Ya mo mo abakingo bangiro tipa agu apai namanga ngbangbaturũ yo gbiati agu aboro naraka yo? Ka si du wo, anga kina ro sa te. Tipa dungu kutu agarã, aboro aima digo ni saki gipai re. Kura aboro idi kuti gupai nga, ngbangbaturũ nga gu ba agu atitarani naima raka mbata ki du ni wene aboro araka rogoho. Kura aboro naberãpa ngbangbaturũ ni bawene zezeredi rago, du na dungu amaraika gbiati gu wene aboro naima kpiko. Berewe a, akurayo nabi ngbangbaturũ ni gu kporo du na dungu ambori rogoho.

Kura aboro natikango kindi nga, ani arengbanga ka ino gupai namanga ngbangbaturũ yo te mbiko boro ho naye yo rengbe ka gumba gupai furani du ko yo te. Agi aberãpai re dunduko ni kina irairaha. Yesu Kristo araki ngbangbaturũ yo mbata fu ko ye ku auru kpotosende ane. Ko agumbaha gbaiga fu agu abarumbatayo rogo pambori naadu rogo bambata sa kama agarã ki ya: “Bambiko mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.” Yesu afura tipa agu apai du ku ngbangbaturũ yo ho ko aya ni fu gako amokedi: “Rogo ga Buba bambu dungu banye du yo.”​—Yoane 6:38; 14:2.

Ba Yesu nga Mbori, du rimoko nga Yekova, na ga Yekova “bambu” gu du ngbangbaturũ yo. (Atambuahe 83:18) Si du, boro ho rengbe ka sakapai wenengai tipa ngbangbaturũ ki susi Yekova Mbori gbiati Yesu Kristo te. I ayugu dungu apai tipa ngbangbaturũ ni mangasunge na yuguyuguapai nga gu i ayuguhe fu ruru amoyambu.

Gu kekeapai naye fuo gere nika sakapai tipa agu apapara Ziazia Kekeapai nayugo gupai akumba abihe rogo yuguyuguapai yo. Wa mo nikaa wisigo gi yuguyuguapai re, mo ini gupai nga, anga ngbangbaturũ nga gu rago du na agu ahe rogoho rengbe ani ka zadaha watadu ka bihe te. Kuba gupai nga i sia ka sakapai furani rogo gu gene kina agu aboro naraka ngbangbaturũ yo narengbe ka rugatiyo na ni, Mbori ayugu agu apai du ngbangbaturũ yo rogo gu gene rengbe ani arengba ka gia rogoho yo. Gi yuguyuguapai re nika undo ro tipa mo ini agu aboro naraka rogo gu “dungu banye” du ngbangbaturũ yo.