Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Ya mo Mo Nabi gu Ndupai si Aida Mo Sono Rogo Toro yo Ti Ni?

Ya mo Mo Nabi gu Ndupai si Aida Mo Sono Rogo Toro yo Ti Ni?

“Mo fu tiro fu gedapai, . . . na tungusapai na yugopai.”—1 TIM. 4:13.

ABIA: 45, 42

1, 2. (a) Wai du Yesaya 60:22 nadigisi tihe ti gi gaani regbo re? (b) Gini zingo du awere rogo gu papara ga Yekova riigbu du auru kpotosende?

“GU Umba pa boro adú wa ngbatunga kutu sa, gu toni ni ki ngia nyanyaki rikaaboro.” (Yes. 60:22) Gu fugo sangbanebi re nadigisotihe ti gi yangara arame re. Nirengo, rogo gu garã nangia 2015, abatungusipa Kindo nga 8,220,105 aatungusapai zaaza rogo zegino dunduko! Si naida yangara papara gu sangbanebi re du na maapai kurii aKristano wadu yo ni basasa dũ, mbiko gu Barani du ngbangbaturũ yo naya: “Mi nga Yekova; mi nikaipisa paha ti ragoho.” Wakina agu aboro du rogo gu tarambiri nakiiso gaha ato kina kumbatayo, ani ima inopa gu sonakumbatayo namanga rogo sunge sa aboro ni abawiriki. Wadu ani ni basasa dũ, wai du ani amangapai kuti gu sonakumbatayo re? Ya mo ani natungusapa Kindo zaaza na omerani dũ? Badungu awirina nafutiyo ka mangasunge ni agu abazakigene natungusapai dedede watadu moundo abazakigene. Nirengo, ani na bakere ngbarago ka bi badungu aboro i ni futiyo ka mangasunge rogo agu arago du na zingo abatungusipai rogoho watadu ka manga kura asunge nga ga Kindo.

2 Ti kina gu bangisa regbo re, ani ima bi gu zingo abi du tipa badungu abamangisunge. Adungurati wa 2,000 nakura na agarã dũ. Ka si du nga si naida abaakumba 5 rogo gu vovo adungurati re ni basasa  dũ, gure nga si naida amoundo abaakumba 10,000 rẽ ka mangasunge ababiapai rogo agarã dũ. Gipai re nayugo gupai nga si ni nyanyakipa pai fu akutu awirina nga akumba i mangi ome ka rẽ tipa wa ka i mangisunge ni moundo abaakumba. Kurigure, singia ani nga akumba watadu adee, si naida ani “nimángi ga Gbia sunge zaza.”—1 Kor. 15:58.

GUPAI SONAKUMBATAYO ROGO TORO YO AYUGOHO

3, 4. Ginipai si ayugoho foro ka manga sonakumbatayo rogo toro yo?

3 Oni gedi 1 Timoteo 3:1. Gu pa-Giriki sayo ho nga “gbata sunge,” rogoyo nga taa bee ka zio he, isoke guhe du ni tuturũ he tiro. Pauro amangisunge na gu fugo re ka nyakasa gupai nga sonakumbatayo rogo toro yo naida na bakere ome. Oni berẽnga pa gu wirina naberãpa gupai ni aida ka mangaha kumbatayo rogo dungurati. Si rengbe kadu nga ni amanganga sunge awere ni mounda abaakumba te, ono ni bi gupai nga si naida ni sonosi agu asino nga ga toro. Bambatapai nga, ni namanga ome kada ni moundo abaakumba. Kusa, ni kidu na maabangirise ka nyaka rogo toro yo ka mangasunge ababiapai. Fuani, ni kini mangisunge nyanyaki tipa ka rẽ tipa kura asunge rogo dungurati.

4 Wakina gure a, agu awirina nga akumba na adee nakpinyemu ka mangasunge abazakigene, ka mangasunge Betere yo watadu ka futiyo ka undo sunge dua Bambu Kindo, si naida i mangi ome amanga ka dati gayo asasa. Ani bingo wai Fugo Mbori angarasa rani dunduko ani mangi sonakumbatayo rogo toro yo.

ONI MANGI OME KA MANGA BAKERE SONAKUMBATAYO ROGO TORO YO

5. Wai du rengbe paranga aboro ka mangasunge Kindo na gu ome du tiyo?

5 Paranga aboro na ome tiyo ka manga bakere apai rogo ga Yekova sunge yo. (Oni gedi Asanza 20:29.) Kura paranga aboro Betere yo namangasunge gbingbida aBaibiri gbiati agu awaraga du mburuhe rii Baibiri. Badungu paranga akumba na adee namangasunge dudua aBambu Kindo na kini ngerefuoho. Ho gu gberãngo naye be ome zegino ati ni kurii rago, paranga aboro nagbiatiyo kuti sosono awirina tipa ka fu undo. Na badungu paranga abazakigene nandu na wene pangbanga ku rogo agbaria na ku rogo agu adagbarago i agumba kura afugo rogoho.

6-8. (a) Wai du kura paranga kumba sa aˈaria gako biapai tipa ga Mbori sunge, na gini sangbanaha si aye na ni? (b) Wai du rengbe ani ka “ía Yekova ka bi ko [nga] ko du ni wene ko”?

6 Si nawira wa mo ima inopa nyaka mangasunge fu Mbori na ngbaduseyo dũ. Ono na ginipai rengbe ka manga ka si du nga mo na gu bipai gu wirina nga Aaron anidu na ni mbata? Wa vura duhe nga i asonosi ko rogo gu kporo nga ga aKristano, ko aya, “dunguratise gbiati tungusapai anidu ni kpakpasiraa ha bangire.” Ko aaida ka mangasunge fu Mbori na ngbarago ono ko kini bakibangiriko tipa gu ndupai ko aadunga ti ni na ngbarago ya. Ginipai ko amangihe?

7 Aaron atona ka geda Ziazia Kekeapai dedede, mbakada adunguratise na kini fuku akaragapai ti regboho. Ko atona kaa kpara fu Mbori dedede. Ko atona ka sonakumbatayo rogo toro yo wa gako nyemuse tipa Yekova aakio. Naatona ti gu regbo re, Aaron ima gbia ngbarago ti mangasunge abazakigene, mangasunge fu undo ti regbo agberãngo na tungusapai rogo kura aringara. Aaron namangasunge awere Betere yo na ko nga bakumba. Wai du ko abi gu gene raka ko asiaha re? Ko aya, “mi ima ‘ía Yekova ka bi ko ko du ni wene ko.’ Mbiko agu amaku ko nafuhe fere, mi nabihe nga si naida mi mangi gako sunge amanga ni bakerehe, na si ima ye na bakere amaku fere.”

8 Bake papara atambuahe abibia nga: “Agu yo nagbata Yekova a nga wene he ho sa ka zingo ho mangi yo te.” (Oni gedi Atambuahe 34:8-10.) Nirengo, Yekova abanga gberãrago ti agu aboro namangasunge fuko zaaza te. Ani  nitirani “ía Yekova ka bi ko [nga] ko du ni wene ko” wa ani amanga gako sunge na omerani dunduko. Na ka ani irisi Mbori na kpotoraniyo dunduko, ani nika gbia gu ngbarago ka i aringbisanga ha na kurahe ya.

MO KPATAGARA NA KA OMERO BATINGO YA

9, 10. Tipagine du duhe ti ni ni nyanyakipa pai kadu na gu sino nga ka ‘súnguda’?

9 Wa mo nikaa manga ome ka dati gamo asasa, mo du na gu sino nga ka ‘súnguda.’ (Mika 7:7) Yekova nasongoda gako ruru amoyambu ti aregbo dunduko, wa vura duhe nga kura aregbo kinaho ko naima rengba ka mbuyo i sungudi amomu watadu ariapai mangi nibipa agu apai du tipa yo. Ko akido Abarayama nga ko nika vunga kumbagude, ono si aaida gu bakumba re du na idapase gbiati zerangbaduse. (Eb. 6:12-15) Wa vura duhe nga Abarayama apidi tipa dungu agarã tipa i vungu Yisaka, omeko aabatanga te na Yekova aabanga gberãrago tiko a te—Bam. P. 15:3, 4; 21:5.

10 Taatapai ngaha ka sungudopai te. (Snz. 13:12) Ka si du nga ani nikaa berãkurii agu apai amanganga furani wenengai ya, si ima rengba ka ba bakere gberãrago tirani. Kuba gure, si naida ani mangisunge na gaani regbo tipa ka nyakasa tirani rogo toro yo tipa ka rẽ. Ani bingo agene biata rengbe ani ka mangaha ngbaha.

11. Gini asino nga ga toro rengbe ani ka sonosaha, na tipagine du duhe ti ni na nyanyakipaha?

11 Mo sonosi agu asino nga ga toro. Ka ani ageda Fugo Mbori na kini berẽkuriihe, ani ima rengba ka sonosa agu asino nga tatamana, dudunguro bipai, rugatinapai, inohe, tandu berãpai, na ruru berã. Agu asino re na nyanyakipaha fu agu aboro nangbe kumbatayo rogo ndikidi irisombori yo. (Snz. 1:1-4; Tito 1:7-9) Wa ani kaa geda gaani awaraga du mburuhe rii  Ziazia Kekeapai, ani rengbe arengba ka ino ga Mbori berãpai tipa dungu apai. Aˈuru dunduko ani agbiatirani na agu apai nakoda aũngbarago, vorokoo na mbakadatise, mangasunge na marã, gbiati mangapai na kura aboro. Ka ani amanga agu apai ani awirikaha rogo Ziazia Kekeapai yo, ani rengbe arengba ka manga gu diaberã nafu ngbarago fu Yekova.

12. Wai du rengbe agu aboro du rogo dungurati kadu ni agu aboro i akido akido kutiyo?

12 Mo du ni gu boro aboro akido kuti ni. Singia ani nga akumba watadu adee, si naida ani mangi ome ka ngerafuo agu asunge nga ga Kindo dunduko ani agbiaha. Wa Nemaya angia banyaki, si aaida ko sia aboro i ngerefuo asunge dagba ga Mbori aboro. Ada ko asiayo? Ko amangisunge na agu aboro naagunde ti Mbori, kidu ni ruruyo, na aboro anaakido akido kutiyo. (Nem. 7:2; 13:12, 13) Zavura areme, “gu pai i nakpi nyemu he ti abaringbisipai nga, boro du ni irarengo.” (1 Kor. 4:2) Aboro azanganga bi gu wene apai oni amangaha te.—Oni gedi 1 Timoteo 5:25.

13. Wai du rengbe mo ka pekafuo gu kpiapai nga ga Yosefa ka si du nga kura aboro namanga foro gbegberẽ?

13 Yekova kpuruwa roni. Ginipai rengbe mo ka mangaha ka si du nga aboro namanga foro gbegberẽ? Isoke mo ima rengba ka rugusapai kubara ro yo ni ipo. Ono tie, ti gu kura aregbo, ho mo asongoda pai ni kubara ro yo nyanyaki, gure nga mo nagbarasaha kina kumbatayo. Awirina Yosefa arungosiko, ono ko aakpingo pai kutiyo te. Kusa, i akitingbanga Yosefa na ki bako ku bambukiso yo. Ono tie, ko ambu Yekova ko ngbe kumbatayo fuko ti gu kpakarakpakara regbo re. Sangbanaha angia gine? “Sangba Yekova aasadi ko” watadu ka kpuruwa ko. (Tam. 105:19) Ho agu aˈasada re anyasi ni, Yosefa arẽ tipa kparakpara sunge. (Bam. P. 41:37-44; 45:4-8) Wa mo nikaa gbiatiro na kere akpakarapai, mo kpari fu Mbori tipa tatamana, mo ni mangipai na kini fura na zera, na mo sana Mbori tipa ko fu ome foro. Yekova nika undo ro aundo.—Oni gedi 1 Petero 5:10.

MO SONOKUMBATAYO ROGO TUNGUSAPAI YO

14, 15. (a) Tipagine du si aida ani ‘niberẽpa’ gu gene ani atungusapai ngbaha ti ni? (b) Wai du rengbe mo ka tungusapai ringbisihe kina kuti agu apai namanga? (Oni bi gu sura duti tonatonaha na gu sanduki nga “ Ya mo Mo na Nyemu ka Asada Kura Gene Tungusapai?”)

14 Pauro angarasi Timoteo nga: “Mo fu tiro fu gedapai, . . . na tungusapai na yugopai. Mo bérẽ pa tiro, na ga yugopai.” (1 Tim. 4:13, 16) Timoteo aima du ti gu regbo re na inohe rogo tungusapa Kindo yo. Ono wa si avura duwo, gako tungusapai arengbe kadu na diabese ka si adu nga ko ‘naberãpa’ gako yugopai. Ko aarengbanga ka bi gupai taata gbua nga aboro nika karagapai akaraga ni wenehe kuti gu gene ko anaatungusapai dedede ngbaha te. Tipa gako yugopai nizi ngbaduyo yo azio kindi, si aida ko ni ariaha ringbisihe kina kuti gayo azingo. Wangia ani abatungusipa Kindo, si naida ani mangi kina gu ngisapai re.

15 Dedede, ho ani atungusapai ni kporo na kporo, ani nabi gupai nga aboro tii kporo te. Rogo kura arago, ani arengbanga ka rimo ku rogo kura agu abambu du na dungu avuruhe yo watadu du na andugu pati ni te. Kangia gure nga rengo tipa gamo dagbarago, si angba gbe mo gbata kura agene tipa ka tungusa wene pangbanga ngbaha.

16. Wai du rengbe tungusapai rogo gu ba du na dungu aboro rogoho kadu ni wenehe?

16 Tungusapai rogo gu ba du na dungu aboro rogoho nga wene gene sa tipa ka gbandaka wene pangbanga. Badungu awirina ima du na diabese na ki gbia ngbarago ti gi ngbatunga gene tungusapai re. I nadia regbo kaa tungusapai fu aboro rogo agu aba agatara gbiati atarambiri aru rogoho, nzengu yo na rogo agu aba aboro aongoda rogoho, gbiati gu kura aba du aboro rogoho ni dunguyo. Gu Dezire Yekova du na rugatinapai rengbe ka tona fugo na boro ni fura ni tipa agu apangbanga na susa, ka fura wenengai bara awiri gu boro re watadu ka sanahe tipa gani sunge. Ka i ta tona kaa fura wenengai, gu batungusipai re rengbe ka  kusapai rogo Ziazia Kekeapai yo na ki sa gu boro re ni karagapai. Ga gu boro re karagapai rengbe ka sa gupai nga i sakipai berewe gbe rogo Ziazia Kekeapai yo.

17, 18. (a) Wai du rengbe mo kadu na wingbaduse ka tungusapai rogo agu aba du na dungu aboro rogoho? (b) Tipagine du gu sino Davide ti ni nangia ka sambuo Yekova na nyanyakipaha foro wa mo atungusapai?

17 Ka si du nga si ni kpakarakpakaraha foro ka tungusapai rogo gu ba du na dungu aboro rogoho, ka omero batingo ya. Wirinarani nga Eddie nga bazakigene rogo gu gbata nga New York City, anaagunde agunde kaa fura na boro dagba aboro. Ono tie kusa, ko agbia wingbaduse. Ginihe naundo ko? Ko aya: “Ti regbo gaani irisombori nga ga aborokporo, mi na diare namanga wetekapai ka gbia karagapai kuti agu akango na berãpai nga ga kura aboro. Ani naasana kura awirina a tipa kura aberãpai.” Awere Eddie na ngbarago ka tungusapai rogo agu aba du na dungu aboro rogoho.

18 Wa mo nika ino abirĩ tungusapai na ki gbia wingbaduse, gamo sonakumbatayo rogo toro yo nika duadu ni yuguyuguhe gbaiga. (Oni gedi 1 Timoteo 4:15.) Kurigure, zanga kapa, mo nika sambuo gu Barani du ngbangbaturũ yo wakina Davide nga guko nabibia nga: “Mi asambua Yekova ti arago dunduko; tambuako adu ngbare kindi. Mbisimore nasambua tihe rogo Yekova yo; rungorungo aboro gi pa ha, ki ngi angi.” (Tam. 34:1, 2) Na si rengbe kadu nga sangbana gamo tungusapai nasa bayee aboro i du na ngbarago ka kodatiyo na mo rogo ndikidi irisombori yo.

MO SAMBUO MBORI NI SONA MO ROGO TORO YO

19. Tipagine si aida ga Yekova amoyambu du ti ni na ngbarago ka si vura du vurũ nga agu apai du tipa yo ambunga gene fuyo te?

19 Davide abibia a nga: “Ako Yekova, gamo mangaapai afú atambuahe foro dunduko, gamo ziazia aboro dunduko asámbua ro. I agúmba pa gu taarimo nga ga ga ngbi, ki pe pa ga ngarã, ka yugo pa ga kangarã mangaapai fu awiri aboro, na gu taarimo nga ga ga baiiriwo ngbi.” (Tam. 145:10-12) Nirengo, agu afugo re nayugo gu berãpai nga ga ruru aDezire Yekova naabayo. Ono na ka si du nga mo arengbanga ka tungusapai wenengai te mbiko kaza watadu gbinza? Mo ni tingidi gupai dedede nga wa mo nikaa tungusa wene pangbanga fu agu aboro nangera fuoro na fu kura aboro, gu gamo ziazia sunge re nafu taarimo fu gaani Mbori. Kangia mo bambukiso yo mbiko gamo idapase, si nawira wa ho du rengba ni mo nafura afura tipa rengo, na gure nasa ngbadu Yekova yo si ni ngi angi. (Snz. 27:11) Kina gu ngisapai re a rengbe ka manga ka si du nga mo rogo gu kporo du aboro rogoho na gayo aida ni bakiakia ono mo kini kakuti gamo apai nga ga toro. (1 Pet. 3:1-4) Ka apai vura du tipa ro ni kpakarakpakaraha, mo rengbe arengba ka sambuo Yekova na ki mangi sonakumbatayo rogo toro yo.

20, 21. Kangia i fu bakere asunge foro rogo ga Yekova riigbu, wai du rengbe mo kadu ni maku fu kura aboro a.

20 Nirengo, Yekova nika fu maku afu foro ka si du nga mo namanga sonakumbatayo rogo toro yo. Isoke ka mo mangi bete ariapai rogo gamo ambakadapai yo watadu gamo gene raka, mo ima rengba ka tungusa gu rengo du rogo Fugo Mbori yo ni bakerehe fu agu aboro du na zingo maabangirise. Kurigure, ka mo sono kumbatayo rogo toro yo na ki mbupa kura gamo apai, si rengbe ka ye na bakere aundo fu akuarani aidipase. Na mbiko gu ome mo amangaha na umbasitise rogo dungurati, mo nika gbia gu mosoro nga gu nyemuse, tambuahe na songodahe nga ga agu aboro nakpinyemu Yekova.

21 Singia ani ima dia dungu agarã watadu kina bete adiwi kutingba ga Yekova sunge, ani dunduko rengbe arengba ka sonakumbatayo rogo toro yo. Ono wai du rengbe agu aKristano naima nyaka ka undo vovo aboro i sono rogo toro yo? Ani nika wisigoho rogo gu wisigopai ngbefuo gere.