KPAKARAAPAI: Badungu abangbembatayo nga ga birĩ zogarago gbiati ga apambori yo adu na agu asasa du kia ti gu pangbanga nga ga Ziazia Kekeapai. Dedede, i anaamangasunge na gayo pagbia ka rugusa aboro ti du na Ziazia Kekeapai beyo, ka kusa ha watadu ka sa ha ku rogo kura fugo. Oni bingo agi akpiapai du ue re:

  • Bara rogo gu garã nangia 167 Mbata fu Batikayo Kristo: Seleucid Bakindo Antiochus Epiphanes, naaida ka sa aYudo ngbaome ku rogo gu pambori nga ga aGiriki, ko afu zinahe i gbarasi agu aZiazia Kekeapai dunduko nga Kuru Ndika. Bake kuru apangbanga nga Heinrich Graetz, akepai nga, gako abanyaki “anaasipo agu aBaibiri dunduko i anaagbiaha na kini zokodihe, na kini imi agu aboro dunduko nanaagedaha tipa ka gbia ome na wasa behe.”

  • Bangbanda agu agarã nangia 500 na 1500 Fuo Batikayo Kristo: Kura abangbembatayo rogo gu pambori nga ga aKatoriko adu na bakere gberãrago mbiko gayo aboro pambori aatungusa gupai du rogo Baibiri kuba agu ayugopai nga ga aKatoriko, na kini bi agu aboro ni asamungu naanidu na Baibiri beyo kuba gupai nga i du na kitabu Atambuahe rogo pa-Tiriani. Kura rondo sa nga ga kanisa arũ ndiko fu gayo akumba nga ‘i mangisunge sirisiri ka gbata agu asamungu re dedede rogo agu akporo na agu aba dunduko i anibihe wa i rogoho, na gu kporo i nika nibi samungu rogoho i gbarasihe.’

Ka avura Baibiri adu na diabese ka gbarasaha, ka gu pangbanga du rogoho aima inga.

Gu sasa Ziazia Kekeapai ku rogo pa-Ingirisi nga ga William Tyndale aima bata wa vura duhe nga i arugusi pa saha, kini zoho, na ki imi Tyndale rogo gu garã nangia 1536

WAI BAIBIRI ABATI: Gu tua nga ga Bakindo Antiochus adu tipa agu aboro naaraka Yisaraere yo, ono aYudo aima du rogo kura dungu aringara. Nirengo, wene abawirikipai wisigihe ki bihe nga bara ti bambata sa kama agarã Fuo Batikayo Kristo, 60 rii kama nga ga aYudo aarakanga Yisaraere yo te. AYudo anaabanda Ziazia Kekeapai rogo gayo abambutiria, nga gu Ziazia Kekeapai agu rikaaboro nangbefuo yo amangisunge na ni kodihe na aKristano.—Amokedi 15:21.

Bangbanda agu agarã nangia 500 na 1500 Fuo Batikayo Kristo, agu aboro naakpinyemu Baibiri ahi arungosiro na kini sa Ziazia Kekeapai na kini kusihe ti kura ahe kindi. Zavura mbata fu i kusi makana gbingbida awaraga bara rogo bebere 15 kama agarã, si nawira wa apapara Ziazia Kekeapai aima du ho rogo afugo wa 33. Fuo gure ngbutuko, i atona ka sa Ziazia Kekeapai na kini kusihe kisusi wai si anaamanga mbata.

SANGBANAHA: Wa vura duhe nga agu abakindo naadu na ome tiyo gbiati abangbembatayo rogo apambori asovura kuti Baibiri, si nga gu buku i naima kparakaha na ki saha kisusi abuku dunduko rogo gu pangbanga yo nga ga aboro raka. Si ima manga ariapai na gu ndiko na afugo nga ga kura aringara, gbiati gu raka nga ga amirioni aboro.