Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Ngi 2018

I Afu Tiyo Na Kpotoyo Yo Dunduko Madagascar Yo

I Afu Tiyo Na Kpotoyo Yo Dunduko Madagascar Yo

SYLVIANA nga nazakigene du garãri wa 25 aya, “Ho mi agi agu apangbanga ni nga ga agu abakureami namangisunge rogo agu aba bakere zingo nga ga abazakigene adu rogoho, mi aye kadu na nyemu ka hia gu ngbarago i agbiaha a.” Ri aya berewe wẽ, “Ono mi aagunde agunde nga mangasunge rogo gu ba du na bakere zingo abatungusipai rogoho arengbanga na omere te.”

Ya mo mo adunga na gu berãpai Sylviana adu na ni re? Ya mo mo na nyemu ka mangasunge a rogo gu dagbarago si aida dungu atungusipa Kindo rogoho, ono mo kini bakibangiro singia mo ada ti gu gamo sasa re? Kangia wo duhe, ka rago gberẽnga tiro ya! Mbiko gu undo nga ga Yekova, akutu awirina ima diabe agu akpakarapai naaka na yo ti kiiso yo gayo sunge tungusapai. Tipa ka ino wai Yekova azakigene fu agu akurayo, ani nika ndu ku Madagascar yo, nga gu biama kikii kisanga rogo zegino.

Vuru agu agarã bawe susi kusayo, kakaka abatungusipai gbiati abazakigene bangeyo naima susa 70 rogo aringara nga 11 * ima ndu ka mangasunge rogo gu ringara du nga mbudu sende tipa tungusapai vuru Afirika re, nga gu ringara badungu aboro abi Ziazia Kekeapai rogoho na irisa. Berewe a, badungu abatungusipai nga ga gu ringara re yo aima digo nidu na nyemu ka ga ku rogo kura aba tipa ka undo sunge tungusapa gu pangbanga nga ga Kindo rogo gi kikii kisanga re. Ani inidingo tirani na agu akurayo.

DIABE GUNDE GBIATI GBERÃRAGO

Perrine na Louis

Louis na Perrine, nga arogotise garãyo naima susa 30, aguari France yo ki ga ku Madagascar yo. Tipa dungu agarã, i aima digo niberẽpa kiiso gayo sunge tungusapai ni ga yo ku gii ngbi yo, ono Perrine adindiko adindiko ka ndu. Ri aya: “Mi aagunde agunde ka ndu ku rogo gu ba mi ainongo ho ya. Mi abaka bangire abaka tipa ka mbu gimi aborokporo, gimi dungurati, kpurani, agu aba dunduko mi ainidihe gbiati agu apai ani anaamangaha dedede. Nirengo, gimi abakabangirise nangia gu bakere kpakarapai si aaida mi dibehe.” Rogo gu garã nangia 2012, Perrine aye kadu na wingbaduse, na ri na Louis ki ga ku Madagascar yo. I nabi gu diaberã i amangihe re wai? Perrine ape gupai nga, “Ho mi angera ni kusayo, mi rengbe ka ya si aima du ni gupai nanyakasa idapase ka bi be Yekova si nimangisunge rogo gaani raka yo. Oni bingo gupai nga ti regbo gaani bambata Tingida Pakpio  Yesu Madagascar yo, agu aboro ani aawirika Ziazia Kekeapai na yo aye bawe tipaha!”

Ginipai nanyakasi gi arogotise re tipa i nye kindi ti ngba gayo sunge ho akpakarapai akuru ni? I azungodi Yekova rogo kpee yo tipa ko fu gu ome fuyo i aaidaha tipa ka hipai. (Frp. 4:13) Louis aya: “Ani abi gupai nga Yekova aima karagapai kuti gaani akparakpee na ki fu ‘gu zereda nga ga Mbori’ furani. Ani aima du na rengba ka gbe berãrani kuti gu ngbarago ani aagbia ha ti gaani sunge. Berewe a, agu abakurearani naadu France yo aakeda keke apai furani rogo e-mail gbiati keke awaraga tipa ka ngarasa rani ka omerani batingo ya.”—Frp. 4:6, 7; 2 Kor. 4:7.

Yekova aima fu mosoro fu aLouis na Perrine tipa gu hipai i ayuguhe. Louis aya, “Rogo Tanvuo 2014, ani amangi Gu Sukuru Du Tipa Raba Arogotise na Ziazia Kekeapai * France yo. Manga gu sukuru re angia gu gamahe be Yekova ka bangirani agonga ti ni ya.” Fuo nyasa agi arogotise re gu sukuru re, i adu na bakere ngbarago ho i akedi yo ni berewe ku Madagascar yo.

“RAGO NIKA NGBA ANGBA TIRANI NA ONI!”

Nadine na Didier

Ho Didier na Nadine, nga arogotise rogo gu ringara nga France, aga ni ku Madagascar yo rogo 2010, i aima du ni nyanyaki aboro. Didier aya: “Ani amangisunge abazakigene ho ani adu ni ni paranga aboro, na fuani ani ki vungu agude biata ki sonosi yo. Ho i angangarã ni, ani aberẽpa ndu ka mangasunge tungusapai gii ngbi yo.” Nadine aya: “Berãpa kparaka na awirani asa re mi du dindikodindiko ka ndu, ono i aya furani wẽ: ‘Ka oni ndu ku gii ngbi yo ka mangasunge rogo gu ba du na bakere zingo abatungusipai rogoho, rago nika ngba angba tirani na oni!’ Afugoyo aima ngarasa rani ani ndu ku gii ngbi yo. Wa vura duhe nga ani naraka awere tuturũ ti awirani, ani na ngbarago nga ani ima du na rengba kaa fura na yo dedede.”

Wirika pa-Malagasy aima du ni mbumbuhe fu aDidier na Nadine. Nadine ape gupai na mongo ti ngbari nga, “rukutu agude nga ani rengbe ka ino vovo fugo ni ipo te.” Wai du i aye kadu na diabese? Bambatapai nga, i aga ku rogo gu dungurati nga ga Faransée. Kusa, ho i abihe ni nga i ima du regerege ka dia bakere regbo kaa wirika gu fugo nga ga gu ringara re, i aga ku rogo gu dungurati nga ga pa aboro Madagascar. Nadine aya: “Badungu agu aboro ani agbiayo gene tungusapai yo ima du na nyemu ka wirika Ziazia Kekeapai. I naafu tambuahe furani dedede tipa ndu ani kaa biyo. Ti bambata regbo, mi aberẽhe tigimi nga musumo du mi arara ha. Mangasunge abazakigene ima ngba tire rogo gi dagbarago re. Ho mi naazinga ni rame yo wiso, mi naaya fu tire wẽ, ‘Si ni wenepai nga mi nandu gene tungusapai yo areme!’”

Didier amomu ti ngbako ho ko aatingidapa gu regbo ni ko aawirika Malagasy. “Mi aanungusa gu dunguratise nga ga dungurati ono ka mi agianga rogo agu akaragapai yo awirina aafuhe ya. Gupai mi aanapehe sa nga, ‘Tambuahe foro.’ Fuo mi fu tambuahe fu kura wirina sa ni dee tipa gari karagapai, agu aboro naasungu gii ri yo atona kaa ya fere ni beyo wẽ gu karagapai ri afuhe re aarunga te. Sidu, kura wirina atumba beko ni ipo ki fu ruru karagapai, na mi na maabangirise nga ko aima fuhe nzunzu.”

 RI ADI YAMBAHE KUGUME NA NGBARAGO

Ti regbo bakere dunguratise rogo 2005, aThierry na diako nga Nadia, abi gu drama nga “Oni Merefuo Agu Asasa Nafu Irisa fu Mbori.” Gu drama nga ga Ziazia Kekeapai naadu tipa Timoteo re aima zio ngbaduyo yo na ki kiisi gayo nyemu nduge ka mangasunge rogo gu ba du na bakere zingo amangisunge Kindo rogoho. Thierry aya: “Ti digido gu drama re, ti gu regbo ani aata berani, mi api kuti diare na ki sana ri nga, ‘Wari ani andu kuhoni?’ Diare ape gupai nga ri aaberã kina gu bangisapai re.” Fuo gure ngbutuko, i atona ka manga adiandue tipa ka da ti gayo sasa. Nadia ape gupai nga, “Ani atona kaa umbasi gaani ahe tooni tooni da kinaho si anye ni rogo amangu gbua biama!”

Ku gare beyo: Nadia na Marie-Madeleine Ku kumbabee yo: Thierry

I ada Madagascar yo rogo 2006 na ki tona gbia ngbarago ti gayo sunge tungusapai nibasa. Nadia aya, “Agu aboro ani agbiayo nafu bakere ngbarago furani.”

Ono tie fuo susa agarã sita kusa, agu arogotise re agbiatiyo na kpakarapai. Na Nadia nga, Marie-Madeleine, nga guri naaraka France yo, ati beri ki kuo na ri ri ki hõ. Fuo agu arogotise re sana gu munganga naahusa Marie-Madeleine tipa ka inopa wai ri adu, i asana gu nayo re tipa ri ga gu Madagascar yo kaa raka yo na yo. Wa garãri avura du nga 80 ti gu regbo re, ri adi gu yambahe re kugume na ngbarago. Wai du ri abipa raka ri gii ngbi yo? Ri aya: “Si ni mbumbuhe ti kura aregbo ka inido vovo rago, ono wa vura duhe nga badungu apai kinaho adunga mi na rengba ka mangaha ya, mi nabi tire nga mi na kina sunge tire rogo dungurati. Na gupai nafu ngbarago fere nzunzu nga gi mbakadapai nga ga raka re nambugene fu wire na kumbari tipa i naandu kumbatayo wenengai na gayo sunge tungusapai.”

“MI AIMA BI BE YEKOVA SI NIUNDO RE”

Riana namanga gumbapai rogo pa-Tandroy

Riana nga wirina du garãko wa 22. Ko asono rogo gu ba nga Alaotra Mangoro, nga gu ba du sendehe ni mbuduhe Madagascar yo ku uroyo. Ko aima ngarã sukuru yo na ko aaida ka ndu tipa bakere wirikapai. Ono tie, fuo wirikako Ziazia Kekeapai, ko kini aria berãko. Ko ape gupai nga: “Mi amangi ome ka nyasa sinia (école secondaire) na mi ki mangi kidohe fu Yekova nga, ‘Ka mi du na diabese rogo gimi yangara asada, mi nika tona sunge abazakigene.’” Fuo nyasa Riana sukuru, ko akakuti gu kidohe ko amangihe re. Ko aga fuo kura wirina ni bazakigene, ki gbia sunge marã nga gu ko anaamangaha rogo siasia aˈuru, na ko ki tona mangasunge abazakigene. Ko aya, “Si nangia gu bawene diaberã kisusi mi amangihe rogo gimi raka.”

Ono tie, agume Riana agianga tiyo na gu ndupai ko aameranga fuo sunge marã ti ni ya te. Ko aya: “Buba, tame buba, gbiati tame na buba angarasi re mi ndu tipa bakere wirikapai. Ono mi aaidanga ka mbu sunge abazakigene tipa ai pai te.” Fuo regbo ngbutuko, Riana aaida ka mangasunge rogo gu ba naadu na bakere zingo abatungusipai rogoho. Ginipai naafu be kuti gu nyemupai re? Ko aya: “Airadĩ akuo gaani ngbadimo na ki dĩ badungu gaani ahe. Pa dĩ yo gaani ahe asa re mi berẽkurii agu afugo Yesu du tipa dúngura ‘aũkumuko ku ngbangbaturũ yo.’ Mi adiberã ka mangasunge nyanyaki tipa ka kumuko rogo toro yo.” (Mt. 6:19, 20) Ko aga ku rogo kura rago du ku sudiyo rogo gu ringara re, nga gu ngatarĩrago du baturõho na gu ba ko aaraka rogoho nga amairo 800 (akirometere 1,300). Agu aboro naraka rogo gu rago re, i nayamba yo nga Antandroy. Tipagine ko aga ti ni koyo?

Diwi sa kusayo mbata fu i dĩ ga aRiana ahe, ko atona wisigo Ziazia Kekeapai na akumba ue ni Antandroy. Ko awiriki bete afugo rogo gayo fugo yo na ko ki berẽ pa gu dungu Antandroy nga aguyo ata gianga gu pangbanga nga ga Kindo ya. Ko aya, “Mi amangi kparakpee fu Yekova ko undo re mi ga ku rogo gu rago i ape fugo Antandroy rogoho.”

Riana aga ku rogo gu rago re, na ko ki gbiatiko na kpakarapai yo nibasa. Ko aarengbanga ka bi sunge te. Kura kumba sa aya fuko wẽ: “Tipagine mo aye ti ni kono? Aboro naaguari aguari rogo gi rago re ka ndu koyo mo aye ni tipa ka gbia sunge!” Fuo aposo ue, Riana aguari ka ndu tipa bakere dunguratise na wirihe mangu ko yo gbua tooni, na ko kini bakibangiriko abaka tipa gupai ko nika mangaha. Rogo yangara uru nga ga bakere dunguratise, wirina sa amoihe ku mangu Riana yo. Guhe ko amoihe re angia marã nga gu naima rengba ka ga na Riana ku rogo gu rago nga ga Antandroy re na ki undoko ko tona wiri sunge baga mamuanyaa. Riana aya: “Mi aima bi be Yekova si niundo re ti gu regbo re. Mi aima du na rengba ka undo agu aboro naadunga na momu beyo ka wirikapai tipa Yekova ya!” Bakere sunge adu kinaho a tipa mangaha rogo dungurati. Riana ape gupai berewe nga: “Rogo diwi yo sa, mi  animangi gumbapai bara ue. Yekova aaraba re vurube gako riigbu.” AReme, Riana natungusa gu pangbanga nga ga Kindo kindi fu agu aboro nape pa-Tandroy nga aguyo naida ka wirikapai tipa Yekova.

YEKOVA NAFU MAKU FU AGU ABORO NAMANGA OME

Yekova nakidohe nga ko nika fu maku fu ai gu boro namanga ome ka mangasunge fuko. (Yes. 65:16) Ho ani amanga ome ni ka diabe akpakarapai tipa ka kiiso gaani sunge tungusapai, Yekova nafu maku afu furani. Oni makianga pa Sylviana, nga wirina Madagascar yo, nga gu ri i nipepa ri ti tonatona gi kekeapai re. Oni tingidi gupai nga, ri aagunde nga ri na rengba te ka ndu ka mangasunge rogo gu ba du na bakere zingo abatungusipai rogoho. Tipagine ri aaberã ti ni wa gure? Ri ape gupai nga: “Gare ndure ni gurehe ti kumba ndure. Sidu, ho mi andu ni mi naterenga aterenga, na ome re nabata ni ipo.”

Sylviana (ku garebeyo) na Sylvie Ann (ku kumbabee yo) gbiati Doratine rogo gu uru ri azi bapatiza

Rogo 2014, Sylviana gbiati paranga nazakigene rogo gari dungurati rimori angia Sylvie Ann, aga ku rogo kura umba gbaria baturõho adu na gu gbata i aaraka rogoho nga amairo 53 (akirometere 85). Wa akpakarapai avura du, Ga Sylviana sasa aima da ti rengo na ri ki ima gbia maku! Ri aya, “Fuo dia mi garã gbua sa kuti gimi vovo sunge, dee mi aawirika Ziazia Kekeapai na ri rimori angia Doratine, azi bapatiza ti regbo gaani bakere dunguratise.”

“MI AÚNDA RO”

A wa agu afugo nga ga idapase nga ga agi awirina naaga ku rogo kura ringara re ayugoho, ho ani amanga bakere asadatise ni ka diabe gu kpakarapai rengbe ka ka na ani ti kiiso gaani sunge tungusapai, ani naino rengo gu ga Yekova kidohe fu gako amoyambu nga: “Mi anyákasa ro, mi aúnda ro.” (Yes. 41:10) Ni sangbana gipai re, gaani pagume na Yekova nanyaka. Kurigure, fu tirani na kpotorani yo dũ rogo gu rago ani araka rogoho watadu rogo kura ringara nambakada rani tipa agu asunge napido rani mbatayo rogo vovo zegino. A wa Didier nga guko i nipepa ko kusayo agumbaha, “mangasunge rogo gu ba du na bakere zingo abatungusipai rogoho nga wene rabahe tipa kumbatayo!” Agu aboro du na nyemu ka futiyo tipa sunge, i tonanga gbia gu rabahe re atona kina awere!

^ genewaraga 4 Agu awirina re aye rogo agu aringara nga Canada, Czech Republic, France, Germany, Guadeloupe, Luxembourg, New Caledonia, Sweden, Switzerland, United Kingdom, gbiati Amerika.

^ genewaraga 8 Gu Sukuru Du Tipa Abatungusipa Kindo du awere kuba gu sukuru re. Agu amangisunge Kindo ti aregbo dũ namangasunge gii ngbi yo ima rengba ka hiso fuomu tipa ka ndu tipa gi sukuru re rogo gu ringara i aenge rogoho watadu rogo gu kura ringara i amanga gu sukuru re rogoho rogo gayo fugo watadu rogo gu fugo i apehe ape wenengai.