ye kina be Yekova. Ho ani afu gamahe ni fuko, si nayugo gupai nga ani ima kpinyemuko na ani nabi agu apai dunduko ko namangihe furani na nyanyakipaha. (1 Peka 29:17) Ho aboro aafu gamahe ni tipa i dua yekaru na ni, ‘aboro angi bambiko wa i afu he ni nyemuhe, bambiko i afu he fu Yekova na kpotoyo yo ziazia ni nyemuhe.’ (1 Peka 29:9) Wakina gure a, ani ndunga andu kindi kumbatayo kaa gbia ngbarago ti fu gamahe fu Yekova dagba agu ahe yo kinako nafuhe furani.