“Ga ngbarago dú rogo Yekova yo a, ko afú agu ahe foro du nyemu he kpotoro yo”—TAM. 37:4.

ABIA: 11, 44

1. Ginipai si aida paranga boro diberã tipaha kumbatayo, ono tipagine si aidanga boro bakibangirini ti ni ni kerehe ya? (Oni bi gu sura duti tonatonaha.)

PARANGA aboro, oni ima rengba ka ida kuti gupai nga mbata fu oni tona nunguro, si ni patatamana ka sogima gu ba oni nika ndu ku rogoho. Raka wakina nunguro, gu regbo si aida oni sogima gu ba oni aida ka ndu ku rogoho nga gu regbo du oni ni paranga roni. Rengo ngaha nga, taatapai ngaha ka sogimapai te. Degude du rimori nga Heather aya: “Si naba kina gunde ti boro. Mo nadiaberã tipa gupai mo nika mangaha na gamo raka dunduko.” Ono si naida mo du na wingbaduse. Yekova nagumba gupai fu gako aboro nga: “Ka mo kío nga ya, mbiko mi nga ga Mbori; mi anyákasa ro, mi aúnda ro.”—Yes. 41:10.

2. Wai du mo aino gupai nga Yekova naida mo sogima gu raka kumbatayo du na ngbarago?

2 Yekova nazungodi ro nga mo sogima gamo raka kumbatayo na tatamana. (Batu. 12:1; Mt. 6:20) Ko naida mo du na ngbarago. Mo naino gipai re ti gu kusikusiahe du na wene bibihe, wene aworo ho gbiati wene hiaha. Mo berẽnga pa wai a ko angerafuo rani na kini yugu wene gene raka furani. Yekova nagumba gupai fu agu aboro naká gako rugute nga: “Oni . . . sia gu pai rago angba nga ti re be he ya. . . . Oni ngére, gimi amoyambu angi, ono oni adù na zee; Oni ngère, gimi amoyambu abì bia mbiko ngbarago kpotoyo yo.” (Yes. 65:12-14) Yekova  nagbia taarimo ho gako aboro amanga wene asiapai ni rogo raka yo.—Snz. 27:11.

GU SOGIMA APAI NIKA SA RO MO DU NA NGBARAGO

3. Ginipai Yekova aida mo mangihe?

3 Gini apai Yekova aida mo sogimaha? Ko akusi aboro i gbia ngbarago ti inoko na mangasunge fuko ni ruruyo. (Tam. 128:1; Mt. 5:3) Gipai re na bakere kparakparapai dagbaha na wai ko akusi anya, nga agura narengba kina be riahe, mbirahe, na vunga awiira. Mbori naida mo gbia ngbarago ti so mo gima agu apai susi agu apai anya arengba behe. Bakusiro nga “Mbori . . . nyemuse,” “nga ga zereda ko a,” nga guko nakusi aboro “ni kpiako.” (2 Kor. 13:11; 1 Tim. 1:11; Bam. P. 1:27) Mo nika du na ngbarago ho mo awirika gaani Mbori nga ga nyemuse ko ni. Ya mo mo abingo rengo gu veresi nga gu naya: “Fu he ngba ti dia ha” watadu gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi? (Amo. 20:35) Gure nga gu bangua rengo du tipa ga aboro raka. Sidu tie, gupai Yekova aidaha nga, agu apai mo asogimaha, si du tipa ka yugo gamo nyemuse fu kura aboro na fu Mbori.—Oni gedi Matayo 22:36-39.

4, 5. Gine naana sa ngbarago ti Yesu?

4 Paranga aboro, Yesu amoi wene kpiapai furoni. Ho ko angia gude ni, kango ti ni te nga ko anaangi mbaro angi na kini gbia ngbarago. Fugo Mbori nagumba gupai nga “rago mongo . . . na rago dogbere” kina ti ni. (Batu. 3:4) Yesu ambedi na Yekova a ni wisigo ko Ziazia Kekeapai. Ho garãko adu ni 12, ngba agu abayugupai naadu yekaru yo azere be “gako rugatinapai . . . na gako karagapai” tipa agu apai nga ga toro.—Rk. 2:42, 46, 47.

5 Yesu asono ki da ni gu sosono boro naadu na ngbarago. Gine naasa ngbarago tiko? Ko aima ino gupai nga pai sa dagba agu apai yo Mbori aaida beko nga ko “tungusi wene pangbanga fu rungorungo aboro . . . na pa hahasa bangiri airavurari.” (Rk. 4:18) Gupai naana sa ngbarago ti Yesu angia manga gupai Mbori aaidaha beko. Atambuahe 40:8 nayugopa wai du ko ki ya: “Ako gi Mbori, rago ngba ti re ka amanga gu pai ngba angba ti ro.” Yesu anaagbia ngbarago ti yugopai fu aboro tipa Bako du ngbangbaturũ yo. (Oni gedi Ruka 10:21.) Bara sa tingbafuo Yesu yugupai fu dee sa tipa ndikidi irisombori, ko aya fu gako abawiriki wẽ: “Gi riahe nga manga kina gu pai gu ko akpi nyemu he nakedi re, mi nyasi gako sunge.” (Yo. 4:31-34) Yugo nyemuse fu Mbori na fu kura aboro angia gupai naasa ngbarago ti Yesu. Si ima rengba ka sa ngbarago tiro a.

6. Tipagine ngbaha angba ti ni mo saki gupai na gu Kristano du na inohe mo asogimaha?

6 Badungu aKristano aima gbia ngbarago mbuyo ni paranga aboro ti sunge abazakigene. Si adu ni wenepai ka mo saki gupai na yo mo asogimaha. “Yo adu nga rugapai ni ya, apai yo na kina gberãrago, ono bambiko rimbasa aboro rondo apai ni nyakasinyakasi he wenengaĩ.” (Snz. 15:22) Gu ngbatunga nyanyaki aboro rogo toro yo re rengbe ka pe gupai foro nga mangasunge Kindo ti aregbo dũ nafu gu yugopai foro nika undoro rogo gamo raka yo dunduko. Tingbafuo Yesu gbia arugapai be Bako ngbangbaturũ yo, ko andu kindi kumbatayo kaa wirikapai ti regbo gako sunge tungusapai auru kpotosende no. Ni kpiapai, ko awiriki pa gu ngbarago duti zio ngbadu aboro yo na wene pangbanga na berewe a gu ngbarago duti kakuti padu ni ruruse ti regbo asada. (Oni gedi Yesaya 50:4; Eb. 5:8; 12:2) Ani bingo agu asunge nga ga Kindo ti aregbo dũ nga gu rengbe mo ka gbia ngbarago ti ni.

GU NDUPAI DU AGU ABORO NASA ABORO NI ABAWIRIKI TI NI NA DIABESE

7. Tipagine badungu paranga aboro agbia ngbarago ti ni ti sunge sa aboro ni abawiriki?

7 Yesu aya: “Oni ndú . . . ki sa arikaaboro dunduko ni abawiriki, . . . ki nirugu yo.” (Mt. 28:19, 20) Ka mo sogimapai kadu ni gu boro nasa aboro ni abawiriki, gure nga mo nasia gu sunge nga gu nafu ngbarago kisusi, nga gu nafu taarimo fu Mbori. Kina wai duhe tipa asunge dunduko, si naida mo di regbo adia ka ino mangaha wenengai. Barambeda kusayo, wirina du rimoko nga Timothy nga guko naatona sunge  abazakigene mbuko kindi ni paranga gude aya: “Mangasunge fu Yekova ti aregbo dũ ima ngba tire mbiko si nga gu gene mi ayugo gimi nyemuse fuko ngbaha. Ti tonatonaha, mi aarengbanga ka tona wisigo Ziazia Kekeapai na boro te, ono kusa, mi ki ga ku rogo kura dagbarago, kina vuru diwi yo sa, mi atona ka wisigo Ziazia Kekeapai na badungu aboro. Guni sa atona ka ye ku Bambu Kindo yo. Tingbafuo mi ndu tipa Gu Sukuru Du Tipa Raba Abakuparanga na Ziazia Kekeapai * nga gu naadu tipa diwi ue, i akedi re ku rogo kura vovo dagbarago na mi ki tona wisigo Ziazia Kekeapai na aboro yo nga biama. Mi ima kpinyemu yugopai fu aboro, mbiko mi nabi wai abi ziazia toro aʹaria yo.”—1 Tesa. 2:19.

8. Wai du kura aKristano namangi sunge sa aboro ni abawiriki wenengai?

8 Kura paranga aKristano ima wirika kura afugo. Ni kpiapai, Jacob du Amerika ku Nodiyo akepai nga: “Ho garãre adu ni nga saba, badungu agu agude ani adu na yo rogo riko sukuru yo angia aboro Vietnam. Mi aaida ka pepa Yekova fuyo, sidu tingbafuo bete regbo, mi asogima wirika gayo fugo. Gupai gbe mi anaamangaha ka wirika gu fugo re angia ringbisa gu Ngbaõbambu Sinziri nga ga pa-Ingirisi na gu nga ga pa aboro Vietnam. Mi azi bakure a na agu aboro naadu rogo gu dungurati nga ga pa aboro Vietnam nga gu naadu mbembedi. Ho garãre ada ni nga 18, mi atona sunge abazakigene. Kusa, mi andu tipa Gu Sukuru Du Tipa Raba Abakuparanga na Ziazia Kekeapai. Si aundo re na gu sunge abazakigene mi amangaha awere rogo gu badona nga ga pa aboro Vietnam nga gu du kina re yo ni bakumba. Badungu aboro Vietnam ngbayo azera nga mi ima ino gayo fugo. I naayamba re na dedede mi kini wisigi Ziazia Kekeapai na yo. Agu akurayo ima manga sonakumbatayo ki zi bapatiza.”—Oni ringbisihe na Amokedi 2:7, 8.

9. Wai du sunge sa aboro ni abawiriki afu wene yugopai?

9 Sunge sa aboro ni abawiriki nitihe nga yugopai nga gu nayugopai foro tipa wene asino mangasunge, agu abirĩ nga ga fugodagbase, du na wingbaduse, gbiati mangaapai rogo birĩ yo. (Snz. 21:5; 2 Tim. 2:24) Ono sunge sa aboro ni abawiriki nafu bakere ngbarago gbe mbiko si naundo ro mo inidi tiro gbe na agu apai gamo idapase aru kuriihe nga gu du mburuhe rii Ziazia Kekeapai. Mo nawirika wai a ka mangasunge mbembedi na Yekova.—1 Kor. 3:9.

10. Wai du rengbe mo ka gbia gu ngbarago du ti sunge sa aboro ni abawiriki zavura rogo gu dagbarago du ni kpakarakpakaraha?

10 Mo ima rengba ka gbia ngbarago ti sa aboro ni abawiriki ka si vura du vurũ nga kina bete aboro rogo gamo dagbarago nadia wene pangbanga kugume. Sunge sa aboro ni abawiriki nga gu sunge aboro akoda beyo akoda kutini. Dungurati dũ nagbata agu aboro du na nyemu rengo tiyo. Wa vura duhe nga kina wirina sa rengbe ka gbia gu boro nga guni nada ni bawiriki niyangaraha, aboro dunduko naima koda beyo ka gbata ni na i dunduko nagbia gu ngbarago re. Ni kpiapai, Brandon adi agarã ribua kuti sunge abazakigene rogo gu dagbarago aboro aadianga rengo rogoho kugume ya. Ko aya: “Mi ima kpinyemu tungusa wene pangbanga mbiko si nga gu sunge Yekova aida ani mangihe. Mi atona sunge abazakigene ngbutuko fuo nyasa mi sukuru. Mi nagbia bakere ngbarago ti ngarasa gu paranga awirina du rogo gaani dungurati na ho mi abiyo ni i nisono kumbatayo rogo toro yo. Tingbafuo mi ndu tipa Gu Sukuru Du Tipa Raba Abakuparanga na Ziazia Kekeapai, i akedi re ku rogo kura dagbarago. Rengo du tigu nga mi agbianga boro rogo gu dagbarago re nga guni mangi sonakumbatayo ki zi bapatiza te, ono kura awirina ima gbiayo. Mi na ngbarago nga mi aima sogima mangasunge sa aboro ni abawiriki.”—Batu. 11:6.

GU BA RENGBE AGU APAI MO ASOGIMAHA KA NDU NA MO KU ROGO

11. Gini ngbatunga ziazia sunge badungu paranga aboro nagbia ngbarago ti ni?

11 Badungu amomu duho ka mangasunge fu Yekova. Ni kpiapai, badungu paranga aboro nafutiyo ka undo sunge meka abambu. Akama aBambu Kindo duho si aida i meke he. Sunge  meka agu abambu re nga ziazia sunge nga gu nafu taarimo fu Mbori na si rengbe ka sa ngbarago tiro. A wa duhe tipa gu kura ngbatunga ziazia asunge, mo nagbia bakere ngbarago ti koda tiro na agu awirina mo amangasunge na yo. Agu asunge meka abambu gaani riigbu amangaha, si nitihe nga kina yugopai a, si nayugo wai foro ka banda tiro basunge yo, ka mangasunge zanga nyomoro, na ka kodabee na agu aboro nangerakurii apai.

Badungu amaku napido agu aboro namangasunge Kindo ti aregbo dũ (Oni bi genewaraga 11-13)

12. Wai du rengbe sunge abazakigene ka zakagene tipa kura amomu?

12 Wirina du rimoko nga Kevin aya: “Naatona kinaho mi adu ni nga wiri tooni kumbagude, mi aima du na nyemu ka mangasunge fu Yekova ti ngba sunge Kindo ti aregbo dũ. Niyangaraha, mi atona sunge abazakigene ho garãre adu ni nga 19. Mi anaangera fuo tire ni manga mi sunge tipa bete regbo fu wirina nangia bameke abambu. Mi awiriki wai ka banga rii bambu, bangiri abambu, gbiati angbadimo. Kusa, mi amangi garã ue na gu badona naafu undo ti regbo bakere bavugumo, nga gu badona naameka agu aBambu Kindo gbiati agu akporo nga ga awirina nagberẽ. Ho mi agi pa gu zingo ni naadu tipa abameke abambu South Africa yo, mi afu tire na i ki yambu re koyo. Afirika no, ani nameka aBambu Kindo kina ti mburu kuraha vuru bete aposo yo. Gu badona nga ga meka abambu du mi rogoho wakina boro gimi ngbadimokporo. Ani naraka kina sa, kini wisigi Ziazia Kekeapai kina sa, na kini mangisunge kina sa. Mi naagbia ngbarago berewe a ti tungusapai na agu awirina du rogo gu dagbarago du mi rogoho na aposo dũ. Agu apai mi asogimaha mbure ni tooni kumbagude, ima fu gu bakere ngbarago fere mi aainongo nga mi agbiaha ya.”

13. Wai du sunge Betere afu ngbarago fu paranga aboro?

13 Kura agu aboro nga aguyo namangi gupai i asogimaha ka mangasunge fu Yekova tingba sunge Kindo ti aregbo dũ awere namangasunge Betere yo. Sunge Betere nga gu gene raka naye na ngbarago mbiko agu apai dunduko mo amangaha yo, si fu Yekova. Avuru Betere naundo  na fu gu riahe nga ga toro. Vuru Betere sa du rimoko nga Dustin aya: “Mi amoi gu sasa nga ga mangasunge Kindo ti aregbo dũ ho garãre adu ni nga ribua, na mi ki tona sunge abazakigene ho mi anyasi sukuru ni. Tingbafuo garã sa na beberehe, i ayambu re ku Betere yo, mi ki wiriki wai yo ka mangasunge na makana gbingbida awaraga na kusa, mi awiriki wai ka mbakada agu aringbisapai kompiuta amangasunge na ni. Betere no, mi nagbia ngbarago ni kerehe ti giapa gu sonakumbatayo namanga rogo sunge sa aboro ni abawiriki rogo zegino dunduko. Mangasunge ane ima ngba tire mbiko gu sunge ani amangaha ane naundo aboro i mbedi na Yekova.”

GINIPAI MO NIKA SOGIMAHA TIPA GAMO RAKA KUMBATAYO?

14. Wai du rengbe mo ka sogimapai ka tona mangasunge Kindo ti aregbo dũ?

14 Wai du rengbe mo ka sogima kadu ni gu Kristano namangasunge fu Mbori ti aregbo dũ? Gupai nyakipaha anyaka gbe nga agu asino nga ga toro nga gu rengbe ka undoro mo du na diabese tingba mangasunge fu Yekova. Sidu, si naida mo niwisigi Fugo Mbori zanga nyomoro, kini berẽkurii rogoyo dudunguro, na kini gbata gene ka yugo gamo idapase ti aregbo adunguratise. Vuru agu agarã yo du mo sukuru yo, mo ima rengba ka gbia inohe gbiati abirĩ nga ga tungusa wene pangbanga. Mo wiriki wai ka yugo nyemuse fu aboro ni sana mo yo rogo birĩ yo tipa gayo aberãpai na ki degeturo kuti gayo akaragapai. Kurapai berewe nga, mo rengbe ka fu tiro kaa manga apai rogo dungurati, wagu nga undo na sunge giriso Bambu Kindo na kini ngerefuoho. Yekova na ngbarago ka mangasunge na agu aboro du na gu toro nga ga umbasitise gbiati futise. (Oni gedi Atambuahe 110:3; Amo. 6:1-3) Gu mokedi nangia Pauro adi Timoteo kutingba sunge amokedi mbiko “awirina . . . agumba ruru pai kuti ko.”—Amo. 16:1-5.

15. Wai du rengbe mo ka mbakada tiro tipa kaa songoda raka ro?

15 Dedede, agu aboro namangasunge Kindo ti aregbo dũ, si naida pai duadu ho i amangaha si undo raka yo. (Amo. 18:2, 3) Isoke mo ima rengba ka manga wiri guru korosi nga ga sukuru nga gu rengbe ka saro mo rẽ ka manga gu sunge tipa bete regbo du zingo aboro tipaha rogo gu dagbarago du mo rogoho. Wa mo nikaa sogimapai, si naida mo fura afura na babi adungurati gbiati agu abazakigene du rogo gaoni badona adungurati. Mo sana yo tipa gu sunge ngba tipa abazakigene. Na a wa Ziazia Kekeapai agumbaha, “mo fu pa ga mangaapai kina ku be Yekova, gamo aberã adu ni nyakasinyakasi he.”—Snz. 16:3; 20:18.

16. Wai du pa manga mo sunge fu Yekova ni bakerehe ho du mo ni ni paranga boro ambakada ro tipa kura atindiro kumbatayo?

16 Mo ima rengba kadu na gu kido nga Yekova naida gupai nga mo “nye anye” kadu na ngbarago rogo raka kumbatayo. (Oni gedi 1 Timoteo 6:18, 19.) Mangasunge Kindo ti aregbo dũ nasa gupai nga mo gbiatiro na gu kura aboro nga aguyo namangasunge Kindo ti aregbo dũ a na si nasa ro mo nyaki rogo toro yo wangia mo Kristano. Badungu aboro ima bi gupai nga mangasunge fu Yekova ni bakerehe mbuyo ni paranga aboro aima undoyo a i du na diabese rogo gayo rogatise yo. Dedede, agu aboro namangisunge abazakigene mbata fu rogatise aima ndu kumbatayo na ni tingbafuo mangayo rogatise.—Rom 16:3, 4.

17, 18. Wai du sogimapai akoda ngbaduroyo?

17 Sogimapai ni guhe nakoda ngbaduroyo. Atambuahe 20:4 naya tipa Yekova wẽ: “Ko fú gu pai foro kpotoro yo akpi nyemu he, ki nidigisi pa gamo berã pa apai dunduko!” Sidu, mo berãpa gupai mo aida ka mangaha na gamo raka. Mo makiapa gupai Yekova amangaha ti gi gaani regbo re na wai rengbe mo ka fubee tipa gako sunge. Fuani, mo ki sogima manga gupai nika sa ngbarago tiko.

18 Mangasunge fu Yekova ni bakere nika ye na bakere ngbarago foro mbiko si nga gu gene raka naye na irisa fu Mbori. Nirengo, “ga ngbarago dú rogo Yekova yo a, ko afú agu ahe foro du nyemu he kpotoro yo.”—Tam. 37:4.

^ genewaraga 7 Gu Sukuru Du Tipa Abatungusipa Kindo aima diabaha.