“Yekova amoi mburu zegino be tatamana; be rugatinapai ko ambakadi angbangbaturũ ti ni.”​—SNZ. 3:19.

ABIA: 15, 16

1, 2. (a) Wai du kura aboro akaragapai kuti gupai nga Mbori na riigbu beko? (b) Gini apai ani nika sakapai tipaha rogo gi kekeapai re?

YA MO Mbori na riigbu beko? Kura aboro naape gupai nga, “Si aidanga riigbu duho kaa fu rugapai foro te. Gupai si aidaha bero nga mo du na pagume na Mbori.” Ya mo ru gu bipai re aru? Ginipai agu arengo duho ayugoho?

2 Rogo gi kekeapai re, ani nika wisigo agu agopai nayugoho nga Yekova nga gu Mbori angianga ga ruguzuruguzu apai ya, ko nga wene Ba mangiapai ti genehe kisusi aboro dũ. Ani nika bi wai a si aida ani mangipai kuti agu arugapai ani agbiaha be ga Yekova riigbu. (1 Kor. 14:33, 40) Naatona rogo bambata sa kama agarã Fuo Batikayo Kristo, na ti gi gaani regbo re, Ziazia Kekeapai aima digo ni undo gu papara ga Yekova riigbu du auru kpotosende ane tipa si mangi gu bakere sunge nga ga tungusa wene pangbanga. Mbiko ani nakakuti gupai du rogo Ziazia Kekeapai yo, na kini pekefuo agu arugapai riigbu afuhe, ani nabanda gu du gigiri, zereda, na kodatise nga ga dungurati naabaha dunduko.

YEKOVA NGA WENE BA MANGIAPAI TI GEHEHE KISUSI

3. Ginihe nasa ro mo idi kuti gupai nga Yekova nga wene Ba mangiapai ti gene kisusi?

3 Kusikusiahe nayugoho nga Mbori nga wene Ba mangiapai ti  gene kisusi. Ziazia Kekeapai naya: “Yekova amoi mburu zegino be tatamana; be rugatinapai ko ambakadi angbangbaturũ ti ni.” (Snz. 3:19) Ani ini kina “bete [ga Mbori] apai,” na “ani nagia kina rukutu wiri apai tipa ko!” (Eyo. 26:14) Ono wa vura duhe wo, kina gu wiri ngbarangbara inohe du ani na ni tipa kpotosende gbiati gu kura ahe duwa ha, akerekuru, gbiati badona akerekuru, nasa rani ani idi kuti gupai nga agi ahe du ariyo re ima du ni mbakadimbakadihe kina ti genehe. (Tam. 8:3, 4) Abadona akerekuru na amirioni akerekuru rogoho, nga gu nake ariyo naabaha dunduko kina ti genehe. Nirengo, kpotosende gbiati gu kura ahe duwa ha re, naake pati uru kina ti genehe si ki duwa ndiko kinaho si apeka fuoho! Zanga kapa, gu kere kpakarakpakara gene du ahe rogoho rogo haurago naundo rani ani ini gupai nga Yekova nga guko “nafu ngbangbaturũ” na kpotosende ima rẽ tipa ani taasi ko, ka nye ni rururani fuko, na ka irisoko.​—Tam. 136:1, 5-9.

4. Tipagine du birĩ-inohe arengbanga ti ni ka karagapai kuti dungu asanahe ya?

4 Birĩ-inohe ima yugo dungu apai furani tipa haurago gbiati kpurani nga kpotosende, na si ima undo rani rogo dungu apai yo nga ga raka. Ono dungu asanahe duho birĩ-inohe akaraganga pai kutini ya. Ni kpiapai, abawisigipa agu ahe du ariyo arengbanga ka pe wai nzunzu furani haurago akuru te watadu gu ndupai du ani gbiati kura rakirakiahe ti ni auru Kpotosende te. Berewe a, badungu aboro arengbanga ka saka rogo gu ndupai yo du ngbatunga aboro dunduko ti ni na nyemu ka raka nyeanye kindi te. (Batu. 3:11.) Tipagine du du badungu nyanyakipa asanahe ti ni wa gure aboro agbianga akaragapai kutini ya? Ndupai sa nga, badungu aboro birĩ-inohe gbiati gu kura aboro nasonosa kina agu aberã angianga ga Mbori ya na i idi kuti gupai nga ahe akuru nisaha. Ono Yekova ima karagapai rogo gako Buku yo kuti agu asanahe du ngbadu aboro yo rogo arago dunduko.

5. Ngba gini agene du ani akido kina kuti agu andiko nga ga sino zegino?

5 Gaani apai naabaha naru kina kurii agu andiko nga ga sino zegino nga gu aʹarianga tihe ya Yekova asigiraha. Abarẽke karaba, abavodimbepe ime, abakama tiyara (avion), gbiati amunganga, gayo asunge naabaha naru kina kurii agi andiko re. Ni kpiapai, amunganga naakido kuti gu rengo nga kpoto aboro dunduko kina sa. Sidu, munganga naagbatanga bara gu ba agbata du bagunda boro rogoho te. Ani dunduko naairisa agu andiko airisa nga ga sino zegino. Ka boro idi ka gu ari ngua yo wa zire, ni ima rengbanga ka ti ki kpi!

AGU APAI MBORI NAMANGIHE TI GENEHE

6. Tipagine du rengbe ani ka maabangirani ti ni nga airisi Yekova nikaa mangaapai ti genehe?

6 Nirengo, Mbori ambakadi haurago ni iʹiriwoho ti genehe. Sidu tie, si nirengo nga ani ima rengba ka maabangirani nga Yekova naida airisiko mangiapai kina ti genehe. Nirengo, tipa ka mangaha wo, Mbori ima fu Ziazia Kekeapai tipa si ngbe furani kumbatayo. Ka ani raki zanga na gu undo nga ga ga Yekova riigbu gbiati gako arugute, si rengbe ka ye na bakere gberãrago gbiati arungo furani.

7. Ginihe nayugoho nga Ziazia Kekeapai nga gu buku du kina ti genehe?

7 Anga Ziazia Kekeapai gbua nga gu dunguradungura akitabu nga ga aYudo gbiati aKristano te. Kuba gure, si nga gu buku du ti genehe ga Mbori toro adu kugii pa kehe. Agu akitabu du rogo Ziazia Kekeapai yo naabaha na ngbanya dagbaha na akuraha. Tona rogo Bambata Pai yo kuti Yugoti, si na gu meme riipai rogo yo nga ga Ziazia Kekeapai, du nga pa dia gbarasarimo kusayo ti ga Yekova bakere pagbia na pa digiso ga Mbori ringbisapai tipa kpotosende vurube gako Kindo tii ga Kristo zogarago, nga gu ‘tita dee’ i akido pako.​—Oni gedi Bambata Pai 3:15; Matayo 6:10; Yugoti 11:15.

8. Tipagine du rengbe ani ti ni ka ya aYisaraere anaamangaapai ti genehe?

 8 Agu aYisaraere naadu bakuru kusayo angia kpia wai Mbori amangapai ti genehe. Ni kpiapai, tii ga Moize aNdiko, “agu ade naadungura tiyo ka amanga apai pati ngbadimo bamburoko dungurati” aamangapai kina ti genehe. (Gate 38:8) Wai aYisaraere anaaguari na gayo bataya gbiati banye anaamanga kina ti genehe. Kusa, Bakindo Davide akparaka aRevi gbiati aboromotumo i nimangisunge rogo abadona. (1 Peka 23:1-6; 24:1-3) Na ho aYisaraere anaagiasangba Yekova ni, i anaagbia maku nga gu naana sayo i nimangipai kina ti genehe, i kidu na zereda gbiati kodatise.​—Pa Rug. 11:26, 27; 28:1-14.

9. Ginihe nayugoho nga gu dungurati nga ga aKristano naadu rogo bambata sa kama agarã anaamangapai kina ti genehe?

9 Gu dungurati nga ga aKristano naadu rogo bambata sa kama agarã anaamangaapai kina ti genehe, na si aima gbia undo ti agu arugapai nangia ga riigbu bipasunge, nga gu riigbu bipasunge naadu mbata nga amokedi. (Amo. 6:1-6) Kusa, i arimisi kura awirina ku rogo gu riigbu bipasunge re. (Amo. 15:6) I anaagbia arugute na arugapai a vurube agu awaraga ga Mbori toro adu kugii agu akumba nangia papara gu riigbu bipasunge re watadu aguyo naana mangasunge mbembedi na gu riigbu bipasunge re. (1 Tim. 3:1-13; Tito 1:5-9) Wai du adungurati anaagbia undo ti pekafuo agu arugapai nangia ga riigbu bipasunge?

10. Gini sangbanapai nakuru ho gu bambata adungurati nga ga aKristano apekefuo agu andiko ni riigbu bipasunge afuhe? (Oni bi gu sura duti tonatonaha.)

10 Oni gedi Amokedi 16:4, 5. Agu awirina riigbu bipasunge akedi yo apeke pa “agu andika fu akanisa i ka kuti ni, gu amokedi na abaakumba arũ he nadu Yerusarema yo.” Wa adungurati aapekafuo agu andiko re, “akanisa ki nyaki rogo idapase yo, ki nge ange na uru.” Ya mo pai ho rengbe ani ka wirikaha ti gu pangbanga nga ga Ziazia Kekeapai re nibipa mangapai rogo ga Yekova riigbu areme?

YA MO ONI NAPEKAFUO ARUGAPAI?

11. Wai du si aida agu akumba i naasia yo mangipai kuti agu arugapai i agbiaha be ga Mbori riigbu?

11 Ginipai si aida agu aboro du rogo gu Rondo Nga ga Be Basunge watadu gu Rondo Nga ga Ringara, babi adungurati, gbiati abaakumba rogo dungurati mangihe ho i agbia arugapai ni areme be ga Yekova riigbu? Ga Yekova Buku naruga rani dunduko nga ani du na giasangba gbiati ranigose. (Pa Rug. 30:16; Eb. 13:7, 17) Ba ho rogo ga Yekova riigbu tipa gu toro nga ga bisirapai watadu samungu te, mbiko ngbatunga gu sino re ima rengba ka gbarasapa gaani nyemuse, zereda na kodatise nga ga adungurati. Rengo ngaha nga, ruru Kristano ho rengbe ka ida ka yugo gu sino nga ga zanga irisa gbiati zanga du ni ruruse Dioturepe adu na ni te. (Oni gedi 3 Yoane 9, 10.) Ani ima rengba ka sana tirani a nga: ‘Ya mo mi nafubee tipa agu aboro du patire du wenengai rogo toro yo? Ya mo mi naadia agu arugapai kugume ni ipo na kini songodihe nga gu agu awirina nangbe kumbatayo afuhe?’

12. Gini ariapai i amangihe nibipa wai ka sia moundo abaakumba gbiati abaakumba?

12 Oni makianga pa gu diaberã Riigbu Bipasunge namangihe barambeda. “Asanahe be Agedihe” rogo gu Ngbaõbambu Sinziri nangia ga Ngbangba 15, 2014, apepa gu ariapai i amangihe nibipa wai i asia aboro ni abaakumba gbiati moundo abaakumba. Gu kekeapai re ape gupai nga gu riigbu bipasunge naadu rogo bambata sa kama agarã aidihe fu agu ababiapai nata ata i ni sia aboro. Na ngbanya na gu kpiapai re, naatona rogo Mbirinvuo 1, 2014, ababi adungurati aima digo ni sia abaakumba gbiati moundo abaakumba. Babi adungurati naasada ka ino agu akumba i nafura tipa yo ya i rẽ tipa i siayo na ka rengba du ko ki kuru gene tungusapai yo na yo. Babi adungurati nawisigo ga gu  wirina re aborokporo a wenengai. (1 Tim. 3:4, 5) Gu gbuu nga ga abaakumba gbiati babi adungurati nawisigo agu apai du rogo Ziazia Kekeapai yo tipa gu boro rẽ ka mangasunge moundo abaakumba gbiati abaakumba.​—1 Tim. 3:1-10, 12, 13; 1 Pet. 5:1-3.

13. Wai du rengbe ani ka songoda agu arugapai ani agbiaha be abaakumba?

13 Si naida ani pekefuo agu arugapai nga ga Ziazia Kekeapai ani agbiaha be abaakumba. Gi ruru ababanda akandoro du rogo ga Yekova riigbu re, gu “ziazia” arugapai du rogo ga Mbori Buku yo du nangbe fuyo kumbatayo. (1 Tim. 6:3) Oni tingidinga gu rugute nangia ga Pauro tipa agu aboro namanga utukuru rogo dungurati. Gu kura aboro adu yo ‘naamanganga sunge wa sa ya, ono i adu ni adingbiti pai.’ Wa goapai ayugoho, abaakumba aima zungodi yo ono ka i agianga gu rugute re ya. Wai du ka dungurati amangipai na gu ngbatunga aboro re? Pauro afu rugapai nga: “Oni bí nga gu boro re, ka oni kódi nga tironi na ni ya.” Gu rugute re aapingo kina kubanisa te mbiko si ape gupai nga ka i bingo ngbatunga gu boro re ni kare ya. (2 Tesa. 3:11-15) Areme, abaakumba rengbe ka manga gumbapai nga gu nafu zahe tipa gu boro kakuti manga gupai nagbarasa rimo dungurati, wa gunga mbakadapa rogatise na zanga idipase. (1 Kor. 7:39) Wai du mo amangapai ka si du nga abaakumba bihe nga si daada i fu gu ngbatunga gumbapai re? Ka si du nga mo ima ino gu boro i nafura tipa ni re, ya mo mo ambu koda tiro na ni? Gamo nyemuse na pa ru mo nyanyaki ima rengba ka sa gu boro re ni mbu gani gbegberẽ mangaapai. [1]

ONI BANDA PADU GIGIRI, KIDU NA ZEREDA GBIATI KODATISE

14. Wai du rengbe ani ka fubee tipa ka banda dungurati ni gigirihe?

14 Ani rengbe ka banda gu padu gigiri nga ga dungurati rogo toro yo ni peka ani fuo agu arugute du rogo Fugo Mbori yo. Oni berẽnga pa gupai naamangi bakuru kusayo rogo gu dungurati naadu Korinda yo. Pauro aima futiko ka tungusapai rogo gu gbata re, na ko aima kpinyemu gu “ziazia” awirinako naadu yo. (1 Kor. 1:1, 2) Ono nairiwo gu gberãrago ko adu na ni ho si adu ni nga ko mangipai kuti gu pa bari i aambuhe ambu si nimangi rogo gu dungurati re! Pauro afu rugapai fu abaakumba nga i fu gu kumba re fu Satana, du rogoyo nga ka kusako kusayo rogo dungurati. Si aaida abaakumba di gu “agbooro” kusayo naadu dagba aboro tipa ka banda dungurati ni gigirihe. (1 Kor. 5:1, 5, 6, 12) Ho ani asongoda gu diaberã ni nga ga abaakumba ka kusa gu boro ingapai kusayo aidanga ka saberã ya, gure nga ani naundo ka banda dungurati ni gigirihe na isoke ka sa gu boro re ni saberã ni na ki gbata ga Yekova mbupai.

15. Wai du rengbe ani ka banda zereda rogo dungurati?

15 Gu kura kpakaraapai adu kina Korinda yo si aaida i mangipai sa ni. Gu kura awirina aandu na awirinayo ku ngbangayo. Pauro asana yo na nyanyakipa sanahe nga: “Ka oni vura hi irairapai si mangi wãi?” (1 Kor. 6:1-8) Ngbatungapai wa gure ima kura areme a. Ti gu kura aregbo, kura awirina rogo toro yo aima manga mbakadapai nga ga sunge marã ono pa gayo marã ki gberẽ na isoke i ki tona ka bira wirinayo nga ni abiriki yo. Gu kura aboro ima ndu na awirinayo ku ngbangayo, ono ga Mbori Buku naundo rani ani ini gupai nga, gu ngba nga pa gaani ahe gberẽ ti gu nga ani ye na pazee kuti rimo Mbori watadu ka fuda gu zereda nga ga dungurati. [2] Rengo ngaha nga, tipa ka nyasariipa kere akpakarapai, si naida ani mangipai kuti ga Yesu rugute. (Oni gedi Matayo 5:23, 24; 18:15-17.) Ho ani amangaha ni wo, ani nafubee tipa gu kodatise nga ga airisi Yekova.

16. Tipagine du si aida ani moibangirani ti ni nga ga Mbori aboro nika du na kodatise?

16 Ga Yekova Buku nayugo gu ndupai furani si aida ani moibangirani ti ni tipa ga Mbori  aboro du ni kodikodi yo. Bake papara Atambuahe abibia nga: “Oni ngére, nga gu wenepai na wenerago a ka awirina sungu sa na berã sa!” (Tam. 133:1) Ho aYisaraere anaagiasangba Yekova ni, i anaamangapai kina ti genehe na kidu ni kodikodi yo. Ho Mbori afura ni kumbatayo tipa gupai si adu nga gako aboro nika du rogoho, ko aya: “Mi amáa yo kina sa wa akandoro rogo ndugu ra.” (Mika 2:12) Kurigure, Yekova afura kumbatayo vurube gu nebi nangia Zefania ki ya: “Mi asá gu fugo nga ga aboro ni nzunzu fugo [nga ga gu rengo du rogo Ziazia Kekeapai yo], ya i dunduko ki yambu he ti rimo Yekova ki nimangi pako kina ku bani sa.” (Zef. 3:9) Nairiwo gu tambuahe du ani na ni tipa kadu na gu momu nga ka iriso Yekova na kodatise!

Abaakumba, oni mangi ome ka undo gu boro rogo toro yo mangi irairapai (Oni bi genewaraga 17)

17. Tipa ka banda gu kodatise nga ga dungurati na padu gigiri, wai du si aida abaakumba mangipai na gu boro mangi irairapai?

17 Tipa ka banda gu kodatise nga ga dungurati na si kidu gigiri, si naida abaakumba mangipai ni ipo na rogo nyemuse yo ka si du nga wirina mangi kere ingapai. Pauro aima inoho nga anga Mbori nakpi nyemurani akpi gbua te, na Ko abingo iraira mangapai ki zanga mangapai sa ni a te. (Snz. 15:3) Sidu, Pauro amanganga ndundu ka ke Bambata aKorindo te nga gu waraga naadu na nyanyaki rugute rogoho ono kidu na nyemuse. Ue aKorindo nga gu ko akehe bete adiwi kusa, nayugoho nga i aima manga sonakumbatayo mbiko abaakumba aima mangapai kuti ga Pauro rugute. Ka si du nga Kristano mangi irairapai mbata fu ni inihe, si naida agu akumba du na inohe asadi ka ruga ni ni gu sino nga ga zera.​—Gara. 6:1.

18. (a) Ngba gini agene gu rugute du rogo Fugo Mbori yo aundo agu adungurati naadu rogo bambata sa kama agarã? (b) Ginipai ani ka sakapai tipaha rogo gu kekeapai ngbefuo gere?

18 Si tie ziazia nga gu rugute du rogo ga Mbori Buku yo ziazia toro adu kugii pa kehe, aundo agu aKristano naadu rogo bambata sa kama agarã Korinda yo na rogo kura arago tipa i nye gigiri, ki banda zereda na kodatise rogo gayo adungurati. (1 Kor. 1:10; Ef. 4:11-13; 1 Pet. 3:8) Ni sangbanaha, agu awirinarani naadu ti gu regbo re aima rengba kadu na diabese rogo sunge tungusapai yo. Nirengo, Pauro arengbe ka ya i aima tungusa wene pangbanga “rogo arago tii ngbangbaturũ yo dũ.” (Koro. 1:23) Areme, i nagbandaka gu inohe du tipa ga Mbori bawene ringbisapai rogo zegino dunduko mbiko gu bakere ome agu aboro du ni kodikodi yo rogo riigbu amangaha. Gu kekeapai ngbefuo gere nika fu gu kura goapai nayugoho nga agi aboro re nabi Ziazia Kekeapai na nyanyakipaha na i ima diaberã ka iriso gu Bakerepa Bakindo nga Yekova.​—Tam. 71:15, 16.

^ [1] (genewaraga 13) Oni bi Organized to Do Jehovah’s Will, kpewa. 134-136.

^ [2] (genewaraga 15) Ka oni aida ka inopai tipa gu ngbatunga apai rengbe Kristano ka ndu na kurani ti ni ku ngbanga yo, oni bi gu buku nga “Oni Bánda Tironi Rogo ga Mbori Nyemuse Yo” kpe. 223, rukutu kekeapai bandu he yo.