“Agu avura dunduko naamangi bakuru kusayo . . . ka i ringbisinga ha na gu bakere vura namanga awere rogo Putu te.” Rogo gi gene re, gu Ngbaõbambu Sinziri nangia ga Mbirinvuo 1, 1915 asakipai tipa gu bambata vura nangia ga zegino nga gu nakodi aringara 30 ku rogoho niyangaraha. Mbiko gu vura re, gu Ngbaõbambu Sinziri re ape gupai nga: “Vura ima ka na gu sunge [nga ga Kindo], gbe Germani yo gbiati France yo.”

Ho Abawiriki Ziazia Kekeapai agbiatiyo ni na gu vura naamanga rogo zegino dũ re, i ainongo gu rengo nzunzu naadu tipa pa zanga rimiso aKristano tiyo ku rogo vura te. Ono wa si avura duwo, i aima diaberã ka takapande wene pangbanga. Gu kumba nangia Wilhelm Hildebrandt aaida ka manga gu sunge nga ga Kindo, sidu, ko ki sanahe i kedi agu awaraga fuko nangia The Bible Students Monthly rogo pa-Faransée. Anga ko adu France yo ni bakparaka abuku pambori te, (gu boro namangasunge kindo ti aregbo dũ) ono tie, ko angia gu basovura nga ga Germani. Kina ngba aboro France naazere ka bi gupai nga gu boro naavo roko asekere kangia kare kutiyo aatungusa gu pangbanga nga ga zereda.

Agu awaraga Abawiriki Ziazia Kekeapai akehe i kusihe rogo Ngbaõbambu Sinziri si ayugu gupai nga badungu agu Abawiriki Ziazia Kekeapai nga ga Germani yo adu na nyemu ka tungusa gu wene pangbanga nga ga Kindo ho i adu ni tingba vura yo. Wiriba Lemke naadu dagba agu asekere naasovura bangiri ime ape gupai nga aboro bisue dagba agu aboro ko aamangasunge nayo adu na nyemupai. Ko akepai nga, “zavura rogo gi bakurungba re, mi nake zuzuhe ka tambua Yekova.”

Georg Kayser andu ku ba vura yo ni sekere na ki karaga tiko ku kpuko yo ni ga Mbori moyambu. Ginipai namangi? Si nawira wa ko agbia gu waraga nga ga Abawiriki Ziazia Kekeapai, ki di gu rengo kugume nga ga Kindo na ngbadukoyo dũ, na ko ki mbu sovura. Fuani, ko ki tona manga gu sunge naakodanga sovura ya. Tingbafuo vura nyasi, ko amangisunge ni zaaza bazakigene tipa dungu agarã.

Wa si avura du nga Abawiriki Ziazia Kekeapai wirikihe aruganga tiyo na pa zanga rimiso tiyo ku rogo avura yo te, gayo abipai na mangaapai adu kia ti agu abipai na mangaapai nga ga agu aboro naadu na ngbarago tipa vura. Baraho aboro birĩ zogarago gbiati abangbembatayo rogo pambori aatumba abeere ni ku ariyo  nga ga aringara, Abawiriki Ziazia Kekeapai aatumbapa “Gbia Zereda.” (Yes. 9:6) Wa vura duhe nga akurayo akparanga tiyo kusayo dunduko ti agu apai nga ga vura te, i aima ida kuti gupai gu Bawiriki Ziazia Kekeapai nangia Konrad Mörtter agumbaha nga, “Mi ima ino gupai rogo Fugo Mbori yo ziazia nga si aidanga Kristano imi boro te.”—Gate 20:13. *

Hans Hölterhoff natakapande gu magazini i anaayambaha nga The Golden Age

Germani yo, ndiko aambunga gene fu agu aboro naka ka mangasunge asekere mbiko sangbakpotoyo yo te, Abawiriki Ziazia Kekeapai bangeyo aima susa 20 aka ka kodatiyo ku rogo sunge asekere. I aya tipa agu akurayo wẽ i angia airapopo, wa Gustav Kujath i andu na ko ku rogo gu bambungua nga ga airapopo na ki rukö na ngua. I aba Hans Hölterhoff ku bambukiso yo a mbiko ko aka ka mangasunge asekere, na ko aka agu asunge bambukiso yo dũ naadu na ngbaya dagbaha na pa sovura. Ababanda bambukiso avodi abeko na anduko daho si adani nga tautau. Ho gipai re aasanga ko ni ko mbu gako diaberã ya, ababanda bambukiso anangi ko nga i nika imoko. Wa si avura duwo, Hans aru nyanyaki ti regbo gu vura re dũ.

Gu kura awirina i aziyo aka sunge asekere na ki sanahe i fu gu sunge fuyo naakodanga sovura ya. * Johannes Rauthe amangi gu ngbatunga diaberã re na i ki kedi ko ko ndu ka mangasunge mbakada agene gatara. I afu sunge fu Konrad Mörtter bambungua yo na ki fu Reinhold Weber ko mangisunge ngerafuo aborokaza. August Krafzig adu na ngbarago nga gu sunge ko aamangaha aasanga ko ko du tingba vura yo te. Agi Abawiriki Ziazia Kekeapai re gbiati kura aboro naadu wakina yo aima diaberã ka mangasunge fu Yekova na gu inohe i adu na ni nibipa wai i arugutiyo na pa guhe nga nyemuse gbiati du ni ruruse.

Mbiko gu mangapai nangia ga Abawiriki Ziazia Kekeapai ti regbo vura, agbia ngbii atona ka wisigo yo nyanyaki. Rogo agu agarã nangbefuo gure, Abawiriki Ziazia Kekeapai Germani yo agbiatiyo na akutu angbanga tipa gayo sunge tungusapai. Tipa ka undo yo na gipai re, gu be-basunge du Germani yo asia aboro Betere Magdeburg yo i ni ngerakurii agu apai nabipa pe angbanga.

ADezire Yekova atona ka kpuruwa gayo giarogopaiyo yeeye nibipa kpara Kristano ti ni ti birĩ zogarago. Ti gu regbo ue vura nga ga zegino atona, i akakuti padu yo ni ruru yo na ki zanga rimiso tiyo ku rogo sunge asekere. Sidu, i aabi yo wa avura gu ringara nga Germani na i ki rungosiyo ni kerehe. Ono gipai re kia ti gu pangbanga nika ye fuo gi kekeapai re rogo gu riipai nga “Gaani Kuru Apangbanga.”—Gaani kuru apangbanga Putu yo.

^ genewaraga 7 Oni bi gu pangbanga du tipa agu Abawiriki Ziazia Kekeapai nga ga ringara aNgirisi yo ti regbo Bambata Vura Nga ga Zegino rogo gu kekeapai nga “From Our ArchivesThey Stood Firm in an ‘Hour of Test’rogo gu Ngbaõbambu Sinziri nangia ga Merekoko 15, 2013 rogo pa-Ingirisi.

^ genewaraga 9 Gi gayo mangapai re i afu berãpai tipaha rogo gu buku nangia Millennial Dawn Volume VI (1904) na rogo gu Ngbaõbambu Sinziri nangia ga Buza 1906 rogo pa-Germani. Gu Ngbaõbambu Sinziri nangia ga Mbirinvuo 1915 akpuruwa gaani giarogopaiyo na ki fu berãpai nga si naida Abawiriki Ziazia Kekeapai ne rimiso tiyo ku rogo sunge asekere. Ono tie, gi kekeapai re akuranga rogo gu nangia ga pa-Germani te.