Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Agu Aboro du na Tambuahe Tipa ga Mbori Weneringise Arẽnga Aboro Tipaha Ya

Agu Aboro du na Tambuahe Tipa ga Mbori Weneringise Arẽnga Aboro Tipaha Ya

“I afu he fu rani dunduko . . . undahe ku ri undahe.”YO. 1:16.

ABIA: 1, 13

1, 2. (a) Oni furanga tipa ga Yesu sanza du tipa baira ati bakakue. (b) Wai du gu pangbanga re ayugopa gu sino nga ga gamahe na gu weneringise arẽnga aboro tipaha ya?

ROGO kura wiso sa, barũ bakakue andu ku nzengu yo tipa ka gbata aboro i mangisunge rogo gako ati bakakue. Agu aboro ko agbiayo i ki idipa gu marã ko apepaha tipa gu sunge re na ki ndu ki tona sunge. Ono tie, bairasunge aaida badungu aboro tipa gako sunge, ko ki karagatiko rogo gu uru re ku nzengu yo tipa ka gbata dungu aborosunge, ko ki pepa gu marã nadaada zavura fu agu aboro ko agbiayo ti saa biata nimbidi ku nyemu. Ho nyemu ada ni, ko ki dungura gako aborosunge dunduko tipa ka fu gayo marã sunge fuyo, ko ki fu kina bakio marã sa fuyo ni basasa dunduko, singia aguyo namangisunge tipa dungu asaa watadu aguyo namangisunge tipa kina saa sa. Ho aguyo naatona sunge mbata agi gipai re ni, i atona ka kpakanahe. Barũ bakakue ki karagapai fuyo nga: ‘Mo naaida nga gu marã mi nipe paha te? Ru ngaha mi fu marã fu gimi abamangisunge wa mi akpi  nyemu he te? Gberẽhe agberã tiro wa du mi ni boro weneringise?’Mt. 20:1-15.

2 Gu ga Yesu sanza re natingida rani na ga Yekova sino sa i nafura tipaha dedede rogo Baibiri yo, nga gako “undahe” watadu gu weneringise arẽnga aboro tipaha ya. (Oni gedi 2 AKorindo 6:1.) Agu abamangisunge namangisunge tipa kina saa gbua sa si adu wa ka i ya i aarẽnga tipa ka gbia gu marã akurayo agbiaha te, ono baira ati bakakue aima yugo bakere weneringise fuyo. Wene bawirikipai sa akepai nibipa gu fugo nga “gu weneringise arẽnga aboro tipaha ya” i nasaha ku rogo dungu aBaibiri nga “undahe” ki ya: “Gu memepai du tipa gu fugo re nga si tipa gu gamahe du gbua boro arẽnga tipaha ya, nga guhe i afuhe fu boro ni amanganga sungehe amanga ya na ni arẽnga na ni aya.”

GA YEKOVA GAMAHE NGA GA WENERINGISE

3, 4. Tipagine du Yekova ayugu weneringise ti ni fu aboro dũ, na wai du ko ayuguhe?

3 Ziazia Kekeapai nafura tipa ‘gu gamunihe nga ga ga Mbori undahe.’ (Ef. 3:7) Tipagine du Yekova afu gi “gamunihe” re ti ni na wai du ko afuhe? Ka si nidu nga ani namanga agu apai dunduko Yekova akpinyemuhe berani ni rengberengbehe, ka si du nga ani ima rẽ tipa gako weneringise. Ono a wa duhe, ani amanganga ha wo te. Si du gu tatamanatatamana Bakindo nangia Soromo akepai ti ni nga: “A nga ruru boro auru kpotosende no namanga wenepai, zanga manga ingaapai te.” (Batu. 7:20) Wakina gure a, gu mokedi nangia Pauro aya: “Aboro aingi ainga dũ, ki ti bungudu ti ga Mbori taarimo,” na “mosoro ingapai nga kpio.” (Rom. 3:23; 6:23a) Gure nga gupai ani arẽ tipaha.

4 Ono tie, Yekova ayugu gako nyemuse fu aboro ingapai ni manga ko gu bakerepai nga ga weneringise i aarẽnga tipaha ya. Ko akedi gako bakere gamunihe dagbaha yo dũ nga “bangisa Wiriko,” ku auru kpotosende no ko kpi tipa rani. (Yo. 3:16) Sidu, Pauro akepai ti ni nibipa Yesu ya i amoi “kpakpari irisa riko yo na taarimo bambiko hi kpio, ya ko ka hia kpio tipa aboro dunduko be ga Mbori undahe.” (Eb. 2:9) Nirengo, “ga Mbori gamunihe gbua nga nyenye unga rogo Kristo Yesu yo gaani Gbia.”Rom. 6:23b.

5, 6. Gini sangbanapai nakura ho (a) ingapai akindo ni kurirani? (b) gu weneringise arẽnga aboro tipaha ya akindo ni kurirani?

5 Wai du aboro adi ingapai na kpio nga gu namanga rani dunduko? Baibiri nasaka ha nga: “Kpio akindo mbiko gu boro sa [Adamu], mbiko ga gu boro tindika sa” ri atita Adamu. (Rom. 5:12, 14, 17) Ono tie, si ni pa ngbarago nga, ani ima rengba ka sia gupai nga ka ingapai kindongo kurirani berewe ya. Ho ani ayugo idapase ni kuti ga Kristo motumo, gure nga ani nambu ga Yekova weneringise arẽnga aboro tipaha ya si kindo kurirani. Wai du duhe wo? “Ho ingapai nimoi pai ni, undahe nimoi pai amaa ki susi; ya wa ingapai akindo ni kpio, ga Mbori undahe kindo a wo rogo rurupai yo sa nyenye unga mbiko Yesu Kristo.”Rom. 5:20, 21.

6 Wa vura duhe nga ani kindi nga aboro ingapai, si aidanga ani mbu ingapai si moipai kurirani te. Ho ani aingapai ni, ani nasana Yekova tipa ko mbupai furani. Pauro afu zahe fu aKristano nga: “Ingapai afu nga ri roni te; bambiko oni tii rugute te, oni kina tii undahe.” (Rom. 6:14) Sidu tie, gu weneringise arẽnga aboro tipaha ya nakindo kurirani. Na gini sangbanaha? Pauro asakihe nga: “Ga Mbori undahe . . . niraba rani ya, ani ta mbu agu apai zanga sinombori na gu nyemuahe nga ga zegino nidu  na rugatise, na rurupai, na sinombori, rogo gi zegino du awere re.”Tito 2:11, 12.

GU WENERINGISE ARẼNGA ABORO TIPAHA YA NI YUGUYUGUHE NGBA “DUNGU” AGENE

7, 8. Ginihe pa yugo Yekova gako weneringise arẽnga aboro tipaha ya ngba “dungu” agene ayugoho? (Oni bi agu asura duti tonatonaha.)

7 Gu mokedi nangia Petero ake gupai nga: “Wa i agama he fu boro kina wo a ni mangi pa akurani na ni, wa wene babanda gu dungu agamahe nga ga Mbori.” (1 Pet. 4:10) Ginipai gupai re ayugoho? Si nayugo gupai nga ka ani vura gbiatirani na kina gini ngbatunga asada vurũ rogo gaani raka yo, Yekova rengbe arengba ka undo rani ani mangipai kutini. (1 Pet. 1:6) Yekova nikaa yugo gako weneringise ayugo kindi furani tipa ani dibe aˈasada ni basasa dũ.

8 Nirengo, Yekova nayugo gako weneringise arẽnga aboro tipaha ya ngba dungu agene. Gu mokedi nangia Yoane akepai nga: “I afu he fu rani dunduko kina yo du gako hibepai ni, undahe ku ri undahe.” (Yo. 1:16) Gu dungu agene Yekova ayugo gako weneringise ngbaha naye na dungu amaku furani. Gine nga bete agu amaku re?

9. Wai du ani agbia undo ti ga Yekova weneringise arẽnga aboro tipaha ya, na wai du rengbe ani ka yugo gaani tambuahe tipaha?

9 Mbupai furani ti gaani aingapai. Mbiko ga Yekova weneringise arẽnga aboro tipaha ya, ko nambupai furani ti gaani aingapai ka ani saberã rani na ki sovura nyanyaki kuti gu sino nga ga manga ingapai du tirani. (Oni gedi 1 Yoane 1:8, 9.) Si naida ga Mbori inapai sarani ani du na tambuahe na ki fõ rani ani taasipa ko. Ho Pauro akepai ni fu akurako mbedimbedi aKristano, ko aya: “Bambiko [Yekova] abatasi rani be tandu bitimo, ki rimisi rani ku rogo gu ngbi nga ga Wiriko, du nyemuko ti ko gbe. Gaani motumo du rogo wiriko yo a, na pa vu rani ti gaani ingaapai.” (Koro. 1:13, 14) Pa mbu Mbori pai furani ti gaani aingapai nazaka gene furani tipa kura dungu amaku.

10. Ginipai ani agbia ngbarago behe mbiko ga Mbori weneringise arẽnga aboro tipaha ya?

10 Du na wene pagume na Mbori. Mbiko gaani ingapai, ani aima du ni avura Mbori tona kinaho i avungurani ni. Pauro aima ino gipai re na ki ya: “Ho ka ani adu ni ni avura, ka ani azeredi na Mbori mbiko kpio Wiriko.” (Rom. 5:10) Gi mbakadapai dagbarani na Yekova re nasarani ani du na zereda na ko. Pauro aringbisi gi momu re kuti ga Yekova weneringise arẽnga aboro tipaha ya na ki ya: “Wa di yo pai ri rani [mbedimbedi awirina Kristo] mbiko idapase tie, ani zezeredi na Mbori rogo gaani Gbia Yesu Kristo yo. Ko ye ani rogo ko yo a kono du gi undahe ni, ru ani ni re.” (Rom. 5:1, 2) Nairiwo gu wene maku re!

Ga Mbori weneringise arẽnga aboro tipaha ya ni yuguyuguhe rogo: Gu momu nga ka gia wene pangbanga (Oni bi genewaraga 11)

11. Wai du mbedimbedi aKristano aye na “gu kura akandoro” sa rurupai?

11 Si naye na ani sa rurupai. Ani dunduko i aavunganga rani na rurupai ya. Ono gu nebi nangia Daniere afura kumbatayo ya, ti yangara arame, “agu yo nga airatatamana,” nga yangada mbedimbedi aKristano, i nika ye na “dungu yo sa rurupai.” (Oni gedi Daniere 12:3.) Gayo sunge tungusapai gbiati yugopai nasa dungu amirioni “gu kura akandoro” i du ni ruruyo barangba Yekova. (Yo. 10:16) Ono tie, si namanga sa kina mbiko ga Yekova weneringise arẽnga aboro tipaha ya. Pauro asakipai ki ya: “I di pai ri yo gbua mbiko gako undahe rogo gu tumori yo du rogo Kristo Yesu yo.”Rom. 3:23, 24.

Gu maku nga ga kparakpee (Oni bi genewaraga 12)

12. Gini ngbanya du dagba kparakpee na ga Mbori weneringise arẽnga aboro tipaha ya?

12 Mbeda na ga Mbori mbatabakindo vurube kparakpee. Mbiko ga Yekova  weneringise arẽnga aboro tipaha ya, ko nafu gu maku furani nga ani mbedi na gako mbatabakindo nga ga ngbangbaturũ vurube kparakpee. Nirengo, Pauro ayambu ga Yekova mbatabakindo nga gu “mbatabakindo nga ga undahe” na ko ki yambu rani ani mbedi koyo duhe ni na kini fura zukazuka zanga gunde. (Eb. 4:16a) Yekova fu gi momu re furani vurube Wiriko, “ko du ani rogo ko yo zukazuka na gene [berani na] nyanyaki idapase mbiko ida ani pa ko.” (Ef. 3:12) Nirengo, pa mbu Yekova gene furani tipa ani kpari fuko ti aregbo dũ nayugo gako weneringise arẽnga aboro tipaha ya.

Gbia undo ti rago zingo (Oni bi genewaraga 13)

13. Wai du rengbe ga Mbori weneringise arẽnga aboro tipaha ya ka undo rani ti “rago zingo”?

13 Gbia undo ti rago zingo. Pauro angarasi rani nga ani mbedi na Yekova rogo kparakpee yo zukazuka, “ya ani di inapai, ki bi undahe si unda rani rogo rago zingo.” (Eb. 4:16b) Ti agu aregbo ani agbiatirani na aˈasada watadu kpakaraapai rogo gaani raka, ani rengbe arengba ka kpara fu Yekova tipa gako undo. Wa vura duhe nga ani arẽnga te, ko nakaragapai akaraga kuti gaani akparakpee, dedede vurube akuarani aKristano, “si du ani aerã ti ni wenengaĩ ki ya, ‘Gbia nga gimi mounda; mi agúnde nga wa sa te; gini pai boro ka manga re na ni?’”Eb. 13:6.

14. Wai du ga Yekova weneringise arẽnga aboro tipaha ya aundo ngbaduraniyo?

14 Gbia wasa ngbaduraniyo. Gu bakere maku naye furani vurube ga Yekova weneringise arẽnga aboro tipaha ya nga si nafu wasa fu rungorungo kpotoyo. (Tam. 51:17) Pauro akepai fu agu aKristano naadu Tesaronike yo naagbiatiyo na arungosi nga: “Gaani Gbia Yesu Kristo tigako, na Mbori nga Barani nakpi nyemu rani ki fu nyenye wasa fu rani na wene maabangirise mbiko undahe, ko ngárasi kpotoroni yo ki ninyakasi he.” (2 Tesa. 2:16, 17) Nairiwo wai si afu wasa furani ka inopa wai Yekova angerafuo rani mbiko gako weneringise!

15. Gini maabangirise du ani na ni mbiko ga Yekova weneringise arẽnga aboro tipaha ya?

 15 Du na gu maabangirise nga ga nyenye unga. Wa ani angia aboro ingapai, maabangirise nitirani te. (Oni gedi Atambuahe 49:7, 8.) Ono Yekova ima fu wene maabangirise furani. Yesu akido apefuoko nga: “Gi Buba akpi nyemu he re, nga gu ni ka bi Wiri, ki idi pa ko, nyenye unga ka du be ni.” (Yo. 6:40) Nirengo, gu maabangirise nga ga nyenye unga nga gamunihe, gu bawene gene Yekova ayugo gako weneringise arẽnga aboro tipaha ya ngbaha. Pauro naima du nirengo na tambuahe tipa gu rengo re aya: “Ga Mbori undahe akuru, niye na bata fu aboro dunduko.”Tito 2:11.

KA ONI BINGO GA MBORI WENERINGISE ARẼNGA ABORO TIPAHA YA NA PAHA TAATA YA

16. Wai du bete agu aKristano naadu mbata anaabi ga Mbori weneringise arẽnga aboro tipaha ya na paha taata?

16 Wa vura duhe nga ga Yekova weneringise arẽnga aboro tipaha ya nafu dungu amaku furani, si aidanga ani bihe nga amangapai dunduko ko abihe na paha taata te. Kura aboro adu kinaho dagba agu aKristano naadu mbata naˈasadi ka ‘sa ga Mbori undahe ni wasiro.’ (Yuda 4) Si nawira wa agi aKristano naadunga ni ruruyo re ya aaberãha nga i rengbe arengba kaa manga ingapai na kini sana Yekova ko nimbupai fuyo. Gu nagberẽ agberã gbe nga, i aasosoda awirinayo tipa i nimangi gu gbegberẽ mangapai re nayo. Zavura areme, gu boro namanga gupai re, ni ‘narungosi gu Toro nga ga undahe.’Eb. 10:29.

17. Gini nyanyaki rugute Petero afuhe?

17 Areme, Satana ima nanga kura aKristano i ni berẽhe nga i rengbe arengba ka gbia ga Mbori inapai na kini ingipai zanga pai gbiayo. Wa vura duhe nga Yekova na nyemu ka vu agu aboro ingapai nasaberã yo, ko naida ani sovura aso nyanyaki kuti gu nyemu ingapai du tirani. Gako toro adu kugii Petero ko ke gupai nga: “Were abadiangba, wa ini oni pa agi apai re mbata, oni bánda tironi gu ingapai nga ga gbegberẽ aboro, si ka ndu ka ngbe fu roni ku mbata yo, oni ki ti pati gaoni ru nyanyaki. Ono oni sóno rogo gu undahe nga ga gaani Gbia nga Batasirani Yesu Kristo, na rogo ina pako.”2 Pet. 3:17, 18.

GA MBORI WENERINGISE ARẼNGA ABORO TIPAHA YA NAYE NA TINDIRO

18. Mbiko ga Yekova weneringise arẽnga aboro tipaha ya, gini sunge du berani?

18 Wadu ani na tambuahe tipa ga Yekova weneringise, si naida ani mangisunge na gaani gamunihe ka fu iriso fuko na ka undo kura aboro. Ngba gini agene? Pauro akaragapai nga: “Ũgume be rani akia ku sangba gu undahe yo i afu fu rani, . . . ka si ngia gu ni nayugo pai, ni fu tini fu gani yugopai; ka si ngia gu ni natungusa pai, ni fu tini fu gani tungusapai: gu ni nafu he, ni mangi he amanga wenengaĩ; . . . gu ni naina pai, ni ini he esuesu.” (Rom. 12:6-8) Ga Yekova weneringise arẽnga aboro tipaha ya ko nafuhe furani, si nafu gu sunge furani nga ka mangasunge tungusapai, ka yugo Ziazia Kekeapai fu kura aboro, ka ngarasa akuarani aKristano, na ka mbupai fu agu aboro naingapai kuti rani.

19. Gini gaani asunge ani nika wisigopai tipaha rogo gu kekeapai ngbefuo gere?

19 Wadu ani na tambuahe tipa ga Mbori nyemuse, si naida si fõ rani ani mangi ome ka ‘tungusa gu wene pangbanga nga ga Mbori undahe.’ (Amo. 20:24) Ani nika wisigopai tipa gi sunge re rogo gu kekepai ngbefuo gere.