Ni rengo, gbegberẽ amaraika kinaho. Wari gu i aye ni? Mo tingidi gupai nga Mbori akusi amaraika na gu gamahe nga ga siapai. Ngbutuko fuo i kusi bambata aboro nangia Adamu na Eva, rengberengbe boro ni toro amangisunge na gako ranirii nga ga siapai ngba iraira gene ki sa aboro auru kpotosende i sa mungu. Ko aima sa Adamu na Eva i samungu kuti Mbori. (Bambatapai 3:1-7; Yugoti 12:9) Ziazia Kekeapai ayugongo rimo gi kusikusi boro ni toro re te, watadu gini bangiriba ko aamangasunge rogoho ngbangbaturũ yo a te. Ono tifuo ko samungu, i nayamba ko rogo Ziazia Kekeapai nga Satana, du rogoyo nga “Gu boro nasovura kuti kurani” na bakitingbanga du rogoho yo nga “Bape ziree.”—Matayo 4:8-11.

Si nafu kina gberãrago nga, gi gbegberẽ samungu re adigongo kina yo te. Ti regbo Noa, bete amaraika a “he gu rago i aringbisi he fu yo” dagba ga Mbori aborokporo ngbangbaturũ yo. I aye ku auru kpotosende ki di kpoto aboro kutiyo ki mere gene wasiwasi mangaapai yo, kini mbu gu gayo gene raka i aarakaha.—Yuda 6; Bambata Pai 6:1-4; 1 Petero 3:19, 20.

Ginipai namangi tipa gu gbegberẽ amaraika re? Gu regbo Mbori aye na ime akangbii tipa ka giriso kpotosende na ni, i ambu gu kpoto nga ga aboro ki satiyo berewe ni atoro. Ono tie, Mbori aaidanga ha fu gi gbegberẽ amaraika re i karaga tiyo ku rogo gayo “bambata rago” te. Kuba gure, ko aka kuti yo ku rogo “nyenye azogbo tii bitimo,” i ayambaha nga Tartarus. (Yuda 6; 2 Petero 2:4) Agi adaimona re namangasunge kutiibe Satana Bakitingbanga, “nga gbia adaimona,” nga gu ko “nambakada tiko ni maraika imarago.”—Matayo 12:24; 2 AKorindo 11:14.

Ziazia Kekeapai nayugo gupai nga gu Kindo Nga ga Masiya, nga zogarago ngbangbaturũ yo, si atona zogarago rogo gu garã nangia 1914. * Tifuo gu regbo re nibasa, i ado Satana gbiati gako adaimona ngbangbaturũ yo ki ba yo ku auru kpotosende no. Gu gbegberẽ mangaapai gbiati gu wasiwasi mangaapai nga gu du areme auru kpotosende ane nga sangbana gayo zinga gbiati gayo gbegberẽ mangaapai.—Yugoti 12:9-12.

Ono tie, wai gbegberẽ apai akio kina kumbatayo nayugo gupai nga digido gi gayo gbegberẽ apai re ima mbeda. Barambeda, i nika gbarasa gi gbegberẽ atoro re. Tifuo ga Mbori Kindo zogorago kurii paradizo kpotosende tipa agarã 1,000, gu gbegberẽ atoro re nika du na momu berewe tipa wiri guru regbo tipa ka asada aboro. Fuoho, i kini gbarasi yo nyeanye kindi.—Matayo 25:41; Yugoti 20:1-3, 7-10.

^ genewaraga 6 Tipa ka ino kura apai tipa ga Mbori Kindo, mo bi kapita 8 nga ga gu buku nga Gini Apai Nzunzu Ziazia Kekeapai Ayugoho? aDezire Yekova akusihe. Si a kina rogo gaani bangiriba nga ga Internet nga www.jw.org/zne.