Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Ngi 2016

“Ani Ndú na Mo”

“Ani Ndú na Mo”

“Ani ndú na mo, bambiko ani gi he ya Mbori du na mo.”ZEK. 8:23.

ABIA: 32, 31

1, 2. (a) Ginipai Yekova agumbaha nga si nika manga ti gaani regbo re? (b) Gini asanahe ani nika wisigopai tipaha rogo gi kekeapai re? (Oni bi gu sura du ti tonatonaha.)

YEKOVA afura kumbatayo tipa gi regbo ani araka ti ni re nga: “Ni gu rago re akumba bawe nikazada ga gu boro Ebere baukadi, ki ya, ‘Ani ndú na mo, bambiko ani gi he ya Mbori du na mo.’” (Zek. 8:23) Wakina agu akumba bawe du payo re, agu aboro du na maabangirise tipa ka raka auru kpotosende ane ima zada “ga gu boro Ebere baukadi.” I na bakere sambuohe tipa ka kodatiyo na agi aKristano du ni mbedimbediyo na toro re nga “ga Mbori Yisaraere” ni inoyo gupai nga Yekova nafu maku kurii gako mbedimbedi aboro.Gara. 6:16.

2 A wa si adu tipa gu nebi nangia Zakaraya, Yesu afura tipa gu wene kodatise ga Mbori aboro agbiaha. Ko afura tipa apefuoko wa badona ue nga “umba rika aboro” na “kura akandoro,” ono ko aya “rimbasara adú adu sa” na “babanda akandoro ki du sa.” (Rk. 12:32; Yo. 10:16) Ono tie, gu pagume du dagba gu badona du ue re naye na sanahe nga: (1) Ya mo si naida kura akandoro ini rimo agu aboro dunduko nga mbedimbedi aKristano areme? (2) Si naida mbedimbedi aKristano nibi tiyo wai? (3) Gini bipai si aida mo du na ni ka si du nga boro rogo gamo dungurati tona ka ri  kpakuto ti regbo Tingida Pakpio Yesu? (4) Ya mo si naida mo bakibangiro na pa nge agu aboro nari kpakuto? Si naida ani wisigingo akaragapai kuti agi asanahe re ni basasa.

YA MO SI NAIDA ANI INI RIMO AGU ABORO DUNDUKO NGA MBEDIMBEDI AKRISTANO AREME?

3. Tipagine adu ngaha ti ni furani taata ka ino da nika du dagba agu aboro du bangeyo nga 144,000 ya?

3 Ya mo si naida kura akandoro ini rimo agu aboro dunduko nga mbedimbedi aKristano areme? Karagapai ni wiri guruhe nga oó. Tipagine adunga ha ti ni wo ya? Bambiko ka boro vura gbia gu yambahe nga ga ngbangbaturũ, gure nga ni gbia kina kungbo yambahe gbua, angianga yangara mosoro ya. Gere nga ndu gupai Satana akusa “zire anebi, . . . wa ka i ingisi siasia aboro” ti ni. (Mt. 24:24) Boro ho rengbe ka ino singia mbedimbedi Kristano nika gbia gani mosoro ngbangbaturũ yo te daho Yekova nika sarangbanga ni ni nga ni ima rẽ tipa gu mosoro re. Yekova du namanga gu diaberã re na kini dikohe tiní ni yangaraha singia mbata fu ni kpi niruru ni watadu bara ti tonatona “bakere gberãngbi.” (Yugo. 2:10; 7:3, 14) Sidu, wiri undoho fu gu boro naraka awere tipa ni asadi ka ino ada dagba ga Mbori amoyambu yo nika du dagba agu aboro du bangeyo nga 144,000 ni yangaraha te. [1]

4. Ka si du nga si taata tipa ani ini rimo mbedimbedi aKristano auru kpotosende areme te, wai du rengbe ani ka “ndú na” yo?

4 Ka si du nga si taata tipa ani ini rimo agu aYisaraere nga ga toro yo areme te, wai du rengbe agu aboro nga kura kandoro ka “ndú na” yo? Ani bingo gupai gu sangbanebi du rogo Zakaraya agumbaha tipa agu akumba du bawe re. Agi aboro re ‘nika zada ga gu boro Ebere baukadi re, ki ya, “Ani ndú na mo, bambiko ani gi he ya Mbori du na mo.”’ Wa vura duhe nga kina bangisa Ebere i nafura tipa ni ane, gu fugo nga “mo” re si nafura tipa aboro ni dunguyo. Sidu, gu boro Ebere re nga badona aboro angianga bangisa boro sa ya! Anga si naida ani ini agu aEbere nga ga toro yo ni basasa ani kini ru ka ndu na gu ni te. Kuba gure, si naida ani ini yo wa badona na kini undo yo wa rengbe omerani na ni. Ziazia Kekeapai angarasanga rani ani pekefuo boro sa te. Yesu nga gaani Bangbembatayo.Mt. 23:10.

SI NAIDA MBEDIMBEDI AKRISTANO NIBI TIYO WAI?

5. Gini zahe si aida mbedimbedi aKristano berẽkuriihe nyanyaki, na tipagine?

5 Si naida agu aboro nari kpakuto ti regbo Tingida Pakpio Yesu wisigi gu zahe du rogo 1 AKorindo 11:27-29. (Oni gedihe.) Ginipai gu mokedi nangia Pauro aaida ka gumbaha na gipai re? Mbedimbedi Kristano rengbe ka ri kpakuto si kidu ni gbegberẽ he ka si du nga gani pagume na Yekova ni wenehe te. (Eb. 6:4-6; 10:26-29) Ngbatunga gu zahe re naundo mbedimbedi aKristano i tingidi gupai nga i ata dianga gayo mosoro te. Si naida i nindu kumbatayo kindi tipa ka ‘dusia gu ringbisiringbisi he du ku mbata yo sa dia gu mosoro du ti ga Mbori yambahe ari yo rogo Kristo Yesu yo.’Frp. 3:13-16.

6. Wai du si aida mbedimbedi aKristano nibi tiyo?

6 Ga Mbori toro adu kugii Pauro ko zungodi mbedimbedi aKristano i tá “ata si ki re are na gu yambahe i ayambu [yo sa ni].” Wai du si aida i mangi gipai re? Pauro aya “ni umbasiti na zera, na gbanga hipai, oni hi pai fu akuaroni ni nyemuse; nike na ka kuti gu du sa nga ga Toro zikazika, ni gu ũkpamiatise nga zereda.” (Ef. 4:1-3) Ga Mbori toro naye na umbasitise, angianga rukö ya. (Koro. 3:12) Nirengo, mbedimbedi aKristano ima inoho nga anga i du na bakere ziazia toro kisusi agu aboro du na maabangirise tipa ka raka auru kpotosende ane te. I atanga ngbaduyo  nga i na kparakpara inohe watadu ayuguyugupai te; i aˈasadanga ka yugoho nga i nyakipa yo kisusi kura aboro te. Na si aidanga i asadi ka ya fu kura aboro gi boro re a nga kina mbedimbedi Kristano na si naida ni tona ka ri kpakuto te; kuba gure, si naida i du na umbasitise ki ini gupai nga Yekova du nayamba yo.

7, 8. Ginipai si aidanga mbedimbedi aKristano berẽpaha ya, na tipagine?

7 Wa vura duhe nga bakere momu du ngaha nga boro gbia gu yambahe nga ga ngbangbaturũ, mbedimbedi aKristano aidanga aboro nifu kparakpara irisa fuyo te. (Ef. 1:18, 19; oni gedi AFiripoio 2:2, 3.) Ga Yekova toro namanga dezirepai fuyo ni basasa. Anga tingidapai ho i amangaha fu zegino te. Sidu, si airiwongo tiyo te ka si du nga kura aboro aidanga kuti gupai nzunzu nga i ima mbeda yo na ziazia toro te. Nirengo, i ima ino gupai nga Ziazia Kekeapai naruga aboro tipa ka i idinga kuti gu boro niˈipo naya Mbori ima sia ni ya. (Yugo. 2:2) Sidu, si aidanga i mangisunge na pa mbeda yo na ziazia toro wa “waraga yambahe” tipa ka yugo tiyo fu kura aboro te. Na si aidanga i fura tipa pa gayo yambahe fu kura aboro tipa ka gbeberã aboro kutiyo te; si aidanga i ta ngbaduyo tipa gu gayo mosoro nika du kumbatayo re te.1 Kor. 1:28, 29; oni gedi 1 AKorindo 4:6-8.

8 Kurigure, mbedimbedi aKristano abingo tiyo wa i du rogo gu badona du paha kuari te. I agbatanga kura aboro i gbia gu yambahe re na kini moibangiriyo nga si naida i du ni kodikodi yo watadu ka asada ka kusa kparakpara badona nga ga wisigo Ziazia Kekeapai te. (Gara. 1:15-17) Ngbatunga gu mangapai re rengbe ka ye na kparakaro rogo dungurati gbiati zanga mangapai kuti ziazia toro mbiko ziazia toro nga guhe naye na zereda gbiati kodatise.Oni gedi ARomo 16:17, 18.

GINI BIPAI SI AIDA MO DU NA NI?

9. Tipagine si aida mo du ti ni na rubangirise nibipa gu gene mo amangapai ngbaha fu gu boro nari kpakuto ti regbo Tingida Pakpio Yesu? (Oni bi gu sanduki nga “ Nyemuse ‘Amanga Nga Gu pai Angba Nga ya Te.’”)

9 Wai du si aida oni mangi fu gu boro ri kpakuto ti regbo Tingida Pakpio Yesu? Yesu aya fu gako abawiriki wẽ: “Oni ki du ni awirina dunduko.” Ko aya berewe wẽ: “Gu ni ka kiisa tini, i aúmbasi ni aumbasi; na gu ni nikaumbasi tini i akíisa ni.” (Mt. 23:8-12) Sidu, si adu ni gbegberẽpai tipa ka kiisopa kura aboro, ka si vura du nga i nga awirina Kristo vurũ. Ziazia Kekeapai nangarasa rani tipa agu abaakumba nga aKristano ani wiriki gayo idapase mbiko i nangbembatayo furani, ono si ayanga furani ani tumbapa aboro kuari wa gaani agbia te. (Eb. 13:7) Nirengo, Ziazia Kekeapai nafura tipa aguyo nga “i re na irisa susi.” Ono tie, agu aboro re rẽ na irisa angianga mbiko gupai nga i nga mbedimbedi aboro ya, ono mbiko i “nazoga rago wenengaĩ” watadu nangerakurii apai wenengai na i “namanga sunge rogo tungusapai na yugopai” nyanyaki. (1 Tim. 5:17) Sidu tie, si rengbe kadu ni gbegberẽpai fu agu aboro du na gu yambahe nga ga ngbangbaturũ ka si du nga kura aboro nafu irisa fuyo kisusi. Gu gberẽ agberã nga, ka aboro amangapai fu mbedimbedi aKristano kia, si rengbe kadu fuyo ni kpakarapai i du na umbasitise. (Rom. 12:3) Boro ho dagbarani rengbe ka ida ka sa wirina Kristo niti te!Rk. 17:2.

Wai du si aida mo mangi fu gu boro nari kpakuto ti regbo Tingida Pakpio Yesu? (Oni bi genewaraga 9-11)

10. Wai du rengbe mo ka yugoho nga mo nairisa mbedimbedi aKristano?

10 Wai du rengbe ani ka yugo gu irisa rẽarẽ fu agu aboro Yekova nasia ka mbeda yo na ziazia toro? Si aidanga ani sasana yo tipa pa mbedayo na ziazia toro te. Si nika sa gupai nga ani zanga rimiso tirani ku rogo gupai angianga gaani ya. (1 Tesa. 4:11; 2 Tesa. 3:11) Si aidanga ani du na gu berãpai a nga avunguni,  diani, watadu gu kura agumeni a nika gbia gu yambahe re agbia te. Wiri kodatise ho du dagba gupai re na rogatise watadu pagume te. (1 Tesa. 2:12) Si aidanga ani sasana gayo abadiarogatise tipa gu bipai du yo na ni tipa wa i naini gupai nga i nika raka rogo Paradizo auru kpotosende ane zanga gayo badiarogatise te. Kuba gupai nga ani sasana yo na agu asanahe rengbe ka imisa yo, ani dunduko si aida ani du na kido nga Yekova nika za beko aza tipa ka ‘mbisa gu nyemuhe nga ga unga ahe dunduko.’Tam. 145:16.

11. Wai du rengbe ani ka bandatirani ka si du nga ani ne gu sino nga ga kiisopa kura aboro?

11 Agu aboro namanga fu mbedimbedi aKristano ngba wene gene nabanda tiyo be kereapai. Ziazia Kekeapai naya furani wẽ “kungba awirina” watadu ziree awirina rengbe arengba ka rimo ku rogo dungurati. (Gara. 2:4, 5; 1 Yo. 2:19) Agi airaziree re ima rengba ka ya ami nga mbedimbedi aKristano. Kurigure, kura mbedimbedi aKristano ima rengba ka ti kusayo ti gayo idapase. (Mt. 25:10-12; 2 Pet. 2:20, 21) Ka ani bandatirani ti gu sino nga ga tumbapa aboro kuari, ngbatunga agu aboro re agbenga rani kusayo ti rengo te; na pa gaani idapase arengbanga ka gberã mbiko gupai nga nyanyakipa Kristano watadu gu wirina di gbanga regbo rogo dungurati ni berewe niruru te te.Yuda 16.

NA GINIPAI DU TIPA PA NGE AGU ABORO NARI KPAKUTO?

12, 13. Tipagine si aidanga ti ni ani bakibangirani na pa nge namba agu aboro nari kpakuto ya?

12 Rogo agu agarã susi kusayo, ani ima bi gupai nga bange agu aboro nari kpakuto ti regbo Tingida Pakpio Yesu nange kina kumbatayo. Gi pa ngeyo re kia ti wai ani aabi bange agu aboro naari kpakuto si niumba dungu bawe agarã kusayo. Ya mo si naida gipai re fudi rani? Oó. Ani wisigingo nyanyakipa apai nga gu si aida si du rirani yo.

13 “Gbia ini agu yo nga gako yo.” (2 Tim. 2:19) Agu aboro nageda bange aboro ti regbo Tingida Pakpio Yesu, i arengbanga ka ino da nzunzu du na gu maabangirise nga ga ga ku ngbangbaturũ yo te. Bange agu aboro re nakoda agu aboro du na gu iraira bipai nga ami nga mbedimbedi aboro a. Gu kura aboro kinaho naatona ka ri kpakuto i ki ima mbu rihe kusa. Runga ri agu akurayo yo te, watadu nunga nazio agu akurayo i ki tona ka bi tiyo nga i nika zogarago na Yesu ngbangbaturũ yo. Sidu tie, pa nge agu aboro re ayugongo namba gu mbedimbedi aKristano nzunzu he auru kpotosende te.

14. Ginipai Ziazia Kekeapai agumbaha tipa bange gu mbedimbedi aKristano nika du auru kpotosende ho bakere gberãngbi nika tona ni?

 14 Mbedimbedi aKristano nika du na apapara zegino dunduko ho Yesu nika ye ni tipa ka dia yo ku ngbangbaturũ yo. Ziazia Kekeapai nafura tipa gu regbo re nga Yesu aya: “Ko ki kedi gako amaraika na bakere woro ngbunga, i ki dungura gako siasia aboro rogo arago dũ, ti digida ngbangbaturũ dunduko.” (Mt. 24:31) Ziazia Kekeapai naya kina yangara mbedimbedi aKristano nika nye auru kpotosende rogo yangara areme. (Yugo. 12:17) Ono tie, Ziazia Kekeapai ayugongo namba aguyo nika nye daho bakere gberãngbi nika tona ni te.

15, 16. Ginipai si aida ani rugutirani na ni nibipa sia Yekova agu aboro du bangeyo nga 144,000?

15 Yekova nasia mbedimbedi aKristano. (Rom. 8:28-30) Yekova atona ka sia mbedimbedi aKristano fuo Yesu kpi na ki zingi be kpio, na si nawira wa agu aboro dunduko naadu rogo gu dungurati naadu rogo bambata sa kama agarã angia kina mbedimbedi aKristano. Natona ti bambata sa kama agarã ki da ti tonatona yangara arame, badungu agu aboro naaya i nga apefuo Kristo angia ziree aKristano; Yesu ayambuyo nga “rende.” Wa si avura du wo, Yekova aandu kumbatayo kindi kaa sia bete gako ruru aboro vuru agu agarã yo re dunduko, na i adu wakina gu “morũ” Yesu afura tipaha. (Mt. 13:24-30) Vuru yangara arame yo, Yekova nandu kumbatayo kindi tipa kaa sia agu aboro nika du dagba gu agu aboro bangeyo nika du nga 144,000. [2] Ka si du nga ko sia ka sungo dati gu regbo nga ga yangara arame re tipa ka sia agu aboro du tipa gi momu re, ada nga ani rengbe ka sakapai na gako tatamana? (Yes. 45:9; Dan. 4:35; oni gedi ARomo 9:11, 16.) [3] Si naida ani du na rubangirise ani andu ka mangapai wakina agu abamangisunge naakpakanahe tipa wai bairasunge amangipai fu agu abamangisunge natona sunge ti asa bisue nyemu.Oni gedi Matayo 20:8-15.

16 Anga agu aboro dunduko du na gu maabangirise nga ga ga ku ngbangbaturũ yo du ni papara “gu kangara moyambu tie du na tatamana” te. (Mt. 24:45-47) A wa si adu rogo bambata sa kama agarã, aYekova na Yesu du nariga dungu aboro areme vurube umba rikaaboro. Kina bete mbedimbedi aKristano rogo bambata sa kama agarã Yekova amangisunge na yo tipa i ke gu papara Ziazia Kekeapai nga Vovo Ndika. Wakina gure a, kina bete mbedimbedi aKristano Yekova nasia yo tipa i nifu ‘riahe ti ragoho.’

17. Ginipai wiriki moho rogo gi kekeapai re?

17 Ginipai wiriki ani he rogo gi gaani sakapai re? Yekova ima sia ka fu amosoro ue ni bakiakia nga raka ngbangbaturũ yo fu agu aEbere nga ga toro yo na raka auru kpotosende fu agu akumba bawe nandu fuo boro Ebere. Wa vura duhe wo, ko naida i dunduko du niruru yo singia aguyo naga ku ngbangbaturũ yo watadu aguyo nika raka auru kpotosende ane. Agi abadona ue re dunduko si aida si du na umbasitise. I dunduko si aida i du ni kodikodi yo. I dunduko si aida i sa zereda si du rogo dungurati. Wa yangara arame ambeda ka digo, ani dunduko dinga berã adia tipa ka mangasunge wa akandoro sa tiibe Kristo.

^ [1] (genewaraga 3) Atambuahe 87:5, 6 nayugo gupai nga si nawira wa kumbatayo, rimo agu aboro dunduko nika zogarago na Yesu ngbangbaturũ yo, i nika yugoho ayugo.Rom. 8:19.

^ (genewaraga 15) Wa vura duhe nga Amokedi 2:33 nayugo gupai nga aYesu na Yekova du na sia agi aboro re, Yekova du nzunzu nga Mburu gu yambahe re.

^ [3] (genewaraga 15) Ka oni aida ka ino kura apai, oni bi “Asanahe be Agedihe” rogo gu Ngbaõbambu Sinziri nangia ga Merekoko 1, 2007, kpe. 30-31 rogo pa-Ingirisi.