Gu kumba du na kambu ime ke waraga pavuko na agu akumba sita du na ũvura beyo du payo rogo gu yuguyugupai du rogo Yezekere narukuba gine?

Tipagine du du gi vovo giarogopaiyo re ti ni niruruhe?

Fuo Yezekere bi gu gbegberẽ mangaapai naamanga be abasamungu kuti ndikidi pambori Yerusarema yo mbata fu i gbarasihe rogo 607 Mbata fu Batikayo Kristo, ko agbia yuguyugupai naadu tipa agu apai nika manga ti regbo gbarasaha. Ko abi akumba sita na aũvura beyo. Ko abi kumba a dagbayo “naukadi roko ni tutu giri nzibi” na “kambu ime ke waraga pavuko.” (Yeze. 8:6-12; 9:2, 3) I aya fu gu kumba re: “Mo ndú rogo bakporo . . . ki gba fuohe ti ngbandia kpakpu agu aboro nauka omeyo ki nikpari mbiko gu kere gbegberẽ asino nga gu du ni mangimangi he rogo ho.” Fuani, i aya fu agu akumba naadu na aũvura beyo i imi agu aboro dunduko du rogo gu bakporo re adunga na gbagbahe ti kpakpuyo ya. (Yeze. 9:4-7) Ginihe gi yuguyugupai re ayugoho furani, na da nga gu kumba du na kambu ime ke waraga pavuko?

I ape gi sangbanebi re rogo gu garã nangia 612 Mbata fu Batikayo Kristo, na bambata digisidigisihe aringbisitihe kuti gbarasa Yerusarema be agu abanzengere nangia ga aBabero yo nga gupai si adu nga si nika manga fuo agarã bisue gbua. Wa si avura du nga aBabero agbarasi Yerusarema, Yekova du namangisunge nayo tipa i gbarasihe. (Yere. 25:9, 15-18) Gipai re amangi wo mbiko Yekova amangisunge nayo i fu mbusa fu gako rikaaboro nasamungu kutiko. Ono tie, gu gbarasahe re aamanganga bau te. Si adu nga i agbarasanga ruru aboro wa sa na gbegberẽ yo te. Yekova aima mbakadapai tipa ka batasa agu aYudo naidanga na gu gbegberẽ mangaapai naamanga rogo gu bakporo re ya.

Yezekere aadunga dagba agu aboro naamaa fuohe ti kpakpu aboro watadu ka gbarasa gu bakporo re te. Kuba gure, si adu nga amaraika du nika ruga gupai du tipa pa gbarasaha. Vurube sangba gu nebi re, si nambugene furani tipa ani ini agu apai naamanga ngbangbaturũ yo. Yekova afu sunge fu gako amaraika i rugupa gbarasa gbegberẽ aboro na ki kpara ruru aboro tipa bata. *

Mbata kusayo ani asakipai tipa wai gi yuguyugupai re adigisotihe ti gaani regbo nga, gu kumba naadu na kambu ime ke waraga pavuko narukuba mbedimbedi aKristano. Ani aberẽhe nga agu aboro nadia wene pangbanga kugume nga agu aboro i agbahe ti kpakpuyo tipa bata. Ono tie, rogo agu agarã susi re, si ada ziazia nga si naida ani mangi ariapai rogo gi sakarogopai yo re. Ringbisihe kuti gupai gumbayo ho rogo Matayo 25:31-33, Yesu du nga gu boro nasapungbanga aboro. Ko nika manga gako yangara sapangbanga ti regbo bakere gberãngbi, ka kparaka agu aboro du wa akandoro nika bata ti aguyo duwa ameme i nika gbarasa yo.

Sidu, nibi gi vovo giarogopaiyo re, ginipai ani awirikaha ti gu yuguyugupai nga ga Yezekere? Apai ho wa bisue nga:

  1. Areme, Yekova namangasunge na tooni badona nga ga mbedimbedi aKristano tipa i nifu riahe fu gako aboro na kini fu zahe fu kura aboro mbata fu bakere gberãngbi ye. Tipa ga Kristo aborokporo dunduko, i dunduko du a nafu gi zahe re.Mt. 24:45-47.

  2.   Gayo pai gbua nga ka tungusa ga Yekova pangbanga, nga gu sunge tungusapai amaraika angbembatayo fuhe.Yugo. 14:6.

  3. Kina gu bangisapai re du areme a. Ono ginipai si aida aboro mangihe tipa i moi gu fuo gbahe tiyo narukuba bata? Si naida i di gu tunguspai kugume namanga areme, ki moi agu asino tiyo nga ga aKristano, ki kpara gayo raka fu Yekova, na ki songodi awirina Kristo niruru yo. (Mt. 25:35-40) Agu aboro namanga gipai re nika gbia gu gbagbahe nga ga bata ti regbo bakere gberãngbi.

  4. I nika gbahe ti bakere rimbasa ho i nika sapangbanga yo ni wa akandoro ti regbo bakere gberãngbi. Gere nika sayo i gbia nyenye unga auru kpotosende ane.Mt. 25:34, 46. *

  5. I nika gbarasa rikaaboro gbiati gbegberẽ apai dunduko barambeda.Yeze. 9:2, 6, 7; Yugo. 19:11-21.

Pa ruga ani tirani na gi nyanyakipa apai ani na wirikihe re nafu wasa furani nga Yekova agbarasanga ruru aboro na gbegberẽ yo wa sa te. (2 Pet. 2:9; 3:9) I natingida rani a napa nyaka pa tungusapai ti gaani regbo re. Si naida aboro dunduko gbia gu zahe re mbata fu digido zegino da!Mt. 24:14.

^ genewaraga 6 Wa vura duhe nga, anga ndikidi gbagbahe du naadu ti kpakpuyo te, ngbatunga aboro wa Baruka (ga Yeremaya bakeapai), Ebede-mereke nangia boro Etiopia, na aRekaba, i aima bata. (Yere. 35:1-19; 39:15-18; 45:1-5) I aima gbia gu gbagbahe naarukuba bata.

^ genewaraga 12 Mbedimbedi aKristano aidanga na gbagbahe tipa ka bata te. Kuba gure, i nika gbia gayo yangara dikodikohe singia mbata fu i kpi watadu mbata fu bakere gberãngbi tona.Yugo. 7:1, 3.