GU DIWI nga Ngbangba rogo 1932 ima mbeda ka digo rogo gu gbata nga Mexico City. Rogo poso sa kusayo, agu awe du bangiri gene nanungusa aũnduge atona mangasunge rogo gi garanvugaranvu gbata du na aboro rogoho naima susa mirioni sa re. Ono awere, fura tipa agu awe re nga kuru pangbanga. Agu aboro pangbanga nga ga gu gbata re ima tona fura tipa gupai du rogo gi poso re. I ima dudua akamera, na i awere ba rugo gatara yo, napido gu kparakpara gino nga Joseph F. Rutherford, nga guko nga bangerekuriisunge nga ga Watch Tower Society. Agu awirina du rogo gu gbata re ima ye a ka dia Wiriba Rutherford kugume, nga guko ye tipa gu bakere dunguratise nga ga uru biata.

Gu magazini nga The Golden Age ape gupai nga, “Kango ti ni te nga pa gi bakere dunguratise re nika nye tipa gba regbo ni gu nyanyakipa pai nga ga Rengo rogo gu ringara nga Mexico.” Ono ginipai naasa gi bakere dunguratise aboro adu pati ni gbua nga 150 re si du ni nyanyakipa bakere dunguratise?

Mbata fu gu bakere dunguratise re, zuzu Kindo adu gbua tooni Mexico yo. Naatona rogo 1919, i atona manga umba bakere adunguratise yo, ono fuo agarã kusa, bange adungurati aima ye ka umba. Ho i azaki be-basunge ni Mexico yo rogo 1929, si aangera wa ka i ya apai nika ngba angba. Ono tie, akpakarapai adu kinaho naaga na apai kusayo. Ho i afu rugute ni nga aboro mbu koda sunge marã na sunge tungusapai, kura zingizingi wirina sa nga guko naana mangasunge kparaka awaraga ambu dungurati na ki zaki gako badona nga ga wisigo Ziazia Kekeapai. Ti kina gu bangisa regbo re, babiapai nga ga be-basunge amangi iraira mangapai, na si ki idi i moi kura boro kubako. Gu ruru aDezire Yekova naadu Mexico yo aida nyakasaro.

Ti gu regbo Wiriba Rutherford andu ko yo, ko anyakasi gi ruru awirina re nifu ko bawene agumbapai ue nga ga bakere dunguratise gbiati nyanyakipa agumbapai bisue rogo radio. Gere nangia bambata regbo awirina mangisunge na radio tipa ka gbandaka wene pangbanga vuru gu ringara nga Mexico dũ. Tingbafuo bakere dunguratise, gu vovo babiapai i amoi ko ambakadi pa sunge, na awirina kini ndu kumbatayo zaaza na sunge tungusapai na Yekova kini fu maku fuyo.

Gu bakere dunguratise namangi rogo 1941 Mexico City yo

Rogo gu garã naangbe fuo gure, i amangi bakere adunguratise ue rogo gu ringara re, i amangi gu rogo gu gbata aba kurungba aru rogoho nga, Veracruz na i ki mangi gu Mexico City yo. Gu nyanyaki sunge awirina aamangaha gene tungusapai yo aima tona kusa wene asangbanapai. Rogo 1931 abatungusipai adu yo nga 82. Fuo susa agarã bawe kusa, bange agu awirina naadu yo aima susa gu namba re bara bawe! Abatungusipai nga 1,000 naaye ku Mexico City yo tipa gu bakere dunguratise nangia ga 1941.

“GU TUNGUSAPAI NGA GA BANGIRI AGENE”

Rogo gu garã nangia 1943, aDezire Yekova amangisunge na kekeapai tipa ka takapande gu bakere dunguratise riihe angia “Free Nation’s” nga gu naamangi rogo  agbata nga 12 Mexico yo. * Gu kekeapai re adu ti kpe awaraga nga gu i aabaha goyo yo, kuraha ti ngbaduyo, kuraha kugii yo yo, na gere angia gu gene nga ga tungusapai aDezire Yekova atona mangasunge na ni rogo 1936.

Kpe magazini nga ga 1944 nayugo awirina Mexico City yo na kekeapai bangirigene

Mangasunge na gu kekeapai re aima du na diabese, si ki sa gupai nga gu magazini nga La Nación pe gupai nga: “Rogo gu bambata uru nangia ga bakere dunguratise, i ape gupai fu aDezire nga i yambu kura aboro. Rogo kura giro rago, aboro aima nge ki hi rago.” Rago aangbanga ti gu Kanisa Nga ga Katoriko na gipai re te, na i ki tona kaa soga aDezire Yekova. Wa i avura kaa gbiatiyo na sogote, agi awirina naagundenga re ya aandu kindi kumbatayo kaa tungusapai bangiri agene. La Nación atingidi gupai a nga: “Aboro dunduko rogo gu gbata re aima biyo . . . akumba—na adee—i nitungusipai na kekeapai.” Gu kekeapai re ayugu sura awirina bangiri agu agene nga ga Mexico City. Kekepai adu tii gu sura re nga: “Gu tungusapai nga ga bangiri agene.”

“AGU ABA RAME NAADU NI FIÕFIÕ HO NA NI FOFOI HE KISUSI PIGO RII ASIMINDI”

Rogo agu agarã re, badungu aDezire Yekova aamanga bakere ome tipa kaa du pati gu bakere adunguratise naamanga Mexico yo. Badungu aboro anaaye rogo tuturũ agbaria, nga gu ka agatara adanga rogoho ya watadu adunga agene ku rogoho a ya. Sidu, agu aboro naandu tipa bakere dunguratise anaandu na adongi watadu na nduyo tipa arame tipa ka da pati ba gatara si di yo yo ku rogo gu gbata bakere adunguratise anaamanga rogoho.

Badungu aDezire Yekova nangia airarungo, i adu na rengba ka gbia kina marã nduge, angianga marã yego ya. Ho i anida ni, i anaazora fuo awirina rogo gu gbata re, na i anaadia yo kugume wenengai ku rogo akpuyo. Kura awirina anaara ara rogo aBambu Kindo. Ti kura regbo sa, bange awirina wa 90 azoro be-basunge yo, kini pi ri “akarotoni nga gu i aaingidihe ni ba 20.” Pangbanga rogo Yearbook ape gupai nga agu awirina re abi agi abarame re ni “fiõfiõ ho na ni fofoi he kisusi pigo rii asimindi.”

Tipa agu awirina naima du na tambuahe re, dungura yo tiyo kupati bakere dunguratise aima du na nyanyakipaha kisusi agu aome dunduko i amangihe re. Areme, wa bange abatungusipai Mexico yo ambeda ka da ti mirioni sa, gu toro nga ga tambuahe re kindi rogo yo yo. * Rogo gu garã nangia 1949, gu be-basunge du Mexico yo aya tipa awirina wẽ: “Gu kpakaraapai i andu rogoho azeresanga gayo kakaka nyemuse tipa rengo te bambiko agu aregbo dunduko ani amanga bakere dunguratise, si nga gupai i aza kaa fura tipaha tipa gbanga regbo na gu sanahe awirina naasanaha asana kindi nga, gini regbo ani nika du na kura bakere dunguratise berewe?” Gu tingidapai re nga rengo areme kina wai si adu mbata.—Gaani kuru apangbanga Central America yo.

^ genewaraga 9 Ringbisihe kuti gu Yearbook nangia ga 1944, gi bakere dunguratise re asa gupai nga “aboro ini aDezire Yekova Mexico yo.”

^ genewaraga 14 Rogo gu garã nangia 2016, aboro bangeyo nga 2,262,646 Mexico yo adu pati Tingida Pakpio Yesu.