KPAKARAAPAI: Badumo na kpoto anya angia gu bangua ahe abake Ziazia Kekeapai na abakeapai anaake pai ti ni. (2 Timoteo 4:13) Wai du agi ahe re asaha ni kpakarakpakaraha tipa Ziazia Kekeapai bati?

Si taata badumo sipi, zehe ki gbandaka na si ki da ni rurungburaha. Abawirikipai tipa agu apai nga ga Ezipeta nga Richard Parkinson na Stephen Quirke aya, “kpehe rengbe ka kuruko na si ki satihe ni kina kungbo agire nvutu ki ga ki hihe. Ho i aigoho kaĩkaĩ waraga badumo ni, si rengbe ka nvutö watadu si rengbe ka zirã be ndomo na agbiro ki rengbe ka rihe, gbe angbari narihe ho i aigoho ni kutii sende yo.” Fuo i kuru bara gu kura awaraga nga ga badumo, uru watadu ndomo azihe na si ki saha si gbere ni ipo.

Kpoto anya naraka gbe ti badumo, ono si nagberã agberã a ka i abandanga ha ya watadu ka i mbuhe fu kere uru watadu ndomo. * Berewe a, kpoto anya ni guhe du paha ti agbiro ni kerehe. Nibi gipai re, gure nga gu ndupai dungu agu awaraga i akehe bakuru kusayo abatanga ti ni da ku awere ya. Sidu tie, ka Ziazia Kekeapai akuruko, ka gu pangbanga du rogoho agberẽ na ni sa.

WAI BAIBIRI ABATI: Gu ndiko nga ga aYudo adu nga abakindo dunduko du wa ka i ‘ké kpia gi ndika re tipa tiyo ku rogo kitabu,’ nga agu abambata akitabu bisue nga ga Baibiri. (Pa Fu Rugute ni Ue he 17:18) Kurigure, abakeapai aima kusa dungu agu aBaibiri i akehe ni bee ti bambata sa kama agarã Fuo Batikayo Kristo, Ziazia Kekeapai anidu rogo abambutiria dũ rogo ringara Yisaraere na zavura rogo gu tuturũ arago nga Makedonia! (Ruka 4:16, 17; Amokedi 17:11) Wai du kura kuru kekeapai ni bee abati da ku areme?

Gu kekeapai ni bee du rimoho nga Kaĩkaĩ Waraga Baime Tikpo araki tipa akama agarã rogo runge yaro yo rogo ugu ngbii

Wene bawirikipai tipa Vovo Ndika nga Philip W. Comfort aya, “aYudo anaamaa kaĩkaĩ waraga nga ga Baibiri ku rogo andukura watadu arunge tipa ka bandaha.” Wa goapai ayugoho, aKristano andu kumbatayo kindi a na gu sino re. Ni sangbana gupai re, i ima kura bara agu aZiazia Kekeapai i akehe ni bee ni igiigihe rogo arunge, na rogo asanduki gbiati ayaro na rogo agu arago du ni kere uguhe.

SANGBANAHA: Akutu apapara agu aZiazia Kekeapai i akehe ni bee nga gu naima dia agarã naima susa 2,000 ima bata da ku awere. Kuru kekeapai ho du na gu dungu kekeapai i akehe ni bee bakuru kusayo wa Ziazia Kekeapai te.

^ genewaraga 5 Ni kpiapai, gu waraga naayugopa gu ranirii nga ga Amerika, i akehe ti kpoto anya. Si ata dianga agarã 250 te, ono zehe ima gbandaka na ka boro gedinga ha berewe te.