DANIEL NA MIRIAM amangi rogatise rogo Mbirinvuo 2000 na ki moi kpuyo rogo gu gbata nga Barcelona du Spain yo. Daniel aya, “Ani aaraka gu raka aboro aya tipaha wẽ wene raka. Gu sunge ani aamangaha asaha taata furani ani naarihe rogo wenewene amataamu, kini ta ku rogo kura aringara, na kini vodi wenewene aroko. Ani anaamangasunge tungusapai dedede a.” Ono tie, ariapai aye ka manga.

Ba bakere dunguratise yo rogo gu garã nangia 2006, sanahe akuru yo rogo gumbapai nga gu nazi ngbadu Daniel yo ni kerehe, gu sanahe re adu nga: “Ya mo ani namanga bakere ome tipa ka undo agu aboro ‘i naima ringbisa yo sa imo yo’ tipa gupai nga i ye ku ngbagene nyenye unga?” (Snz. 24:11) Si anyakasipa gu tindiro du ani na ni ka tungusa gu pangbanga bata nga ga Ziazia Kekeapai. (Amo. 20:26, 27) Daniel aya, “Mi abihe nga Yekova nafura fu kina boro mi.” Gu gumbapai re ape gupai a nga kiiso sunge tungusapai naye na bakere ngbarago. Daniel aima ino gipai re nga rengo du. Miriam aima tona sunge anazakigene na ri aagbia bakere ngbarago.

Daniel aya, “Mi ada kuti gupai nga gure angia regbo fere mi mangi ariapai.” Na ko aima manga ariapai. Ko aumbasi agu asaa ko aadia ha kuba sunge marã yo, ki tona sunge abazakigene, na ki tona ka berãkurii gu ngbarago rengbe ko gbiati Miriam ka gbiaha ka i ndu ka mangasunge tungusapai rogo gu rago du na zingo abatungusipa Kindo rogoho.

SI ATONA NA KPAKARAAPAI, FUANI WENE PANGBANGA KI KURU

Rogo Merekoko 2007, Daniel na Miriam ambu gayo sunge na ki ndu ku Panama yo, nga gu ringara i aima ndu ku rogoho mbata. Gu dagbarago i aatungusapai rogoho akodi dungu akisanga nga ga Bocas del Toro Archipelago du Caribbean Sea yo, agu aboro gbe du yo nga kina agu aboro Guaymi naima enga kina yo. Daniel na Miriam aberehe nga ka i aamangasunge na gu marã i aigihe, i ima rengba ka raka Panama yo tipa he wa adiwi muambe.

I anaata rogo agu akisanga re na akurungba gbiati angbagida, na i natingida gayo bambata nunguro na ngbagida atingida wenengai, i andu tipa amairo wa 20 (akirometere 32) rii agangara na rogo kere uru. He ambedi ka maa Daniel be mbugo. Ono wa si avura duwo, agu aboro Guaymi akpuyo adu pangba agene anaadia yo kugume, gbe fuo agu arogotise re wiriki bete wiri afugo rogo gu fugo i aagumbaha rogo gu dagbarago re. Si aaimanga te i kidu na aboro beyo 23 i aawisigo Ziazia Kekeapai na yo.

Ono tie, ho marã anyasi ni beyo, gayo ngbarago asatihe ku rogo gberãrago yo. Daniel aya: “Ani atona ka kpara ho ani aaberãpa karagatirani ni ku Spain yo. Ani adu na bakere gberãrago ka ga pati gu gaani aboro ani aawisigo Ziazia Kekeapai na yo.” Ono tie fuo diwi sa kusa, i agi wene pangbanga. Miriam aya: “Ani agbia yambahe ka mangasunge kparakpara abazakigene. Nairiwo gu ngbarago ani adu na ni ka nye kina ti ngba gaani sunge!”

GAYO BAKERE NGBARAGO KISUSI

Rogo gu garã nangia 2015, ni sangbana gu ariapai namangi rogo riigbu, i aya fu aDaniel na Miriam i karagatiyo kaa mangasunge ni agu abazakigene natungusapai dedede. Ginipai ka i amangihe? I akido kuti gu kidohe du rogo Atambuahe 37:5 nga gu naya: “Mo fú ga pai ku be Yekova; ki kida kuti ko a, ko amánga pai tipa ha.” I agbia sunge marã tipa kaa songoda tiyo wa i angia abazakigene, na areme, i namangasunge rogo gu dungurati du rogo gu papara Panama nga Veraguas.

Daniel aya: “Mbata fu ani guari Spain yo, ani aainongo singia ani arengbe ka raka taata raka te. Areme, ani naraka taata raka, na he ho du na nyanyakipaha ani azingo tipaha te.” Gine nafu ngbarago fuyo kisusi? I aya, “Undo aboro umbasitise i ini pai tipa Yekova nafu gu ngbarago fu boro ka i aringbisanga ha na kura he ya!