Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Bamburu 2017

Oni Gbata Ndikidi Aũkumuko

Oni Gbata Ndikidi Aũkumuko

 Oni Gbata Ndikidi Aũkumuko

“Oni sá aboro ni abadiaroni ni gu ũkumuko nga gbegberẽ he.”—RK. 16:9.

ABIA: 32, 51

ONI RENGBE KA SAKA ROGOYO?

Wai rengbe ani ka mangasunge na aũzegino ka nyakasa gaani pagume na Mbori?

Wai rengbe ani ka ne du ni akanga nga ga gi zegino du na nyemu marã rogoho re?

Tipagine oni nadiberã ti ni ka gbata agu aũkumuko nga ga toro?

1, 2. Tipagine rungorungo aboro nika duadu kindi ti ni rogo gi zegino du awere re?

PA GBIA marã ima mbu areme, na anga aboro dunduko rengbe ka gbia marã te. Paranga aboro nagbata sunge marã agbata vurũ, ka i abingo ho ya. Badungu aboro namaa gayo raka ngba pai yo ka ga ku rogo agu aringara du ni kumukokumuko ho. Rungo ima du rogo arago dunduko, zavura rogo agu aringara du ni kumukokumuko a. Bakere kparakparapai du dagba du ni irakumuko na du ni irarungo. Ringbisihe kuti agu awisigopai i namangihe barambeda kusayo, kere airakumuko du nga sa rii kama nga ga agu aboro du auru kpotosende dunduko, gayo kumuko ima kio kisusi gu nga ga agu aboro du auru kpotosende dunduko. Wa vura duhe nga si ima mbu ka ino rengo gipai re nzunzu, boro ho rengbe ka ti kango gupai nga badungu abirioni aboro narungo, ono kura aboro kidu na bakere kumuko beyo nga gu rengbe ka undo yo rogo gayo raka yo naabaha te. Yesu aima inopa gi rengo re ni gumbako agu afugo nga: “Rungorungo aboro du na oni dedede.” (Mk. 14:7) Tipagine adunga apai ti ni kina sa tipa aboro ya?

2 Yesu aima rugatiko na gupai nga gi sino raka nga ga rungo re nika go sa kinaho ga Mbori Kindo nika ye ni. Aboro birĩ-zogarago gbiati abarumbatayo rogo pambori kodihe na gu sunge marã nga ga ngbaduse nga gu agu “ababagiahe” du rogo Yugoti 18:3 arukubaha, si nga papara ga Satana zegino. Ga Mbori aboro arengbanga ka kparatiyo nyasi koyo ti gu sunge marã nga ga ga Satana Zegino wa gu i  akparatiyo kusayo ti birĩ-zogarago gbiati ziree pambori te.

3. Gini asanahe ani nika sakapai tipaha?

3 Wangia ani aKristano, si naida ani wisigi gaani bipai tipa gu sunge marã nga ga gi zegino re ni sana ani tirani na asanahe wa agu nga: ‘Wai rengbe mi ka mangasunge na agu aũzegino du bere ka yugo gimi padu ni ruruse fu Mbori? Wai rengbe mi ka ne rimiso tire gbe ku rogo gu sunge marã nga ga gi zegino re? Gini apangbanga nayugo gupai nga ga Mbori aboro nakido kuti ko wenengai rogo gi kere zegino re?’

GU KPIAPAI NGA GA IRAIRA BURUKU

4, 5. (a) Gu buruku du pako rogo ga Yesu kpiapai, gini kpakaraapai ko agbiatiko na ni? (b) Gini rugute Yesu afuhe fu apefuoko?

4 Oni gedi Ruka 16:1-9. Gu ga Yesu kpiapai du tipa iraira buruku nasa boro ni berẽkuriipai. Tingbafuo i kitingbanga gu buruku re ya ko aamisiko ga bairako ahe, gu buruku re amangipai “ni tatamana” ni ‘sa ko aboro ni abadia ko’ tipa i undoko ho ko ka zanga gako sunge buruku ni. * Rengo ngaha nga, Yesu aangarasanga gako abawiriki nga i mangipai ngba iraira gene tipa ka gbia gene raka rogo gi zegino re te. Ko afura tipa gu mangaapai re ya si nga ga “awiri gi zegino re,” ono ko amangisunge na gu kpiapai re tipa ka yugo nyanyakipa pai.

5 Yesu aima ino gupai nga wakina gu buruku naadu rogo kpakaraapai re, badungu apefuoko nikaa gbata gene raka kina rogo gi gbegberẽ zegino nga ga sunge marã re. Sidu, ko angarasiyo nga: “Oni sá aboro ni abadiaroni ni gu ũkumuko nga gbegberẽ he; ya ho si ka paya ni, i [aYekova na Yesu] adía roni ku gume rogo gayo nyenye rago.” Ginipai rengbe ani ka wirikaha ti gu ga Yesu rugute re?

6. Wai du ani ainoho nga gupai nga ga bagaahe du areme aangianga papara ga Mbori ringbisapai te?

6 Wa vura duhe nga Yesu aapenga gu ndupai ko ayambu aũkumuko ti ni nga “gbegberẽ he” te, Ziazia Kekeapai ima maaha kpadio nga sunge bagaahe aangianga papara ga Mbori ringbisapai te. Yekova afu agu ahe kpaima fu aAdamu na Eva i aaidaha Edene yo. (Bam. P. 2:15, 16) Kusa, ho ziazia toro aamangasunge ni na gu dungurati nga ga mbedimbedi aKristano naadu rogo bambata sa kama agarã, “a nga boro sa naya guhe sa dagba agu ahe nadu be ni, gani nga hate; ono si du adu ni gayo dunduko.” (Amo. 4:32) Gu nebi nangia Yesaya afura tipa gu regbo aboro dunduko nika gbia ngbarago ti agu ahe nga ga kpotosende zanga tumo tipaha. (Yes. 25:6-9; 65:21, 22) Ono wa du rago re, si naida apefuo Yesu du na “tatamana” tipa ka gbata gene raka ni mangayo sunge na gu “ũkumuko nga gbegberẽ he” nga ga gi zegino re baraho i agbata gene ni ka sa ngbarago ti Mbori.

WENE MANGASUNGE NA AGU AŨKUMUKO NGA GBEGBERE HE

7. Gini rugute du rogo Ruka 16:10-13?

7 Oni gedi Ruka 16:10-13. Gu buruku du pako rogo ga Yesu kpiapai asa aboro ni abakureako tipa gupai nga ka gbia undo tipa tiko. Ono tie, Yesu angarasi apefuoko nga i sa agu aboro du ngbangbaturũ yo ni abakureayo angianga tipa kina guhe i nika gbiaha tipa tiyo ya. Gu veresi ngbefuo gu kpiapai re narigisa mangasunge na “gu ũkumuko nga gbegberẽ he” kuti du ni ruruse fu Mbori. Gu memepai Yesu aaida ka gumbaha nga ani rengbe ka ‘manga wenengai’ na agu aũkumuko re bara sa ani nagbiaha. Wai du rengbe ani ka mangaha wo?

8, 9. Oni funga akpiapai nga ga wai kura aboro ayugo gayo padu ni ruruse ni mangayo sunge na gu ũkumuko nga gbegberẽ he.

8 Gu gene rengbe ani ka manga wenengai watadu ka yugo gaani padu ni ruruse ngbaha na agu aũborose du berani nga ka fu marã tipa gu sunge tungusapai namanga rogo zegino dunduko nga gu Yesu afura tipaha kumbatayo ya si nika manga. (Mt. 24:14) Tooni degude India yo  adu na tooni sanduki marã nga gu ri aadungura marã ku rogoho yeeye, zavura ki mbu ngbeka aũmbaro nga ga agude tipa ka dungura gu marã re. Ho gu sanduki re ahi ni, ri afu gu marã re tipa si undo na sunge tungusapai. Wirina India yo nga guko du na ati gu zuzungua du wa akua afu bakere gamahe nga ga gu zuzungua re ku rogo gu basunge safugo nga ga gu fugo nga Malayalam, kini berẽ gupai nga wadu he nga si naaida i ni ngbe gu zuzungua re ku rogo gu basunge re, pa ye ko na kina boro gu zuzungua re ngba kisusi gu ka ko naaye na bangiri marã. Gure nga tatamana rogo mangimangipai yo. Wakina gure a, agu awirina du ringara aGiriki yo ninaagama agu ahe dedede nga nzeme, kutokuto kputakputa mamunyaa, gbiati gu kura ariahe fu avuru Betere.

9 Wirina Sri Lanka yo nga guko naraka awere gii ngbii yo ambu gako dagbangua Sri Lanka yo i nimangi adunguratise gbiati bakere adunguratise rogoho na agu aboro namangasunge Kindo ti aregbo dunduko i niraki rogoho. Gipai re ima sa gu wirina re ko mbupa gu marã ka ko naagbiaha ono si ki ima undo agu awirina ni bakerehe du rogo gu dagbarago re adunga gene beyo ya. Rogo agu aringara irangbii naima rugusa gaani sunge tungusapai rogoho, awirina nasa akpuyo si du ni aBambu Kindo, gipai re kini sa badungu abazakigene gbiati gu kura aboro adunga gene beyo ya i mangi dunguratise amanga zanga gu tindiro du kuriyo naida marã.

10. Gini amaku ani agbiaha ho ani agamahe ni esuesu?

10 Agu akpiapai susi re, nayugo wai ga Mbori aboro ‘amanga wenengãi na gu du ni toni he,’ du rogoyo nga wai i amangasunge na agu aũkumuko nga ga borose, nga gu du paha kusende ti agu aũkumuko nga ga toro. (Rk. 16:10) Wai du agu abakurea Yekova re abi gu ngbatunga agamahe i afuhe re? I ima ino gupai nga kaa gamahe nga gene sa ka gbia “ndikidi” aũkumuko. (Rk. 16:11) Wirina nga guri ninaafu bee dedede tipa gu sunge nga ga Kindo apepa agu amaku ri nagbiaha ki ya: “Mbiko gupai nga mi nagama ahe, wene apai ima manga fere vuru agu agarã yo susi. Mi ima bi gupai nga ho du mi ni na weneringise kaa gamahe, mi nadu a na weneringise koyo du kura aboro ni. Si ima sa re mi nimbupai gbe fu kura aboro, kidu na zerangbaduse fuyo, na kidu regerege ka dia rugute kugume na ka mangapai ni wenehe ho du mi ni rogo gberãrago.” Badungu aboro ima ye ka ino gupai nga, du na gu sino nga ga gamahe nakumukosi boro rogo toro yo.—Tam. 112:5; Snz. 22:9.

11. (a) Wai du pa fu ani gamahe esuesu ayugo “tatamana”? (b) Gini ngbatunga ringbisapai nga ga marã namanga dagba ga Mbori aboro? (Oni bi gu sura duti tonatonaha.)

11 Mangasunge na aũborose tipa ka songoda agu apai nga ga Kindo nayugo du na “tatamana” ngba gu kura gene. Si nambu gene furani ani mangisunge wenengai na agu ahe du berani ka undo kura aboro. Agu aboro duadu na agu aũkumuko nga ga gi zegino re beyo ono ka gene adunga beyo wa ka i mangisunge Kindo ti aregbo dũ watadu ka ndu ku gii ngbiiyo ya, i nagbia bakere ngbarago ti ino gupai nga gu marã i afuhe nasongoda gu sunge tungusapai nga ga kura aboro. (Snz. 19:17) Agu agamahe aboro afuhe esuesu naundo na pa tinda awaraga na kini songodi sunge tungusapai rogo agu adagbarago du na kere rungo rogoho ono nga gu du na bakere sonakumbatayo rogo toro yo rogoho. Tipa dungu agarã, rogo agu aringara duwa Congo, Madagascar, gbiati Rwanda, dedede, si aaida awirina sia singia ka ngbe riahe tipa gayo  aborokporo watadu ka ngbe Ziazia Kekeapai, nga gu ti gu kura aregbo genoho anidu nga gu marã boro animangisunge ru tipa poso sa watadu diwi sa. Awere, mbiko agu agamahe badungu aboro afuhe na mbiko pa “ringbisa” yo gu marã du beyo, si ima sa ga Yekova riigbu si sa Ziazia Kekeapai na ki kparakaha fu aborokporo dunduko kodihe na agu aboro nawirika Ziazia Kekeapai nga aguyo du na gomoro rogo toro yo. (Oni 2 AKorindo 8:13-15.) Rogo gi gene re, ga Yekova pabakure nadu zanga tumo tipaha fu gu boro nagamahe gbiati guni nagbia gamahe.

ZANGA RIMISOTISE KUGOSE KU ROGO “PA GI UNGA RE”

12. Wai du Abarayama ayuguhe nga ko aakido kuti Mbori?

12 Gu kura gene rengbe ani ka sa Yekova ni bakurearani ngbaha nga ka umbasi wai ani arimiso tirani ku rogo gu pa bagaahe nga ga zegino na ka mangasunge na wai du apai tipa rani ka gbata “ndikidi” aũkumuko. Abarayama, nga gu kumba naadu na idapase bakuru kusayo, agisangba ki guari rogo gu kumukokumuko gbata nangia Ura tipa kaa raka rogo bamburoko na kaa mbakada gako pabakure na Yekova. (Eb. 11:8-10) Ko anaangera ti aregbo dunduko koyo du Mbori ni ni gu Boro nafu ndikidi kumuko, na ko aagbatanga aũkumuko nga gu ka yugu gupai nga ko akidongo kuti Mbori te te. (Bam. P. 14:22, 23) Yesu angarasi aboro nga i du na gu ngbatunga idapase re ho ko ape gupai ni fu kumukokumuko paranga kumba nga: “Ka mo kpi nyemu ka du ziazia, mo ndú, ki bagi agu ahe du be ro, ki gagamu he fu rungorungo aboro, mo akúmuko ngbangbaturũ yo; mo ki ye ka apeka re.” (Mt. 19:21) Gu kumba re aadunga na gu ngbatunga idapase naadu ti Abarayama te, ono kura aboro ima yugo ndikidi kido kuti Mbori.

13. (a) Gini rugute Pauro afuhe fu Timoteo? (b) Wai du rengbe ani ka mangapai kuti ga Pauro rugute areme?

13 Timoteo angia gu kumba naadu na idapase tiko. Tingbafuo Pauro yambu Timoteo nga “ga Kristo Yesu wene banzengere,” Pauro ape gupai fuko nga: “A nga banzengere navoda tini na pa gi unga re ho du ni ni ti ngba vura wa sa te; ni ngba bangiri gu ni nasia ni ni du ni banzengere.” (2 Tim. 2:3, 4) Agu apefuo Yesu du areme kodihe na agu abanzengere namangasunge Kindo ti aregbo dunduko nga aguyo bangeyo naima susa mirioni sa, namangapai kuti gu ga Pauro rugute re ringbisihe kuti wai du apai tipa yo. I nasovura kuti sosodahe nga ga agu aboro natakapande bagibagiahe gbiati gu sosodahe nga ga gu zegino du yo rogoho ni tingidayo gu rengo nga: “Gu ni nga badibape nga kanga fu bafubape.” (Snz. 22:7) Pai ho Satana aidaha kparakusayo ti gu nga ani gberesi gaani regbo na omerani dunduko kuti du ni akanga fu gi zegino nga ga sunge marã re te. Kura adiaberã kinaho rengbe ka sarani ani du na bape kurirani tipa dungu agarã. Pa fu boro kpuni ni ngbanga, agu abape agude sukuru adiaha, tumo bakere marã tipa tarambiri, na zavura manga bambaiko pumbo rogatise ima rengba ka sa boro ni du ni fudifudi ni ni kerehe tipa ka gbia marã. Ani nayugo gupai nga ani na tatamana ho ani asa gaani raka ni si du taata na ki umbasi agu abape du rirani gbiati gu marã ani agberesaha, ani kidu zanga pai tirani tipa kadu ni akanga fu Mbori kuba du ni akanga fu gi zegino nga ga sunge marã re.—1 Tim. 6:10.

14. Gini ngbatunga nyanyaki kakutipai si aida boro du na ni? Oni funga akpiapai.

14 Tipa gupai nga ani banda gaani raka si du taata, si naida ani ini gupai ani aperesa paha mbatayo. Kura arogotise sa adu na sunge marã beyo nga ga mbakada ahe nga gu naazambua kina kumbatayo. Ono tie, gu nyemupai i adu na ni ka tona mangasunge Kindo ti aregbo dũ asayo i bagi gu gayo bambakada ahe re, gayo bakurungba, gbiati gu kura gayo aũzegino. Fuani i ki futiyo tipa ka undo na sunge dua gaani bakere basunge nga ga zegino nga gu du Warwick New York yo. Gu kparakpara maku i nagbiaha nga ka mangasunge sa Betere yo na wiriyo gbiati kumbari, na tipa bete regbo a i aima mangasunge na avungu bairakporo nga aguyo a namangi gu sunge naadu Warwick yo re. Nazakigene sa Colorado Amerika yo azi gu sunge du tipa bete regbo na beenge. Rago  angba ti bangerekuriisunge na gari sunge ni kerehe na ko ki diberã ka fu gu sunge re furi ri nimangihe ti aregbo dunduko na kini zi marã naaima kio wa bara biata kisusi gu ri aazioho mbata. Ono tie, wadu he nga gu sunge re arengbe ka sari ka ri moingo berãri berewe fuo sunge tungusapai ya, ri aka gu sunge ka ye na bakere marã furi re. Gere gbua nga bete akpiapai nga ga gu badungu apai ga Yekova amoyambu ambupaha. Gu ngbatunga nyanyaki kakutipai ka peresapa agu apai nga ga Kindo mbatayo re nayugo gupai nga ani nabi pabakure na Mbori gbiati agu aũkumuko nga ga toro na nyanyakipaha kisusi agu ahe du rogo gi zegino re.

HO AŨKUMUKO NGA GA BOROSE KA PAYA NI

15. Gini kumuko naye na bakere ngbarago kisusi?

15 Aũkumuko nga ga borose ayugongo gupai nzunzu nga Mbori ima fu maku fu boro te. Yekova nafu maku fu agu aboro “kúmuko na wene mangaapai.” (Oni gedi 1 Timoteo 6:17-19.) Ni kpiapai, ho Lucia * aini gupai ni nga bakere zingo abatungusipai adu Albania yo, ri aguari Itaria yo rogo gu garã nangia 1993 ki ga ku Albania yo zanga na guhe kaa songoda ri, kini kido ni bakerehe kina kuti Yekova. Ri aye ka ino pa aboro Albania wenengai na ri ima undo aboro bangeyo naima susa 60 i kparatiyo fu Mbori. Wa vura duhe nga badungu ga Mbori aboro atungusanga pai rogo agu adagbarago du nga mbudusende wa gure te, agu apai dunduko ani amangaha ka undo kura aboro i gbia gu gene nandu sa unga na i nye ngbaha, si nga gupai ani gbiati agu aboro re nikaa bihe na nyanyakipaha nyeanye kindi.—Mt. 6:20.

16. (a) Gine napido gu babagaahe nga ga gi zegino re? (b) Gupai ini anihe tipa raka kumbatayo, wai du si aida si du na maapai kurii gaani bipai tipa aũborose?

16 Yesu aya: ‘Ho [gu ũkumuko nga gbegberẽ he] ka paya ni,’ angianga ‘ka si paya’ ya. (Rk. 16:9) Agu abeenge kisi na pa wai marã nati rogo gi yangara arame re, ka i ringbisinga ha na gupai nika manga rogo zegino dunduko barambeda kumbatayo te. Gu mbakadapai nga ga Satana dunduko du nga birĩ zogarago, pambori, gbiati sunge bagaahe nika paya apaya. Gu nebi nangia Yezekere gbiati Zefania afura kumbatayo ya dahabu na feda nga agu ahe nga ga ababagaahe vuru akama agarã yo, sunge adunga ti ni berewe te. (Yeze. 7:19; Zef. 1:18) Wai du rengbe ani kadu ka ani da ti digido gaani raka rogo gi zegino re na ani ki kurubara gupai nga ani aima mbupa ndikidi aũkumuko tipa gu bakere “ũkumuko nga gbegberẽ he” nga ga gi zegino re? Ani rengbe kadu wakina gu kumba namangisunge rogo raka ko yo dunduko tipa bakere marã, fuani ko kini kurubara gupai nga anga ndikidi marã du ko amangisunge tipaha te. (Snz. 18:11) Nirengo, gu ngbatunga aũkumuko re nika paya apaya, sidu, gu momu du beroni ka mangasunge na ni ka “sá aboro ni abadiaroni” ngbangbaturũ yo, ka oni mbunga ha paha gberẽ ya. Agu apai dunduko ani amangaha ka songoda ga Yekova Kindo, nakumukosi rani rogo toro yo.

17, 18. Gine napido abakurea Mbori?

17 Ho ga Mbori Kindo nika ye ni, boro ho nikaa tumo marã tipa bambu te, riahe nika du gbua zanga marã na kidu ni bakerehe, marã ho si nikaa idaha tipa boro gbia husa tipa tini te. Ga Yekova aboro auru kpotosende nika gbia bakere ngbarago ti agu ahe nga ga kpotosende. Dahabu, feda, gbiati ambia fongo nika du tipa kina fongatise angianga tipa bagaha ya. Wene aũ duabambu wa ngua, mbia, gbiati marã nika du gbua tipa kaa dudua wene abambu. Abakurearani nikaa undo rani tipa ngbarago angianga tipa marã ya. Vovo gene kparaka agu ahe du auru kpotosende fu aboro nika ngia gene raka nga ga aboro.

18 Gere gbua nga papara gu nyanyakipa ũkumbo du fu agu aboro nazio bakure ku ngbangbaturũ yo. Gu ngbarago nga ga ga Mbori aboro nika du zanga na digidoho ti ni ho i nika gia gu fugo Yesu ni nga: “Ga Buba aboro maku oni yé, oni dí kumbo gu ngbi du ni mbakadimbakadi he tipa roni ho rago aenge ni da awere.”—Mt. 25:34.

[Gu rukutu kekeapai du bandu kpewaraga yo]

^ genewaraga 4 Yesu aayugongo ho singia gupai i akitingbanga gu buruku re na ni angia rengo te. Gu pa-Giriki mangiyo sunge na ni nga “kiti ngbanga” rogo Ruka 16:1 ima rengba ka yugo gupai nga ziree du i agumbaha ti rimo gu buruku re. Ono tie, Yesu agbe berãko kurii wai gu buruku re amangipai, angianga kurii gu ndupai i ambuko ti sunge ti ni ya.

^ genewaraga 15 Gu pangbanga du tipa ga Lucia Moussanett raka gu du rogo gu Awake nga ga Banzinga 22, 2003 kpe. 18-22.

[Asanahe nga ga wisigopai]

[Gu sanduki du ti kpewaraga 9]

WAI KA FU GAMAHE ROGO INTERNET

Gaani sunge yugopai nga ga Ziazia Kekeapai gbiati sunge fu undo ti aregbo gberãngo, agu agamahe aboro nitiyo afuhe du nasongodaha. Ka oni aida ka fu gamahe rogo Internet, oni ndu ku rogo jw.org na ki noro gu paparaha nga “Make a Donation to Our Worldwide Work” gu du mbembedi kuti digidoho yo.