“Nivu akuaroni.”KORO. 3:13.

ABIA: 53, 28

1, 2. Wai du Ziazia Kekeapai afura ku mbatayo tipa pa nge ga Yekova aboro?

GA Yekova ruru amoyambu du auru kpotosende nga gako aDezire, i rogo gu riigbu du kia nirengo. Rengo ngaha nga, si na agu aboro rogoho du ni kpakpayo na du na aingahe tiyo. Ono wa vura duhe wo, ga Mbori ziazia toro aima digo nisa gako dungurati rogo zegino dunduko si sono na kini moipai kina ku mbatayo. Oni bingo bete gu iˈiriwoapai Yekova aima digo nimangihe na gako aboro i ki vura ngia kpakpa aboro vurũ.

2 Ho yangara arame nga ga gi sino raka re atona ni rogo gu garã nangia 1914, ga Mbori amoyambu adu nikina wiri beteyo auru kpotosende ane. Ono Yekova afu maku kurii gayo sunge tungusapai. Vuru agu abawe agarã naangbefuo gure, amirioni vovo aboro awiriki gu rengo du rogo Ziazia Kekeapai na kida ni aDezire Yekova. Nirengo, Yekova aima fura kumbatayo tipa gi bakere sonakumbatayo re ki ya: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” (Yes. 60:22) Gu fugo sangbaanebi re ima da ti rengo ti gi yangara arame re. Rogo gi gene re, bange ga Mbori aboro auru kpotosende ima kio awere kisusi bange aboro rogo kura dungu aringara.

3. Wai du ga Mbori amoyambu nayugu nyemuse?

 3 Vuru agi aregbo re a, Yekova ima undo gako aboro i sonosi gu bangua sinoko nga nyemuse ni bakerehe. (1 Yo. 4:8) Yesu nawiriki ga Mbori nyemuse aya fu apefuoko wẽ: “Vovo rugute fu mi fu roni nga, oni kpi nyemu akuaroni akpi . . . Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) Gipai re aima du na nyanyakipaha gbe vuru agu agarã yo susi kusayo nga gu rikaaboro aaso kere avura dagbatiyo ti ni. Ni kpiapai, i aimi aboro wa amirioni 55 ti regbo gu Ue Vura Nga ga Zegino nisaha. Ono tie, aDezire Yekova aarimisongo tiyo ku rogo gu imo aboro naamangi rogo zegino dunduko re te. (Oni gedi Mika 4:1, 3.) Si aima undoyo ka i “adia nga bape kure boro wa sa” ya.Amo. 20:26.

4. Tipagine si nairiwo ti ni nga ga Mbori aboro nange kina ku mbatayo?

4 Gu sonakumbatayo nga ga ga Mbori aboro namanga rogo gu zegino du na kere sogote rogoho, nga gu Ziazia Kekeapai aya tipaha Satana nga bazogoho na ni “mbori gi zegino re.” (2 Kor. 4:4) Ko namangapai na agu aboro nga ga birĩ zogarago yo gbiati agu aũgbandaka pangbanga nga ga zegino. Ono ko arengbanga ka rugusa sunge tungusa wene pangbanga te. Ono tie, wa Satana nainihe nga kina bete regbo nye fuko, ko naasada ka aria aboro kusayo ti ndikidi irisombori, na ko namanga ngbatunga apai dũ tipa ka mangaha wo.Yugo. 12:12.

ASADA PADU NIRURU RANI

5. Tipagine rengbe kura aboro ka imisa rani ti ni ti gu kura aregbo? (Oni bi gu sura du ti tonatonaha.)

5 Gu dungurati nga ga aKristano nanyakasapa kpinyemu Mbori na ka kpinyemu kura aboro. Yesu ayugu gupai nga wodu si aida si du. Ho ko akaragapai ni kuti gu sanahe naadu tipa gu rugute nga bakumbaha, ko aya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro.” (Mt. 22:35-39) Wa vura duhe wo, Ziazia Kekeapai ima yugo gupai ziazia nga ani dunduko i avungu rani ni kpakpa aboro mbiko ga Adamu ingapai. (Oni gedi ARomo 5:12, 19.) Ti kura aregbo, kura aboro rogo dungurati ima rengba ka imisa rani na gupai i agumbaha watadu mangaha. Gipai re ima rengba ka asada gaani nyemuse tipa Yekova na tipa gako aboro. Ginipai rengbe ani ka mangaha ti gu ngbatunga aregbo re? Zavura gu ga Mbori ruru amoyambu naadu bakuru kusayo i aima gumba agu apai watadu manga agu apai naimisi akurayo, na ani rengbe arengba ka wirikapai ti gupai Ziazia Kekeapai ayugoho tipa gipai re.

Ka mo araki Yisaraere yo tirago Eri na awiriko, wai du ka mo amangipai? (Oni bi genewaraga 6)

6. Rogo gini gene du Eri azanga ruga awiriko?

6 Ni kpiapai, gu Gbiamotumo nangia Eri adu na awiriko ue nga aguyo naairisongo ga Yekova andiko ya. Ani nageda gupai nga: “Awiri Eri adu wa awiri gbegberẽ sino aboro; i aberã nga pa Yekova te.” (1 Sam. 2:12) Wa vura duhe nga bayo aamanga nyanyakipa sunge tipa ka sonosa ndikidi irisombori si ndu ku mbatayo, agu awiriko ue re amangi kere ingapai. Eri aima inopai tipa gipai re na si aaida ko fu mbusa fuyo, ono ko aabihe taata. Nisangbanaha, Mbori aye na kere sarangbanga kurii gu ngbadimokporo nga ga Eri. (1 Sam. 3:10-14) Fuo bete regbo kusa, si adu nga atita ko amanganga sunge berewe ni agbiamotumo te. Ka mo aaraka ti rago Eri, ginipai ka mo amangihe tipa pa mbu Eri awiriko i naamanga ingapai? Ya mo ka mo ambuhe si kotosi ro si ki da nga mo amanganga sunge berewe fu Mbori te?

7. Wai du Davide aingipai nikerehe, na ginipai Mbori amangihe tipaha?

7 Yekova aima kpinyemu Davide, na “ngbaduko [Yekova] aida” na ko. (1 Sam. 13: 13, 14; Amo. 13:22) Ono kusa, Davide amangi bäri na Bataseba, na ri kidu na vuse fuko. Gipai re amangi ho kumbari nangia Uria adu ni bavura yo. Ho ko ayeni ku kporo tipa wiri bete regbo, Davide aasadi ka sa ko ko kodiba na Bataseba tipa wa ka si angera nga Uria du nangia ba gu gude re. Uria aka ka manga gupai bakindo Davide agumbaha, sidu Davide ki mangi mbakadapai tipa i imiko bavura yo. Davide aima tumo nikerehe tipa gako ingapai, gberãngo ati kuriko na gako aborokporo. (2 Sam. 12:9-12) Ono wa si avura duwo, Mbori ayugu inapai fu gi kumba naata barangba Yekova ‘na rengo kpotoko yo’ re. (1 Aba. 9:4) Ka mo araki dagba ga Mbori aboro ti gu regbo re, wai du ka mo amangipai? Ya mo ka ga Davide iraira mangaapai akotosi ro?

8. (a) Wai du gu mokedi nangia Petero azanga mangaapai kuti afugoko? (b) Tingbafuo ga Petero ingahe, tipagine du Yekova aamangasunge ti ni kindi na ko?

8 Gu kura kpiapai du rogo Ziazia Kekeapai yo nga gu nga ga gu mokedi nangia Petero. Yesu asiako ni boro sa dagba gako amokedi yo; wa si avura duwo, ti gu kura aregbo, Petero anaagumba gupai watadu manga gupai ko anibira tiko abira ti ni kusa. Ni kpiapai, ti kere regbo, amokedi ambu Yesu ki zubo patiko. Mbata kusayo, Petero aima gumba gupai nga ka kura aboro vura zubo pati Yesu ko azubongo te. (Mk. 14:27-31, 50) Wa si avura duwo, ho i azi Yesu ni, agu amokedi re dunduko kodihe na Petero azubo ki mbuko. Zavura Petero ki tikango bara dunguhe ya ko ainongo Yesu te. (Mk. 14:53, 54, 66-72) Ono tie, Petero ayugu gako saberã, na Yekova kini mangisunge kindi na ko. Ka mo angia bawiriki ti gu regbo re, ya mo ka ga Petero mangaapai aˈaria gamo padu niruruse koyo du Yekova ni?

9. Tipagine du du mo ti ni na kido nga Mbori namanga kina rurupai ti aregbo dũ?

9 Agu akpiapai ani nabihe kuari re nga bete akpiapai nga ga ga agu aboro namangi agu apai naimisi akurayo. Dungu akpiapai kinaho naamangi dungu kama agarã kusayo na gu mangi barambeda ani naima rengba ka fura tipaha, nga ga gu kura aboro namangisunge fu Yekova na ki mangi kere ingapai si  ki imisi kura aboro. Gu memepai duho nga, wai du mo nika mangapai? Ya mo mo ambu gayo aingahe si kotosi ro, si ki saro mo mbu Yekova na gako aboro, kodihe na aguyo du rogo gamo dungurati? Ya mo mo rengbe ka ida kuti gupai nga Yekova ima rengba ka mbu regbo fu gu boro re ni saberã na ko nika mbakada gu gbegberẽpai re niyangaraha na ki mangipai ngba ruru gene? Tipa agu aboro tigayo namanga kere ingapai, ti gu kura aregbo i naka ga Yekova inapai na ki zanga saberãyo. Ti ngbatunga regbo wagure, ya mo mo adu na kido nga Yekova nika sapangbanga gu boro namanga irairapai re asapa kusa, isoke ki kusini kusayo rogo dungurati?

MO NYE NI RURURO

10. Ginipai Yesu ainihe tipa agu aingahe nangia ga Yuda Keriota gbiati Petero?

10 Ziazia Kekeapai na apangbanga rogoho tipa ga Mbori amoyambu nga aguyo naanye niruruyo fu Yekova na fu gako aboro si ki vura du vurũ nga agu aboro naadu patiyo aamanga kere gbegberẽ apai vurũ. Ni kpiapai, tingbafuo Yesu kpari fu Bako yuru sasasa, ko asia agu amokedi naadu 12. Yuda Keriota adu kina dagbayó. Ho Yuda akusi pako ni kusa, Kristo aambunga gu samungu re si gberesi gako pagume na Bako nga Yekova te; Yesu aambunga pa ti Petero kango nga ko ainongo ko te si gberesi gako pagume na Bako a te. (Rk. 6:12-16; 22:2-6, 31, 32) Yesu aima inoho nga agu amangapai re aangianga ga Yekova ingahe watadu ga gako aboro naabayo dunduko te. Yesu andu kumbatayo na gako wene sunge si ki vura du vurũ nga kura apefuoko aba gberãrago tiko. Yekova afu mosoro fuko nizingisa ko bekpio, rogo gi gene re, si ki zaki gene fu Yesu ko da ni Bakindo gu Kindo nga ga ngbangbaturũ.Mt. 28:7, 18-20.

11. Ginipai Ziazia Kekeapai agumbaha nga si nika manga tipa ga Yekova aboro areme?

11 Ga Yesu kido kuti Yekova gbiati gako aboro adu na wene nduhe ti ni na si kindi a. Nirengo, ho ani abi agu apai ni Yekova amangaha vurube gako amoyambu rogo gi yangara arame re, kina iriwo rago nazio rani. Kura aboro ho natungusa rengo rogo zegino dunduko te, mbiko Yekova angbenga mbatayo fuyo wagu ko amangaha fu gako dungurati du nikodikodihe areme te. Yesaya 65:14 nafura tipa wai du ga Mbori aboro areme rogo toro yo, si naya: “Oni ngère, gimi amoyambu abì bia mbiko ngbarago kpotoyo yo.”

12. Wai du si aida ani bi agu aingahe nga ga kura aboro?

12 Ga Yekova amoyambu na ngbarago tipa gu wene apai i na rengbe ka mangaha, mbiko ko du nanungusa yo. Ono tipa gu zegino tigaha du tiibe Satana, si nauko auko, mbiko apai nagbera kina ku mbatayo. Si arengbanga kadu ni patatamana ka bira Yekova watadu gako dungurati tipa agu aingahe bete gako amoyambu amangaha te. Si naida ani bandapa du niruru rani fu Yekova na gako ambakadapai, na ki wiriki wai ka bi agu aingahe nga ga kura aboro watadu ka mangapai kutini.

WAI KA MANGAPAI KUTI GA ABORO AINGAHE

13, 14. (a) Tipagine du si aida ani du ti ni na zerangbaduse na akuarani? (b) Gini kidohe si aida ani tingidihe?

13 Wai du tie rengbe ani ka mangapai kasi du nga boro dagba ga Mbori amoyambu yo pe gupai watadu mangi gupai imisi rani? Gu rugute du rogo Ziazia Kekeapai yo nga: “Ka mo gbá nga sa zinga ya; bambiko nye zinga anye ku kpoto airamungo yo.” (Batu. 7:9) Si naida ani ini gupai nga agarã ima susa awere nga 6,000 wa i adi rengba tirani nga aboro kusayo ati Edene yo. Si taata fu kpakpa aboro i mangi ingahe. Sidu tie, si angbanga ani berẽ gupai nga si naida awirinarani aidipase mangipai ki gbaagba riihe te na ka mbu gayo aingahe si gbarasipa gu ngbarago ani agbiaha  mbiko du ani nipapara ga Mbori aboro ti gi yangara arame re a te. Gu kere ingahe rengbe ani ka mangaha nga ka mbu gu ingahe nga ga kura aboro si kotosi rani na ki sa rani ani mbu ga Yekova riigbu. Ka pai mangi wagure, ani zanganga kina gu momu sa nga ka manga ga Mbori pai te ono gu maabangirise a nga ka raka rogo ga Mbori vovo zegino.

14 Tipa ka banda gaani bakere ngbarago na gaani nyanyaki maabangirise, si naida ani berẽkurii gu ga Yekova kidohe nafu wasa nga: “Oni ngére, mi mangi vovo angbangbaturũ na vovo kpotosende a; i atíngida nga pa gu bambata apai te si ayé nga ku berãyo yo a te.” (Yes. 65:17; 2 Pet. 3:13) Ka mo mbunga agu aingahe nga ga kura aboro si ka na mo ti dia agu amaku re ya.

15. Ginipai Yesu aya si naida ani mangihe ho kura aboro ainga ni kuti rani?

15 Ono tie, wa duhe nga ani ata da nga rogo vovo zegino te, si naida ani ini ga Mbori aberãpai nibipa wai ka mangapai ho kura aboro agumba gupai ni watadu amanga gupai ni imisi rani. Ni kpiapai, bangua rengo sa si aida ani tingidihe nga gu Yesu agumbaha nga: “Ka oni vu aboro ti gayo ingaapai, Baroni du ngbangbaturũ yo ko avú roni ti gaoni ingaapai. Ono ka oni avu nga aboro ti gayo ingaapai ya, Baroni avú nga roni ti gaoni ingaapai a te.” Oni tingidi gupai a nga, ho Petero asanahe ni singia si naida ani vu aboro “bara saba,” Yesu akarapai nga: “Mi aya nga foro bara saba te; ono, Bara saba bawe bara saba.” Si tie ziazia nga, gupai Yesu aagumbaha nga si naida ani du na nyemu ka vu aboro ti aregbo dũ; si nga gu bambatapai na gu banguapai si aida ani mangihe.Mt. 6:14, 15; 18:21, 22.

16. Gini wene kpiapai Yosefa amoihe?

16 Yosefa nangia wiri Yakobo na Raere amoi wene kpiapai nga ga wai ka mbupa aingahe. Awiribako bawe anaakpiko mbiko bako aima ida na ko. Sidu, i abagi Yosefa ni kanga. Tingbafuo dungu agarã, ga Yosefa wene fuo sunge Ezipeta yo asako ko da ni ue kikiipa boro fuo bazogo gu ringara re. Ho ngbongi ati ni kurii gu ringara awiribako adu rogoho, i andu ku Ezipeta yo ka ngbe riahe ono ka i ainongo ko ya. Yosefa aima rengba ka mangasunge na gako pagbia ka irobape gu gbegberẽpai awiribako amangiko na ni re. Kuba gure, ko aasadi awiribako ka bihe singia i ima aria sinoyo. Ho Yosefa abihe ni nga awiribako aima aria sinoyo nzunzu, ko ayugu tiko fuyo. Ko aya kusa wẽ: “Si du ka oni agúnde nga ti ni ya; mi abánda roni na rukutu awironi.” Gu pangbanga nga ga Ziazia Kekeapai re nape kurapai nga: “Ko ki ngarãsi yo, ki nifura na yo besemene.”Bam. P. 50:21.

17. Ginipai mo nadiberã ka mangaha ho kura aboro ainga ni kuti ro?

17 Si a nipatatamana ka tingida gupai nga wadu ani dunduko na aingahe tirani, ani ima rengba ka imisa akuarani. Ka ani bi gupai nga ani ima mangaha wo, Ziazia Kekeapai naruga rani nga ani ndu fuo gu boro ani naingi kuti ni re na ki asadi ka mbakada gupai re. (Oni gedi Matayo 5:23, 24.) Ani nidu na ngbarago ho aboro aziongo pa gaani aingahe ni kutirani ya, sidu, si naida ani nimangihe kinawo fuyo a. AKorosaio 3:13 nangarasa rani nga: “Nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.” 1 AKorindo 13:5 nape gupai nga gu nyemuse nga ga aKristano “aberã nga gbegberẽpai kuti boro te.” Ka ani ambupai fu kura aboro, Yekova nika mbupai ambu furani a. Nirengo, ho daha ni ti mangapai kuti agu aingahe nga ga kura aboro, gupai si aida Kristano mangihe nga ka wirika wai gu Barani nga boro inapai amangapai na ani ho ani ainga ni kutiko.Oni gedi Atambuahe 103:12-14.